Published:Updated:

தனிமையில் தவிக்கும் ஆப்பிரிக்க சிம்பன்ஸி

இரா.கலைச் செல்வன்
தனிமையில் தவிக்கும் ஆப்பிரிக்க சிம்பன்ஸி
தனிமையில் தவிக்கும் ஆப்பிரிக்க சிம்பன்ஸி

மேற்கு ஆப்ரிக்க நாடான ஐவரி கோஸ்ட்டில் சில நாள்களுக்கு முன்னர், ஒரு குட்டி சிம்பன்ஸியைக் கடத்திய இரண்டு பேர் கைது செய்யப்பட்டு, அவர்களுக்கு ஆறு மாத சிறைத் தண்டனை கொடுக்கப்பட்டது. ஐவரி கோஸ்ட் வரலாற்றிலேயே, வன உயிரின கடத்தல் சம்பந்தமாக பதிவு செய்யப்பட்ட முதல் வழக்கே இதுதான். 1965 ஆம் ஆண்டிலிருந்தே வனப் பாதுகாப்பு சட்டம் அங்கு அமலில் இருந்தாலும், அது அத்தனை கடுமையாக கடைபிடிக்கப்படவில்லை. 

இந்தக் கடத்தல்காரர்களிடமிருந்து கைப்பற்றப்பட்ட சிம்பன்ஸிக்கு "நெம்லே ஜூனியர்" என்று பெயரிடப்பட்டுள்ளது. சரியாக உணவு எடுத்துக் கொள்ளாததால் உடல் மெலிந்து மிகவும் சோர்வாகக் காணப்படுகிறது. ஐவரி கோஸ்டின் முக்கிய நகரமான அபிட்ஜனிலிருக்கும் உயிரியல் பூங்காவில் நெம்லே வைக்கப்பட்டிருக்கிறது. பொதுவாக, காடுகளில் வளரும் சிம்பன்ஸிகள் முதல் ஐந்து வருடங்கள் தங்கள் தாயிடம் தான் வளரும். அந்தப் பூங்காவில் உள்ள மற்ற சிம்பன்ஸிகள் எல்லாமே வயதில் பெரியவையாக இருப்பதால், நெம்லேவை அவைகள் சேர்த்துக் கொள்வதில்லை.  இதனால், தனிக் கூண்டில் தனிமையில் தவித்து வருகிறது நெம்லே.

அரபு நாடுகள், தென் கிழக்கு ஆசிய நாடுகள், சீனா போன்ற நாடுகளில் இவைகளுக்கு அதிக கிராக்கி இருக்கிறது. உலகம் முழுக்க வருடத்துக்கு கிட்டத்தட்ட 3000 மனிதக் குரங்கு வகைகள் கடத்தப்படுகின்றன. இதனால், உராங்குட்டான், கொரில்லா, சிம்பன்ஸி போன்ற மனித குரங்கினங்கள் அழியும் தருவாயில் உள்ளன.