Published:Updated:

நிதி ஆலோசகர்கள்.... முதலீட்டை முழுங்கும் முதலைகளா?

Vikatan Correspondent
நிதி ஆலோசகர்கள்.... முதலீட்டை முழுங்கும் முதலைகளா?
நிதி ஆலோசகர்கள்.... முதலீட்டை முழுங்கும் முதலைகளா?
நிதி ஆலோசகர்கள்.... முதலீட்டை முழுங்கும் முதலைகளா?

நாணயம் விகடன்: 01-15 நவம்பர், 2007

 'பங்குச் சந்தை 20 ஆயிரம் புள்ளிகளைத் தொட்டுக்கொண்டிருக்கிறதே... அப்படி என்ன அதில் மோகம் இருக்கிறது?’ என்று அறிந்துகொள்ள கடவுளுக்கு ஆசை வந்துவிட்டது.

அவர் விசாரித்தவரையில் நிதி ஆலோசகர்களின் யோசனைப்படிதான் எல்லோரும் செயல்படுகிறார்கள் என்று தகவல் சொன்னார்கள்.

 அது உண்மையா என்று தெரிந்துகொள்ள பங்குச் சந்தை முதலீட்டாளர்கள் அத்தனை பேரையும் தன்னெதிரே வந்து கூடச் செய்தார். ''உங்களில் நிதி ஆலோசகர்களின் சொல்படி கேட்டு முதலீடு செய் பவர்கள் ஒரு வரிசையிலும், மற்றவர்கள் இன்னொரு வரிசையிலும் நில்லுங்கள்'' என்றார்.

 நிதி ஆலோசகர்களின் சொற்படி கேட்டு முதலீடு செய்பவர்களின் வரிசை மைல் கணக்கில் நீண்டுகொண்டே போனது. இன்னொரு வரிசையில் ஒரே ஒருவர் மட்டும் நின்றிருந்தார்.

 நிதி ஆலோசகர்களின் சொற்படிதான் எல்லோரும் செயல்படுகிறார்கள் என்ற வாதத்தை பொய்யாக்க ஒருவராவது இருக்கிறாரே என்ற எண்ணத்தில் அவர் அருகே போன கடவுள், ''உங்களுடைய முதலீட்டு பாணி என்ன?'' என்றார்.

 அந்த மனிதர் கூலாகச் சொன்னார்: ''அதெல்லாம் எனக்குத் தெரியாது. எங்க ஃபைனான்ஸ் அட்வைசர் என்னிடம், 'யார் என்ன சொன்னாலும் கூட்டத்தோடு போய் நிற்காதீங்க. ஏமாத்திடுவாங்க’னு சொன்னார்'' என்றார்.

 கடவுள் வாழ்க்கையே வெறுத்துப் போனார்.

 கதைதான்... ஆனால், ஒரு முதலீட்டாளரின் முடிவுகளைத் தீர்மானிப்பதில் நிதி ஆலோசகர்களின் பங்கு எந்த அளவுக்கு இருக்கிறது என்பதைச் சொல்லும் கதையாகத்தான் இதைப் பார்க்கவேண்டும்!

 'எந்த முதலீடாக இருந்தாலும் நாம் மண்டையை உடைத்து யோசிக்கத் தேவையில்லை. நிதி ஆலோசகரிடம் பொறுப்பை ஒப்படைத்துவிட்டால் நமக்கான முதலீட்டு வாய்ப்புகளைச் சொல்லிவிடப் போகிறார்’ என்பதுதான் பலருடைய எண்ணமாக இருக்கிறது. ஆனால், கவனமாக இருங்கள், முதலீட்டு ஆலோசகர்கள் என்ற பெயரில் சிலர் உங்கள் முதலீட்டையே சுரண்டிக் கொண்டிருக்கிறார்கள்.

நிதி ஆலோசகர்கள்.... முதலீட்டை முழுங்கும் முதலைகளா?

நிதி ஆலோசகர் ஒருவரை நம்பி ஏமாந்து நிற்கும் சென்னை வாசகி ஒருவரின் அனுபவம் இது!

 ''கையில் உபரியாக இருந்த பத்தாயிரம் ரூபாயை எதில் முதலீடு செய்யலாம்? என்று ஆலோசனை கேட்டு நிதி ஆலோசகர் ஒருவரிடம் போனேன். மிக அருமையான திட்டம். 40% ரிட்டர்ன் கிடைக்கும் என்று சொல்லி ஒரு மியூச்சுவல் ஃபண்ட் திட்டத்தில் முதலீடு செய்ய வைத்தார். நானும் செய்தேன். ஒருவருடத்துக்குப் பிறகு, பணத்தேவை ஏற்பட, அந்த ஃபண்டில் போட்ட தொகையை எடுக்கலாம் என்று போனால், மூன்று ஆண்டுகளுக்கு லாக் இன் பீரியட் கொண்ட குளோஸ்ட் எண்டட் ஃபண்ட் என்று சொல்லி பணத்தை எடுக்க வாய்ப்பில்லை என்று சொல்லிவிட்டார்கள்.

 இத்தனைக்கும் நிதி ஆலோசகரிடம் ஓராண்டுக்குப் பிறகு அந்தப் பணம் தேவைப்படும் என்று சொல்லிஇருந்தேன். ஆனால், ஓப்பன் எண்டட் திட்டத்தை விட குளோஸ்ட் எண்டட் திட்டத்தில் அவருக்கு அதிக கமிஷன் கிடைக்கும் என்பதால் இப்படி என்னை மாட்டி விட்டுவிட்டார்'' என்றார் வேதனையோடு!

இன்னொருவரின் கதை வேறு விதம்.

 ''நிதி ஆலோசகரை நம்பி மொத்தப் பணத்தையும் கொடுத்துவிட்டேன். 'கவலையேபடாதீங்க... உங்களுக்கு சூப்பரான போர்ட்ஃபோலியோ ரெடி பண்ணிடலாம்’ என்று சொல்லி என்னிடம் சில பேப்பர்களில் கையெழுத்து வாங்கிக்கொண்டார். நான் கொடுத்த பணத்தை பங்குச் சந்தையில் போட்டார். மியூச்சுவல் ஃபண்டில் போட்டார். இன்ஷூரன்ஸ் எடுத்ததாகச் சொன்னார். எல்லாம் முடிந்து ஓராண்டு கழித்து ஒரு பேலன்ஸ் ஷீட் கொடுத்தார். அதில், நான் பணத்தை வங்கியில் போட்டிருந்தால் என்ன ரிட்டர்ன் கிடைத்திருக்குமோ, அதைவிடக் குறைவான ரிட்டர்ன் காட்டியது. என்னவென்று விசாரித்தபோது, எனக்குக் கிடைக்க வேண்டிய லாபமெல்லாம், அவருக்கு கமிஷனாகப் போய்க் கொண்டிருந்திருக்கிறது. அந்த அளவுக்கு என்னுடைய முதலீட்டை மாற்றிக்கொண்டே இருந்திருக்கிறார். இந்த வம்பே வேண்டாம் என்று அவரிடமிருந்து விலகி வந்துவிட்டேன்'' என்றார் அந்த வேதனைப்பட்ட இன்னொரு மனிதர்.

 நிதி ஆலோசகர்களிடம் சிக்கல் இருப்பது இந்த இடத்தில்தான். முதலீட்டாளருக்கு எது நன்மை தரும் என்று பார்க்காமல் தனக்கு எதில் அதிக கமிஷன் கிடைக்கும் என்றுதான் பார்க்கிறார்கள். அதிகமாகக் கிடைக்கும் கமிஷனுக்கு ஆசைப்பட்டு முதலீட்டாளர்களின் பணத்தை அடிக்கடி வேறுவேறு திட்டங்களுக்கு மாற்றிக்கொண்டே இருக்கிற நிதி ஆலோசகர்களும் இருக்கிறார்கள். இப்படி அடிக்கடி முதலீட்டை மாற்றுவதால், முதலீட்டாளருக்குப் பாதிப்புதான் ஏற்படும். அதுபற்றி நிதி ஆலோசகர்கள் என்று சொல்லிக்கொள்ளும் இவர்கள் கவலைப்படுவதில்லை.

 ஆடம்பரமாக இருக்கும் அலுவலகங்கள், இவர்கள் மீது அதிகமாக நம்பிக்கை வைக்கத் தூண்டுகின்றன. சிறிய தொகையோடு உள்ளே நுழைந்தாலும் காபி, பிஸ்கட் என்று உபசரிப்பு பலமாக இருக்கும். உங்களுடைய முதலீட்டை இந்தத் திட்டங்களில் போட்டால், அது இப்படியெல்லாம் பெருகும் என்று லேப் டாப்பை வைத்துக்கொண்டு சார்ட்டுகளும் கிராஃபுகளுமாகக் காட்டுவார்கள்.

 இப்படி ஹைடெக்காகக் காட்டப்படும் மோடி மஸ்தான் வலையில் முதலீட்டாளர் வசமாகச் சிக்கிக்கொள்வார். ஆரம்பத்தில் ஸ்டேட்மென்ட் தருகிறோம் என்பார்கள், போனிலேயே ஆலோசனை பெறலாம் என்பார்கள், கவர்ச்சிகரமான பரிசுகளை அறிவிப்பார்கள். ஆனால், நாம் போட்ட முதலீட்டை மட்டும் பெருக்கித் தரவே மாட்டார்கள்.

 இவர்கள் காட்டும் கவர்ச்சியில் மிக முக்கியமானது ஆலோசனைக் கட்டணம் என்று எதுவும் கிடையாது என்பதுதான். இதில் மயங்கித்தான் பலரும் இவர்களிடம் சிக்கிக்கொள்கிறார்கள்.

  ''வெளிநாடுகளில் இந்த நிதி ஆலோசகர் என்ற திட்டம் நடைமுறையில் இருக்கிறது. நம் ஊரில் இன்னும் அந்த அளவுக்குப் பிரபலமாகவில்லை. அதனால், தனக்கு வேண்டிய நிதி ஆலோசனைகளைப் பெற பணம் செலுத்தும் முதலீட்டாளர்களின் எண்ணிக்கை மிகவும் குறைவு. ஆனால், நிதி ஆலோ சகர்கள் தங்களுடைய வருமானத்துக்காகப் பெரிதும் நம்பியிருப்பது முதலீடுகளுக்காகக் கிடைக்கும் கமிஷனைத்தான். அதனால்தான் பலரும் தடம் மாறிப் போய்விடு கிறார்கள்'' என்றார் முதலீட்டாளர் ஒருவர்.

 அதோடு, இங்கு இருக்கும் மிகப்பெரிய குறை எல்லா முதலீட்டு வாய்ப்புகளைப் பற்றியும் தெரிந்த நிதி ஆலோ சகர்கள் அதிக எண்ணிக்கை யில் இல்லாமல் இருப்பது தான்!

 ''இவர்கள் பங்குத் தரகு நிறுவனத்தில் பணியாற்றியிருப்பார்கள். அல்லது, மியூச்சுவல் ஃபண்ட் தேர்வோ, இன்ஷூரன்ஸ் தேர்வோ எழுதியிருப்பார்கள். அல்லது, சி.ஏ. படித்துவிட்டு டேக்ஸ் பற்றித் தெரிந்து வைத்திருப்பார்கள். அதை வைத்துக்கொண்டு தங்கள் துறையைத் தாண்டி முதலீட்டு ஆலோசனைகளைச் சொல்வதாலும் பல குழப்பங்கள் ஏற்படுகின்றன'' என்றார் அந்த முதலீட்டாளர்.

 இப்போது வங்கிகள் பலவற்றிலேயே மியூச்சுவல் ஃபண்ட், ஐ.பி.ஓ. விற்பனை என்று தொடங்கிவிட்டதால், வங்கி அதிகாரிகளும் இந்த நிதி ஆலோசனையில் இறங்கிவிடுகிறார்கள். போதிய தகவல்கள் கையில் இல்லாமல் டார்கெட்டை அடைய வேண்டும் என்பதற்காக இவர்கள் சொல்லும் ஆலோசனை எந்த அளவுக்குப் பயனுள்ளதாக இருக்கும் என்பது சந்தேகம்தான்!

நிதி ஆலோசகர்கள்.... முதலீட்டை முழுங்கும் முதலைகளா?

முதலீட்டாளரின் வயதைப் பற்றியோ அல்லது அவருடைய ரிஸ்க் எடுக்கும் தன்மை பற்றியோ அதிகம் அலட்டிக்கொள்ளாமல் தங்களுடைய கமிஷனை மட்டும் மனதில் வைத்துக்கொண்டு செயல்படுவதால், பாதிப்புக்கு உள்ளாவது முதலீட்டாளர்கள்தான்.

எல்லோருமே இப்படித்தானா?

 முதலீட்டு ஆலோசனை நிறுவனமான ஐ-ஃபேக்டர் ஃபைனான்ஸியல் சர்வீஸ் நிறுவனத்தின் இயக்குநர் பழனியப்பனைக் கேட்டபோது, ''நிதி ஆலோசகர்கள் மீது இப்படி ஒரு குற்றச்சாட்டு இருப்பதை நானும் ஒப்புக்கொள்கிறேன். ஆனால், யாரோ சிலர் செய்யும் தவறுகளுக்காக ஒட்டுமொத்தமாக அந்தப் பிரிவையே குறை சொல்வதை நான் ஒப்புக்கொள்ள முடியாது. நாங்கள் இதைச் சேவையாகத்தான் செய்துவருகிறோம்.

 ஒருவருடைய நிதி ஆதாரத்துக்கு ஏற்ற முதலீட்டு வாய்ப்புகள் அனைத்தையுமே சொல்லி, அதில் உள்ள ரிஸ்க் பற்றியும் எடுத்துச் சொல்லிவிடுகிறோம். அதன்பிறகு, அவர் எடுக்கும் முடிவுக்கு ஏற்ப அவர் முதலீடு செய்வதற்கு உதவி செய்கிறோம். நாங்கள் எந்தத் திட்டத்தையும் முதலீட்டாளர்களிடம் திணிப்பதில்லை. அவர்கள் செய்யும் முதலீட்டுக்கு ஏற்ப எங்களுக்கு கமிஷன் கிடைப்பது உண்மைதான். ஆனால், முதலீடு செய்யும் சுதந்திரம் முதலீட்டாளரிடம்தான் இருக்கிறது. அதனால், எந்த நிர்ப்பந்தமும் அவருக்கு இல்லை. இந்த வழியில் செயல்படாதவர்கள் பணத்துக்காக ஆசைப்படும் போலியான ஆலோசகர்கள்தான்'' என்றார்.

 தனிநபர்களுக்கான முதலீட்டுத் தேவைகளுக்குத் திட்டமிட்டுக் கொடுக்கும் சென்னையைச் சேர்ந்த சங்கரிடம் பேசினோம். இவர் சர்டிஃபைட் ஃபைனான்ஸியல் பிளானர் என்ற படிப்பை முடித்தவர்.

 ''ஃபைனான்ஸியல் பிளானர் என்ற வார்த்தையைப் பயன்படுத்துவது இன்று ஃபேஷனாகிவிட்டது. ஃபைனான்ஸியல் பிளானர் என்று மூன்று ஆண்டுகளுக்கு முன்பு வரை யாரும் இல்லை. ஒவ்வொரு துறைக்கும் தனித்தனியான ஆலோசகர்கள்தான் இருந்தார்கள். இப்போதும் பலர் அப்படித்தான் இருக்கிறார்கள். மக்கள்தான் சரியானவர்களை அடையாளம் கண்டு செயல்படவேண்டும்.

நிதி ஆலோசகர்கள்.... முதலீட்டை முழுங்கும் முதலைகளா?

முதலீடு, இன்ஷூரன்ஸ், வரி, ஓய்வுக்காலம் என்று சகல விதங்களிலும் தனிமனித வாழ்க் கைக்குத் திட்டமிட்டுக் கொடுப் பவர்தான் உண்மையான ஃபைனான் ஸியல் பிளானர். இவைதவிர, வீடு, கார், குழந்தைகளின் கல்வி, திருமணம் போன்ற அனைத்துத் தேவைகளுக்கும் ஏற்ப அவர் களுடைய முழு வாழ்க்கைக்கும் திட்டமிட்டுக் கொடுக்கும் சேவையையும் ஃபைனான்ஸியல் பிளானர் செய்யவேண்டும்'' என்ற அவர், ''இதற்கான கட்டணத்தை முதலீட்டாளரிடம் இருந்தே பெறவேண்டும். இதனால், கமிஷனை எதிர்பார்க்க வேண்டிய தேவை அவருக்கு இருக்காது'' என்றார்.

 ''சிறந்த ஃபைனான்ஸியல் பிளானர்களை எவ்வாறு கண்டு பிடிப்பது?'' என்று ஸ்ரீனிவாசனிடம் கேட்டோம். இவர் சர்டிஃபைட் ஃபைனான்ஸியல் பிளானர் கோர்ஸ் முடித்துவிட்டு தனியார் நிறுவனம் ஒன்றில் துணைத்தலைவராகப் பணிபுரிபவர்.

 ''முறையான கல்வித்தகுதி, முன் அனுபவம், வாடிக்கையாளர்கள் போன்ற விவரங்களை வைத்தே ஒருவரின் திறமையை எடைபோட்டுவிடலாம். கூடவே, உங்களுக்கு ஒரு திட்டத்தை மட்டுமே சொல்லி, அதை எடுத்துக்கொள்ளச் சொல்லி வலியுறுத்துகிறாரா அல்லது பல வாய்ப்புகளை எடுத்துக் கொடுத்து உங்களைச் சுதந்திரமாக முடிவெடுக்க அனுமதிக்கிறாரா என்று பார்க்க வேண்டும். அதோடு, நீங்கள் வேறொரு முதலீட்டாளரைப் பரிந்துரை செய்தால் உங்களுக்கு கமிஷன் தருகிறாரா... என்று கவனிக்க வேண்டும். இப்படி பல காரணிகளின் அடிப்படையில் ஒரு நிதி ஆலோசகரைத் தேர்ந்தெடுக்கலாம்'' என்றார்.

நிதி ஆலோசகர்கள்.... முதலீட்டை முழுங்கும் முதலைகளா?

களைகள் இல்லாமல் நெற்பயிர் வளர்க்க முடி யாது. ஆனால், களைகளை அடையாளம் கண்டு கொள்ளாமல் அதுவும் நெற்பயிர்தான் என்று நினைத்து தண்ணீர் ஊற்றிக்கொண்டே இருந்தால் அது தவறு. எனவே, நிதி ஆலோசகரின் துணையோடு முதலீட்டு முடிவுகளை எடுப்பதுதான் சரியாக இருக்கும். ஆனால், அதற்கு முன்னதாக நல்ல நிதி ஆலோசகரைத் தெளிவாக ஆராய்ந்து தேர்ந்தெடுத்துக்கொள்ள வேண்டியது அவசியம்!

ஏன் இப்படிச் செய்கிறார்கள்?

 நிதி ஆலோசகர்கள் முதலீட்டாளர்களைத் தூண்டுவது பெரும்பாலும் மியூச்சுவல் ஃபண்ட் புதிய திட்டங்களில் சேரச் சொல்லித்தான்! அதற்குக் காரணம், அந்த நிதி ஆலோசகர்களுக்குக் கொடுக்கப்படும் இலக்குதான். ஒரு திட்டத்தின் மூலம் சுமார் 100 கோடி ரூபாய் நிதி திரட்டத் திட்டமிடும் மியூச்சுவல் ஃபண்ட் நிறுவனம், 5 கோடிக்கு மேல் நிதியைத் திரட்டித் தரும் நிதி ஆலோசனை நிறுவனத்துக்கு பெரிய தொகையை கமிஷனாகத் தர சம்மதிக்கிறது.

 அந்த நிதி ஆலோசனை நிறுவனம் தன்னுடைய ஆளுமைக்குக் கீழ் வரும் நிதி ஆலோசகர்களுக்கு இந்தத் தகவலைச் சொல்லி, முதலீட்டாளர்களை இந்தத் திட்டத்தில் சேர்க்க வைக்கிறது. வழக்கமாக அந்த நிதி ஆலோசனை நிறுவனத்திடம் இருந்து கிடைக்கும் கமிஷனை விட இதற்கு அதிக தொகை கிடைப்பதால் நிதி ஆலோசகர்களும் இந்தக் குறிப்பிட்ட திட்டத்தை நோக்கி முதலீட்டாளர்களைச் செலுத்துகிறார்கள்.

 ஆக, எங்கோ வைக்கப்படும் தூண்டில், படிப்படியாக இறங்கி முதலீட்டாளர்களைச் சிக்க வைக்கிறது!

 ஏஜென்ட் ஆகும் வங்கிகள்!

 இப்போது இன்ஷூரன்ஸ், மியூச்சுவல் ஃபண்ட், பங்குத் தரகு போன்ற துறைகளில் சில வங்கிகளும் ஈடுபடுவதால் இந்த நிதி ஆலோசனை வேலைகளை அவர்களும் செய்கிறார்கள். நேரடியாக வங்கி அதிகாரிகளே இந்தச் செயலில் ஈடுபடுவதில்லை. அதற்கென வங்கிகளில் தனிப்பிரிவுகள் இருக்கின்றன.

 வங்கி அதிகாரிகளின் வேலை எல்லாம், தங்கள் வங்கியில் கணக்கு வைத்திருக்கும் வசதியான வாடிக்கையாளர்களை அடையாளம் காட்டுவது மட்டும்தான். இப்படி அதிக எண்ணிக்கையில் வாடிக்கையாளர்களை அடையாளம் காட்டும் அதிகாரிகளுக்குச் சிறப்பான ஊக்கத்தொகை எல்லாம் கிடைப்பதால், திட்டங்களைப் பற்றியோ, முதலீட்டாளர்களைப் பற்றியோ கவலைப்படாமல் வாடிக்கையாளர்களை அடையாளம் காட்டிவிடுகிறார்கள். வங்கி அதிகாரிகளே சொல்கிறார்கள் என்பதால், முதலீட்டாளர்களும் நம்பி முதலீட்டைச் செய்துவிடுகிறார்கள். சில வங்கிகள்தான் முதலீட்டுப் பிரிவு தனி, வங்கிச் சேவை தனி என்று ஒன்றுக்கு ஒன்று தொடர்புபடுத்தாமல் செயல்பட்டு வருகின்றன.

 ஆர்.ரெங்கராஜ், ஸ்ரீஹரி

படங்கள்: உசேன்