வெளியிடப்பட்ட நேரம்: 18:34 (20/10/2018)

கடைசி தொடர்பு:18:34 (20/10/2018)

செலவு, சேமிப்பு எப்படி இருக்க வேண்டும்..? பணம் காக்கும் ரகசியம்

செலவு, சேமிப்பு எப்படி இருக்க வேண்டும்..? பணம் காக்கும் ரகசியம்

ட்ஜெட் போடுவது என்றாலே பலருக்கும் குழப்பம்தான். ஒவ்வொரு மாதமும் செலவு, வரம்பு மீறிச் செல்கிறது. செலவைச் சுருக்கிச் சேமிக்க எண்ணினாலும், அதை எப்படிச் செயல்படுத்துவது என்பதில் பலரும் திணறித்தான்போகிறார்கள். சம்பாதிக்கும் பணத்தைக் கையில் வைத்துக்கொண்டு, எந்தச் செலவினங்களுக்கு முன்னுரிமை கொடுப்பது, எதைத் தள்ளிப்போடுவது என்பதில் பலருக்கும் குழப்பம் ஏற்படுவதுண்டு. இத்தகைய தருணங்களில் பலரும் சொல்லும் ஆலோசனை, பட்ஜெட் போட்டுச் செலவழிப்பது. அவ்வாறு பட்ஜெட் போடுவது நல்ல விஷயம் என்றாலும், அந்த பட்ஜெட்டை 50/20/30 விதிப்படி உருவாக்கினால், பணத்தைச் சிறப்பாக நிர்வகித்து, சேமிப்பை முறைப்படுத்தலாம் என்கிறார்கள் நிதி ஆலோசகர்கள். 

பணம் சேமிக்கும் வழிகள்

இந்த விதியைச் செயல்படுத்துவதற்கு நீங்கள் நிதி நிபுணராக இருக்கவேண்டிய அவசியமில்லை.

50/20/30 விதி என்றால் என்ன? 

செலவுகளுக்கான மூன்று பிரிவுகளைப் பயன்படுத்தி, உங்களது பட்ஜெட்டைத் தயாரிக்க இந்த விதிமுறை உதவுகிறது. அதாவது உங்களது அத்தியாவசிய தேவைகள், சேமிப்பு மற்றும் கடன்கள், விருப்பங்கள் ஆகியவற்றின் அடிப்படையில் செலவுசெய்வது. 

50%:  உங்கள் தேவைகளுக்கானது 

உங்கள் வருவாயில் 50 சதவிகிதம் அன்றாட வாழ்க்கைச் செலவினங்கள் மற்றும் அத்தியாவசிய தேவைகளுக்கானதாக இருக்கட்டும். இதில் உங்களது வீட்டு வாடகை அல்லது வீட்டுக்கடன், மின்சாரக் கட்டணம், தண்ணீர் வரி, தொலைபேசிக் கட்டணம், மருந்துகள் வாங்குவது, சமையல் சிலிண்டர் வாங்குவது மற்றும் தொலைக்காட்சிக்கான கேபிள் கட்டணம் போன்ற பயன்பாடுகளுக்கான செலவுகள், மளிகைச் சாமான்கள், அலுவலகம் செல்வதற்கான போக்குவரத்துச் செலவுகள் மற்றும் கிரெடிட் கார்டுக்கான குறைந்தபட்ச கட்டணம் (minimum payment) கட்டுதல் போன்றவை இடம்பெறட்டும்.

`தேவை'க்கும் `விருப்ப'த்துக்கும் உள்ள வேறுபாட்டைப் புரிந்துகொள்வது முக்கியமானது. `தேவை' என்பது உங்களது அன்றாட வாழ்க்கைத்தரம் அல்லது அத்தியாவசிய தேவைகளைப் பூர்த்திசெய்யக்கூடியது. `விருப்பம்' என்பது பட்ஜெட்டில் உரிய ஒதுக்கீடு செய்து செலவழிப்பது. 

அத்தியாவசிய தேவைகள்

20% : சேமிப்பு & கடன்

உங்கள் வருவாயின் அடுத்த 20 சதவிகிதம், உங்களது சேமிப்புக்கான முதலீடுகள் மற்றும் கடன்களை திரும்பக் கட்டும் கடன் தவணைகளுக்கானதாக இருக்கட்டும். வேறு வார்த்தையில் சொல்வதானால், கடந்த காலத்தில் செலவழித்ததற்கும், எதிர்காலத்துக்கான முதலீட்டுக்குமானதாகவும் இருக்கட்டும். 

இதில் கல்விக் கடன், கிரெடிட் கார்டு கட்டணம், ஓய்வுக்கால சேமிப்பு மற்றும் இதர நிதி இலக்குகளும் அடங்கும். சுருக்கமாகச் சொல்வதானால், உங்கள் வருவாயிலிருந்து 20 சதவிகிதத் தொகையைச் சேமிப்புக்காக ஒதுக்கிவிட்டு, அந்தத் தொகையை மீண்டும் எடுத்துச் செலவழித்துவிடாதவாறு, அதில் ஒரு பாதுகாப்பு வலையமைப்பை ஏற்படுத்திவிடுங்கள். அதாவது ஐந்தாண்டுக் காலம், பத்தாண்டுக் காலம் லாக் இன் பீரியடுகொண்டதாக மாற்றிவிடுங்கள்.

சேமிப்பு

30%:  விருப்பச் செலவுகள்

உங்கள் வருவாயில் மீதம் இருக்கும் 30 சதவிகிதத்தை, ஷாப்பிங், சினிமாவுக்குச் செல்வது, ஹோட்டல்களில் உணவருந்துவது, சொந்த ஊர் அல்லது சுற்றுலா செல்வது போன்ற உங்கள் விருப்பத்துக்குரிய, வாழ்க்கையை மகிழ்ச்சியாக வைத்துக்கொள்வதற்கான செலவுக்காகப் பயன்படுத்திக்கொள்ளலாம். ஆனால், இந்த 30 சதவிகிதத் தொகை அனைத்தையும் செலவழித்துவிட வேண்டும் என்ற கட்டாயம் எதுவுமில்லை. 

அதாவது உங்கள் விருப்பங்கள் அனைத்தையுமே நிறைவேற்றிக்கொள்ளவேண்டிய அவசியமில்லை. மகிழ்ச்சியான வாழ்க்கை என்பது மேற்கூறிய பொழுதுபோக்குகளை மட்டுமே சார்ந்ததல்ல. செலவில்லாத அல்லது செலவு குறைந்த பொழுதுபோக்கு அம்சங்களும் இருக்கத்தான் செய்கின்றன. எனவே, உங்கள் விருப்பங்களில் எவற்றுக்கு முன்னுரிமை கொடுக்கலாம் மற்றும் எவற்றைத் தவிர்க்கலாம் என்பதை நீங்களே முடிவுசெய்து, மீதமாகும் பணத்தைக்கொண்டு சேமிப்பை அதிகரிக்கலாம். 

ஷாப்பிங்

50/20/30 விதி ஏன்? 

இந்த விதிமுறை பாதுகாப்பானதும், உங்கள் விருப்பத்துக்கேற்ப மாற்றியமைத்துக்கொள்ளக்கூடியதுமாகும். இதில் சொல்லப்பட்டிருக்கும் சதவிகிதக் கணக்கு ஒரு பொதுவான வழிகாட்டுதல்தான். உங்கள் வாழ்க்கைத் தரத்துக்கேற்ப அதை மாற்றியமைத்துக்கொள்ளலாம். எதை மாற்றியமைத்தாலும் கட்டாயம் சேமிப்பை உள்ளடக்கிய பட்ஜெட் போட்டு, அதையொட்டி உங்கள் செலவுகளை அமைத்துக்கொள்ளுங்கள். இப்படிச் செய்வதன் மூலம், உங்கள் வாழ்க்கை அநாவசிய கடன் சிக்கலில் மாட்டிக்கொள்ளாமலும், எதிர்காலத் தேவைகளுக்கான சேமிப்புடனும் பாதுகாப்பாக இருக்கும்.

நீங்க எப்படி பீல் பண்றீங்க


டிரெண்டிங் @ விகடன்