"ஜிம்ல சைக்கிள் ஓட்றீங்க... ஆனா ரோட்ல ஓட்ட மாட்றீங்களே?" - அரியலூர் சகோதரர்களின் மர சைக்கிள்

சிக்னலில் நிற்கும் கார், பைக் போன்ற நூறு வாகனங்களுக்கு நடுவில் சைக்கிளில் உட்கார்ந்துகொண்டு ஒருவர் கிரீன் சிக்னலுக்காகக் காத்திருந்தால் அவரை அதிசயமாகப் பார்க்கும் நவீன உலகமிது.  நம்மிடையே நகரங்களில் மறைந்துவிட்ட, கிராமங்களில்கூட மறையும் நிலையில் உள்ள ஒரு பழக்கம் எதுவென்றால் அது 'சைக்கிள் ஓட்டுதல்'. சைக்கிள் ஸ்டாண்டுகள் பைக் ஸ்டாண்டுகளாகவும், கார் ஸ்டாண்டுகளாகவும் மாறிவிட்டன. 

 மர சைக்கிள்

சைக்கிள் ஓட்டுவதால் பணம் மிச்சமாகிறது; உடம்பு ஃபிட் ஆகிறது; சுற்றுச்சூழல் பாதுகாக்கப்படுகிறது. இப்படி எல்லா வகையிலும் நல்ல பிள்ளையாக இருக்கும் இந்த சைக்கிள்கள் முதன்முதலில் வடிவமைக்கப்பட்டது மரத்துண்டுகளால் என்றால் உங்களால் நம்ப முடிகிறதா? 17-ம் நூற்றாண்டில் 1971-ல் பிரான்ஸில் வசதியான குடும்பத்தில் பிறந்தவர் கோம்டி மீடி டீ ஷிவ்ராக். இவரது பெற்றோர்கள் கண்டிப்பானவர்கள் என்பதால், வீட்டை விட்டு வெளியே விளையாட அனுமதிக்க மாட்டார்களாம்.

காய்ந்த மரத்துண்டுகளை செதுக்கிக்கொண்டிருக்கும்போது அவரது சிந்தனையில் தோன்றிய வடிவம்தான் சைக்கிள்.  இந்த சைக்கிளை ஓட்டுபவர் இருக்கையில் உட்கார்ந்துகொண்டு காலால் உந்தித்தள்ளினால் சைக்கிளை முன்னோக்கி உருளும்படியாக இருந்தது. 'The celerifire’ என்று அழைக்கப்பட்ட இந்த வகை சைக்கிளில் திசைமாற்றியோ, மிதி இயக்கியோ (பெடல்) , தடையோ (பிரேக்)  இல்லை. இதுதான் சைக்கிள் உருவாகக் காரணமாக அமைந்தது. இதனை முன்மாதிரியாகக்கொண்டு அடுத்தடுத்த அறிஞர்கள் அவரவர் சிந்தனைப்படி சைக்கிள்களை உருவாக்கினார்கள். 1910-ம் ஆண்டு இங்கிலாந்து நாட்டில் உள்ள அஸ்டன் நகரில் ‘ஹெர்குலிஸ்’ கம்பெனி துவங்கப்பட்டது. இக்கம்பெனி துவங்கப்பட்டே பத்தே ஆண்டுகளில் உலகின் அனைத்துப் பகுதிகளிலும் உள்ள சாலைகளில் சைக்கிள் தனது டயர் சுவடுகளைப் பதிந்தது.  

     மர சைக்கிள்

ஆனால், இன்றைய நவீன காலகட்டத்தில் பழைய சைக்கிள்களை இரும்புக் கடையில் போட்டுவிட்டு உடம்பைக் குறைப்பதற்காக,  ஜிம்மில் 'சைக்கிளிங்' ஓட்டிக்கொண்டிருக்கிறோம். இந்நிலையில் சைக்கிள் ஓட்டுவது குறித்து விழிப்புஉணர்வு ஏற்படுத்துவதற்காக முழுவதும் மரத்தினாலான சைக்கிளை வடிவமைத்து ஆச்சர்யத்தை ஏற்படுத்தி வருகிறார்கள் சகோதரர்கள் மூவர். அரியலூர் மாவட்டத்தில் தயாராகி வரும் மரத்தால் ஆன சைக்கிளுக்கு அனைவரின் மத்தியிலும் ஆதரவு பெருகி வருகிறது.

பாஸ்கர்ராஜாஅரியலூர் மாவட்டம் திருமானூர் அருகே உள்ள முடிகொண்டான் கிராமத்தைச் சேர்ந்தவர்கள் பாஸ்கர், திருநாவுக்கரசு, ராஜா மூவரும். சகோதரர்களான 3 பேரும் மரத் தொழிலகம் வைத்து நடத்தி வருகின்றனர். வீட்டிற்குத் தேவையான மரச்சாமான்கள் செய்தல்,  கோயில்களில் சுவாமிகள் வீதி உலா வரும் பல்வேறு வாகனங்கள் செய்தல் எனப் பல விதங்களில் தங்களது திறமையைக் காட்டி வரும் இவர்கள், கடந்த ஒகி புயலின்போது, தங்களது பட்டறையில் மரத்தினாலான சைக்கிளைச் செய்துபார்க்க வேண்டும் என யோசனை செய்துள்ளனர்.

தொடர்ந்து, பாஸ்கர் மற்றும் ராஜா ஆகிய இருவரும் தலா ஒரு சைக்கிள் செய்யத் தொடங்கினர்.  சக்கரம், செயின், பிரேக் தவிர்த்து மீதி அனைத்தும் மரத்தால் செய்யபட்டுள்ளது. முழுக்க தேக்கு மரங்களைக் கொண்டு செய்யப்பட்ட இந்த சைக்கிள்கள் பார்ப்போரை ஓட்டிப் பார்க்கத் தூண்டுகிறது. தினமும் அவ்வழியே வருவோர் போவோர் என 10-க்கும் மேற்பட்டோர் ஓட்டிப்பார்த்துச் செல்கின்றனர். மரத்தினால் செய்யப்பட்ட மர சைக்கிளை ஓட்டிச்செல்லும்போது சாலையில் செல்லும் பலரும் கண்சிமிட்டாமல் பார்த்து வியப்படைகின்றனர்.

  தேக்கு மர சைக்கிள்

இதுகுறித்து, பாஸ்கரிடம் பேசினோம். ”நம் முன்னோர்கள் வாழ்ந்த காலத்தில் ஆரோக்கியமான உணவும், அதிகமான உடல் உழைப்பும் இருந்தது. ஆனால், இன்று அது நாளுக்குநாள் குறைந்து வருகிறது. இதற்கு மற்றொரு காரணம்கூட சொல்லலாம். நம் முன்னோர்கள் பயன்படுத்திய பழைய பொருட்கள் அனைத்தும் ஏதோ ஒரு வகையில், நம் உடலை வலிமையாக்குவதாக இருந்தது. ஆனால், இன்று அவையெல்லாம் நம் வீட்டின் பரணிலோ அல்லது ஏதோ ஒரு மூலையிலோ இருக்கின்றன. இன்னும் சிலர், அவை எதற்கு என்று பழைய இரும்புக்கடையில் போட்டுவிட்டு காலியாக வைத்துள்ளனர். அதே போல் பலரும் சைக்கிளை மறந்து மோட்டார் டூ வீலர் பக்கம் கவனத்தைத் திருப்பிவிட்டனர். அவசரத்துக்கு மோட்டார் வாகனங்கள் பயன்படுத்தினாலும், மற்ற நேரங்களில் பலரும் சைக்கிளை உபயோகப்படுத்த வேண்டும் என்ற எண்ணத்தோடு, மக்களுக்கு விழிப்புஉணர்வு ஏற்படுத்தும் விதத்தோடு இந்த மரத்தினாலான சைக்கிள்களை உருவாக்கினோம். மரத்தினால் சக்கரம் செய்தால் வேகமாகச் செல்ல முடியாது. எனவே, சில உதிரிபாகங்களை கடையில் வாங்கி உபயோகித்துள்ளோம். முன்பெல்லாம் பலரும் சைக்கிளை ஓட்டியதால் வலிமையுடன் இருந்தார்கள். ஆனால், தற்போது உடலை வலிமைப்படுத்த முற்படும் சிலரே ஜிம் சென்று ஓடாத சைக்கிளை தினமும் ஓட்டுகின்றனர்" என்றார்.

மர சைக்கிளை ஓட்டும் சிறுவர்கள்

அவரைத் தொடர்ந்து ராஜா பேசத்தொடங்கினார். ''மரத்தினால் செய்யப்பட்ட இந்த சைக்கிளை பார்க்கும் பலரும் சிறிது நேரம் ஓட்டிவிட்டுச் செல்கின்றனர். அனைத்தும் தேக்கு மரத்தால் செய்யப்பட்டதென்பதால் இதற்குச் செலவு ரூ.10 ஆயிரம் வரை ஆகிறது. சைக்கிள் முழுவதும் பாலிஷ் போட வேண்டும். தேக்கு மரத்தால் செய்யப்பட்டதால் எடை குறைவாக உள்ளது. சிறியவர்கள் முதல் பெரியவர்கள் வரை அனைவரும் ஓட்டலாம். நமது நாட்டில் அதிகமாக மோட்டார் வாகனங்களைப் பயன்படுத்துவதால் சுற்றுப்புறச் சூழ்நிலை அசுத்தமாக மாறி, நுரையீரல் தொடர்பான நோய்கள் அதிகமாகி வருகிறது. மேலை நாடுகளில் பெரிய பதவிகளில் இருப்பவர்கள்கூட சைக்கிளில் செல்வதை விரும்பும்போது, நமது நாட்டில் அது தகுதி குறைவு என்ற நிலை வந்து விட்டது" என்றார்

சாலைகளில் சைக்கிள்கள் அதிகரிக்க வேண்டிய நேரமிது!

Do you like the story?

Please Appreciate the Author by clapping!