வெளியிடப்பட்ட நேரம்: 11:50 (14/01/2019)

கடைசி தொடர்பு:11:50 (14/01/2019)

ரஷ்யா - இந்தியா மாணவர்களின் ஹேப்பி பொங்கல்!

பொங்கலுக்கு எப்போதுமே தனி மரியாதை உண்டு. தமிழர் திருநாள், உழவர் திருநாள் இப்படி பெரியவர்களுக்கு அர்த்தப்படுகிறது பொங்கல். ஆனா பசங்களுக்கு அதுவும் குறிப்பா ஸ்கூல் பசங்களுக்கு மூன்றிலிருந்து நான்கு நாள்கள் லீவு வழங்குகிற சிறப்பான சம்பவம் இது. ஐ, ஜாலி! எனத் துள்ளிக் குதிக்கிற அவர்களின் உற்சாகம் பள்ளியிலேயே பொங்கல் விழா நடக்கிறது என்றவுடன் இரு மடங்கு அதிகமாகிவிடும்.

மாட்டு வண்டிகள், வண்ணமயமான கோலங்கள், மஞ்சள் கொத்து சேர்த்து அலங்கரிப்பட்டிருந்த பொங்கல் பானைகள், கரும்புகள் இப்படி வரிசைகட்டி அழகு சேர்த்துக்கொண்டிருந்த பொங்கல் விழாவின் ஹைலைட் இந்த வருடம் நம்மூர் பசங்களோடு ரஷ்யாவின் மாணவர்களும் சேர்ந்து பொங்கல் கொண்டாடப் போறாங்கங்கிற செய்திதான்.

காரைக்குடி செட்டிநாடு பப்ளிக் பள்ளியில்தான் இந்தக் கொண்டாட்டம். ரஷ்யாவிலிருந்து கலாசார பரிமாற்றத்துக்காக வந்திருந்த 9 மாணவர்களும் 3 ஆசிரியர்களும் படு உற்சாகமாகப் பொங்கலிடும் செய்முறைகளில் தங்களை ஈடுபடுத்திக்கொண்டனர்.

பட்டு தாவணியில் குட்டிக் குட்டி சிறுமிகள் அழகா படையெடுக்க குட்டி மைனர்ஸ் பட்டு வேட்டி காலில் தட்ட தட்ட அங்குமிங்கும் ஓடிக் கொண்டிருந்தனர். 

பொங்கல் பொங்குது!

பொங்கலோ பொங்கல் வளாகத்தைத் தாண்டி ஒலித்தது மாணவர்களின் குரல். பொங்கல் பொங்கியாச்சு அடுத்து என்ன பொங்கல் சாப்பிட வேண்டியதுதானே. அதோட கலை நிகழ்ச்சிகளையும் சேர்த்து ரசிச்சுகிட்டே சாப்பிடலாம்.

நாட்டுப்புற நடனத்தில் நம்ம பசங்க வேட்டி, கண்டாங்கி சேலையில் கலக்கினால் ரஷ்ய மாணவர்கள் நீண்ட அங்கிகளோட அவர்களின் பாரம்பர்ய நடனமான கராவோத் (Khorovod) அரங்கேற்றி பார்வையாளர்களின் பலத்த கைத்தட்டல்களை அள்ளிச் சென்றனர். அஸ்ஸாம், கேரளா என இந்தியாவின் பல்வேறு கலாசார நடனங்களும் அணிவகுத்தன.

சிலம்பம் சுற்றும்போது எதை வீசினாலும் மேல படக்கூடாது என்பதுபோல சிலம்ப கம்போடு விளையாண்டனர் மாணவர்கள். எல்லோரும் வியப்பில் வாயைத் திறந்து மூட வேண்டியதாச்சு.



அமெரிக்கன் அம்புலன்ஸ் பீல்ட் சர்வீஸ் (AFS) கலாசார திட்டத்தில் வந்திருந்த ரஷ்ய மாணவர்களின் ஆசிரியர் எலெனாவிடம் பேசினோம், `முதன்முறையா இந்தியாவில் நடைபெற பொங்கல் விழாவில் கலந்துகொள்வது மகிழ்ச்சியா இருக்கு. திறந்த வெளியில் பொங்கல் சமைப்பது புது அனுபவமா இருந்தது. ரஷ்யாவில் செப்டம்பர் மாதத்தில்தான் அறுவடை நாள் கொண்டாடுவோம். பாரம்பர்யத்துக்கு மதிப்பு கொடுக்கிற பண்பாடு ரொம்பவே பிடிச்சிருக்கு’ என்றார்.

முதன்முறையாகச் சேலை அணிந்திருந்த உற்சாகத்தில் பேசத் தொடங்கியிருந்தார் ரஷ்யாவிலிருந்து வந்திருந்த மாணவி அனஸ்டசீயா (அப்பாடா, பெயரை கரெக்ட்டா எழுதியாச்சு). `இந்த விழா ரொம்பவே சிறப்பா இருக்கு. உங்களுக்கு இருக்கிற நிறைய உறவு முறைகள், பண்பாடுகள், காரசாரமான உணவு எல்லாமே சூப்பரா இருந்தது. பெரியவங்களை மதிக்கிற பண்பை எங்கள் நாட்டுக்கு எடுத்துச் செல்லப் போகிறேன்' என்றார்.

ரஷ்ய மாணவர்களோடு கொண்டாடிய பொங்கல் குறித்து சிலாகிக்கின்றனர் நம்ம மாணவிகள் சுதர்சனா மற்றும் பார்கவி. `ஸ்ரைட் பார்வேர்டா இருக்கிறது, புதுப்புது விஷயங்கள் ட்ரை பண்றது இப்படி அவங்க கிட்ட நிறைய கத்துக்கிடலாம்' என்கின்றனர். ரஷ்யாவுக்கே சென்று வந்திருக்கிற பார்கவி நம்ம நாடுதான் எப்பவுமே பெஸ்ட் என தம்ஸ் அப் உயர்த்துகிறார். ரஷ்யா - இந்தியா ஹேப்பி அண்ணாச்சி.