வெளியிடப்பட்ட நேரம்: 15:44 (08/04/2017)

கடைசி தொடர்பு:16:02 (11/04/2017)

5 நாள்களில் 1000 கி.மீ பறந்த ‘திருச்சி ராணி’! 27 வருட சாதனை முறியடிப்பு #VikatanExclusive

புறா ஒன்று ஐந்து நாட்களில் 1000 கிலோ மீட்டர் தூரம் கடந்துள்ளது. அந்தப் புறாவுக்கு, ‛திருச்சி ராணி’ எனும் பட்டம் வழங்கிக் கொண்டாடி மகிழ்கின்றனர் திருச்சிவாசிகள். இது 27 வருடங்களுக்குப் பிறகு நடந்த சாதனை எனச் சொல்லி மெய் சிலிர்க்கிறார்கள்.

புறா திருச்சி ராணி

ஒவ்வொரு வருடமும், ஜனவரி மாதம் முதல் மார்ச் மாதம்வரை, திருச்சி ரேசிங் பீஜியன்ஸ் கிளப் சார்பில் புறா ரேஸ் நடத்துவது வழக்கம். அப்படித்தான் பந்தய புறாக்களை, வழக்கம் போல வாகனத்தில் ஏற்றிக்கொண்டு, கிளம்பினார்கள் திருச்சி ரேசிங் பீஜியன்ஸ் கிளப் உறுப்பினர்கள். 7 நாட்களில் 1000 கிலோமீட்டரைக் கடந்து, வளர்ப்பவர் வீட்டுக்கு முதலில் வரும் புறா வெற்றி பெற்றதாக அறிவிப்பார்கள். அந்த வகையில் திருச்சியில் இருந்து கொண்டு செல்லப்பட்ட புறாக்கள், கடந்த மார்ச் 12-ம் தேதி மகாரஷ்டிரா மாநிலம், பல்ஹர்ஷா எனும் ஊரில் இருந்து பறக்கவிடப்பட்டன.

பந்தய தூரம் மிகத் தொலைவு என்பதால், கடந்த 27 வருடங்களாக திருச்சியில் இருந்து விடப்பட்ட எந்தப்புறாவும் ஜெயிக்கவில்லை. இப்படி இருக்க, 7 நாட்கள் கடக்கவேண்டிய 1000 கி.மீ தூரத்தை, ஐந்தே நாட்களில் கடந்து திருச்சி ராணி எனும் பட்டத்தை வென்றுள்ளது திருச்சி ஶ்ரீரங்கம் ஆர்.எஸ் சாலையைச் சேர்ந்த ஆறுமுக அருள் குமரனின் புறா. இந்த வெற்றியை, திருச்சி ரேசிங் பீஜியன்ஸ் கிளப் உறுப்பினர்கள், பந்தய புறா வளர்ப்பவர்கள் கொண்டாடி மகிழ்கிறார்கள்.

அருள் குமரனை நேரில் சந்தித்தோம்.

“எங்க அப்பா, பறவைகள் மீது ரொம்ப பிரியமாக இருப்பார். அதனால் எனக்கும் அந்தப் பழக்கம் வந்தது. வடக்கு வாசலைச் சேர்ந்த என் நண்பன் ஶ்ரீதர், வீட்டுக்குச் செல்லும்போதெல்லாம், அவனைப்போலவே புறா வளர்க்கணும்னு நினைப்பேன். படித்ததால் அந்த ஆசை, பலவருடங்கள் தள்ளிப்போனது. கல்லூரி படிப்பை முடித்த நான், ஸ்மார்ட் ஆட் எனும் இவண்ட் மேனேஜ்மெண்ட் நிறுவனம் ஆரம்பித்து நடத்தி வருகின்றேன்.

இதனால் கடந்த 5 வருடத்துக்கு முன்னாள், ஆர்வத்தோடு 5 ஜோடி சாதாரண புறாக்களை வாங்கி வளர்க்க ஆரம்பித்தேன். அடுத்து பந்தய புறாக்கள் வளர்ப்பில் கவனம் செலுத்தினேன். புறாக்களுக்கு, தினமும் காலையும் மாலையும் கம்பு, திணை, சோளம், கோதுமை என தானியங்கள் உணவளிக்க வேண்டும். இதற்காக ஒவ்வொரு மாதமும், 3 ஆயிரம் முதல் 5 ஆயிரம் வரை செலவானது. கொஞ்சம் சிரமப்பட்டாலும், கவலைப் படவில்லை. புறாக்கள் பெருகி, இப்போது 100 புறாக்களுக்கு மேல் உள்ளது.

திருச்சி புறா

‘புறாக்களைத் தூது’ விடுவது நமது பழைய பாரம்பர்யம், இப்போது, புறா இனங்களை காப்பாற்றிட இதுபோன்ற புறா பந்தயங்கள் நடத்தப்படுகிறது. ஒரு புறா நமது வீட்டுக்கு மேல் அரை மணி நேரம் பறந்தால், அது பந்தயத்துக்கு தகுதியான புறா. அடுத்து புறாவை மெல்ல மெல்ல, 100, 200 என பல்வேறு வகையிலான கிலோமீட்டர் தூரங்களில் விட்டால், நமது வீட்டுக்கு வந்துவிடும்படி பயிற்சி மேற்கொண்டோம். அடுத்து 500, 650 கிலோமீட்டர் தூரங்களை ஒரு புறா கடந்தால் அது 1000 கிலோமீட்டர் தூரத்தை கடக்கும் போட்டிகளில் கலந்துகொள்ள தகுதியான புறா. ஒவ்வொரு போட்டியின் போதும், நாம் வளர்க்கும் 5 பந்தய புறாக்களை, கிளப்பில் கொடுக்க வேண்டும். அந்தப் புறாக்கள், பந்தய தூரத்தைக் கடந்து வீட்டுக்கு வந்து சேர்ந்தவுடன், உடனே கிளப்புக்கு தகவல் கொடுக்க வேண்டும். அப்படி முதலில் வந்த புறா ஜெயித்ததாக அர்த்தம்.

அப்படித்தான் இந்தப் புறா முதலில் வெற்றி பெற்றது. இதேபோல், என் இன்னொரு புறா, 1000 கி.மீட்டரை 7 நாள் கழித்து கடந்து வந்தது. மற்ற புறாக்கள் வரவே இல்லை. இப்படியான போட்டிகளில் கலந்துகொள்ளும், புறாக்கள் பல தடைகள் இருக்கும். காற்று பலமாக வீசினால், புறா பறக்கும் திசை மாறலாம், அதேபோல், வெயில் அதிகமாக இருந்தாலோ, காற்றாலைகள், வேட்டைக்காரர்கள் விரித்த வலைகள், ஏவுகணைகள் அனுப்பும்போது, பறவைகள் வந்துவிடக்கூடாது என ரசாயனக்கலவை தூவுவார்கள். அந்தப் பவுடர் பட்டாலோ, வயல்வெளிகளில் மருந்துகள் தெளித்திருந்தாலோ இவை பறவைகளை பாதிக்கும். இப்படியான பத்துக்கும் மேற்பட்ட தடைகளைக் கடந்து, உரிய நேரங்களில் வந்து சேரும் புறா வெற்றி பெற்றதாக எடுத்துக்கொள்ளப்படும். கடந்த 27 வருடங்களுக்குப் பிறகு, பந்தய நாட்களை விட இரண்டு நாட்கள் முன்னதாகவே வந்து, என் புறா, எனக்குப் பெருமை தேடிக்கொடுத்துள்ளது” என்றார் மெய்சிலிர்க்கிறார் அருள்.

புறா வளர்ப்பின் மூலம் திருச்சிக்கு பெருமை சேர்த்த அருள் குமரனுக்கும் , திருச்சி ராணிக்கும் வாழ்த்துச் சொல்லி விடை பெற்றோம். 

சி.ய.ஆனந்தகுமார். படங்கள்: தே.தீட்ஷித்

நீங்க எப்படி பீல் பண்றீங்க


டிரெண்டிங் @ விகடன்