கவிஞர் யவனிகா ஸ்ரீராம் பரிந்துரைக்கும் கவிதைப் புத்தகங்கள்! | Poet Yavanika Sriram Suggests books to read

வெளியிடப்பட்ட நேரம்: 10:12 (16/01/2019)

கடைசி தொடர்பு:10:18 (16/01/2019)

கவிஞர் யவனிகா ஸ்ரீராம் பரிந்துரைக்கும் கவிதைப் புத்தகங்கள்!

கவிதையைப் பற்றியும், முக்கியமான கவிஞர்கள் பற்றியும், வாசகர்கள் படிக்க வேண்டிய புத்தகங்கள் பற்றியும் யவனிகா ஸ்ரீராம் நம்முடன் பகிர்ந்துகொண்டார்.

கவிஞர் யவனிகா ஸ்ரீராம் பரிந்துரைக்கும் கவிதைப் புத்தகங்கள்!

“எழுதுதல் என்பது

மொழி தோன்றுமிடத்தின் பரிணாம அவஸ்தை

அல்லது

இறந்த மண்டையோட்டின் பல்வலி

மேலும் எழுதுதல் என்பது

வரலாற்றிலிருந்து தானியக்கூடங்களைப் பாதுகாப்பது

அல்லது

வனங்களின் விலங்குகளை உடலுறவுக்குப் பழக்குவது”

           - யவனிகா ஸ்ரீராம்

வானம்பாடியாகத் தன்னுடைய கவிதைகளை எழுதத்தொடங்கி, பின்னர் நவீன கவிதைகளில் தனக்கென தன்னுடைய கவிதைகள் மூலம் தனி அடையாளத்தை ஏற்படுத்திக்கொண்டவர் கவிஞர் யவனிகா ஸ்ரீராம். உலகமயமாக்கல் அரசியல், மார்க்சிய சிந்தனை, கைவிடப்பட்டவர்களின் வாழ்க்கை என பேசுபொருளைக் கொண்டு வலிமையான எதிர்க்குரலை தன்னுடைய கவிதைகளின் மூலமாக வெளிப்படுத்தியவர். கவிதையைப் பற்றியும், முக்கியமான கவிஞர்கள் பற்றியும், வாசகர்கள் படிக்க வேண்டிய புத்தகங்கள் பற்றியும் யவனிகா ஸ்ரீராம் நம்முடன் பகிர்ந்துகொண்டார்.

“கவிதை பற்றிய உங்களது எண்ணம்?”

கவிதை, மொழி சார்ந்த அறிவாக இருக்கிறது! இலக்கியத்தில் கட்டுரை, நாவல், சிறுகதை வடிவங்களைப் போல கவிதையும் தனக்கென தனித்துறையைக் கொண்டுள்ளது. நாவல், சிறுகதை வாசிப்பதைப் போல கவிதையை வாசிக்க முடியாது. கவிதைகளைப் பற்றி பொதுவெளியில் உரையாடவோ அல்லது கவிதைகளிடமிருந்து கற்றுக்கொள்ளவோ எதுவும் இருப்பதாகத் தோன்றவில்லை. கவிதைகள் சாட்சியாகவும், சகுனமாகவும் புழங்குகிற மொழியில் தன்னை தனிமைப்படுத்திக்கொண்டு நிற்கிறது. கடந்த பல ஆண்டுகளில் கவிதை புத்தகங்கள் அதிகம் விற்பனையாவதில்லை என்கின்றனர், நண்பர்கள். ஆனால், கவிஞர்கள்தான் அதிகமாகக் கவனத்தையும் ஈர்க்கிறார்கள் என்பது முரணான புதிர். ஒருவர்  இலக்கியத்தின் மற்ற வடிவங்களோடு தன்னை எளிமையாக உறவுபடுத்திக்கொள்ள முடியும். ஆனால், கவிதைகளோடு கலைஞர்களால் மட்டுமே உறவுபடுத்திக்கொள்ள முடிகிறது. கவிதைகள், அதிக சப்தமின்றி மனதோடு உரையாடுவது மட்டுமல்ல பொது இலக்கிய தன்மைக்கு வெளியே அலைவதும் அதற்கு முக்கியமான காரணம்.

யவனிகா ஸ்ரீராம்

சங்ககால கவிதைகளின் தொடர்ச்சியை நவீனப்படுத்த வேண்டுமெனில் மேற்கத்திய உலக கருத்தாக்கங்களையும் கவிதைகளில் எடுத்துக்கொள்ள வேண்டியது இருக்கிறது. ஏனெனில், இன்றைய புதிய வாழ்வுமுறைகள் கவிதைகளில் உலகளாவியதாக மாறியுள்ளது. கவிதைகளுக்கென சில மீயொலிப் பண்புகள் இருக்கின்றன. சமூகத்தின் பெரும் இரைச்சல்களுக்கிடையே ஓசையற்றுபோன மீயொலிகளை கவிதைகள் வெளிப்படுத்துகின்றன.

குறிப்பாக இன்றைய நவீன கவிதைகளின் போக்கைக் குறிப்பிட வேண்டுமெனில் கிராமத்திலிருந்து நகரத்தையும், நகரத்திலிருந்து கிராமத்தையும் தேடி அலைகிற விதமாகத் தோன்றுகிறது. அதற்குள் தான் இன்றைய கவிதைகளை அடக்க முடிகிறது அல்லது இழத்தல், பெறுதல் வெளிப்பாடாகவும் நவீன தகவமைப்பாகவும் அவற்றைப் பார்க்க முடிகிறது.

 

“கவிதைகளை வாசிக்க வேண்டியதன் அவசியம்?”

ஒரு குறிப்பான சமூகத்தில் அதன் மொழியின் கூர் உணர்வுகளைத் தக்கவைத்துக்கொள்ள கவிதைகள் அவசியமாகின்றன. புதிய சொல்லாடல்களை உருவாக்குவதிலும், கட்டமைப்பதிலும் கவிதையின் காலாதீத பங்கு முக்கியமானது. தன்னுடைய மொழியில் பண்பு ரீதியாக, வடிவ ரீதியாக ஏற்படும் மாற்றங்களில், எதிர்காலம் சார்ந்து பேசுவதில் முன்னறிவைக் கவிதைகள் பெறுகின்றன. பிறகு ஒருவர் தன்னைத்தானே யார் என்று கேட்டுக்கொள்ளவும் கவிதைகளில் இடமிருக்கிறது. உணர முடியாத தவறவிட்ட சிலவற்றை உணர வைப்பதிலும் கவிதைகள் நெருக்கமானவை. அவை மனிதர்களின் அரசியல் கருவியாகவும், பண்பாட்டு பெட்டகங்களாகவும் முக்காலத்தையும் எழுதிப் பார்க்கும் வகையிலும் ஆர்வத்தையும், தூண்டலையும் கொண்டவை. இன்றைய நவீன கவிதைகள் மானுட இருத்தலியல் சார்ந்த அவஸ்தைகளோடும், தன்னுணர்ச்சி சார்ந்த மொழிகளோடும் சமூக ஊடகங்களின் வழியே ஊடுருவுகின்றன. புதிய சந்தைகளோடும் ரகசிய உறவுகளை மேற்கொள்கின்றன. அதனுடைய விளைவுகள் குறித்த சமகால அரசியல் கவிதைகளின் தேவை வலுப்பட வேண்டும்.

யவனிகா ஸ்ரீராம்

 

“வாசகர்கள் முக்கியமாகப் படிக்க வேண்டிய கவிதை புத்தகங்களாக மற்றும் கவிஞர்களாக நீங்கள் கருதுவது?”

பணிதல் மறந்தவர் – சிவசேகரன். சி

எஸ்.வி.ராஜதுரை மற்றும் வ.கீதா தொகுப்புகள்.

ஆஃப்ரோ-அமெரிக்கன் கவிதைகள்.

பிறமொழிக் கவிதைகளின் முக்கியமான தொகுப்புகள் இவை. வழக்கமான கவிதை போக்குகளிலிருந்து வித்தியாசமாகப் பயணிக்கின்ற கவிதைகள் அடங்கிய இவை ஒடுக்கப்பட்ட உலக மக்களின் பாடுகளை பேசுபவை.

தமிழின் முன்னோடிகளான பிரமிள், நகுலன், தேவதேவன், தேவதச்சன், பிரம்மராஜன், ஆனந்த், ஆத்மாநாம், இன்குலாப், கலாப்ரியா, சுந்தர ராமசாமி, விக்ரமாதித்தன், சமயவேல், சி. மோகன், சி. மணி, சுகுமாரன் வழியாக நவீன கவிதை போக்குகள் தொடர்ந்தாலும் ஞானக்கூத்தன் கவிதைகள் தமிழ் மரபில் ஒரு மேற்கத்திய நவீனத்துவத்தை இணைத்து புதிய அனுபவங்களைத் தந்தது எனலாம்.

 

“இளங்கவிஞர்களின் படைப்புகளில் நீங்கள் முக்கியமாகக் கருதும் புத்தகங்கள்?”.

களம் காலம் ஆட்டம்  –  சபரிநாதன்

மகிழ்ச்சியான பன்றிக்குட்டி  –  வெய்யில்

பஷீருக்கு ஆயிரம் வேலைகள் தெரியும்  –  இளங்கோ கிருஷ்ணன்

ழ என்ற பாதையில் நடப்பவன்  –  பெரு. விஷ்ணு குமார்

ரொட்டிகளை விளைவிப்பவன்  –  ஸ்டாலின் சரவணன்

ஒளிர்விதை  –  ஜி. கனிமொழி

காயா  -  தேன்மொழி தாஸ்

நேசமித்திரன் தொகுப்புகள்

அம்பட்டன் கலயம்  –  பச்சோந்தி

வாரணாசி  - தேவேந்திர பூபதி

இசை, ஊர்சுலா ராகவ், கடங்கநேரியான், சம்யுக்தா மாயா, பாலைவன லாந்தர், கே. கயல்,  போன்றவர்களையும் கவனப்படுத்தலாம்.

கவிஞர்

இதற்கு முன்பாக 90-களில் எழுதத் தொடங்கிய ரமேஷ் பிரேதன், லக்ஷ்மி மணிவண்ணன், சங்கரராமசுப்ரமணியன், பாலை நிலவன், பிரான்சிஸ் கிருபா, செல்மா பிரியதர்ஷன், என்.டி.ராஜ் குமார், கண்டராதித்தன், நேசன், ராணி திலக், கரிகாலன், முத்து மகரந்தன் போன்றவர்கள், 2000-க்குப் பிறகு எழுத வந்த மாலதி மைத்திரி, குட்டி ரேவதி, சல்மா, சுகிர்தராணி, லீனா மணிமேகலை, லதா ராமகிருஷ்ணன், பெருந்தேவி போன்றவர்களோடு தொடங்கிய நவீன கவிதைகளுக்கு, இந்த அளவுக்கு மக்கள் மயப்பட்டு வருவது வானம்பாடிகளுக்குப் பிறகு தோன்றிய கவித்துவ இயக்கம் எனலாம்.

பெரும்பாலான இதழ்களை இவர்களுடைய கவிதைகளே நிறைக்கின்றன. இவர்களோடு ஈழத்து கவிஞர்களில் சேரன், வ.ஐ.ச. ஜெயபாலன், சிவரமணி, செல்வி, அவ்வை, லக்ஷ்மி, உமா வரதராஜன், சோலைக்கிளி, றியாஸ் குரானா, அனார், எம்.எ. சகி, எஸ்தர், மலேசியாவில் நவீன், பாலமுருகன், குழலிவீரன், வித்யா, சரவணதீர்த்தா, மஹாத்மன், மீராவாணி போன்றவர்களின் கவிதைகளும் இணைந்ததுதான் நவீன கவிதையாக வளர்ந்திருக்கின்றன. இத்தகைய போக்குகளுக்கிடையேதான் தமிழில் நவீன கவிதை பரப்பு விரிந்துகிடக்கிறது. கடந்த 20 ஆண்டுகளாக இவை குறித்து பெரிய ஆய்வுகள் எதுவும் புத்தகமாக வெளிவரவில்லை. தனித்தனியே விமர்சனங்கள் இருந்தாலும், ஒரு கோட்பாட்டு ஆய்வாக நடக்கவில்லை என்றே கூறலாம்.

(ஒரு குறுகிய தருணத்தில் சில பெயர்கள் விடுபட்டிருக்கலாம்)


டிரெண்டிங் @ விகடன்