2.5 ஏக்கர், 4 தெரு, 97 வீடு, சோலார் மின்சாரம்... ஆச்சர்யப்படுத்தும் ஒரு தீவு!

இந்தத் தீவில் மொத்தம் 4 தெருக்கள் மட்டுமே இருக்கின்றன. தீவுக்கு நடுவே ஒரு சிறிய சிலுவை நடப்பட்டுள்ளது. இறந்தவர்களைப் புதைக்க அருகிலிருக்கும் ஒரு தீவுக்குச் செல்கிறார்கள்.

2.5 ஏக்கர், 4 தெரு, 97 வீடு, சோலார் மின்சாரம்... ஆச்சர்யப்படுத்தும் ஒரு தீவு!

ற்பனையாகச் சில நிமிடங்களாவது இந்த இடத்துக்குப் போக வேண்டும் என்று தோன்றலாம். அந்த வாழ்க்கையைச் சில நிமிடங்கள் வாழவும் செய்யலாம். ஒரு விடுமுறை தினத்தின் கொண்டாட்டத்தோடு இருக்கிறது அந்தச் சிறு தீவு. பொதுவாகவே, சின்னத் தீவுகள் அப்படியான ஒன்றாகத்தான் இருக்கின்றன. குழந்தைகள் தெருக்களில் விளையாடிக்கொண்டிருக்கின்றனர். டீன் ஏஜ் வயதில் இருப்பவர்களில் சிலர், தங்களுக்கான சின்னப் படகுகளை பெரிய அலைகள் அடிக்காத அந்தக் கடலில் ஓட்டிக்கொண்டிருக்கிறார்கள். சிலர் கடலில் நீச்சலடித்துக்கொண்டிருக்கிறார்கள். சிலர், தீவுக்குள் உருவாக்கப்பட்டிருக்கும் சின்னக் குளத்தில் நீச்சலடித்துக் கொண்டிருக்கிறார்கள். அந்தக் குளத்தில் ஒரு சுறாவும், நிறைய ஆமைகளும் இருக்கின்றன. 

சாண்டா க்ரூஸ் தீவு - கொலம்பியா

பெண்கள் மாலை நேரங்களில் வீட்டு வாசல்களில் உட்கார்ந்து அரட்டையடித்துக்கொண்டிருக்கிறார்கள். ஆண்கள் மீன் பிடித்து முடித்துவிட்டு வீடு திரும்பிக்கொண்டிருக்கிறார்கள். அந்த இளைஞன்... அவன் பெயர் ஆட்ரியன். அவன் ஒரு பொடியன்கள் கூட்டத்தைக் கூட்டிக்கொண்டு தீவில் கிடக்கும் குப்பைகளை எல்லாம் எடுத்து சுத்தப்படுத்திக்கொண்டிருக்கிறான். இந்தக் காட்சிகளை எல்லாம் பார்த்தபடி ஒவ்வொரு தினமும் சுற்றுலாப் பயணிகளின் கூட்டம் நூற்றுக்கணக்கில் நகர்ந்துகொண்டிருக்கிறது. 

கொலம்பியா - சாண்டா க்ரூஸ்

இது சாண்டா க்ரூஸ் டெல் இஸ்லாடே (Santa Cruz Del Islote) தீவு. இந்தத் தீவுக்கு கொலம்பியாவின் டொலு (Tolu) நகரிலிருந்து படகில் சென்றடையலாம். உலகிலேயே அடர்த்தியான மக்கள் தொகை கொண்ட தீவு இதுதான். இந்தத் தீவின் மொத்த நிலப்பரப்பு 2.4 ஏக்கர். மொத்தம் 97 வீடுகள் இருக்கின்றன. மக்கள் தொகை தோராயமாக ஆயிரம். 

சாண்டா க்ரூஸ்

இந்தத் தீவில் வசிப்பவர்கள் பெரும்பாலும் மீன் பிடித்தொழிலையே பிரதானமாகக் கொண்டிருக்கிறார்கள். இங்கு ஓர் ஆரம்பப் பள்ளிக்கூடம் இருக்கிறது. அதைத் தாண்டி படிப்பவர்கள் தினமும் படகுகளில் பயணித்து பக்கத்திலிருக்கும் நகரத்துக்குச் சென்று படிக்கிறார்கள். 

2 மளிகைக் கடைகளும், ஒரு ரெஸ்டாரன்ட்டும் இருக்கின்றன. இங்கு நதியோ, குளமோ கிடையாது. அதேபோல், மின்சார வழித்தடங்களும் கிடையாது. அதற்கு பதிலாக, சில சோலார் பேனல்களும் ஒரு ஜெனரேட்டரும் மட்டுமே இருக்கின்றன. இவை இரண்டும் அவர்களுக்குத் தேவையான மின்சாரத்தை வழங்கிவிடுகின்றன. 

இந்தத் தீவில் மொத்தம் 4 தெருக்கள் மட்டுமே இருக்கின்றன. தீவுக்கு நடுவே ஒரு சிறிய சிலுவை நடப்பட்டுள்ளது. இறந்தவர்களைப் புதைக்க அருகிலிருக்கும் ஒரு தீவுக்குச் செல்கிறார்கள். 

படகில் பள்ளிக்குப் போகும் மாணவர்கள் - கொலம்பியா

தீவுக்குள் பைக்கோ, காரோ கிடையாது. சில சைக்கிள்கள் இருக்கின்றன. ஆனால், பெரும்பாலானோர் வீட்டில் படகுகள் இருக்கின்றன. 
கரீபியன் கடற் பகுதியில் இருக்கும் சான் பெர்னாடோ (San Bernado) தீவுக் கூட்டத்தில் ஒன்றுதான் இந்த சாண்டா க்ரூஸ். இந்தப் பகுதி முழுக்கவே வளமான பவளப்பாறைகள் நிறைந்த பகுதி. அந்தக் காலத்தில் இருந்த ராஜா குடும்பத்தைச் சேர்ந்தவர்கள் இந்தத் தீவை உருவாக்கியிருக்கலாம் என்று சொல்லப்படுகிறது. 150 ஆண்டுகளுக்கு முன்னர் வரை இந்தத் தீவீல் எந்தக் குடியிருப்புகளும் கிடையாது. ஆரம்பத்தில் மீனவர்கள் அந்தத் தீவில் அவ்வப்போது ஓய்வெடுக்கத் தொடங்கினர். பின்னர், சில மீனவக் குடும்பங்கள் அங்கு வீடுகட்டி வாழத் தொடங்கின. இதோ, இப்போது இன்னும் ஒரு வீட்டைக் கட்டிட முடியாத அளவுக்கு நெருக்கியடித்து வீடுகள் நிறைந்திருக்கின்றன. 

சாண்டா க்ரூஸ் தீவு - கொலம்பியா

சில சிக்கல்களும், வசதியின்மையும் இந்தத் தீவில் இருந்தாலும் கூட, இதில் வாழும் பெரும்பாலானவர்களுக்கு இந்தத் தீவில் வாழ்வதே பிடித்திருக்கிறது. முக்கியமான விஷயம் இங்கு காவல்நிலையமே கிடையாது. தீவிலிருக்கும் ஒவ்வொருவருக்குமே அடுத்தவரை தெரிந்திருக்கும். இதுவரை எந்தத் திருட்டோ, வன்முறையோ அந்தத் தீவில் நடந்ததே இல்லை என்கிறார்கள். 

உலகம் முழுவதுமே இப்படியிருந்தால்?

Do you like the story?

Please Appreciate the Author by clapping!