வெளியிடப்பட்ட நேரம்: 12:08 (11/10/2018)

கடைசி தொடர்பு:12:08 (11/10/2018)

சொத்தின் பேரில் கடன் வாங்கப் போறீங்களா..? முக்கியமான 3 விஷயங்கள்

சொந்தத் தொழில் தொடங்க அல்லது வேறு ஏதாவது பெரிய தேவைக்காக, சொத்தின் பேரில் கடன் வாங்குவது எளிது மற்றும் வட்டி  குறைவு என்பதால் பலரும் அதைத்தான் நாடுகின்றனர். ஆனால், சொத்தின் பேரில் கடன் வாங்கும்போது பல்வேறு விஷயங்களைக் கவனத்தில் கொள்ள வேண்டும். 

கடன்

உங்கள் வீடு அல்லது நிலம் என்பது உங்களுக்கான சொத்து.  அதை நீங்கள் குடியிருக்கும் வீடாகவோ ( காலி மனை எனில் அதில் வீடுகட்டி) அல்லது வாடகைக்கு விட்டுச் சம்பாதிக்கவோ பயன்படுத்தலாம். அதே சமயம், சொத்தின் பேரில் கடன் வாங்கும்போது அதிக தொகை, அதாவது 50 கோடி ரூபாய் வரைக்கும் கூட கடனாக வாங்க முடியும். உங்கள் சொத்தின் சந்தை மதிப்பில் குறிப்பிட்ட சதவிகிதத்தை எவ்வித நிபந்தனைகளுமின்றி கடனாகப் பெறலாம். ஆனாலும், இந்தக் கடனை அதிகபட்சம் எவ்வாறு பயன்படுத்திக் கொள்வது எப்படி என்பதைப் பார்ப்போம். 

நீண்டகால கடன் & முன்கூட்டியே செலுத்துதல்

பொதுவாக சொத்தின் பேரில் கடன் வாங்குவதே அதிக தொகை தேவைப்படும்போதுதான். இத்தகைய கடன் வழங்கும் பெரும்பாலான வங்கிகள் அல்லது நிறுவனங்கள், 15 ஆண்டுகள் வரை கடனைத் திருப்பிச் செலுத்தும் வகையில் நீண்டகால கடனாகவே வழங்குகின்றன. சொத்தின்பேரிலான கடனை உங்களது சொந்தத் தேவைக்காக வாங்குகிறீர்களோ அல்லது உங்களது தொழில் தேவைக்காக வாங்குகிறீர்களோ, எதுவானாலும் நீண்டகால அடிப்படையில் அந்தக் கடனை வாங்குவதன் மூலம், கடனைத் திருப்பிச் செலுத்துவதற்கான உங்கள் மாதாந்திர இஎம்ஐ தொகையின் அளவு குறைவதோடு, கடன்தொகையில் ஒரு பகுதியை முன்கூட்டியே செலுத்தவோ அல்லது கடனை எதிர்காலத்தில் முன்கூட்டியே முடிக்கவோ தேவையான பணத்தைச் சேமிக்கவும் உங்களுக்கு உதவும்.

குறுகிய கால அடிப்படையில் இந்தக் கடனை வாங்கியிருந்தால், மாதாந்திர இஎம்ஐ தொகையின் அளவு அதிகமாகி விடும். இதனால், கடன் வாங்கியவருக்குக் கடுமையான நிதிச் சுமை ஏற்படுவதோடு, கடன் தவணையைச் சரியாகக் கட்ட முடியாத ஆபத்தில் சிக்கிக் கொள்ளும் நிலையும் ஏற்பட வாய்ப்பு உள்ளது. 

கடனில் ஒரு பகுதியை முன்கூட்டியே செலுத்துவதற்கோ அல்லது முழுக் கடனையும் முன்கூட்டியே முடிப்பதற்கோ சம்பளதாரர்கள் போன்ற பணியாளர்களுக்கு, பெரும்பாலான வங்கிகள் கட்டணம் வாங்குவதோ அல்லது அபராதம் விதிப்பதோ இல்லை என்றபோதிலும், அதுபோன்ற கட்டணங்கள் கம்பெனிகள், இந்துக் கூட்டுக் குடும்பங்கள் போன்ற தனிநபர் அல்லாத கடனாளிகளுக்கு விதிக்கப்படுகிறது. 

எனவே, கடனைத் திருப்பிச் செலுத்துவதற்கான காலம் மற்றும் முன்கூட்டியே செலுத்துவதற்கான திட்டம் ஆகியவை குறித்து முடிவு செய்யும் முன்னர், சம்பந்தப்பட்ட கடன் வழங்கும் வங்கி அல்லது நிதி நிறுவனம், கடனை முன்கூட்டியே செலுத்துவதற்கு கட்டணம் எதையும் வாங்குகிறதா என்பதை உறுதிப்படுத்திக் கொள்ளுங்கள். மேலும், அப்படி வாங்கினால், முன்கூட்டியே கடனைச் செலுத்துவதற்கான உங்கள் சேமிப்பில் கணிசமாகக் குறைத்துவிடாதவாறு பார்த்துக்கொள்ளுங்கள். 

அதிகச் சுமையில் சிக்கி விடாதீர்கள் 

உங்களுக்குச் சொந்தமான வீடு அல்லது கடை போன்ற சொத்தின் பேரில் கடன் வாங்கும்போது, குறைந்த வட்டியில் (வழக்கமாக 9.5 சதவிகிதத்தில் தொடங்குகிறது), தொகை அதிகமாகக் கிடைக்கிறது. இதனால் பலரும் தங்கள் தேவைக்கும் அதிகமாகக் கடன் வாங்கி, கடைசியில் அதைத் திருப்பிச் செலுத்த முடியாத நிலைக்குத் தள்ளப்படுகின்றனர். 

அப்படியான நிலையில், கடனுக்கான அசல் மற்றும் வட்டியைச் சரியான தேதியில் கட்ட முடியாமல் அடிக்கடி கடன் கட்டத் தவறியவர் ( defaulter) பட்டியலில் இடம்பெறும் நிலை ஏற்பட்டு விடுகிறது. அதுமட்டுமல்லாது சம்பந்தப்பட்ட சொத்தையும் இழக்கும் அபாயமும் ஏற்பட்டுவிடும். சொத்தின்பேரில் வாங்கிய கடனை, ஒழுங்காக திருப்பிச் செலுத்தாவிட்டால், அந்தக் குறிப்பிட்ட சொத்தைக் கடன் கொடுத்த வங்கி அல்லது நிதி நிறுவனம் ஏலம் விட்டு, தனது கடன் பாக்கியை வசூலித்துக் கொள்வதற்கான உரிமை உள்ளது என்பதை நினைவில் கொள்வது நல்லது. 

கடன்

ஒப்பிட்டுப் பார்த்து கடன் வாங்குங்கள்

அதிக தொகை மற்றும் நீண்ட கால அடிப்படையில் சொத்தின்பேரில் கடன் வாங்கும்போது சரியான வங்கி அல்லது நிதி நிறுவனத்தைத் தேர்வு செய்வது மிகவும் முக்கியமானது. கடன் வழங்கும் பல்வேறு வங்கிகளின் வட்டி விகிதத்தை ஒப்பிட்டுப் பார்க்கும்போது, உங்கள் தேடல் வட்டி விகிதத்துடன் மட்டும் நின்று விடாது. ஒரு வங்கி, குறைந்த வட்டி விகிதத்தில் கடன் வழங்குவது மட்டுமே, உங்கள் கடன் தேவைக்கான சிறந்த வங்கியாக அது இருந்து விடாது. செயலாக்கக் கட்டணம் ( processing fee), கடனில் ஒரு பகுதியை முன்கூட்டியே செலுத்துதல் அல்லது முன்னரே கடனைக் கட்டி முடிப்பதற்குக் கட்டணம் அல்லது அபராதக் கட்டணம் போன்றவை கடன் தொகையைப் பொறுத்து எவ்வளவு வேறுபடும் என்பதையெல்லாம் ஒப்பிட்டுப் பார்த்து வாங்க வேண்டும். உதாரணமாகச் சொல்வதென்றால், சொத்தின் பேரில் வாங்கும் கடனுக்கான செயலாக்கக் கட்டணம், வங்கிக்கு வங்கி 2 சதவிகிதம் என்ற அளவுக்கு அதிகமாக வேறுபடும். 

எனவே, வட்டி விகிதம் உட்பட அனைத்து முக்கியமான அளவீடுகளையும் ஒப்பிட்டுப் பார்த்து சொத்தின் பேரில் கடன் வாங்குவதற்கான வங்கியைத் தேர்வு செய்யுங்கள்.

நீங்க எப்படி பீல் பண்றீங்க