வெளியிடப்பட்ட நேரம்: 19:35 (17/07/2018)

கடைசி தொடர்பு:20:03 (17/07/2018)

24 மணி நேரத்தில் நூறு சிற்பங்கள்! - யுனிவர்சல் புக் ஆஃப் ரெக்கார்ட்ஸில் கோவை இளைஞர்

சோப்பில் 50 சிற்பம், பென்சிலில் 30 சிற்பம், சாக்பீஸில் 10 சிற்பம், காய்கறி மற்றும் பழங்களில் 10 சிற்பம் என மொத்தம் நூறு சிற்பங்களை 24 மணி நேரம் தொடர்ச்சியாக செய்து சாதனை செய்திருக்கிறார் இவர்.

24 மணி நேரத்தில் நூறு சிற்பங்கள்! - யுனிவர்சல் புக் ஆஃப் ரெக்கார்ட்ஸில் கோவை இளைஞர்

ம் கையில் ஒரு பென்சிலைக் கொடுத்தால் என்ன செய்வோம்? மனம் போன போக்கில் ஏதாவது வரைவோம். ஆனால், இந்த இளைஞரிடம் பென்சிலைக் கொடுத்தால், அதை நுனியை கண்கவரும் சிற்பமாக மாற்றி நம் கைகளில் தருவார். ஆம், கோவையைச் சேர்ந்த சவித்ருவிடம் பென்சில் மட்டுமல்ல சாக்பீஸ், மரக்கட்டை, கற்கள் என எதைக் கொடுத்தாலும் சிற்பமாக மாற்றி அசர வைக்கிறார். ஃபேஸ்புக்கில் இவரது பக்கத்தில் உள்ள பென்சில் சிற்பங்கள் எல்லாம் 'வாவ்' ரகம். சே குவாரா பிறந்த நாளுக்கு அவரின் உருவத்தை பென்சிலில் பொறித்திருக்கிறார். முக்கியமாக சதுரங்கத்தில் உள்ள 32 காய்களையும் சின்னச் சின்ன பென்சில் கிராஃபைட்டில் செதுக்கி ஒரு ரூபாய் காய்ன் அளவில் ஒரு சதுரங்க பெட்டியே செய்திருக்கிறார். 

சவித்ரு'விரல்ல இவ்ளோ வித்தை வச்சுருக்காரே' என இன்பாக்ஸில் தொடர்புகொண்டோம், ``நான் முதலில் காய்கறிகள், சோப்புலதான் சிற்பங்கள் வடிச்சுட்டு இருந்தேன். கொஞ்சம் கொஞ்சமா இந்தக் கலைல இருக்கிற நுட்பங்கள் புரிய ஆரம்பிச்சதும் சாக்பீஸ், மரக்கட்டைனு கிடைக்கற எல்ல பொருள்கள்லயும் சிற்பம் செதுக்க ஆரம்பிச்சேன். அப்புறம் வெளிநாடுகள்ல பென்சில்ல இருக்கிற கிராஃபைட்ல சிற்பம் செதுக்குறாங்கனு தெரிஞ்சுது. ஒரு சின்ன பென்சில் சிற்பத்துக்கு 40,000 ரூபாயிலிருந்து 50,000 வரை விலை போகுது அங்கெல்லாம். சரி நாம ஏன் பென்சில்ல சிற்பங்கள் செய்ய முயற்சி பண்ண கூடாதுனு ட்ரை பண்ணேன். பெரிய பொருள்கள்ல சிற்பம் செஞ்சுட்டு சின்ன பொருள்ல சிற்பம் செய்றது கொஞ்சம் கஷ்டமா தான் இருந்துச்சு! ஆனா, போகப் போக பழகி இப்போ குறைந்த நேரத்துலேயே சிற்பத்தை செஞ்சு முடிக்க கத்துக்கிட்டேன்." என்றவரிடம் சிற்பம் செய்றதுலயே ஏதாவது சாதனை செஞ்சுருக்கீங்களா என்ற கேள்விக்கு, `24 மணி நேரத்துல நூறு சிற்பம் செஞ்சு 'யுனிவர்சல் ஃபுக் ஆஃப் ரெக்கார்ட்ஸ்'ல இடம் பிடிச்சிருக்கேன்' என்றார். சோப்பில் 50 சிற்பம், பென்சிலில் 30 சிற்பம், சாக்பீஸில் 10 சிற்பம், காய்கறி மற்றும் பழங்களில் 10 சிற்பம் என மொத்தம் நூறு சிற்பங்களை 24 மணி நேரம் தொடர்ச்சியாக செய்து சாதனை பண்ணிருக்கேன்" என்றார்.

இதெல்லாம் எங்க கத்துக்கிட்டீங்க என்ற கேள்விக்கு அவர் தரும் பதில் அவரின் யுனிவர்சல் ரெக்கார்ட்டைவிட ஆச்சர்யமளிக்கிறது. ``யாரிடமும் இல்ல, நானே சுயமா கத்துக்கிட்டது இது எல்லாமே" என்கிறார் கூலாக! இவ்வளவு சிற்பங்கள் செய்து அசத்தும் இவர் படித்தது பி.டெக் ஃபேஷன் டெக்னாலஜி. 

சிற்பங்கள்   

எல்லா இன்ஜினீயர்களும் கடந்துபோகும் அதே அனுபவத்தை ஃபேஷன் டெக்னாலஜி படித்த இவரும் கடந்து வந்திருக்கிறார். ``படிச்சு முடிச்சிட்டு சிற்பம் செய்யலாம்னு வீட்ல ஏதாவது செஞ்சிட்டு இருப்பேன். கொஞ்ச நாள் பார்த்தாங்க. அப்புறம் திட்ட ஆரம்பிச்சுட்டாங்க 'இது வேண்டாத வேலை! தேவை இல்லாம எதுக்கு இதெல்லாம் பண்ற'னு. அப்புறம் வீட்டை விட்டு வந்து சொந்த ஊர்லயே தனியா இருந்தேன். ஒரு வருஷம் வேற எதுலயுமே கவனம் செலுத்தாம இதுல மட்டுமே கவனமா இருந்தேன், அதுக்கு நல்ல பலன் கிடைச்சிருக்கு. அந்த 24 மணி நேரத்துல 100 சிற்பம்னு சாதனை பண்ணதுக்கு அப்புறம்தான் வீட்டுக்குப் போனேன். சரி இவனுக்குள்ளையும் ஏதோ இருக்கு, நல்லா வந்துருவான்னு அவங்களுக்கும் ஒரு சின்ன நம்பிக்கை வந்திருக்கு. இப்போ இதையே கமர்ஷியலா கொண்டு போலாம்னு இருக்கேன்" என்றார். 

சிற்பங்கள் செய்வது மட்டுமின்றி, பென்சில் கிராஃபைட்டில் திருக்குறள்கள் எழுதியும் அசர வைக்கிறார். நேரம் கிடைக்கும்போது அவரின் ஃபேஸ்புக் பக்கத்துக்கு ஒரு ரவுண்டு வாருங்கள்! இப்போது லைக்குகள்தானே அவர்களுக்குக் கிடைக்கும் முதல் அங்கீகாரம்.  


டிரெண்டிங் @ விகடன்