இன்பாக்ஸ்

08-07-09 இன்பாக்ஸ் . . 'வேட்டைக்காரன்' படத்தில் இருந்தே அதிரடியை ஆரம்பிக்கலாம் என்பது முடிவாம். ரஜினியின் 'சிங்கம் ஒன்று புறப்பட்டதே...' ஸ்டைலில் வேட்டைக்காரனுக்காக செம பரபரப்பான பாடல் ஒன்று தயாராகி இருக்கிறது. அந்த ஒரே பாட்டில் விஜய் அடி மட்டத்திலிருந்து தடாலடி தலைவராவதைப் போல வெளுத்து வாங்குகிறதாம் விறுவிறுப்பான விஷூவல்ஸ். சர்வே எடுத்தாச்சாங்ணா?

. ஆர்யா தயாரிப்பாளராகி இருக்கிறார். 'த ஷோ பீப்பிள்' என்ற தன் நிறுவனத்தின் பெயரில் 'படித்துறை' என்ற படத்தைத் தயாரிக்க இருக்கிறார். புதிய இயக்குநர் சுகா இயக்கும் இந்தப் படத்தில் அபிஷேக் என்ற புதுமுகம் நாயகனாக நடிக்கிறார். நாயகி, 'நாடோடிகள்' அனன்யா. பார்யா!

. ஜூன் 24-தெலுங்கானா ராஷ்டிரிய சமிதி கட்சி எம்.பி -யான விஜயசாந்திக்கு 45-வது பிறந்த நாள்! திருப்பதி ஏழுமலையானைத் தரிசனம் செய்ய வந்தவரிடம், 'மேடம் உங்க வயசு என்ன?' என்று நிருபர்கள் ரவுண்டு கட்டிக் கேட்க, 'அதை ஏழுமலையான்கிட்டேயே கேளுங்க!' என கொஞ்சம் காரமாகவே பொரிந்துவிட்டுப் போனார் புது எம்.பி. இன்னா நாற்பத்தி ஐந்து!

. உடுக்கை இடுப்பழகி இலியானா சந்தோஷத்தில் இருக்கிறார். சிம்புவின் இயக்கத்தில் 'வாலிபன்' படத்துக்காக மேடம்தான் வாலிபி. பெரிய்ய்ய்ய்ய தொகையைக் கொடுத்து ஹீரோயினாக ஒப்பந்தம் செய்திருக்கிறது நிக் ஆர்ட்ஸ். இன்னாமா இலியானா... டிஸ்கோவுக்குப் போலாமா?

. சித்தம் கலக்கும் உட்கட்சிப் பிரளயத்தில் இருந்து எஸ்கேப் ஆகி சித்தப்பூரில் ஓய்வு எடுக்கும் அத்வானி... காலையில் வாக்கிங், ஏனைய நேரம் புத்தகம் என்றே பொழுதுபோக்குகிறார். நியூஸ் சேனலுக்குத் தடா போட்டிருக்கிறார் கமலா மேடம். ஹேப்பி டேஸ்!

. 'ப்ளே ஹவுஸ்' என்ற பெயரில் படத் தயாரிப்பு நிறுவனம் ஒன்றை ஆரம்பித்திருக்கிறார் மலையாள சூப்பர் ஸடார் மம்மூட்டி. முதல் போணியாக மோகன்லாலை வைத்து ஒரு படத்தைத் தயாரிக்க முடிவுஎடுத்திருக்கிறார் மம்மூக்கா. சேட்டன்ஸ் கூட்டணி!

. 3,000 ஹாட் பாய்ஸைக் கணக்கில்வைத்து எடுத்த சர்வேயில், 'உலகின் மிகவும் ஸ்டைலிஷ் ஆணாக'த் தேர்வாகி இருக்கிறார் பராக் ஒபாமா. ஆடை நேர்த்திக்கு முதலிடம் தரப்பட்ட இந்த சர்வேயில், இரண்டாவது இடம் பிடித்தவர் பிராட் பிட். எப்போ இந்தியா விசிட் ஒபாமா?

. மத்தியிலும் மாநிலத்திலும் நான்ஸ்டாப்பாக 20 ஆண்டுக் காலம் 'பவர்'கியரில் பறந்த லாலுவுக்கு இது பிரேக் டைம். தொண்டர்களைத் தேற்ற தர்ணாக்கள், போராட்டங்கள் துவக்கி வைத்து வண்டி ஓட்டிக்கொண்டு இருக்கிறார். ரயிலைக் கவுத்துப்புட்டாங்களே!

. தன்னைப் போலவே ஆயுளில் அரை சதம் அடித்த மைக்கேல் ஜாக்சனின் திடீர் மரணத்தில் கிலியான மடோனாவுக்கு, ஆறுதல் தந்திருக்கிறது ஃபோர்ப்ஸ். உலகின் இசைப் பிரபலங்களின் வரிசையில் மடோனாவுக்கு முதலிடம் தந்திருக்கிறது. லாங் லிவ் பாட்டி!

. 'ஹிஸ்ஸ்' படப் பணிகளுக்காக அமெரிக்காவில் டென்ட் அடித்திருக்கிறார் மல்லிகா ஷெராவத். மல்லிகாவின் ரசிகர்கள் லிஸ்ட்டில் புதியவர் உலகப் புகழ்பெற்ற கம்போஸரான யானி. சமீபத்தில் தன் லேட்டஸ்ட் ஹிட் பாடலை மல்லிகா ஷெராவத்துக்கு யானி டெடிகேட் செய்ததுதான் இப்போது அமெரிக்காவின் ஹாட் நியூஸ். ஜாக்கிசான் வரைக்கும் மோத வேண்டியிருக்கும் பாசு!

. ஹாலிவுட் நடிகை ட்ரூபேரி மோர் தான் செல்லமாக வளர்க்கும் அணில்களுக்கு வைத்திருக்கும் பெயர்கள் மைக், ஸ்பைக், ஃபேப். இவை ட்ரூபேரியின் முன்னாள் பாய் ஃப்ரெண்ட்களின் பெயர்கள். ட்ரூ லவ்வர்!

. ஓப்பன் ஹார்ட் சர்ஜரி உடம்பை வைத்துக்கொண்டு ஃப்ளோரிடாவில் மிஸ்டர் யுனிவர்ஸ் பட்டம் ஜெயித்திருக்கிறார் 40 வயசு மகாதேவ் தேகா. இந்த அசிஸ்டென்ட் இன்ஜினீயரின் வருகைக்கு கையில் பூச்செண்டோடு காத்திருக்கிறது அஸ்ஸாம் மாநிலம். ஆஹா தேகா!

. 'அரசியலுக்கு வருவேன். ஆனால், அதுக்குத் தகுந்த சந்தர்ப்பம் அமையணும், இல்லையா?'- இப்படிக் கேட்பது நம்மூர் தல, தளபதி வகையறாக்கள் அல்ல... உதட்டழகி ஏஞ்சலீனா ஜோலி. அடுத்த ஜனாதிபதி தேர்தலுக்குள் அட்லீஸ்ட் கவர்னராக வேண்டும் என்பது ஏஞ்சலீனாவின் கனவு. கவர் பண்ற கவர்னர்!

. பாங்காங்கில் தற்காப்புக் கலைகளைக் கற்றுக்கொண்டு இருக்கிறார் மாதவன். அவரை இயக்க இருப்பது சீமான். படத்தின் தலைப்பு அநேகமாக 'பகலவன்'. 'தம்பி'கள் தோற்பதில்லை!

. - .

இன்பாக்ஸ்

Vikatan Correspondent