"பன்னீரின் தியானத்துல இண்டர்வெல் விடுறோம்!" - 2025ன் சூப்பர் ஹிட் படம்

படம் இப்படித் தொடங்குகிறது...

சைரன் சத்தங்கள் காதைக் கிழிக்க வரிசையாக வண்டிகள் மருத்துவமனைக்குள் நுழைகின்றன. ஒருவர் ஓடி வந்து அந்த இனோவா காரின் கதவைத் திறந்துவிடுகிறார். முழுக்கைச் சட்டையை முழங்கை வரை மடித்தவிட்டபடியே பரபரப்பாக இறங்குகிறார் செல்வம். ஊதா நிற புடவையில் படியிறங்கி வரும் கலாவைப் பார்த்து அமைதியாக ஒதுங்கி நிற்கிறார். 

"அம்மா..." என்று உடைந்த குரலில் தொடங்கும் செல்வத்தை, "ஒன்றுமில்லை, சீக்கிரம் சரியாகிவிடும். இப்போ யாரும் பார்க்க வேண்டாம்..." என்று சைகையிலேயே அடக்குகிறார் கலா. மருத்துவமனைக்கு வெளியே மக்கள் கூட்டம், கூட்டமாக திரண்டு அழுகிறார்கள். கேமராக்களும், மைக்குகளும் பரபரக்கிறது. செல்வத்தைக் கடந்து, படியேறும் கலா யாரும் பார்க்காத வகையில் ஒரு புன்னகையை வெளிப்படுத்துகிறார்.

இந்த முதல் காட்சியே அடுத்த மூன்று மணி நேரமும் இதயத்தை படபட வைக்கும் படமாகத்தான் இருக்கும் என்பதை ரசிகர்களுக்கு உணர்த்திவிடுகிறது. ஆனால், படம் முடிந்தும் பல நாட்கள் படபடப்பு குறையாமலேயே இருப்பதை இயக்குநரின் வெற்றி என்று பாராட்டுவதா? இல்லை திரைக்கதையின் வலிமை என சிலாகிப்பதா என்றுதான் தெரியவில்லை.

பல அரசியல் நாடகங்களைக் கடந்து முதல்வராக பதவியேற்கிறார் செல்வம். ஆனால், கலாவின்  கைப்பாவையாகத்தான் ஆரம்பத்தில் செயல்படுகிறார். இதற்கிடையே, எதிர்பாராவிதத்தில் இளைஞர்களின் எழுச்சி பெரும் புரட்சியாக வெடிக்கிறது. இந்த சமயத்தில் செல்வம் டில்லிக்கு டூர் போகும் காட்சியும், கலாவின் நடவடிக்கைகளும் கொஞ்சம் காமெடித்தனமாகப் பார்க்கப்படுகிறது. சீரியஸாகவே போகும் படத்தின் இந்தப் பகுதி ரசிகர்களுக்கு சிறிது ஆசுவாசத்தைக் கொடுக்கிறது. ஆனால், அதே காட்சியில் செல்வத்துக்கும், கலாவுக்கும் மேலாக காவி உடையணிந்த ஒரு வில்லன் இருப்பதை ரசிகர்கள் தெளிவாக உணரும் வகையில் அமைக்கப்பட்டிருக்கும் காட்சிகள் எதிர்பாரா க்ளாஸ் ட்விஸ்ட். அரசியல் பேசியவர்கள் மிக்சர் சாப்பிடுவதும், பீட்சா சாப்பிடுபவர்கள் அரசியல் பேசுவதுமாக இருக்கும் அந்தக் காட்சி ரசிகர்களுக்கான தீபாவளி விருந்தாக அமைகிறது. அதேசமயத்தில், காட்சியின் இறுதியில் நடத்தப்படும் அந்தக் கலவரத்தில் அடிக்கப்படும் அடிகள் நேரடியாக ரசிகர்களின் தலையில் இறங்குவது போன்ற அந்த 3டி எஃபெக்ட்டை இயக்குநர் தவிர்த்திருக்கலாம். 

பன்னீர்செல்வம் சசிகலா தமிழக அரசியல் படம்

செல்வத்தின் டீக்கடை ஃபிளாஷ்பேக்கும், கலாவிடம் அவருக்கு இருக்கும்  நட்பும் தன் பதவியை கலாவுக்காக விட்டுக் கொடுக்கும் அளவுக்குப் போகிறது. இனி கலாதான்  முதல்வர், செல்வம் துணை முதல்வர் என்ற ரீதியிலான காட்சிகள், ரசிகர்களின் நகத்தைக் கடிக்க வைக்கிறது. ஆனால், "தனியொருவனாய் நின்று தமிழகத்தைக் காப்பேன்..." என்று சூளுரைத்து மிகப் பெரிய திருப்பத்தை ஏற்படுத்துகிறார் செல்வம். அடங்கி, ஒடுங்கி, வளைந்து, நெளிந்து இருக்கும் செல்வம் அந்த அரைமணி நேர தியானத்துக்குப் பிறகு நிமிர்ந்து நடக்கும் அந்த இடைவேளைக் காட்சி உலக சினிமா வரலாற்றில் நிச்சயம் இடம்பிடிக்கும். ரசிகர்கள் பாப்கார்ன் வாங்கக் கூட வெளியே போகாத அளவிற்கு இடைவேளைக் காட்சி தாக்கத்தை ஏற்படுத்துகிறது.

பெரும் எதிர்பார்ப்புகளுக்கிடையே படத்தின் இரண்டாம் பகுதி துவங்குகிறது. முதல் பாதியில் உணர்ச்சிகளை வெளிப்படுத்தாமல் "தேமே" என இருக்கும் செல்வம், இரண்டாம் பகுதியில் மொத்த ரசிகர்களின் கவனத்தையும் ஈர்த்துவிடுகிறார். செல்வத்தின் நடிப்புக்கு முன்னால், என்ன செய்வதென தெரியாமல் திருதிருவென விழிக்கும் கலாவின் பல காட்சிகள் பரிதாபமாக இருக்கின்றன. ஆனால், கலா மீது பரிதாப படத்தான் ஒருவருமில்லை. "அவர் எப்படி சிரித்தார் தெரியுமா?", " எதிரி பேசும்போது அமைதியாக இருந்தார்", "எதிரியோடு கைகோத்துவிட்டார்" என்று செல்வத்துக்கு எதிராக கலா பேசும் பெரும்பாலான வசனங்கள் ஶ்ரீஹரிகோட்டாவில் விடப்படும் பட்டாசு ராக்கெட்டுகளாகவே இருக்கின்றன.

அம்மாவின் உருவ ஒற்றுமையோடு வரும் தீ, எதிரிக் கட்சித் தலைவராக வரும் ஸ்லீடன், கலாவின் மூளையாக செயல்படும் மொடராசு, கன்னாபின்னாவென்று கருத்து பேசும்  மைகோ , அந்த எம்.எல்.ஏ, இந்த அமைச்சர் என ஏகப்பட்ட கதாபாத்திரங்கள் படத்தின் தெளிவைக் குழப்புகிறார்கள். அதுவும் மைகோ வரும் காட்சிகள் எல்லாம் ரசிகர்களுக்கு சிரிப்பு நிச்சயம். மொத்தப் படத்தின் ட்விஸ்ட்களுக்குப் பின்னாலும் இருக்கும் காவி சாமியாரின் உழைப்பு திரையில் தெளிவாகத் தெரிகிறது. திரைக்கு முன்னும் அவர்கள் தெளிவாக வெளிப்பட்டிருக்க வேண்டும் என்ற கருத்தை பல ரசிகர்கள் வெளிப்படுத்தியதை மறுக்க முடியாது. 

இது சஸ்பென்ஸா, த்ரில்லரா, ஹாரரா, சைக்கோவா எனப் படத்தை எந்த வரையறைக்குள்ளும் கொண்டு வரமுடியவில்லை. நடக்கும் நுண் அரசியலை இன்னும் பல நுட்பமான காட்சிகளின் மூலம் ரசிகர்களுக்கு விளக்கியிருக்க வேண்டிய பொறுப்பு இயக்குநருக்கு இருக்கிறது. அதை அவர் இன்னும் சிறப்பாக செய்திருக்க வேண்டும். பரபரவென பறக்கும் காட்சிகளைத் தொடர்ந்து கிளைமேக்ஸில் திடீரென தொடரும் என்று போட்டிருப்பது டிவி சீரியல் யுக்தியாக இருப்பது நெருடல்.

பாலியல் வன்புணர்வு ஆளாக்கப்பட்டு கொடூரமான நிலையில் கொலை செய்யப்பட்ட நந்தினி, மாணவர் எழுச்சி, எண்ணூர் எண்ணெய், விவசாயிகள் தற்கொலை, என பல முக்கிய விஷயங்களை ரசிகர்களை மறக்க வைத்தது படத்தின் வரவு என்பதால், படம் வெற்றிபெற்றாலும் அது மனிதத்தின் ஆகப்பெரும் தோல்வியாகவே இருக்கிறது. மொத்தப் படத்தின் இயக்குநர் யார்.. தயாரிப்பாளர் யார்.. என்பதன் பின்னணியில் ஒளிந்திருக்கிறது ரசிகர்களுக்கான மிகப் பெரும் மர்மம். 

ஒவ்வொருவரும் தெளிவாகப் பார்க்க வேண்டிய இந்தத் திரைப்படம்... அரசியல் பாடமும் கூட!

-இரா. கலைச் செல்வன்.
 

Do you like the story?

Please Appreciate the Author by clapping!