Published:Updated:

ரயில் கட்டண உயர்வு அமலுக்கு வருகிறது; சீசன் டிக்கெட் கட்டணம் குறைய வாய்ப்பு!

விகடன் விமர்சனக்குழு
 ரயில் கட்டண உயர்வு அமலுக்கு வருகிறது; சீசன் டிக்கெட் கட்டணம் குறைய வாய்ப்பு!
ரயில் கட்டண உயர்வு அமலுக்கு வருகிறது; சீசன் டிக்கெட் கட்டணம் குறைய வாய்ப்பு!
 ரயில் கட்டண உயர்வு அமலுக்கு வருகிறது; சீசன் டிக்கெட் கட்டணம் குறைய வாய்ப்பு!

சென்னை: ரயில்வேதுறை அறிவித்த பயணிகள் ரயில் கட்டணம் மற்றும் சரக்கு கட்டண உயர்வு நாளை  புதன்கிழமை முதல் அமலுக்கு வருகிறது. மும்பை பா.ஜனதா- சிவசேனா எம்.பி.க்களின் வலியுறுத்தல் காரணமாக உயர்த்தப்பட்ட புறநகர் ரயில்களுக்கான சீசன் டிக்கெட் கட்டணம், ஓரளவு குறைக்கப்படும் என தகவல் வெளியாகி உள்ளது.

பயணிகள் ரயில் கட்டணம் 14.2 சதவீதம், சரக்கு கட்டணம் 6.5 சதவீதம் உயர்த்தப்படுவதாகவும், இது வருகிற 25 ஆம் தேதி ( நாளை) முதல் அமலுக்கு வருவதாகவும் ரயில்வே நிர்வாகம் அறிவித்திருந்தது.

ரயில் கட்டண உயர்வு நாளை முதல் அமலுக்கு வரும் என்று அறிவிக்கப்பட்டாலும், இன்று நள்ளிரவு 12 மணிக்கு மேல் புறப்படும் ரயில்களில் இக்கட்டண உயர்வு அமலாகிவிடும்.  முன்பதிவு செய்த பயணிகள் கூடுதல் கட்டணத்தை செலுத்துவதற்கு நாடு முழுவதும் முக்கிய நகரங்களில் சிறப்பு கவுண்டர்கள் திறக்கப்பட்டுள்ளன. இதுதவிர ரயிலில் பயணம் செய்யும்போது டிக்கெட் பரிசோதகரிடமும் கூடுதல் கட்டணத்தை செலுத்தலாம்.

சிறப்பு கவுன்டர்கள்

தமிழகத்தில் சென்னை சென்ட்ரலில் 2 சிறப்பு கவுன்டர்களும், எழும்பூரில் ஒரு சிறப்பு கவுன்டரும் திறக்கப்படுகிறது.

இவை நாளை முதல் செயல்படும். முன்பதிவு செய்த பயணிகள் சிறப்பு கவுன்டர்களில் கூடுதல் கட்டணத்தை செலுத்தி ரசீது பெற்றுக் கொள்ளலாம். மேலும் அனைத்து முன்பதிவு மையங்களிலும் கூடுதல் கட்டணத்தை செலுத்தலாம்.

பயணத்தின்போதும் டிக்கெட் பரிசோதகரிடம் பழைய மற்றும் புதிய கட்டணத்திற்கான வித்தியாச தொகையை செலுத்தி ரசீது பெற்றுக் கொள்ளலாம்.

சீசன் டிக்கெட்டுக்கு கூடுதல் கட்டணம் தேவையில்லை

சீசன் டிக்கெட் பயணிகளை பொறுத்தவரை அவர்கள் எந்த காலத்திற்கு எடுத்திருக்கிறார்களோ அதுவரை அதே கட்டணத்தில் பயணம் செய்யலாம். அவர்கள் கூடுதல் கட்டணம் செலுத்த தேவையில்லை.

நாளை முதல் புதிதாக சீசன் டிக்கெட் எடுத்தவர்கள் மட்டுமே புதிய கட்டணம் செலுத்தி பெற்றுக் கொள்ளலாம். பொதுமக்கள் தங்கள் வசதிக்கேற்ப எந்த ரெயில் நிலையங்களிலும் கூடுதல் கட்டணம் செலுத்தலாம்.

தொலைதூர ரயில்கள் கட்டண உயர்வு விவரம்

தொலைதூர ரயில்களை பொறுத்தவரை,  சென்னை-நெல்லை 2-ம் வகுப்பு படுக்கை வசதி கட்டணம் ரூ.340-லிருந்து ரூ.385 ஆக உயர்த்தபட்டுள்ளது. 3 அடுக்கு குளிர் சாதன பெட்டிக் கட்டணம் ரூ. 880-லிருந்து ரூ.1000 ஆக உயருகிறது. 2 அடுக்கு குளிர் சாதன பெட்டிக் கட்டணம் ரூ.1245-லிருந்து ரூ.1410 ஆக உயர்த்தப்படுகிறது.

சென்னை-தூத்துக்குடி 2ம் வகுப்பு படுக்கை வசதி கட்டணம் ரூ.385 ஆக உயருகிறது . 3 அடுக்கு குளிர்சாதன பெட்டிக் கட்டணம் ரூ.880ல் இருந்து ரூ.1000 ஆக உயருகிறது.  2 அடுக்கு குளிர்சாதன பெட்டிக் கட்டணம் ரூ.1,245ல் இருந்து ரூ.1,410 ஆக உயருகிறது. முதல் வகுப்பு குளிர்சாதனக் கட்டணம் ரூ.2,095ல் இருந்து ரூ.2,385 ஆக உயருகிறது. 

சென்னை-கோவை குளிர்சாதன இருக்கை வசதி கட்டணம் ரூ.665 ஆக உயருகிறது .

சென்னை-மதுரை  2ம் வகுப்பு படுக்கை வசதி கட்டணம் ரூ.315 ஆக உயருகிறது.  2 அடுக்கு இருக்கை வசதிக் கட்டணம் ரூ.180 ஆக உயர்த்தப்பட்டு உள்ளது.

சென்னை-குமரி 2ம் வகுப்பு படுக்கை வசதி கட்டணம் ரூ.370ல் இருந்து ரூ.415 ஆக உயருகிறது.  3 அடுக்கு குளிர்சாதன பெட்டிக் கட்டணம் ரூ.960ல் இருந்து ரூ.1085 ஆக உயருகிறது. 2 அடுக்கு குளிர்சாதன பெட்டிக் கட்டணம்  ரூ.1355ல் இருந்து ரூ.1545 ஆக உயருகிறது  முதல் வகுப்பு குளிர்சாதன பெட்டிக் கட்டணம் ரூ.2,295ல் இருந்து  ரூ.2,690 ஆக உயருகிறது என்று அறிவிப்பு வெளியிடப்பட்டுள்ளது.

எக்ஸ்பிரஸ் ரயில்களில் உள்ள முன்பதிவு அல்லாத பெட்டியில்  பயணம் செய்வதற்கான கட்டணமும் அதிகரிக்கப்பட்டுள்ளது. திருச்சி செல்ல ரூ.97 ஆக இருந்த கட்டணம் இனி ரூ.111 ஆகவும், மதுரை மற்றும் கோவை செல்ல ரூ.131 ஆக இருந்த கட்டணம் ரூ.150 ஆகவும், திருநெல்வேலி செல்ல ரூ.162 ஆக இருந்த கட்டணம் ரூ.185 ஆகவும் உயர்த்தப்பட்டுள்ளது.

சூப்பர் பாஸ்ட் ரயிலில் உள்ள பொதுப் பெட்டியில் பயணம் செய்தால், மேற்கண்ட கட்டணத்துடன் கூடுதலாக ரூ.15 செலுத்த வேண்டும் என்று அறிவிக்கப்பட்டுள்ளது.

புறநகர் ரயில் கட்டணம்

புறநகர் மின்சார ரயில் கட்டணம், எக்ஸ்பிரஸ் ரயிலில் முன்பதிவு இல்லாத பெட்டி, மாதாந்திர சீசன்

 ரயில் கட்டண உயர்வு அமலுக்கு வருகிறது; சீசன் டிக்கெட் கட்டணம் குறைய வாய்ப்பு!

டிக்கெட் ஆகியவற்றிற்கு புதிய கட்டணம் விவரத்தை தெற்கு ரயில்வே அறிவித்துள்ளது.

சென்னை கடற்கரை– மாம்பலம் இடையே தற்போது ரூ.5 வசூலிக்கப்படும் கட்டணத்தில் எந்த மாற்றமும் இல்லை. ஆனால் முதல் வகுப்பு கட்டணம் ரூ.43–ல் இருந்து ரூ.60 ஆக உயர்த்தப்பட்டுள்ளது.

கடற்கரை–தாம்பரம் இடையே (30 கிலோ மீட்டர்) இரண்டாம் வகுப்பு கட்டணம் ரூ.10 உயர்த்தப்படவில்லை. ஆனால் முதல் வகுப்பு கட்டணம் ரூ.108–ல் இருந்து ரூ.124 ஆக உயர்ந்துள்ளது. கடற்கரை–வேளச்சேரிக்கு 2–ம் வகுப்பு கட்டணம் ரூ.5–ல் இருந்து ரூ.10 ஆக உயர்ந்துள்ளது. முதல் வகுப்பு கட்டணம் ரூ.80–ல் இருந்து ரூ.92 ஆக உயர்த்தப்பட்டுள்ளது.

மாதாந்திர சீசன் டிக்கெட் கட்டணம் கணிசமாக உயர்ந்துள்ளது. முன்பு ஒரு நேர பயண கட்டணத்தை 15–ஆல் பெருக்கி வரும் தொகையை மாதாந்திர சீசன் டிக்கெட் கட்டணமாக வசூலிக்கப்பட்டது. தற்போது ஒரு நேர பயண கட்டணத்தை 30–ல் பெருக்கி வரும் தொகையை மாதாந்திர கட்டணமாக வசூலிக்கப்பட உள்ளது.

உதாரணமாக கடற்கரை– மாம்பலம் இடையே ஒருநேர பயணத்துக்கான புதிய கட்டணம் ரூ.5–ஐ ரூ.30–ஆல் பெருக்கி ரூ.150 மாதாந்திர சீசன் டிக்கெட்டாக வசூலிக்கப்பட உள்ளது. அதுவே முதல் வகுப்பு கட்டணமாக இருந்தால் மாதாந்திர சீசன் கட்டணத்தை நான்கால் பெருக்க வேண்டும். அதன்படி பார்த்தால் புதிய கட்டணமாக ரூ.600 வசூலிக்கப்படும்.

மும்பை பா.ஜனதா - சிவசேனா எம்.பி.க்கள் எதிர்ப்பு

இந்நிலையில் ரயில் கட்டண உயர்வால் மும்பை புறநகர் மக்கள் கடுமையாக பாதிக்கப்படுவார்கள் என்றும், இதனால் புறநகர் ரயில்களுக்கான கட்டணம் உயர்த்துவதை மறுபரிசீலனை செய்ய வேண்டும் என்றும், ரயில்வே அமைச்சர் சதானந்த கவுடாவிடம், மகாராஷ்ட்ரா மாநில பாஜக மற்றும் சிவசேனா எம்.பி.க்கள் நேரில் வலியுறுத்தினர்.

மகாராஷ்ட்ராவின் மும்பை மற்றும் தானே பகுதிகளைச் சேர்ந்த 10 எம்.பி.க்கள், டெல்லியில் அமைச்சர் சதானந்த கவுடாவை இன்று சந்தித்துப் பேசினர். அப்போது, ரயில் கட்டண உயர்வின் காரணமாக மும்பை புறநகர் ரயில்களின் கட்டணம் இரு மடங்கு வரை உயரும் வாய்ப்புள்ளதாகவும், இது மும்பை மக்களைப் பெரிதும் பாதிக்கும் என்றும் மத்திய அமைச்சரிடம், எம்.பி.க்கள் கூறியதாக தெரிகிறது.
 
மும்பை புறநகர் ரயில்களுக்கான கட்டணம் உயர்த்துவதை மறுபரிசீலனை செய்வதுடன், ரயில்வே பட்ஜெட்டில், மும்பை புறநகர் ரயில்களின் முன்னேற்றத்திற்கு தேவையான திட்டங்களை அறிவிக்க வேண்டும் என்றும் அவர்கள் வலியுறுத்தியதாக கூறப்படுகிறது.

இந்த சந்திப்பு குறித்து சிவசேனா கட்சியை சேர்ந்த எம்.பி. கீர்த்தி சோமையா கூறுகையில், ரயில் கட்டணத்தை உயர்த்தும் முடிவு முந்தைய காங்கிரஸ் கட்சியின் அறிவிப்பு என்பதை நாங்கள் உணர்ந்துள்ளோம். ஆனால், இந்த முடிவு பொது மக்களை வெகுவாக பாதிக்கும். எனவே, அமைச்சர் தனது சகாக்களுடன் ஆலோசித்து இதற்கான தீர்வை விரைவில் முன்வைக்க வேண்டும். இதுமட்டுமின்றி மும்பை ரயில்வேக்கு தேவையான நீண்ட காலத் திட்டங்கள் குறித்தும் விவாதித்தோம்" என்றார்.

சீசன் ரயில் கட்டணம் குறையலாம்

இதனிடையே ரயில் கட்டண உயர்வு வாபஸ் பெறப்பட மாட்டாது என்று மத்திய அரசு திட்டவட்டமாக தெரிவித்துவிட்டபோதிலும், புறநகர் ரயில் பயணிகளின் சுமையை ஓரளவு குறைக்க, புறநகர் ரயிலுக்கான கட்டண உயர்வை சற்று தளர்த்துவது குறித்து பரிசீலிக்கப்படும் என்றும், இருப்பினும் இதுகுறித்த இறுதி முடிவை பிரதமர் மோடியே எடுப்பார் என்றும் மத்திய அரசு வட்டாரங்கள் தெரிவிக்கின்றன.