வெளியிடப்பட்ட நேரம்: 15:07 (31/07/2017)

கடைசி தொடர்பு:15:07 (31/07/2017)

கரூரில் வைரலாகும் ‘காக்கா முட்டை’ பீட்சா!

  Pizza shop at karur

பீட்சா சாப்பிடுவதையே தன் லட்சியக் கனவாக வைத்து, அதற்காக கரி பொறுக்கி விற்று, சிறுகச் சிறுகக் காசு சேர்த்து, பீட்சா சாப்பிட கடைக்குப் போகும் சிறுவர்களை அடித்து விரட்டும் கடை முதலாளியின் அரக்கத்தனம், அதைச் சுற்றிய அரசியல் என உலகத்தரத்தில் `காக்கா முட்டை'  என்ற படத்தைக் கொடுத்தார் இயக்குநர் மணிகண்டன். அந்தப் படம் தந்த பாதிப்பில், கரூரில்  `காக்கா முட்டை' என்ற பெயரிலான பீட்சா கடை ஆரம்பிக்கப்பட்டது. இருபது ரூபாயிலிருந்து பீட்சா விற்கும் இவர்கள், பீட்சா நன்றாக இருந்தால் கடைக்குள் கட்டிவைத்துள்ள மணியை அடிக்கச் சொல்வது, ஜல்லிக்கட்டுப் போராட்டத்துக்குப் பிறகு வெளிநாட்டுக் குளிர்பானங்களை விற்காமலிருப்பது, முக்கிய தினங்களில் மரக்கன்றுகள் கொடுப்பது எனப் புதுமையான விஷயங்களையும் செய்கிறார்கள். கரூர் பேருந்து நிலையத்தையொட்டி இருக்கிறது இந்த `அடடே' பீட்சா கடை!


 Karur restaurants

நாம் அந்தக் கடைக்குப் போன நேரம் பார்த்து அருண், வருண் என்கிற இரண்டு சகோதரர்கள் கையில் ஐம்பது ரூபாயை வைத்துக்கொண்டு, `கடைக்குள் போகலாமா... வேண்டாமா?' எனத் தயங்கியபடி நின்றார்கள். அவர்களைப் பார்த்த கடை முதலாளிகளில் ஒருவரான பாக்யராஜ், `உள்ளே வாங்கப்பா.  ரெண்டு பேரும் பீட்சா சாப்பிடலாம்' என்று அழைத்தார். தயங்கியபடியே உள்ளே வந்த அவர்களுக்கு, ஆளுக்கு ஒரு பீட்சா சப்ளை செய்யப்பட, ஆர்வமாகச் சாப்பிட ஆரம்பித்தார்கள் அந்தச் சகோதரர்கள். அந்த இடைவெளியில் `காக்கா முட்டை' கடை முதலாளிகளில் ஒருவரான பாக்யராஜிடம் பேசினோம். 

 Kakka muttai pizza shop

``என் பார்ட்னர் கிருஷ்ணன்தான் இந்தக் கடை ஆரம்பிக்க முழுக்காரணம். கிருஷ்ணன், கேட்டரிங் டெக்னாலஜி முடிச்சுட்டு, மும்பை தாஜ் ஹோட்டல், ஷிப், டெல்லின்னு வேலைபார்த்துட்டு, நாலு வருஷங்களுக்கு முன்பு அமெரிக்காவுல வேலை கிடைச்சுப் போயிட்டார். இருந்தாலும். அவருக்கு சொந்த ஊர்ல கடை வெக்கணும்னு ஆசை. மூலைக்கு மூலைதான் சாப்பாடு, டிபன் ஹோட்டல்கள் இருக்கே! அதனால வித்தியாசமா பீட்சா கடை ஆரம்பிக்கலாம்னு முடிவுபண்ணினார். `பீட்சா'னா நானூறு, ஐந்நூறு ரூபாய்க்கு விற்கப்படும் காஸ்ட்லி அயிட்டம்'ங்கிற எண்ணம் நடுத்தர மக்கள்கிட்ட இருக்கு. அதை உடைச்சு, எளிய மக்களும் வந்து பீட்சா சாப்பிட வசதியா இந்தக் கடையை அவர் ஆரம்பிக்க விரும்பினார். அவர் அமெரிக்காவுல இருக்கிறதால, என்னை பார்ட்னரா சேர்த்துக்கிட்டு, அவரோட தம்பி நாராயணனைத் துணைக்கு இருக்கச் சொன்னார். கடந்த வருடம் ஜூன் மாசம் ஆரம்பிச்சதுதான் இந்த பீட்சா கடை.

கடை வைக்க, இந்த இடத்தைப் பார்த்துட்டோம். ஆனா, கடைக்கு என்ன பெயர் வைக்கிறதுன்னு ஒரு மாசமா குழம்பினோம். அப்போதான், டிவி-யில் `காக்கா முட்டை' படம் ஓடிட்டிருந்துச்சு. உடனே, `காக்கா முட்டை'னு வைக்கலாம்னு முடிவுபண்ணி, கிருஷ்ணன்கிட்ட சொன்னோம். அவரும், அவங்க பெற்றோரும் `இந்தப் பெயர் வேண்டாம்'னுட்டாங்க. ஆனா, விடாமப் போராடி அவரையும் அவர் குடும்பத்தாரையும் `காக்கா முட்டை' படத்தைப் பார்க்கவெச்சு, ஒருவழியா இந்தப் பெயரை ஒப்புக்கவெச்சேன்.

நாங்க வெஜ்ல எட்டு வகை பீட்சாக்களும், சிக்கன்ல எட்டு வகை பீட்சாக்களும் தர்றோம். அதுவும், இருபது ரூபாயில் தொடங்கி அதிகபட்சம் 360 ரூபாய் வரையிலான விலையில் பீட்சா விற்கிறோம். அதோட, பீட்சா தயாரிப்பை ரூமுக்குள் செய்யாமல், கஸ்டமர்கள் பார்வையிலேயே செய்றோம். அதேபோல், என்னென்ன பொருள்கள் சேர்க்கப்படுத்துன்னு கஸ்டமர்கள் பார்க்க வசதி பண்ணியிருக்கோம். `காக்கா முட்டை'னு பெயர் வெச்சதால், `வித்தியாசமான பேரா இருக்கே'ன்னு எல்லோரும் வர ஆரம்பிச்சாங்க. அந்தப் பெயர் தந்த பலனால் கடை ஓரளவுக்கு பிக்கப் ஆகிடுச்சு. ஆரம்பத்தில் மக்கள் வரவு குறைவாத்தான் இருந்துச்சு. இங்கே சாப்பிட்டவங்க பீட்சா விலை கம்மியா இருப்பதைப் பரப்ப, அதன் பிறகுதான் சாமான்ய மக்களும் வர ஆரம்பிச்சாங்க.

Karur Pizza shop

சாப்பிட வருபவர்களின் ஃபீட்பேக்கைத் தெரிஞ்சுக்க, கடை முகப்பிலேயே ஒரு மணியைக் கட்டித் தொங்கவிட்டிருக்கோம். `பீட்சா சுவையாக இருந்தால் அந்த மணியை அடிக்கவும்'னு எழுதியிருக்கோம். அப்படி அடிக்கும்போது, எங்களுக்கு இன்னும் தரமா தரணும்கிற ஆர்வம் ஏற்படும். அதேபோல், இங்கு ஐந்நூறு ரூபாய்க்கு மேல பீட்சா சாப்பிடுபவர்களுக்கு ஐம்பது ரூபாய் கேஷ்கார்டு தருவோம். அதை வெச்சு அடுத்த முறை வரும்போது, அந்த ஐம்பது ரூபாய் மதிப்புள்ள பீட்சாவைச் சாப்பிடலாம். அதேபோல், சுதந்திர தினம், குடியரசு தினம் மாதிரியான முக்கிய தினங்கள்ல இங்கே   சாப்பிட வர்றவங்களுக்கு மரக்கன்றுகள் கொடுத்தோம். இங்கே தங்கள் பிறந்த நாள்களைக் கொண்டாடுபவர்களுக்கும் மரக்கன்றுகள் வழங்குறோம். அதோடு, ஜல்லிக்கட்டுப் போராட்டம் முடிந்த மறுநாளிலிருந்தே வெளிநாட்டுக் குளிர்பானங்களை விற்பதில்லை. `வெளிநாட்டுக் குளிர்பானங்களை விற்காமல், வெளிநாட்டு பீட்சாவை மட்டும் விற்கலாமா?'ன்னு நீங்க கேட்கலாம். `பீட்சா ஏதோ பணக்காரர்கள் அயிட்டம்'னு சாதாரண மக்கள் ஏங்குவதைத் தடுக்கத்தான் பீட்சா கடை ஆரம்பிச்சோம். பீட்சாவைக் கண்டுபிடித்தது வெளிநாட்டுக்காரன்னாலும், அதை நம்ம ஊர் டேஸ்ட்டுக்கு மாத்தி தர்றோம். அதனால, அது  தமிழ்நாட்டுச் சாப்பாடு அயிட்டம்தான் . இந்தக் கடையை விரிவுப்படுத்தி, குறைந்த விலையில் தரமான சாப்பாடு, டிபன் கொடுக்கணும்கிறதுதான் எங்க அடுத்த இலக்கு" என்றார்.


 காக்கா முட்டை பீட்சா கடை

அதற்குள், பீட்சாவைக் கபளீகரம் செய்துவிட்ட அந்தச் சிறுவர்கள், குஷியாகி மணியை பலமாக அடித்தனர். அவர்களிடம் பேசினோம்.
``எங்களுக்கு ரொம்ப நாளா பீட்சா சாப்பிடணும்னு ஆசை. வீட்டுல சொன்னதுக்கு, `அதெல்லாம் ஐந்நூறு, ஆயிரம் ரூபாய்னு சொல்வாங்க. வேண்டாம்'னு சொல்லிட்டாங்க. நாங்களும் விலை ஜாஸ்தின்னு நினைச்சு ஏக்கத்தோடு இருந்தோம். அப்பதான், இங்கே வந்து பீட்சா சாப்பிட்ட எங்க நண்பன் ஒருத்தன், இருபது ரூபாய்க்கு பீட்சா கிடைப்பதைச் சொன்னான். அதான், ஒரு வாரமா மல்லுக்கட்டி, ஐம்பது ரூபாயைச் சேமிச்சு, இன்னிக்கு வந்து பீட்சா சாப்பிட்டோம். பல நாள் கனவு நிறைவேறிட்டு" என்றார்கள் சந்தோஷம் மேலிட!
 


டிரெண்டிங் @ விகடன்