வெளியிடப்பட்ட நேரம்: 09:57 (14/09/2018)

கடைசி தொடர்பு:11:44 (14/09/2018)

உங்களுடைய பாடி ஷேப்புக்கு எப்படி ஆடை அணிய வேண்டும்? ஸ்டைலிஸ்ட் டிப்ஸ்

என் உடல்வாகுக்கு செட் ஆகுமா, அப்படியானதை எப்படித் தேர்வுசெய்வது, செட் ஆகவில்லையெனில், அதை நமக்கேற்ப மாற்றிக்கொள்வது எப்படி?

உங்களுடைய பாடி ஷேப்புக்கு எப்படி ஆடை அணிய வேண்டும்? ஸ்டைலிஸ்ட் டிப்ஸ்

லெஹெங்கா, ஸ்ரக், பிளேசர், லாங் டாப், ஜீன்ஸ் அண்டு டி-ஷர்ட் என டிரெண்டுகளும் ஃபேஷன் அப்டேட்களும் மாறிக்கொண்டே வருகின்றன. விஷேச வீடுகளுக்கு கிராண்டான காஸ்டியூம்ஸ், அலுவலகத்துக்கு சிம்பிள் அண்டு நீட் லுக், அவுட்டிங்குக்கு டிரெண்டி என ஒவ்வொன்றுக்கும் பொருத்தமான ஆடையைத் தேர்வுசெய்து அணிந்து அசத்துகிறார்கள் இன்றைய தலைமுறைப் பெண்கள். `ஃபேஷனில் அப்டேட் ஆகும் ஒரு டிரெண்ட், என் உடல்வாகுக்கு செட் ஆகுமா, அப்படியானதை எப்படித் தேர்வுசெய்வது, செட் ஆகவில்லையெனில், அதை நமக்கேற்ப மாற்றிக்கொள்வது எப்படி, இதுகுறித்துப் பேசுகிறார், சென்னையைச் சேர்ந்த ஸ்டைலிஸ்ட் சண்முகப் பிரியா.ஸ்டைலிஸ்ட் சண்முகப் பிரியா

``பொதுவாக ஒரு டிரெண்ட் நம் உடலமைப்புக்கு செட் ஆகிவிட்டது எனில், அந்த டிரெண்டிலிருந்து இன்னொரு டிரெண்டுக்கு மாறுவது கொஞ்சம் சிரமமாகவே இருக்கும். ஆனால், அடுத்தடுத்து டிரெண்டியாக வலம்வர சில மாறுதல்களைச் செய்துகொள்ளத்தான் வேண்டும். பொதுவாக, பெண்களின் உடலமைப்பை ஐந்து வடிவங்களில் குறிப்பிடுவார்கள். செவ்வக உடலைப்பு, தலைகீழ் முக்கோண உடலமைப்பு, ஆப்பிள் அல்லது வட்ட உடலமைப்பு, முக்கோண உடலமைப்பு, உடுக்கை வடிவ உடலமைப்பு எனச் சொல்லலாம். இதில், உங்களின் உடலமைப்பு எது எனத் தெரிந்து அதற்கேற்ப அப்டேட் செய்துகொள்ளுங்கள்.

தலைகீழ் முக்கோண உடலமைப்பு:

உடலின் மேல் பகுதி அகலமாகவும், கீழ்ப் பகுதி சதை குறைந்து ஒடுக்கமாகவும் இருக்கும். இவ்வகையான உடலமைப்புப் பெண்களுக்கு, மாடர்ன் உடைகளைவிட பாரம்பர்ய ஓப்பன் லெஸ் டாப்ஸ் அனார்கலி ஆடைகள் பொருத்தமாக இருக்கும். துப்பட்டாவை சிங்கிள் ஃப்ளீட்டில் பின் செய்துகொண்டால், மாஸ் லுக்கில் கலக்கலாம். அனார்கலி ஆடைகள் அணிந்து அலுவலகம் செல்லும்போது, அதிகப்படியான நகைகளைத் தவிர்த்து இயரிங்ஸ் மட்டும் அணிந்தால் நீட்டாக இருக்கும். ஹாஃப் ஸ்லீவ் உங்களுக்குப் பொருத்தமான தேர்வு. ஸ்லிம் ஃபிட், பென்சில் கட் பேன்ட் வகைகளைத் தவிர்ப்பது நல்லது.

முக்கோண வடிவ உடலமைப்பு:

உடலின் மேல் பகுதி குறுகியும், கீழ்ப் பகுதி அகலமாகவும் இருக்கும் பெண்கள், குர்தி அணிந்து அதற்கு கான்ட்ராஸ்டான நிறத்தில் ஸ்ரக் மற்றும் லெகின்ஸ் அணிந்தால், ஸ்மார்ட்டாக இருக்கும். அணிகலன்கள் அணிய விருப்பம் உள்ளவர்கள், ஆக்ஸிடைஸ்டு நகைகளைத் தேர்வுசெய்து ஷார்ட்டாக அணிந்துகொள்ளலாம். மேல் பகுதி குறுகலாக இருப்பதால் V நெக் பேட்டர்னை தேர்வுசெய்து, பேட்டட் குர்தி அணியும்போது,  உங்கள் மைனஸும் பிளஸாக மாறிவிடும். ஷார்ட் குர்தாக்களைத் தவிர்ப்பது நல்லது. ஓவர் கோட்கள் அணிந்தால், ஜீனியஸ் லுக்கில் கலக்கலாம்.

செவ்வக வடிவ உடலமைப்பு:

ஆடை

உடலின் மேல் பகுதியும், கீழ்ப் பகுதியும் சமமாக இருந்தால், அதற்குச் செவ்வக வடிவ உடலமைப்பு என்று பெயர். இவ்வகை உடலமைப்பு பெண்கள், வி-நெக், போட் நெக் போன்ற வடிவங்கள்கொண்ட குர்தி, லெகின்ஸ், லாங் டாப் போன்றவற்றைத் தேர்வுசெய்யலாம். க்ளோஸ் நெக் வேண்டாம். சிம்பிளான அணிகலன்களைத் தேர்வுசெய்து அணிந்தால், டிரெண்டியாக இருக்கும். எல்போ ஸ்லீவ் மற்றும் .ஃபுல் ஸ்லீவ் தவிர்ப்பது நல்லது.

உடுக்கை வடிவ உடலமைப்பு :

ஃபேஷன்

உடுக்கை வடிவ உடலமைப்பு பெண்கள், ரொம்பவே ஸ்பெஷல். இவர்களின் உடலமைப்பு மிக அழகானது என்பதால், எல்லா வகையான ஆடைகளும் மாஸ் லுக்கில் இருக்கும். ஆடைகளுக்குத் தகுந்தாற்போல அணிகலன்களைத் தேர்வுசெய்து அணிந்தால் தேவதையாக ஜொலிக்கலாம்.

ஆப்பிள் வடிவ உடலமைப்பு:

ஆடை

கழுத்துப் பகுதியிலிருந்து உடலின் கீழ்ப் பகுதி வரை ஒரே மாதிரியான உடலமைப்பை, ஆப்பிள் வடிவ உடலமைப்பு என்பர். இவர்கள், ஜீன்ஸ், டி-ஷர்ட் போன்றவற்றைத் தவிர்த்து, இடுப்புக்குக் கீழ் ஃப்ளோயியான ஆடைகளை அணியலாம். வெஸ்டர்ன் ஆடைகள் அணிய விரும்பினால், பாடி ஷூட் அணிந்து, அதன்மீது ஆடை அணிவது அவசியம்.

 

 


டிரெண்டிங் @ விகடன்