Published:Updated:

எடப்பாடியின் வேடிக்கை பார்க்கலாம் வாங்க!

எடப்பாடியின் வேடிக்கை பார்க்கலாம் வாங்க!
பிரீமியம் ஸ்டோரி
News
எடப்பாடியின் வேடிக்கை பார்க்கலாம் வாங்க!

கர்நாடகத் தேர்தல்... காவிரி அரசியல்ப.திருமாவேலன், ஓவியம்: ஹாசிப்கான்

முதலில், ‘நடந்தாய் வாழி காவேரி’யாய் இருந்தது. பிறகு ‘நின்றாய் காவிரி’ ஆனது. அதன் பிறகு, ‘உட்கார்ந்தாய் காவிரி’ ஆனது. அதனினும் பிறகு, ‘படுத்தாய் காவிரி’ ஆனது. இனிவரும் காலத்தில், ‘முடங்கினாய் காவிரி’  ஆகப்போவது தெரிகிறது.

காவிரிக்கு முதலில் கர்நாடக அரசியல் கட்சிகள் தடுப்பணை போட்டன. கர்நாடக மாநில அரசு தடுப்பணை போட்டது. மத்திய அரசுகள் தடுப்பணை போட்டன. இதோ இப்போது உச்ச நீதிமன்றமும் சேர்ந்துகொண்டது. ‘மங்கை சூதகமானால் கங்கையில் குளிக்கலாம்; கங்கையே சூதகமானால் எங்கே குளிப்பது?’ என்ற பழமொழியையே கேட்க வேண்டி இருக்கிறது.

‘இதற்கு மேல், மேல் முறையீடு செய்ய முடியாது’ என்று சொல்லிவிட்டு உச்சநீதிமன்றம் அளித்திருக்கும் இறுதித் தீர்ப்பு, தமிழ்நாட்டுக்கும் - காவிரி உரிமைக்குமான இறுதிச் சடங்கு நடத்தும் தீர்ப்பு.

காவிரியிலிருந்து தமிழகத்துக்கு ஆண்டுக்கு 177.25 டி.எம்.சி நீரை, அடுத்த 15 ஆண்டுகளுக்குக் கர்நாடக அரசு திறந்து விட வேண்டும் என்று உச்ச நீதிமன்றம் இறுதித் தீர்ப்பு அளித்துள்ளது. காவிரி நடுவர் மன்ற உத்தரவுப்படி தமிழகத்துக்கு 192 டி.எம்.சி அளிக்க வேண்டும். அதனை 177.25 டி.எம்.சி-யாகக்  குறைத்த நிலையில் தமிழகத்துக்கு 14.75 டி.எம்.சி குறையும். 14.75 டி.எம்.சியை எப்படிக் குறைக்கலாம் என்று சிலரும், 14.75 டி.எம்.சிதானே குறைத்துள்ளார்கள் என்று சிலரும் பூசிமெழுகிக்கொண்டிருக்கிறார்கள். நாம் இழந்திருப்பது வெறும் 14.75 டி.எம்.சி தண்ணீர் மட்டுமன்று. நாம் இழந்திருப்பது காவிரியின் முக்கால் பங்குக்கும் மேலான நீரை என்பதுதான் வரலாறு.

எடப்பாடியின் வேடிக்கை பார்க்கலாம் வாங்க!

1924-ம் ஆண்டில் காவிரி ஒப்பந்தம் கையெழுத்து ஆனது. அப்போது சென்னை மாகாணமாக இருந்தோம். சென்னை மாகாணம் மற்றும் புதுச்சேரிக்குக் காவிரியின் உபரி நீரிலிருந்து 75 சதவிகிதமும் மைசூர் சமஸ்தானத்துக்கு 23 சதவிகிதமும் பயன்படுத்திக் கொள்ளலாம் என்றுதான் இருந்தது. மொழிவாரி மாகாணங்கள் பிரிந்தபோது தமிழ்நாட்டின் எல்லைகள் சுருங்கின. 1924-ம் ஆண்டு போட்ட ஒப்பந்தம் 1974-ம் ஆண்டுடன் காலாவதி ஆகிவிட்டது என்று புதிய பிரச்னையைக் கர்நாடகம் கிளப்பியது. எங்கள் மாநிலத்தில் உற்பத்தி ஆவதால் எந்தப் புதிய ஒப்பந்தமும் எங்களைக் கட்டுப்படுத்தாது என்றது கர்நாடகம். காவிரியின் குறுக்கே பல்வேறு புதிய அணைகளைக் கட்டியது கர்நாடகம். இதைக் கேட்பார் யாரும் இல்லை. ‘எங்கள் மாநிலம்’ என்று கர்நாடகம் உரிமை கொண்டாடியபோது, ‘எங்கள் இந்தியா’ என்று பேசிய யாரும் தட்டிக் கேட்கவில்லை. தமிழகத்த்துக்கு வழக்கு போடுவதைத் தவிர வேறு வழியில்லை.

காவிரி நீர் பங்கீட்டு வழக்கை விசாரித்த நடுவர் மன்றம், தமிழகத்துக்குக் கர்நாடகம் ஆண்டுதோறும் 205 டிஎம்சி தண்ணீர் திறந்துவிட வேண்டும் என்று இடைக்காலத் தீர்ப்பு அளித்தது. 1991-ம் ஆண்டு இடைக்காலத் தீர்ப்பு தந்த நடுவர் மன்றம், 17 ஆண்டுகள் கழித்து 2007-ம் ஆண்டுதான் இறுதித் தீர்ப்பைத் தந்தது. காவிரியில் கிடைக்கும் மொத்தத் தண்ணீரின் அளவு 740 டி.எம்.சி நீரில் தமிழகத்தின் பங்கு 419 டி.எம்.சி நீர். ஆனால், கர்நாடகம் ஆண்டுதோறும் 192 டி.எம்.சி தந்தால் போதும் என்றது நடுவர் மன்றம்.

தமிழகத்தின் பங்கு 419 டி.எம்.சி நீர் என்றால் 419 டி.எம்.சி நீரைத் திறந்துவிடச் சொல்லியிருக்க வேண்டும். அல்லது இடைக்காலத் தீர்ப்பாகச் சொன்ன 205 டி.எம்.சி நீரையாவது திறந்துவிடச் சொல்லியிருக்க வேண்டும். இரண்டும் இல்லாமல் 192 டிஎம்சி என்றது காவிரி நடுவர் மன்றம். இப்போது 177.25 டிஎம்சியில் கொண்டு வந்து நிறுத்தியிருக்கிறது உச்ச நீதிமன்றம். 419 டி.எம்.சி எங்கே இருக்கிறது? 177.25 டி.எம்.சி எங்கே இருக்கிறது? நாம் இழந்தது எவ்வளவு?

தமிழகம், கர்நாடகம் ஆகிய இரு மாநிலங்களுக்கு இடையிலான காவிரி நதி நீர்ப் பங்கீட்டைத் தீர்ப்பதற்கு நிலத்தடி நீரை அளவுகோலாக வைத்து இத்தீர்ப்பு வழங்கப்பட்டுள்ளது. காவிரி நீர் என்பது உரிமை தொடர்புடையது. நிலத்தடி நீர் என்பது தேவையைப் பூர்த்தி செய்வது. நிலத்தடி நீரோ, மழை நீரோ தேவையான அளவுக்கு இருக்குமானால் தேவகவுடாக்களிடமும் வட்டாள் நாகராசுகளிடமும் திட்டு வாங்கிக்கொண்டு காவிரிக்காகக் காத்திருக்க வேண்டியதில்லை. நமது தேவைக்குப் போதுமான தண்ணீர் இருக்குமானால் காவிரியில் வரும் தண்ணீரை வைத்துக்கொண்டு நாம் செயற்கைக் குளங்கள் வெட்டப்போவதில்லை. ‘எனக்கான உரிமையைக் கொடு’ என்றால்... ‘உனக்குதான் கையும் காலும் நன்றாக இருக்கிறதே’ என்று பதில் சொன்னால் எப்படி அபத்தமோ அப்படித்தான் காவிரி உரிமையையும் நிலத்தடி நீரையும் சம தராசில் வைப்பது.

இந்தச் சூழ்நிலையில், ‘நதிகளுக்கு எந்த மாநிலங்களும் உரிமை கோர முடியாது’ என்று உச்ச நீதிமன்றம் சொன்னதுதான் கர்நாடகாவுக்குப் பெரிய பின்னடைவு. ‘காவிரி எங்கள் மாநிலத்தில் உற்பத்தி ஆவதால் அது எங்களுக்கே சொந்தம்’ என்று கர்நாடகம் சொல்லி வந்தது. இன்னும் காமெடியாக ‘1924-ம் ஆண்டு ஒப்பந்தம் கையெழுத்தானபோது கர்நாடக அரசே கிடையாது. எனவே, எங்களை இந்த ஒப்பந்தமே கட்டுப்படுத்தாது’ என்றும் சொன்னார்கள். 1956-க்கு முன்னதாகக் கர்நாடக அரசு கிடையாது என்பது உண்மைதான். அதற்கு முன்னதாக இந்திய அரசு செய்துகொடுத்த நன்மைகள் அனைத்தையும் அழித்துவிட முடியுமா? அகம்பாவத்தால் ஆன அறிவாக இருந்தால் மட்டுமே இப்படிப்பட்ட வாதங்களை வைக்க முடியும். காற்றுபோலவே நீரும் பொது என்பதை உணர்த்தியிருக்கிறது உச்ச நீதிமன்றம்.

காவிரி மேலாண்மை வாரியத்தை ஆறு வாரங்களுக்குள் உருவாக்க வேண்டும் என்று மீண்டும் சொல்லியிருக்கிறது உச்ச நீதிமன்றம். காவிரி நீரைப் பகிர்ந்தளிப்பதைக் கண்காணிக்க வேண்டிய பொறுப்பு காவிரி மேலாண்மை வாரியத்துக்குத் தான் இருக்கிறது. இல்லாவிட்டால் கர்நாடக அரசை யாரும் கேள்வி கேட்க முடியாது என்று உச்ச நீதிமன்றத்துக்கும் தெரிந்திருக்கிறது. இந்தக் காவிரி மேலாண்மை வாரியத்தை அமைக்க வேண்டிய பொறுப்பு மத்திய அரசுக்குத்தான் இருக்கிறது. ஆனால், கர்நாடக மாநிலத்தில் சட்டசபைத் தேர்தல் வருகிறது. அங்கு ஆட்சியில் இருக்கும் காங்கிரஸ் கட்சியை வீழ்த்திவிட்டு அரியணை ஏறத்துடிக்கும் பாரதிய ஜனதா, கர்நாடக மக்கள் வெறுக்கும் ‘காவிரி மேலாண்மை வாரியத்தை’ அமைக்குமா என்பது சந்தேகமே!

‘காவிரி விவகாரத்தில் கர்நாடக அரசுக்குச் சாதகமாக நடந்துகொள்ளாமல் நடுநிலையுடன் செயல்பட வேண்டும்’ என்று பிரதமரிடம் நேரில் வலியுறுத்துவதற்காக அ.தி.மு.க. நாடாளுமன்ற உறுப்பினர்கள் அனைவரும் 2016 அக்டோபர் 3-ம் நாள் (ஜெயலலிதா அப்போலோ மருத்துவமனையில் அனுமதிக்கப்பட்டிருந்த நெருக்கடியான சூழலில்!) டெல்லி சென்றார்கள். 50 எம்.பி.களையும் பிரதமர் சந்திக்க நேரம் ஒதுக்கவில்லை. பிரதமரின் செயலாளரிடம் மனு கொடுத்துவிட்டு வந்தார்கள். இதுதான் தமிழ்நாட்டுக்கு தரப்பட்ட மரியாதை. ஆனால், தேவகவுடா உண்ணாவிரதம் இருந்தால் மோடியே அவரை போனில் அழைத்துப் பேசுகிறார். இதுதான் கர்நாடகாவுக்குத் தரப்படும் ராஜமரியாதை. தலைகீழ் நின்று தண்ணீர் குடித்தாலும் தமிழ்நாட்டில் ஓட்டு தொகுதிக்கு ‘1300’ தாண்டப்போவதில்லை என்று நினைத்தால் இப்படித்தானே செயல்படுவார்கள்!

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
எடப்பாடியின் வேடிக்கை பார்க்கலாம் வாங்க!

இவற்றையெல்லாம் தட்டிக்கேட்கத் துப்பு இல்லாத, முதுகெலும்பு இல்லாத ஆட்சி தமிழ்நாட்டில் இருக்கிறது. தமிழக முதலமைச்சர் வேடிக்கை பார்த்துக்கொண்டிருக்கிறார். இவரால், ‘ஜெயலலிதா வழியில் செயல்படும் அரசை’ எப்படி நடத்த முடியும்? சில நாள்களுக்கு முன் பெங்களூரு சென்று கர்நாடக முதலமைச்சர் சித்தராமையாவுடன் பேச்சு வார்த்தை நடத்தக் கிளம்பியவரைத் தடுத்தது யார்? அந்தப் பயணம் நின்றது ஏன்? அரண்டவன் கண்ணுக்கு இருண்டதெல்லாம் பேய் என்பதைப்போல மோடி கோபித்துக்கொள்வார் என்று இவர் நிறுத்தினாரா, அல்லது அவரே தடை போட்டாரா என்று தெரியாத நிலையில் பேச்சுவார்த்தை நடக்கவில்லை. யாருக்கான ஆட்சி இது? யாருடைய நன்மையின் பொருட்டு இந்த ஆட்சி தொடர்கிறது? கோடிக்கணக்கான விவசாயப் பெருங்குடி மக்களின்  துயரத்தில்கூடப் பங்கெடுக்காத ஆட்சியாளர்களால் என்ன பயன்? காவிரி மேலாண்மை வாரியம் அமைக்க வேண்டும் என்று உச்ச நீதிமன்றம் உத்தரவிட்ட 2016 அக்டோபர் 3-ம் நாளுக்குப் பிறகு இன்றுவரை மத்திய அரசை இதற்காக வற்புறுத்தியது உண்டா? எடப்பாடி பழனிசாமியும், பன்னீர் செல்வமும் எத்தனை தடவை பிரதமரை சென்று சந்தித்தார்கள்? இதற்கான நெருக்கடியைக் கொடுத்தார்களா? எடப்பாடி பழனிசாமியையும் பன்னீர் செல்வத்தையும் சேர்த்து வைக்க எடுத்த முயற்சியில் சிறிதளவாவது கர்நாடக அரசையும் தமிழக அரசையும் காவிரிப் பிரச்னையில் உடன்பாட்டுக்குக் கொண்டு வர முயன்றாரா பிரதமர்?

நரேந்திர மோடிக்குக் கர்நாடகாவில் ஆட்சிக்கு வர வேண்டும். எடப்பாடி பழனிசாமிக்கு இங்கு ஆட்சியைப் பறி கொடுத்துவிடக் கூடாது. பிறகு, தமிழக விவசாயம் கருகாமல் செழிக்கவா செய்யும்?

வானம் பொய்த்தது. இது இயற்கை. ஆட்சிகள் பொய்ப்பது இயற்கை அல்ல; செயற்கை. காவிரி நடுவர் மன்றம் கட்டளையிட்ட 205 டி.எம்.சி பெறுவதும், காவிரி மேலாண்மை வாரியம் அமைப்பதும், இனியும் புதிய தடுப்பணைகள் கட்டாமல் கர்நாடகாவைத் தடுப்பதும், கர்நாடகாவில் சட்டத்துக்கு உட்பட்ட ஆட்சி நடத்தக் கட்டாயப்படுத்துவதுமான நடவடிக்கைகளின் மூலமாக மட்டுமே தமிழகத்தின் எதிர்காலத்தைக் காப்பாற்ற முடியும். தமிழகத்தின் எதிர்காலம் பற்றிக் கவலைப்படும் ஆட்சிகள் இங்கும் இல்லை. அங்கும் இல்லை. காவிரி, கைவிரி ஆனாள்!