ஓய்வுகாலத் திட்டமிடலில் தவிர்க்கவேண்டிய 5 தவறுகள்! | 5 mistakes to avoid while planning for your retirement

வெளியிடப்பட்ட நேரம்: 16:06 (29/03/2019)

கடைசி தொடர்பு:16:06 (29/03/2019)

ஓய்வுகாலத் திட்டமிடலில் தவிர்க்கவேண்டிய 5 தவறுகள்!

வேலைக்குச் செல்ல ஆரம்பித்ததும், மதிய உணவு எடுத்துச் செல்வதற்காக புதிதாக டிபன் பாக்ஸ் வாங்குவது போல, ஒருவர் சம்பாதிக்க ஆரம்பித்ததும், மாதம் ஒன்றுக்குக் குறைந்தபட்சம் 1,000 ரூபாயை ஓய்வுக்காலத்திற்கான முதலீட்டிற்கு ஒதுக்குவது அவசியம்.

ஓய்வுகாலத் திட்டமிடலில் தவிர்க்கவேண்டிய 5 தவறுகள்!

ல்வி, திருமணம், சொந்த வீடு, கார் போன்ற மற்ற எதிர்காலத் தேவைக்கான முதலீட்டைக் காட்டிலும், ஒருவருடைய ஓய்வுக்காலத் தேவைக்கான முதலீடு மிகவும் முக்கியமானது. இன்னும் சொல்லப்போனால், சம்பாதிக்க ஆரம்பித்த முதல் மாதத்திலிருந்தே இதற்கான முதலீட்டை ஆரம்பித்துவிட வேண்டும். இன்றைய நிலையில், பெரும்பாலானவர்கள் மாத வருமானத்திலிருந்து ஒரு பகுதியை ஓய்வுக்கால முதலீட்டுத் திட்டங்களுக்கு ஒதுக்குகிறார்கள் என்றாலும்கூட, அதுசார்ந்து திட்டமிடுவதில் மக்கள் அதிகம் தவறுசெய்கிறார்கள் என்கிற குற்றச்சாட்டு, நிதி ஆலோசகர்கள் மத்தியில் தொடர்ந்து இருக்கிறது.

லேட்டாக முதலீடு செய்வது!

வேலைக்குச் செல்ல ஆரம்பித்ததும், மதிய உணவு எடுத்துச் செல்வதற்காக புதிதாக டிபன்பாக்ஸ் வாங்குவதுபோல, ஒருவர் சம்பாதிக்க ஆரம்பித்ததும் மாதம் ஒன்றுக்குக் குறைந்தபட்சம் 1,000 ரூபாயை ஓய்வுக்காலத்துக்கான முதலீட்டுக்கு ஒதுக்குவது அவசியம். ஆனால், இன்று பலர் 35 வயதுக்குமேல்தான் ஓய்வுக்காலம் பற்றியே யோசிக்கிறார்கள். அதன் பிறகு முதலீட்டை ஆரம்பிப்பது முதலீட்டின் மீதான வருமானத்தைத்தான் குறைக்கும். எப்போதுமே சரியான நேரத்தில் செய்யும் செயலுக்கும், சரியான நேரத்தில் கிடைக்கும் உதவிக்கும்தான் மதிப்பும் மரியாதையும் அதிகம். அப்படித்தான், காலத்தைக் கடத்தாமல் விரைவாகச் செய்யும் முதலீடுகளும் அதிகமான வருமானத்தைக் கொடுக்கும்.

ஓய்வுக்காலத் திட்டமிடலில்

உதாரணத்துக்கு, 25 வயதில் மாதம் ஒன்றுக்கு 5,000 ரூபாயை எஸ்.ஐ.பி முறையில் மியூச்சுவல் ஃபண்டில் முதலீடு செய்வதாக வைத்துக்கொள்வோம். இந்த முதலீட்டின் மீதான வருமானம், தோராயமாக 20 சதவிகிதம் எனக்கொண்டால் (சிறந்த மியூச்சுவல் ஃபண்டைத் தேர்வுசெய்து முதலீடு செய்யும்பட்சத்தில், நீண்டகால முதலீடு என்பதால் இதைவிட அதிக வருமானம் கிடைக்கவும் வாய்ப்பு இருக்கிறது), முதலீட்டுக் காலம் 35 ஆண்டுகளுக்குப் பிறகு கிடைக்கும் வருமானம் 5.61 கோடி ரூபாயாக (தோராயமாகப் பணவீக்க விகிதம் 6%) இருக்கும். 35 ஆண்டுகளில் செய்த மொத்த முதலீட்டுத் தொகை 21 லட்சம் ரூபாய். ஆனால், ஓய்வுக்காலத்துக்கான முதலீட்டை, ஒருவர் தன்னுடைய 40 வயதில் மாதம் ஒன்றுக்கு 10,000 ரூபாயை 20 ஆண்டுகள் முதலீடு செய்கிறார் எனக்கொள்வோம். அந்த முதலீட்டுக்கும் தோராயமாக 20 சதவிகிதம் வருமானம் கிடைத்தால், அவருடைய 60-வது வயதில் கிடைக்கும் மொத்த வருமானம் 1.31 கோடி ரூபாயாக இருக்கும். 20 ஆண்டுகளில் செய்த மொத்த முதலீட்டுத்தொகை 24 லட்சம். மாதம் ஒன்றுக்கு 5,000 ரூபாயை அதிகமாக முதலீடு செய்தாலும், 15 வருடம் தாமதமாக முதலீட்டை ஆரம்பித்ததால், முதலீட்டின் இறுதியில் கிடைக்கும் மொத்த வருமானம் குறையும்.

50 வயதில் வி.ஆர்.எஸ்!

ஓய்வுக்காலத் திட்டமிடலில்

ஒரு பணியாளருக்கு ஓய்வு என்பது பெரும்பாலான துறைகளில், அவருடைய 58-60 வயதில்தான் வழங்கப்படுகிறது. ஆனால், இன்றைய நிலையில் பெரும்பாலானவர்கள் தங்களின் 50 வயதிலேயே ஓய்வுக்காலத்தை அனுபவிக்கத் திட்டமிடுகிறார்கள். இது தவறில்லை என்றாலும், முதலீட்டுத் திட்டங்களை முறைப்படுத்திக்கொண்ட பிறகுதான், வி.ஆர்.எஸ் வாங்குவது பற்றி யோசிக்க வேண்டும். ஆனால், பெரும்பாலானவர்கள் செய்யும் தவறு, நிறுவனம் தரும் பணிக்கொடை மற்றும் பி.எஃப் சேமிப்புத் தொகையை மட்டுமே நம்பி வி.ஆர்.எஸ் பெறுகிறார்கள். இந்தத் தொகை மட்டுமே, மீதமிருக்கும் நாள்களைக் கழிப்பதற்கு போதுமானதாக இருக்காது.

ஒருவர் ஓய்வுக்காலத்துக்கு முன்பாகவே வி.ஆர்.எஸ். வாங்க நினைத்தால், சம்பாதிக்க ஆரம்பித்த நாளிலிருந்து குறைந்தபட்சம் அவருடைய மாத வருமானத்தில் 20 முதல் 25 சதவிகிதத் தொகையை ஒவ்வொரு மாதமும் முதலீடு செய்திருக்க வேண்டும். அப்போதுதான் வி.ஆர்.எஸ். வாங்கும்போது முதலீட்டிலிருந்து கிடைக்கும் வருமானம், பி.எஃப் மற்றும் நிறுவனம் தரும் பணிக்கொடை என எல்லாம் சேர்த்து, மீதமிருக்கும் நாள்களைக் கழிப்பதற்கு உதவியாக இருக்கும்.

இன்ஷூரன்ஸ் பாலிசிகளில் முதலீடு!

ஓய்வுக்காலத் திட்டமிடலில்

இன்ஷூரன்ஸ் நிறுவனங்கள் வாடிக்கையாளர்களைக் கவர்வதற்காக சில்ட்ரன்ஸ் பிளான், ரிட்டையர்மென்ட் பிளான் என பாலிசிகளுக்குப் பெயர்களை வைத்து விற்பனை செய்துவருகிறார்கள். அதனால்தான் இன்று ஓய்வுக்காலத்துக்காக இன்ஷூரன்ஸ் பாலிசிகளை ஏராளமாக வாங்கும் பழக்கம் அதிகரித்திருக்கிறது. பெரும்பாலானவர்கள் ஓய்வுக்காலத்துக்காக 10 முதல் 15 பாலிசிகளை வாங்கி, அதற்காக மாதாமாதம் ப்ரீமியமும் கட்டிக்கொண்டிருக்கிறார்கள். இதைவிட ஓய்வுக்கால முதலீட்டைத் தவறான முறையில் யாராலும் அணுக முடியாது. இன்ஷூரன்ஸ் திட்டங்களை முதலீடாக நினைப்பது முட்டாள்தனத்தின் உச்சகட்டம் என்றுதான் சொல்ல வேண்டும். இன்ஷூரன்ஸ் என்பது, பாதுகாப்புக்காக எடுத்துக்கொள்ளக்கூடிய ஒரு விஷயம். சொந்தமாக வைத்திருக்கும் வீட்டுக்கு, காருக்கு, பைக்குக்கு இஷூரன்ஸ் எடுத்துக்கொள்வதுபோலத்தான், ஒரு மனிதனுக்கும். இதை முதலில் புரிந்துகொண்டு, இன்ஷூரன்ஸ் திட்டங்களை முதலீட்டுக் கண்ணோட்டத்தில் பார்க்காமல் இருங்கள். குறிப்பாக, ஓய்வுக்காலத்துக்கென இன்ஷூரன்ஸ் திட்டங்களை எடுக்காதீர்கள். 

ஹெல்த் கவர் குறைவாக வைத்திருப்பது!

ஓய்வுக்காலத் திட்டமிடலில்

நிம்மதியான ஓய்வுக்காலத்துக்கு, பணம் மட்டுமே போதாது; ஆரோக்கியமும் அவசியம். ஆனால், இன்றைய உணவுப்பழக்கங்கள் மற்றும் இதர பிரச்னைகளால் ஓய்வுக்காலத்தை ஆரோக்கியமாகவும் நிம்மதியாகவும் கழிக்க முடியுமா என்பது சந்தேகம்தான். அன்றைய மருத்துவச் செலவுகளை சமாளிப்பதற்கு, இன்றிலிருந்தே ஹெல்த் இன்ஷூரஸ் கவரேஜை அதிகப்படுத்திக்கொண்டே வருவது அவசியம். ஆனால், நம்மில் பெரும்பாலானவர்கள் முதலீட்டுக்கு முக்கியத்துவம் கொடுப்பதுபோல, ஹெல்த் இன்ஷூரன்ஸ் பாலிசிகளுக்கு முக்கியத்துவம் கொடுப்பதில்லை. வயதான காலத்தில் ஏற்படும் உடல் உபாதைகளுக்கும், மருத்துவச் செலவுகளுக்கும் மூன்று லட்சம் ரூபாய் ஹெல்த் கவரேஜ் இருந்தால் மட்டும் போதாது. அதனால் வருடா வருடம் ஹெல்த் இன்ஷூரன்ஸ் பாலிசி கவரேஜை அதிகப்படுத்திக்கொள்வது முக்கியம்.

இளம் வயதிலேயே ஹெல்த் இன்ஷூரன்ஸ் பாலிசிகளை எடுத்துக்கொள்ளும்பட்சத்தில், ஓய்வுக்காலம் வரையிலும் குறைவான ப்ரீமியம்தான் செலுத்தவேண்டி இருக்கும். 50 வயது வரை ப்ரீமியம் செலுத்தினால் போதும், 75 வயது வரையிலும் பயன்தரக்கூடிய ஹெல்த் இன்ஷூரன்ஸ் பாலிசிகள் இன்று ஏராளமாகக் கிடைக்கின்றன. மேலும், ப்ரீமியம் செலுத்தும் காலங்களில், இன்ஷூரன்ஸ் பாலிசிகளைப் பயன்படுத்தவில்லை என்றால், வருடாவருடம் ஆட்டோமேட்டிக்காக ஹெல்த் கவரேஜ் அதிகரித்துக்கொண்டே இருக்கும். தேவைப்படும்போது அதைப் பயன்படுத்திக்கொள்ளலாம். 

தவறான முதலீடுகளைத் தேர்வுசெய்வது!

ஓய்வுக்காலத் திட்டமிடலில்

``நாலு நிலத்தை வாங்கிப் போடு, இல்லைன்னா வீட்டை வாங்கிப் போடு. இப்போ இல்லைன்னாலும் ஓய்வுக்காலத்துக்கு அது பயன்படும்" என்பதே நம்மில் பெரும்பாலானோரின் எண்ணம். ஓய்வுக்காலத்துக்காக நிலத்திலும் வீட்டிலும் முதலீடு செய்வது சரியான அணுகுமுறை கிடையாது. ஓய்வுக்குப் பிறகு, தேவைக்காக வீட்டையும் நிலத்தையும் விற்க முடிவுசெய்தால், அதைத் தெரிந்துவைத்துக்கொண்டு, வாங்க வருபவர்கள் அடிமாட்டு விலைக்கே கேட்பார்கள். மேலும், வீட்டையும் நிலத்தையும் நினைத்த நேரத்தில் விற்று பணமாக்க முடியாது.

அதேபோல்தான் தங்கத்தின் மீதான ஓய்வுக்கால முதலீடும். வீடு, நிலம், தங்கம் ஆகிய மூன்றும் தேவைக்குத்தானே தவிர, அவற்றை முதலீட்டுக் கண்ணோட்டத்தில் அணுகக் கூடாது. ஓய்வுக்காலத்துக்குப் பிறகு, ஒருசிலர் நிறுவனத்திலிருந்து கிடைக்கும் மொத்த பணத்தை, அதிக லாபம் பார்க்கலாம் என நினைத்து பங்குச்சந்தையில் முதலீடு செய்வார்கள். ஒருவருடைய வயது, ரிஸ்க் எடுக்கும் தன்மையைப் பொறுத்துதான் பங்குச்சந்தையில் முதலீடுகளை மேற்கொள்ள வேண்டும். வயதான காலத்தில் பேராசைப்பட்டு அதிக ரிஸ்க் எடுக்க நினைத்தால், ஆபத்தும் சேதாரமும் நமக்குத்தான். 


டிரெண்டிங் @ விகடன்