'வாழ்வதற்கும், பிழைப்பதற்கும் சின்ன வித்தியாசம்தான்!' சிங்கங்களின் 'சர்வைவல்' கதை | a survival story of lion

வெளியிடப்பட்ட நேரம்: 12:30 (13/03/2019)

கடைசி தொடர்பு:12:30 (13/03/2019)

'வாழ்வதற்கும், பிழைப்பதற்கும் சின்ன வித்தியாசம்தான்!' சிங்கங்களின் 'சர்வைவல்' கதை

வாழ்வதற்கும், பிழைப்பதற்கும் சின்ன வித்தியாசம்தான். அதை நொடிக்கு நொடி நிரூபிக்கும் வகையில் இருக்கிறது சிங்கங்களின் வாழ்வு.

'வாழ்வதற்கும், பிழைப்பதற்கும் சின்ன வித்தியாசம்தான்!' சிங்கங்களின் 'சர்வைவல்' கதை

ர்வைவல் என்கிற விஷயத்தில்தான் எல்லா உயிரினங்களின் வலிமையும் அடங்கியிருக்கிறது. எப்படி பிழைத்திருக்கிறோம் என்பது ஒவ்வோர் உயிரினத்தின் சர்வைவல் கதை. பிறப்புக்கும் இறப்பிற்கும் இடையில் எப்படி வாழ்ந்தார்கள், சந்தர்ப்ப சூழ்நிலைகளில் எப்படியெல்லாம் மாறினார்கள் என்பது ஒவ்வோர் உயிருக்குமான வரலாறு. மனிதன், விலங்கு, பறவை, மீன், பூச்சி, புழு என எல்லா உயிரினங்களும் சர்வைவல் விஷயத்தில் ஒன்றுக்கொன்று சளைத்ததல்ல.

சாம்பியா (Zambia) வனப்பகுதியில் இருக்கிறது Luangw தேசிய உயிரியல் பூங்கா. வடக்கிலிருந்து மேற்கு நோக்கிப் பாய்கிற ஆறு Luangwa River. அந்த வனப்பகுதியில் இருக்கிற எல்லா உயிரினங்களுக்கும் கருணை காட்டுகிற ஒரே ஆறு. காலநிலைக்கு ஏற்ப தன்னைத் தகவமைத்துக் கொள்ளும் ஒரு நிலப்பகுதி. சிங்கம், யானை, மான், ஆப்பிரிக்க எருமை, சிறுத்தை, காட்டுப் பூனை, கழுதைப் புலி என பல்வேறு உயிரினங்களைக் கொண்டது. சிங்கக் கூட்டத்தின் தலைவனாக இருப்பதற்குப் பெயர் பிரைடு (Pride). கூட்டத்திலிருக்கிற ஆண் சிங்கமே பிட்டாக இருக்கும். அதைச் சார்ந்தே மற்ற குடும்ப உறுப்பினர்கள் இருப்பார்கள். பிரைடாக இருக்கிற சிங்கம் எப்போது எங்கே செல்லும், மீண்டும் எப்போது குடும்பத்தைத் தேடிவரும் என்பதெல்லாம் அதன் மன நிலையைப் பொறுத்தது. அதற்கு சீப் என்கிற அடைமொழியும் உண்டு.

LUANGWA ஆறு சர்வைவல்

சிங்கத்திற்கு இருக்கிற ஒரே எதிரி கழுதைப்புலி கூட்டம்தான். ஒரு கழுதைப்புலி கூட்டத்தில் 15-லிருந்து 20 கழுதைப்புலிகள் வரை இருக்கும். சிங்கத்திற்கும் கழுதைப்புலிகளுக்குமான சண்டைகள் பெரும்பாலும் உணவு விஷயத்தில்தான் தொடங்கும். சிங்கம் போராடித் துரத்தி வேட்டையாடுகிற உணவை, கழுதைப்புலிகள் சிரமமேயன்றி எளிதாக உணவாக்கிக்கொள்ளும். இங்கிருந்துதான் இரண்டு விலங்குகளுக்கும் இனப்பிரச்னையே ஆரம்பிக்கிறது. கூட்டமாக இருக்கிற கழுதைப்புலிகள் சிங்கத்தின் உணவைக் கூட்டமாகச் சென்று உணவாக்கிக் கொள்ளும். பெண் சிங்கங்களிடமிருந்து எளிதாக உணவைப் பிடுங்கி விடுகிற கழுதைப்புலிகள் ஆண் சிங்கத்திடம் வாலாட்ட முடியாது. பிரைடு வருகிறதென்றால் மற்ற சிங்கங்களே ஒதுங்கி நிற்கும்பொழுது, கழுதைப்புலிகள் தலைதெறிக்க ஓடிவிடும். கழுதைப் புலிகளின் சர்வைவல் அதன் சூழ்ச்சியில் இருக்கிறது. சிங்கத்தின் சர்வைவல் அதனுடைய வீரத்தில் இருக்கிறது.

சிங்கத்தின் குட்டிகள் பிறந்தவுடன் கண் தெரியாது என்பதால், வாசனையை வைத்து சிங்கத்தின் மடியில் தாய்ப்பாலைக் குடிக்கின்றன. சிங்கம் தன்னுடைய குட்டிகளை மிகுந்த பாதுகாப்புடன் பாதுகாக்கிறது. வேட்டைக்குப் போகிற சிங்கம் வேட்டையாடிவிட்டு மீண்டும் தன் குட்டிகளுடன் நேரத்தைச் செலவிடுகிறது. குட்டிகளை மிகுந்த பாதுகாப்புடன் சிங்கங்கள் வளர்க்கும். மூத்த சகோதரர்களால் குட்டி சிங்கங்களுக்கு ஆபத்து நேருவதற்கும் வாய்ப்பிருக்கிறது. சிறுத்தைகளிடமிருந்தும், கழுதைப்புலிகளிடமிருந்தும் சிங்கங்கள் வேண்டுமானால் தப்பிப்பிழைக்கலாம். ஆனால் சிங்கக் குட்டிகளால் அவ்வளவு எளிதில் தப்பித்துச் செல்ல இயலாது. சர்வைவல் விஷயத்தில் எல்லா உயிரினங்களும் அத்துமீறுபவைதாம்.

சிங்கத்தின் கர்ஜனை 8 கிலோமீட்டருக்குத் தெளிவாகக் கேட்கும். டெசிபல் அளவின்படி ட்ரில்லிங் மிஷின் ஒலியின் அளவை விட 114 மடங்கு அதிக ஒலியை ஆண் சிங்கம் எழுப்பும். அதனுடைய எல்லைக்குப் பாதுகாப்புக்காக `சார்ஜ்' எடுத்திருக்கிறேன் என அங்கிருக்கிற எல்லா விலங்குகளுக்கும் கர்ஜனை மூலம் செய்தியைச் சொல்லும். ஒருவேளை உத்தரவின்றி வேறு யாராவது உள்ளே நுழைந்திருந்தால் உடனே கிளம்பிவிட வேண்டியதுதான். ஆண் சிங்கங்கள் தன் கூட்டத்துக்கு என்று ஒரு எல்லையை உருவாக்கி வைத்துக் கொள்ளும். இதைத் தன் வட்டத்தில் மலம், மூத்திரம் கழிப்பதன் மூலமும் கர்ஜிப்பது மூலமும் தன் நகத்தால் மரங்களில் கீரியும், இது தன் எல்லை என மற்ற சிங்கங்களுக்குத் தெரிவிக்கிறது. சிங்கக் கூட்டத்தின் தலைவனோ தலைவியோ கூட்டத்தின் ஓர் அங்கத்தினராகவே இருக்கவேண்டும். ஒரு கூட்டத்தில் பொதுவாக ஐந்து ஆறு வயதுவந்த பெண் சிங்கங்களும், ஒரு வயது வந்த ஆணும் சில குட்டிகளும் இருக்கும். கூட்டத்தின் அமைப்பில் பெண் சிங்கங்களே அதிக முக்கியத்துவத்தைப் பெறுகின்றன. ஒரு கூட்டத்தில் இருக்கும் பெண் சிங்கங்கள் எல்லாம் நெருங்கிய உறவினர்களாகவே இருக்கும்.

எல்லாமே வசந்தகாலம் வரைதான். எல்லா உயிரினங்களும் கோடைக்காலத்தில் சர்வைவலுக்கு வேறு இடங்களுக்கு இடம்பெயர்ந்து ஓடியாக வேண்டும். அப்படி சர்வைவலுக்காக ஓடுகிற காட்டு எருதுகள்தான், கோடைக்காலத்தில் சிங்கங்களின் இரை. கோடைக்காலம் Luangwa ஆற்றுநீர் கொஞ்சம் கொஞ்சமாக வற்ற ஆரம்பிக்கிறது. விலங்குகள் அந்த நிலத்தில் கடைசியாக இருக்கிற புற்களைச் சாப்பிட்டு முடித்திருந்தன. அந்த வருடத்தின் கடினமான காலமாக செப்டம்பர் மாதம் இருக்கிறது. ஆற்றின் ஓரத்தில் சிங்கங்கள் தங்களின் இரைக்காகக் காத்திருக்கின்றன. குடும்பமாக இருக்கிற கூட்டத்தில் தாய் சிங்கமும் அதன் ஒரு குட்டியும் இருக்கின்றன.

எப்படியேனும் தண்ணீர்தேடி விலங்குகள் வரும் என்பது அவற்றின் நம்பிக்கையாக இருக்கிறது. ஆற்றின் மறு கரையில் இருக்கிற மான்களை வேட்டையாட முயல்கின்றன. ஆனால் அதுவும் தோல்வியில் முடிகிறது. ஆனாலும் சோர்ந்து போகாத சிங்கங்கள் அங்கேயே தங்குகின்றன. ஏனெனில் மிகப் பெரிய இரைக்கூட்டம் இந்தக் காலகட்டத்தில் ஆற்றைக் கடக்கும் என்பது அவற்றிற்குத் தெரிந்திருந்தது.

சர்வைவல் பகுதி 1

வறட்சியில் இடம்பெயர்கிற காட்டு எருதுகளும், யானைகளும் ஆற்றின் வழியாகத்தான் பயணங்களைக் கடந்தாக வேண்டும். அதிலும் எளிதாக, மெதுவாக எருதுகளை வீழ்த்திவிடலாம். எவ்வளவு எளிதாக வேலை முடிகிறதோ அதைவிட அதில் ஆபத்தும் இருக்கிறது. எருதுகள் தங்களின் கொம்புகளால் சிங்கங்களைத் தாக்கவும் வாய்ப்பிருக்கிறது. பகல் இரவு என எருதுகளை எதிர்பார்த்து சிங்கங்கள் காத்திருக்கின்றன. காற்றின் சூடு குறைந்திருக்கும் இரவு வேளையில் எருதுகளின் கூட்டம் ஆற்றங்கரையை நோக்கி வர ஆரம்பிக்கின்றன. அதற்காகவே காத்திருந்த சிங்கக்கூட்டம் எருது கூட்டத்தில் ஒன்றைக் குறிவைத்துத் துரத்துகின்றன. தாய் சிங்கம் குட்டியோடு கூட்டத்தைப் பின்தொடர்ந்து ஓடுகிறது. மொத்த சிங்கங்களும் ‘சுற்றுப்போட்டு’ விடுகின்றன. தாய் சிங்கம் பாய்ந்து எருதின் கழுத்தைப் பிடித்துவிடுகிறது. சிங்கங்கள் எளிதாக எருதை வேட்டையாடி உணவாக்கிக் கொள்கின்றன. குட்டி சிங்கங்களும் பெரிய சிங்கங்களோடு எருதைப் பங்கிட்டுக் கொள்கின்றன. அடுத்த நாள் வேட்டையாடி மிச்சமிருக்கும் உடற்பாகங்களை, காட்டிலுள்ள செந்நாய்கள், கழுதைப்புலிகள், பிணந்தின்னிக் கழுகுகள் என எல்லாம் உணவாக்கிக் கொள்கின்றன. வேட்டையாடிய விலங்குகளை முழுவதுமாக உண்ணாமல் எலும்பு மற்றும் அதனையொட்டிய சதைப்பகுதிகளை அப்படியே சிங்கங்கள் விட்டுவிடும். இயற்கையின் உணவு சங்கிலி இதுதான். பெரும்பாலும் பெண் சிங்கங்களே வேட்டையாடும்.

நன்கு உண்ட சிங்கம் வேட்டைக்குப் பின்னர் பல நாள்களுக்கு வேட்டையாடுவதில்லை. ஆற்றுப்படுகை, சிங்கங்களுக்கு ஓய்வெடுக்கச் சிறந்த இடமாக இருக்கிறது. காட்டு எருதை வேட்டையாடிய களைப்பில் எல்லாச் சிங்கங்களும் ஓய்வெடுக்கின்றன. எருதை வேட்டையாடும்போது தாய் சிங்கம் காயம்பட்டிருப்பது அடுத்த நாள்தான் மற்றவர்களுக்குத் தெரிந்தது. அதன் குட்டி அதனோடு படுத்துத் தூங்குகிறது. காயத்தோடு தாய் சிங்கம் படுத்திருந்தது. நான்கு நாள்கள் தாண்டி விட்டது. இப்போதைக்குக் குட்டி சிங்கத்திற்கு இருக்கிற ஒரே நம்பிக்கை தாயும், அதனுடைய பாலும்தான். இன்னும் நான்கைந்து மாதத்திற்குக் குட்டிக்குத் தாய்ப்பால் அவசியம் தேவைப்படுகிறது. சிங்கத்தின் குட்டி பசியின் தீவிரத்தால் தாயிடம் பால் குடிக்க முயல்கிறது. காயம்பட்டு வலியில் கிடக்கிற தாய் சிங்கம் குட்டியைத் தள்ளி விடுகிறது. ஆனால், விதி விடுவதாக இல்லை; தாய் உயிர்பிழைக்க உடலோடு போராடிக்கொண்டிருக்கிறது. குட்டி உயிர் பிழைக்கத் தாயின் மடியில் போராடிக்கொண்டிருக்கிறது. தன்னிடம் பால் இல்லையென்றாலும் தாய் சிங்கம், குட்டி சிங்கத்தை நாக்கால் தடவிக்கொடுக்கிறது. அப்போதைக்கு குட்டி சிங்கத்திற்கு அந்த அரவணைப்பு தேவையானதாகவும் போதுமானதாகவும் இருக்கிறது. எருதை வேட்டையாடிய நினைவுகளைத் தவிர  சிங்கங்களுக்கு இப்போதைக்கு வேறு உணவு இல்லை.

`சர்வைவல் எப்போதும் பசியை நினைவுபடுத்திக்' கொண்டே இருக்கும். பசி எல்லா உயிரினங்களுக்கும் ஒரு எல்லைக் கோட்டை வகுத்திருக்கும். அதைத் தாண்டும் போதுதான் ரத்தம், காயம், உயிரிழப்பு எல்லாமே. அந்த எல்லைக்கோட்டை தாண்டி `நான் ராஜா' ஆன விலங்குகள் மிகக் குறைவு!

அவை நாளை…


டிரெண்டிங் @ விகடன்

[X] Close

[X] Close