வெளியிடப்பட்ட நேரம்: 11:10 (30/08/2018)

கடைசி தொடர்பு:11:10 (30/08/2018)

அவசரக்கால நிதி சேமிப்பு... எப்படி, எவ்வளவு சேமிக்கலாம்? 

நீங்கள் உட்பட உங்கள் குடும்பத்தில் உள்ள அனைவருமே, தங்கள் பாக்கெட்டுகளில் அன்றாடம் மிஞ்சும் 5,10, 20,50, என எவ்வளவு ரூபாயாக இருந்தாலும் அதனை வீட்டில் ஓர் உண்டியலில் சேர்த்து வந்தால், அதுகூட அவசரக்கால நிதி சேமிப்புக்கான மாதத் தவணைக்கு உதவும்.

வசரக்கால நிதித் தேவைகள், யாரிடமும் சொல்லிக்கொண்டு வருவதில்லை. எதிர்பாராமல் ஏற்படக்கூடிய எந்த ஒரு நிகழ்வையும் சமாளிக்க, அவசரக்கால நிதி சேமிப்பு அவசியம். செய்துகொண்டிருக்கும் வேலையை திடீரென இழக்கும் சூழல் ஏற்பட்டாலோ, பணிபுரியும் நிறுவனம் மூடப்பட்டாலோ, அடுத்த வேலையில் சேர்ந்து வருவாய் ஈட்டும் வரை குடும்பச் செலவுக்குத் திண்டாடாமல் இருக்க அல்லது குடும்பத்தினர் யாருக்காவது அவசர மருத்துவச் சிகிச்சை செய்யும் சூழல் ஏற்பட்டாலோ... எந்த ஒரு நிகழ்வையும் எளிதாகச் சமாளிக்க அவசரக்கால நிதி அவசியம்.

சேமிப்பு

அவசரக்கால நிதி குறைந்தபட்சம் எவ்வளவு இருக்க வேண்டும்?

பொதுவாக, மாதக் குடும்பச் செலவைப்போல சுமார் 3 முதல் 6 மடங்கு நிதியை அவசரக்கால நிதியாக வைத்திருப்பது நல்லது. இதற்குக் குறைவு என்றால், அவசரச் செலவு ஏற்படும்போது சமாளிப்பது கடினம். உதாரணத்துக்கு, ஒரு குடும்பத்தின் மாதச் செலவு 30,000 என்றால், அவர் குறைந்தபட்சம் ரூபாய் 90,000 முதல் அதிகபட்சம் ரூபாய் 1,80,000 வரை அவசரக்கால நிதியாக வைத்திருக்க வேண்டும். இதை ஒரே நாளில் உருவாக்குவது சிரமமான காரியம். இதற்கான தொகையை இத்தனை மாதம் அல்லது ஆண்டில் சேர்க்க வேண்டும் என இலக்கு நிர்ணயித்து, அதற்கு ஏற்ப சேமிக்கலாம்.

இதுவரை சேமிக்காமல் இருந்தால், இனிமேல் மாதாந்திர பட்ஜெட் போடும்போது உங்களது முதல் சேமிப்பு அவசரக்கால நிதியைச் சேர்ப்பதாக இருக்கட்டும். 

அவசரக்கால நிதியை எப்படி உருவாக்க வேண்டும்?

1) மாதச் சேமிப்பு

முதலில், எவ்வளவு தொகை அவசரக்கால நிதியாக இருக்க வேண்டும் என்பதை முடிவுசெய்யவும். பிறகு, அதற்கேற்ப மாதாமாதம் எவ்வளவு சேமிக்க முடியும் என்பதைத் தீர்மானித்து, சேமிப்பைத் தொடங்க வேண்டும். மாத பட்ஜெட்டில் குறைக்கக்கூடிய செலவுகளைக் குறைத்துக்கொண்டு, சேமிப்பை அதிகப்படுத்தி எவ்வளவு விரைவாக முடியுமோ அவ்வளவு விரைவாக அவசரக்கால நிதியை உருவாக்கிக்கொள்வது நல்லது. மாதச் சம்பளத்தில் சுமார் 25 சதவிகிதத் தொகையை அவசரச் செலவு தொகுப்பு நிதிக்கு ஒதுக்கலாம். இதைவிட அதிகமாகச் சேர்க்க முடிந்தாலும் நல்லது.

2) வீணாகும் பணத்தைப் பயன்படுத்துங்கள்

நம் வீட்டில் பயன்படுத்தப்படும் ஒவ்வொரு பொருளிலும் குறைந்தது  10 சதவிகிதமாவது வீணாவதை நாம் உன்னிப்பாகக் கவனித்தால் புரிந்துகொள்ளலாம். சாப்பாட்டை வீணடிப்பது, யாரும் பயன்படுத்தாத அறையில் மின்விளக்கை எரியவிடுவது, மின்விசிறி மற்றும் ஏ.சி போன்றவற்றை ஓடவிடுவது, தண்ணீர்த் தொட்டியில் நீர் நிரப்புவதற்காக மின்மோட்டாரை இயக்கிவிட்டு, அதில் கவனம் இல்லாமல் வேறு வேலையைப் பார்த்துக்கொண்டிருக்கும்போது தொட்டி நிரம்பிய பிறகும் அநாவசியமாக மின் மோட்டார் இயங்கிக்கொண்டிருப்பது போன்ற கவனக்குறைவு அல்லது அலட்சியங்களைத் தவிர்த்தாலே, மின்கட்டணத்தை மிச்சப்படுத்தலாம். இதுபோன்று நமது கவனக்குறைவால் வீணாகும் ஒவ்வொரு செலவையும் கட்டுப்படுத்தி, அதில் மிச்சமாகும் பணத்தைக்கொண்டும் அவசரக்கால நிதியை உருவாக்கலாம்.

3) ஆட்டோமேஷன் ஆக்குங்கள்

அவசரக்கால நிதிக்கான சேமிப்பை, முடிந்தால் மாதாமாதம் வங்கியிலேயே பிடித்தம் செய்யும் ஆட்டோமேஷன் முறையில் சேமியுங்கள். இப்படிச் செய்வதால், ஒவ்வொரு மாதமும் அவசரக்கால நிதி சேமிப்பு குறித்து நீங்கள் நினைவில்கொண்டிருக்க தேவையில்லை.

4) மிஞ்சும் சில்லறையையும் சேமிக்கலாம்

நீங்கள் உள்பட உங்கள் குடும்பத்தில் உள்ள அனைவருமே, தங்கள் பாக்கெட்டுகளில் அன்றாடம் மிஞ்சும் 5, 10, 20, 50 என எவ்வளவு ரூபாயாக இருந்தாலும் அதை வீட்டில்  சேர்த்துவந்தால், அதுகூட அவசரக்கால நிதி சேமிப்புக்கான மாதத் தவணைக்கு உதவும்.

சேமிப்பு

5) உடனடியாகப் பணமாக்கும் வகையில் சேமியுங்கள்

ஆர்.டி போட்டு வரலாம். மியூச்சுவல் ஃபண்ட் திட்டத்தில் ரிஸ்க் இல்லா லிக்விட் ஃபண்டிலும் முதலீடு செய்து வரலாம். அவசரக்கால நிதியை முதலீடு செய்யும்போது, மூலதனத்துக்கு இழப்பு வரக் கூடாது. அந்தத் தொகையை முதலீடு செய்யவோ அல்லது அவசரத்தேவைக்கு எடுக்கும்போதோ, எந்தக் கட்டணமும் இருக்கக் கூடாது. அவசரக்கால நிதித்தொகை மொத்தமாகச் சேர்ந்தவுடன், அதில் 20 சதவிகிதத் தொகையை வங்கிச் சேமிப்புக்கணக்கு, மீதியை ஃபிக்ஸட் டெபாசிட் அல்லது மியூச்சுவல் ஃபண்ட்களில் முதலீடு செய்துவைக்க வேண்டும். இதில் 5 சதவிகிதம் முன் பின் இருக்கலாம். அப்போதுதான் இந்த அவசரக்கால நிதி மூலமும் வருமானத்தை ஈட்ட முடியும்.

அவசரக்கால நிதியிலிருந்து ஏதாவது தொகையை எடுத்துச் செலவு செய்தால், மீண்டும் அதை அதே அளவில் பராமரிப்பது அவசியம். அவசரக்கால நிதியை, கணவன்-மனைவி இணைந்து ஜாயின்ட் கணக்கில் வைத்துக்கொள்வது நல்லது. ஒருவருக்கு சிக்கல் எனில், மற்றவர் சிரமம் இல்லாமல் பணத்தை எடுத்துச் செலவு செய்ய முடியும்.

உங்கள் வீட்டின் அவசரக்கால நிதிக்கான சேமிப்பை, அடுத்த மாதம் முதல் ஆரம்பித்துவிடலாம்தானே!

நீங்க எப்படி பீல் பண்றீங்க


டிரெண்டிங் @ விகடன்