Published:Updated:

“எந்த வடிவத்தில் வந்தாலும் எதிர்கொள்ள முடியும்!”

ஒட்டுமொத்த விகடனுக்கும் ஒரே ஷார்ட்கட்

Use App
“எந்த வடிவத்தில் வந்தாலும் எதிர்கொள்ள முடியும்!”
“எந்த வடிவத்தில் வந்தாலும் எதிர்கொள்ள முடியும்!”

வெ.நீலகண்டன், படம்: ரா.ராம்குமார்

பிரீமியம் ஸ்டோரி

டந்த ஆண்டு மிகப்பெரிய சர்ச்சையாக வெடித்த `நீட்’ விவகாரம் இந்த ஆண்டு சத்தமேயில்லாமல் தேர்வு நாளை நெருங்கிக்கொண்டிருக்கிறது. மே 6 இந்தியா முழுக்க நீட் தேர்வுகள் நடத்தப்படவிருக்கின்றன.

``மாநிலப் பாடத்திட்டத்தில் படிக்கும் மாணவர்களுக்கு, சி.பி.எஸ்.சி பாடத்திட்டத்தின் அடிப்படையில் தயாரித்த வினாப் புத்தகங்களைக் கொடுக்கிறார்கள். இரண்டாண்டுகள் மாநிலப் பாடத்திட்டப் புத்தகங்களைப் படித்த மாணவர்களுக்கு, குறைந்த அவகாசத்தில் சி.பி.எஸ்.சி  பாடங்களைப் படிப்பது மிரட்சியைத்தான் ஏற்படுத்தும். ஆனால் பயப்படவேண்டாம். ப்ளஸ் டூ தேர்வைப்போல, நீட் தேர்வும் ஒரு சாதாரணத் தேர்வுதான். ப்ளஸ் டூ தேர்விலாவது, பதில்களைப்  பக்கம் பக்கமாக எழுத வேண்டும். நீட் தேர்வில் கண்முன்னால் நான்கு வினாக்கள் இருக்கும். அவற்றில் சரியான விடையைத் தேர்வுசெய்து, டிக் செய்தால் போதும். ப்ளஸ் ஒன், ப்ளஸ் டூ பாட நூல்களைத் தாண்டி ஒரு கேள்விகூட வரப்போவதில்லை. இதுவரை வந்ததுமில்லை” என்கிறார் கல்வியாளர் நெடுஞ்செழியன்.

“எந்த வடிவத்தில் வந்தாலும் எதிர்கொள்ள முடியும்!”

104 நகரங்கள்... 2,200 மையங்கள்

சென்னை, கோயம்புத்தூர், மதுரை, சேலம், திருச்சி, நாமக்கல், திருநெல்வேலி, வேலூர் உட்பட இந்தியா முழுவதும் 104 நகரங்களில் 2,200 மையங்களில் நீட் தேர்வு நடைபெறவிருக்கிறது. தமிழ், ஆங்கிலம், இந்தி, தெலுங்கு, கன்னடம், குஜராத்தி உள்ளிட்ட 10 மொழிகளில் தேர்வு எழுதலாம்.

நீட் தேர்வுக்கான தேர்வுக் கட்டணம் 1,400 ரூபாய். பட்டியல் இனத்தவர்களுக்கு 750 ரூபாய். நீட் என்பது மூன்று மணி நேரத் தேர்வு. நான்கு விடைகளில் ஒன்றைத் தேர்வு செய்யும் வகையில் கேள்விகள் கேட்கப்படும். இயற்பியல், வேதியியல், விலங்கியல், தாவரவியலில் தலா 45 கேள்விகள் கேட்கப்படும்.  ஒரு சரியான  விடைக்கு 4 மதிப்பெண்கள் வழங்கப்படும். ஒரு தவறான விடைக்கு 1 மதிப்பெண் கழிக்கப்படும். விடையளிக்காவிட்டால் மதிப்பெண் கிடைக்காது; கழியாது. மொத்தம் 720 மதிப்பெண்.

தேர்ச்சி மதிப்பெண் என்பது ஒவ்வோர் ஆண்டும்  வேறுபடும். 2016-ம் ஆண்டில் 685 முதல் 145 மதிப்பெண் பெற்றவர்கள் வரை எம்.பி.பி.எஸ் சேர முடிந்தது. கடந்தாண்டு, 697 முதல் 131 வரை மதிப்பெண் பெற்றவர்களுக்கு இடம் கிடைத்தது. 

“எந்த வடிவத்தில் வந்தாலும் எதிர்கொள்ள முடியும்!”

நீட் தேர்வுக்குத் தயாராவது எப்படி?

“மார்ச் முதல் வாரத்தில் ப்ளஸ் டூ பொதுத்தேர்வு தொடங்கும்.   நீட் தேர்வுக்குத் தயாராக  அதிகபட்சம் 45 நாள்கள் கிடைக்கும். இந்தக் காலகட்டத்தை சரிவரப் பயன்படுத்தினாலே தேர்வில் நல்ல மதிப்பெண்கள் பெற்றுத் தேர்ச்சி பெற்றுவிட முடியும்’’ என்கிறார் நீட் தேர்வுப் பயிற்சியாளரும் இயற்பியல் துறைப்  பேராசிரியருமான கு.ரவிக்குமார்.

``சி.பி.எஸ்.சி இணையதளத்தில் (http://cbseneet.nic.in/cbseneet/Welcome.aspx) நீட் தேர்வுக்கான பாடங்கள் வெளியிடப்பட்டுள்ளன. மாணவர்கள் தங்கள் பாடப் புத்தகங்களில் குறித்து வைத்துக்கொண்டு, அவற்றை மட்டும் படித்தால் போதும்.  ஆனால், புரிந்துகொண்டு படிக்க வேண்டும்.  சி.பி.எஸ்.சி என்பது நீட் தேர்வை நடத்தும் அமைப்புதான். பாடத் திட்டத்துக்கும் அந்த அமைப்புக்கும் தொடர்பே இல்லை.  பாடப் புத்தகத்தைத் தாண்டி தேர்வில் ஒரு கேள்விகூட வராது.  

“எந்த வடிவத்தில் வந்தாலும் எதிர்கொள்ள முடியும்!”

45 நாள்களை மூன்றாகப் பிரித்துக் கொள்ளுங்கள். ப்ளஸ் ஒன் பாடங்களைப் படித்து ஒரு வருடம் ஆகிவிட்டதல்லவா..? அதனால் அதற்கு முக்கியத்துவம் கொடுக்க வேண்டும். முதல்  15 நாள்கள் முழுவதும் ப்ளஸ் ஒன் பாடங்களைப் படியுங்கள்.  அடுத்த 15 நாள்கள் ப்ளஸ் டூ பாடங்களுக்கு. அடுத்த 10 நாள்கள் மீண்டும் ப்ளஸ் ஒன் பாடங்கள். கடைசி 5 நாள்கள் முழுக்க முழுக்க எழுதிப் பார்க்க என வைத்துக்கொள்ளுங்கள். நீங்கள் எழுதியதை நீங்களே திருத்துங்கள். தவறு தெரியும்.  இணையத்தில் நிறைய மாடல் தேர்வுகள் இருக்கின்றன. அவற்றை எழுதிப் பார்க்கலாம். இயற்பியல், வேதியியலில் கணக்கீடு சார்ந்த கேள்விகளுக்கு அதிக முக்கியத்துவம் தர வேண்டாம்.  அது நேரத்தைத் தின்றுவிடும். உயிரியல் மிகவும் எளிதாக இருக்கும்.

வேதியியல், இயற்பியலில் உள்ள எல்லா ஃபார்முலாக்களையும் தொகுத்து ஒரு புத்தகம் தயாரித்து வைத்துக் கொள்ள வேண்டும். அவ்வப்போது எடுத்துப் பார்க்க வசதியாக இருக்கும். மனதில் நன்கு பதியவும் அது உதவும். 

“எந்த வடிவத்தில் வந்தாலும் எதிர்கொள்ள முடியும்!”

பழைய வினாத் தாள்களை இணையத்தில் தரவிறக்கி, முழுமையாக வாசிக்க வேண்டும். அதில் கேட்கப்பட்டுள்ள ஃபார்முலாக்களை கவனமாகப் படித்து, மனதில் இருத்திக்கொள்ளுங்கள். மொத்தமுள்ள நான்கு கேள்விகளில் எது சரியான விடை என்று கண்டறிந்து படிப்பதைப்போலவே, மற்ற மூன்று பதில்கள் ஏன் தவறானவை  என்று தெரிந்துகொள்வதும் முக்கியம். அப்போதுதான் கேள்விகள் எந்த வடிவத்தில் வந்தாலும் எதிர்கொள்ள முடியும்...” என்கிறார் பேராசிரியர் ரவிக்குமார்.

நீட்டையும் ஒரு கைபார்ப்போம் மாணவர்களே!

தமிழகத்தின் தொடுவானம்?

தமிழகத்தில் இந்த ஆண்டு சுமார் 8 லட்சம் மாணவர்கள் ப்ளஸ் 2  படித்துவருகிறார்கள்.  இதில் மூன்றரை லட்சத்துக்கும் மேற்பட்டவர்கள்  தமிழ்வழி உயிரியல்-இயற்பியல்-வேதியியல் பிரிவை எடுத்துப் படித்துவரும் நிலையில், வெறும் 75 ஆயிரம் மாணவர்கள்தாம் `நீட்’ தேர்வுக்கான தமிழக அரசின் `தொடுவானம்’ பயிற்சி மையத்தில் பதிவுசெய்திருக்கிறார்கள். ஆனால், இந்த 75 ஆயிரம் பேருக்கும்கூட உரிய முறையில் பயிற்சி அளிக்கப்படவில்லை என்பதுதான் உண்மை நிலவரம்.

ஒன்றியத்துக்கு ஒன்றென 412  `தொடுவானம்’  பயிற்சி மையங்கள் தமிழக அரசின் சார்பில் தொடங்கிவைக்கப்பட்டன. ஆனால் உண்மையில் இந்தப் பயிற்சி மையங்கள் முழுமையாகச் செயல்படவேயில்லை.

“எந்த வடிவத்தில் வந்தாலும் எதிர்கொள்ள முடியும்!”

312 பயிற்சி மையங்கள் எங்கே?

தற்போது வரை வெறும் 100  பயிற்சி மையங்கள் மட்டுமே செயல்பட்டுவருகின்றன. “நிதியின்மை காரணமாக 312 பயிற்சி மையங்கள் இதுவரை தொடங்கப்படவில்லை...” என்கிறார்  இதன் இயக்குநர்  டாக்டர் வினாயக் செந்தில்குமார்.

“நவம்பர் 13-ம் தேதி 100 பயிற்சி மையங்களைத் தொடங்கிவிட்டோம். பதிவுசெய்தவர்களில் 40 சதவிகித மாணவர்களுக்குப் பயிற்சியை ஆரம்பித்துவிட்டோம். சனி, ஞாயிறு மற்றும் விடுமுறை நாள்களில் பயிற்சி நடக்கிறது. 60,000 மாணவர்களுக்கான, 312 பயிற்சி மையங்கள் தொடங்கவேண்டியிருக்கிறது.  நிதிப் பிரச்னையால் தாமதமாகிறது. சி.பி.எஸ்.சி பாடப் புத்தகத்தின் அடிப்படையில், `நீட்’-டுக்கான ஒரு பாடப் புத்தகத்தை உருவாக்கியிருக்கிறோம். 10 பாகங்களைக் கொண்ட அந்தப் புத்தகங்களில் இரண்டு புத்தகங்கள் தயாராகிவிட்டன. பிற புத்தகங்களும் அச்சிடும் பணி நடந்துவருகிறது” என்கிறார் வினாயக் செந்தில்குமார்.
 

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு