வெளியிடப்பட்ட நேரம்: 11:25 (02/08/2018)

கடைசி தொடர்பு:11:25 (02/08/2018)

``4 ஆண்டுகள், 60 நாடுகள், 500 கண்கள்!”- இந்த இன்ஸ்டாகிராம் பக்கத்தை மிஸ் பண்ணாதிங்க

``4 ஆண்டுகள், 60 நாடுகள், 500 கண்கள்!”- இந்த இன்ஸ்டாகிராம் பக்கத்தை மிஸ் பண்ணாதிங்க

ஒரு நாளைக்கு எத்தனை முகங்களை, அதன் கண்களை நாம் கடந்து செல்கிறோம்? கிண்டி ரயில் நிலைய வாசலில் யாசகம் கேட்டு நிற்கும் பாட்டியின் கண்களில் ஆரம்பித்து, ஐடி கார்ட் மாட்டியிருக்கும் ஐ.டி பெண்கள் வரை ஒரு நாளைக்குக் குறைந்தது பத்துக் கண்களையாவது நான் கடந்துகொண்டிருக்கிறேன். ஐந்து ரூபாய் டிக்கெட்டிற்கு நூறு ரூபாய் கொடுத்ததும் எழுத முடியாத வார்த்தைகளில் திட்டி, என்னைப் பேருந்திலிருந்து இறங்கச் சொன்ன நடத்துநரிடம் எனக்காக ஐந்து ரூபாய் கொடுத்த பெயர் தெரியாத அந்த அக்காவின் பார்வையை என்னால் மறக்கவே முடியாது. வலி, துக்கம், சந்தோஷம், காதல், பரிதவிப்பு, வெற்றி எனச் சொல்லாத கதைகளையெல்லாம் அவர்களுடைய கண்கள் சொல்லிவிடும். பொதுவாகவே கண்கள் எப்போதும் எதையாவது தேடிக்கொண்டேயிருக்கும். அப்படி ஏதோ ஒன்றைத் தேடிக்கொண்டிருக்கிற பெண்களின் கண்களைப் புகைப்படம் எடுக்கவும், அதற்குள் ஒளிந்திருக்கும் கதைகளை தேடியும் உலகம் முழுமைக்கும் பயணித்த ஒரு பெண் முகத்தைப் பற்றிய கதை இது. 

நோரோக்

அவள் பெயர் அனியா. 26 ஆண்டுகளுக்கு முன்னர் போலந்து நாட்டின் ஒரு மகப்பேறு மருத்துவமனையில் பிறந்தவள். பிறக்கும் பொழுதே வலது காலை இழந்து பிறந்திருந்தாள். கால் இல்லாமல் பிறந்த அனியாவை அவருடைய தாயார் மகப்பேறு மருத்துவமனையிலேயே விட்டு விட்டுச் சென்றுவிடுகிறார். தாய் திரும்பி வருவாள் என்கிற நம்பிக்கையில் மருத்துவமனை ஊழியர்கள் அனியாவைப் பராமரிக்கிறார்கள். ஆனால், அனியாவுடைய தாய் திரும்பி வரவே இல்லை.சில நாள்களுக்குப் பிறகு அனியாவை மருத்துவமனை நிர்வாகம் ஆதரவற்றோர் இல்லத்தில் சேர்த்து விடுகிறார்கள். அங்கு அனியா வளர ஆரம்பிக்கிறாள். அனியா பிறந்து 19 மாதங்கள் கழித்து பெல்ஜியத்தைச் சேர்ந்த ஒரு தம்பதியினர் தத்து எடுத்துக்கொள்கிறார்கள். அனியா போல பல குழந்தைகளை அவர்கள் தத்தெடுத்திருந்தனர். பெல்ஜியத்தில் இயற்கைச் சூழ்நிலையில் அனியா வளர்கிறாள். 

அவளோடு சேர்ந்து ஒரு கனவும் வளர ஆரம்பித்தது. செயற்கைக் காலைப் பொருத்திக்கொண்டு தினமும் கனவில் ஓட ஆரம்பித்தாள். அவளுடைய கனவு பாரா ஒலிம்பிக்கில் பங்கேற்று பதக்கம் வெல்வதாக இருந்தது. அனியாவின் கால்களும், கண்களும் அதற்காக உழைக்க ஆரம்பித்தன. பதக்கம் வெல்வது மட்டுமே அனியாவின் கனவல்ல, அதையும் தாண்டிய ஒரு காரணம் இருந்தது. பாரா ஒலிம்பிக்கில் பதக்கம் பெற்றால் உலகம் முழுமைக்கும் இருக்கிற ஊடகங்கள் அனியாவின் முகத்தை உலகத்திற்குக் காட்டும். அதன் மூலம் பிறந்தவுடன் விட்டு விட்டுப் போன அம்மாவை எளிதாகக் கண்டுபிடித்து விடலாம் என அனியா கனவு காண ஆரம்பித்தாள். அனியாவின் கனவின் கிளைமாக்ஸ் உணர்வுபூர்வமாக இருந்தது. கண்டுபிடித்த அம்மாவைப் பார்த்து ``நீங்க என்னை விட்டு விட்டுப் போனதில் எனக்கு கோபம் எதுவும் இல்லை” எனச் சொல்ல  வேண்டும் என்பதுதான் அனியாவின் கனவாக இருந்தது. அது மட்டுமே அனியாவின் கண்களிலும் இருக்கிறது. அனியாவின் கனவும், அந்தக் கண்களும் இடம்பெற்றிருக்கிற புத்தகத்தின் பெயர் ``அட்லஸ் ஆப் பியூட்டி”. அட்லஸ் ஆப் புயூட்டி” புத்தகத்தை எழுதியவர் நோரோக் ( Mihaela Noroc) என்கிற 33 வயது ரோமானிய பெண். இவர்தான் இந்தக் கதையின் நாயகி.

அனியா

உலகம் முழுவதும் 60 நாடுகளுக்கும் மேலாகப் பயணித்து 500 பெண்களைச் சந்தித்து அவர்களுடைய கதைகளை புத்தகத்தைப் படங்களுடன் வெளியிட்டிருக்கிறார். புத்தகத்தில் 500 பெண்களின் புகைப்படங்கள் இடம்பெற்றிருக்கின்றன. ஒவ்வொரு படத்திற்காகவும் நான்கு ஆண்டுகள் பயணித்திருக்கிறார். அகதி முகாம்கள், வீதிகள், வீடுகள், அமேசான் காடுகள், விலை நிலங்கள், நாடுகளின் எல்லைகள், பழங்குடி கிராமங்கள் என அவர் பயணித்து எடுத்திருக்கிற ஒவ்வொரு பெண்களின் கண்களும் ஒரு கதை சொல்கின்றன. 16 வயதாக இருக்கும் பொழுது நோரோக் கேமராவை கையில் எடுத்திருக்கிறார். அப்போது அவருக்கு மாடலாக இருந்தது அவருடைய அம்மாவும், தங்கையும்தான். அதன் பிறகு புகைப்படம் தொடர்பான கல்லூரியில் சேர்ந்து புகைப்படம் குறித்து படிக்க ஆரம்பித்தார். 2000 ஆண்டு டிஜிட்டல் உலகின் வளர்ச்சி காலம் என்பதால் புகைப்படம் குறித்துப் படித்தவர்கள், படிக்காதவர்கள் என எல்லோருமே கேமரா வாங்கி புகைப்படம் எடுக்க ஆரம்பித்தனர். பத்தோடு பதினொன்றாகப் புகைப்படத் துறையில் இருக்க நோரோவுக்கு விருப்பமில்லாமல் போகவே படிப்பைப் பாதியில் விட்டு விட்டு வேறு ஒரு வேலைக்குச் சென்று விடுகிறார். அதன் பிறகு பெரிதாக கேமராவுடன் ஈர்ப்பு இல்லாமல் இருந்த நோரோக் வேறு வேலைகளுக்குச் சென்றுவிட்டார். ஆனால், எந்த வேலையிலும் அவரது மனம் ஈடுபாடாக இல்லை. 27 வயதில் 2013 ம் ஆண்டு எத்தியோப்பியாவுக்குச் சென்ற நோரோக் அங்கிருந்த பல பெண்களைப் புகைப்படம் எடுத்திருக்கிறார். அதில் ஒரு புகைப்படம்தான் நோரோகின் வாழ்க்கையை மாற்றியிருக்கிறது. அப்போது தன்னுடைய வேலையை உதறிவிட்டு ரோமானியாவில் உள்ள பெண்களின் பன்முகத்தன்மையையும் அவர்களின் முகங்களையும் புகைப்படம் எடுக்க ஆரம்பித்தார். இங்கிருந்துதான் அட்லஸ் ஆப் பியூட்டியின் பயணம் தொடங்கியது. இந்தப் பயணத்தின் முக்கிய தருணங்களை இந்த இன்ஸ்டாகிராம் அக்கவுன்ட்டில் பதிவு செய்து வருகிறார் நோரோக்

வாரணாசியில் எடுத்த புகைப்படம்

பயணம்  குறித்து ஒரு பத்திரிகைக்கு அவர் அளித்த பேட்டியில் ``திடீரென ஒரு பெண்ணைப் பார்த்தவுடன் புகைப்படம் எடுத்து விட இயலாது. அதில் மிகப் பெரிய சவால் இருக்கிறது. உயிர்ப்போடு இருக்கிற ஒரு புகைப்படத்தை எடுக்க வேண்டுமானால் அவர்களோடு பயணித்தாக வேண்டும். எதேச்சையாக எந்த ஒரு பெண்ணையும் புகைப்படமாக எடுத்துவிடலாம். கேமராவை நேருக்கு நேர் பார்க்கும் பொழுது மனித உணர்வுகளை அப்படியே கொண்டு வர வேண்டுமானால் அதற்கு அசாத்திய பொறுமையும் திறமையும் வேண்டும். 
ஒவ்வொரு நாட்டிலுள்ள பெண்களும் வெவ்வேறு இனம், கலாசாரம், மொழியைக் கொண்டவர்கள் அவர்களோடு பயணித்தது உண்மையில் சவாலாக இருந்தது. பல நாடுகளில் மொழி தெரியாமல், என்னுடைய உடல் மொழியைப் பயன்படுத்தி மட்டுமே புகைப்படங்களை எடுத்திருக்கிறேன். அழகு எல்லை இல்லாதது. அது பணம், அந்தஸ்து, இனம், அழகுச் சாதனப் பொருள் சார்ந்தது அல்ல” என்கிறார்.

அழகு என்பது நாம் நாமாக இருப்பதுதான் என்பதை நோரோக் அடிக்கடி குறிப்பிடுகிறார். 60 நாடுகளுக்கும் மேலாகப் பயணித்து அவர் உருவாக்கிய அட்லஸ் ஆப் ப்யூட்டி புத்தகத்தின் அட்டைப் படத்தில் இருப்பது ஓர் இந்தியப் பெண். வாரணாசியில் கங்கை நதியின் கரையில் அந்தப் படத்தை எடுத்திருக்கிறார். ராஜஸ்தானில் தூசி நிறைந்த பாலைவனத்திலிருந்து, மும்பையின் வீதிகளில், கங்கை ஆற்றின் கரையிலும் பல பெண்களை சந்தித்துப் புகைப்படம் எடுத்திருக்கிறார். இந்தியா குறித்து அவர் கூறும் போது ``இந்தியாவில் வாழும் பல பெண்கள் பெரும் சவால்கள் மற்றும் பாகுபாடுகளை எதிர்கொள்கின்றனர். ஆனால், இந்தியப் பெண்கள் பலத்திலும், அழகிலும் அசாதாரண உதாரணமாக இருக்கிறார்கள். இந்தியப் பெண்களின் கண்களிலும் அவர்களின் ஆன்மாவிலும் ஓர் அரவணைப்பு இருப்பதை உணர்ந்திருக்கிறேன்”  என்கிறார். 

தோளில் ஒரு பை, அதில் சில அத்தியாவசியப் பொருள்கள் ஒரு கேமரா எடுத்துக்கொண்டு உலகம் சுற்றி வரும் நோரோக் தேடிக் கொண்டிருப்பது உயிர்ப்புள்ள கண்களையும் அர்த்தமுள்ள கதைகளையும்தாம். பெண்கள் மகத்தானவர்கள் பன்முகத் தன்மை கொண்டவர்கள் என்பதை மீண்டும் உலகுக்குச் சொல்ல இந்த வருட செப்டம்பர் மாதம் அவருடைய ``அட்லஸ் ஆப் ப்யூட்டி” இரண்டாவது  புத்தகம் வெளியாக இருக்கிறது.

உலகின் அற்புதமான பெண்களையும், கண்களையும் காட்டுவதற்கு காலம் காத்திருக்கிறது….