என் விகடன் - சென்னை
என் விகடன் - திருச்சி
என் விகடன் - புதுச்சேரி
Published:Updated:

நானே கேள்வி... நானே பதில்!

தீர்க்கதரிசி ஆற்காட்டார்!

##~##

''இப்போது சொல்லுங்கள்... அறுபது பெரிதா, இருபது பெரிதா?''

 ''அடப் போங்க பாஸ்! எண்பத்தாறே தடுமாறி நிற்கிறது!''

- தெ.சு.கவுதமன், வத்திராயிருப்பு.

''வினை விதைத்தவன்தான் வினை அறுப்பானா?''

''எல்லோரையும் கட்சியைவிட்டு நீக்கிக்கொண்டு இருந்த தங்கபாலு, இப்போது தானே தலைவர் பதவியில் இருந்து ராஜினாமா செய்து இருப்பதைப் பார்த்துமா... இப்படி ஒரு கேள்வி?''

- எஸ்.சந்திரவதனி, ஊட்டி.

''ஒருவேளை, இந்தத் தேர்தலில் தி.மு.க. வெற்றி பெற்று இருந்தால்?''

''பிரதமருக்கு கலைஞர் எழுதிய கடிதங்கள் 'தொல்லை காப்பியப் பூங்கா’ என்ற பெயரில் புத்தகங்களாக வெளியிடப்பட்டு இருக்கும். ரெட் ஜெயன்ட், கிளவுட் நைன் நிறுவனங்களுடன் ஜாக்கிசானும் ஸ்பீல்பெர்க்கும் ஒப்பந்தம் போட்டு இருப்பார்கள். ரஜினியும் கமலும் நடிக்கும் நெடுந்தொடர், கலைஞர் தொலைக்காட்சியில் ஒளிபரப்பாகி இருக்கும்!''

- நா.துளசிராமன், தூத்துக்குடி.

''தி.மு.க - காங்கிரஸ் கூட்டணியை எதனுடன் ஒப்பிடலாம்?''

''அமெரிக்கா - பாகிஸ்தான் உறவுடன். இரண்டு பேரும் நண்பர்களா, எதிரிகளா என்று வெளியில் இருந்து பார்ப்பவர்களுக்கு, சுலபமாகத் தெரியாது. பாகிஸ்தான் அதிபருக்கும் பிரதமருக்கும் தெரியாமல், அமெரிக்கப் படைகள் பாகிஸ்தானில் இறங்கும். கடைசி வரை கருணாநிதியைச் சந்திக்காமலே, ராகுல் காந்தி தமிழ்நாட்டுக்கு வந்து போவார்!''

- ஃபாத்திமா, ராஜபாளையம்.

நானே கேள்வி... நானே பதில்!

''தேர்தல் முடிவுகளின் உற்சாகத்தில் ஜெயலலிதா மறந்துபோனது?''

'' 'வாக்குச் சீட்டு முறையில்தான் தேர்தல் நடத்த வேண்டும். வாக்குப் பதிவு இயந்திரங்களில் முறைகேடுகள் நடக்க வாய்ப்பு உண்டு’ என்று முன்பு சொன்னதை!''

- நிலோபர், சிவகாசி.

''துன்பம் வரும்போது, அதை ஈஸியான மனநிலையில் எப்படி எதிர்கொள்வது?''

''ஒரு குட்டிக் கதை. ஒருவருக்கு விபத்தில் ஒரு கால் போய்விட்டது. 'இப்படி ஓர் இழப்பை நீங்கள் எப்படிச் சமாளிப்பீர்கள்?’ என்று அவரது நண்பர்கள் அவரைக் கவலையுடனும் கரிசனத்துடனும் கேட்டார்களாம். அவர் புன்னகைத்துக்கொண்டே சொன்ன பதில், ''இனி, ஒரு பூட்ஸுக்கு பாலீஷ் போட்டால் போதும்!''

- இரா.வசந்தராசன், கிருஷ்ணகிரி.

''தேர்தல் முடிவுகளை முன்கூட்டியே யூகித்தவர் யார்?''

''ஆற்காடு வீராசாமி. 'தி.மு.க. தோல்வி அடைந்தால், அதற்கு நான்தான் காரணம்’ என்று பல மாதங்களுக்கு முன்னரே சொன்னவர் ஆச்சே!''

- எஸ்.சங்கரி, மதுரை.