Election bannerElection banner
Published:Updated:

எனாக்டஸ் உலகக்கோப்பையில் சென்னை 'ஆல்ஃபா காலேஜ்'

ஆல்ஃபா எனாக்டஸ்
ஆல்ஃபா எனாக்டஸ்

இந்த வருட எனாக்டஸ் உலகக்கோப்பையில், 35+ நாடுகளில் இருந்து 176 புராஜெக்டுகள் அடிப்படைச் சுற்றுக்கு முன்னேறின. இதில் சென்னை போரூரில் இயங்கிவரும் 'ஆல்ஃபா அறிவியல் மற்றும் கலைக் கல்லூரி' மாணவர்களின் புராஜெக்ட், டாப் 48-ல் தேர்வாகியுள்ளது!

கடல் ஆமை ஒன்றின் மூக்கில் ஏதோ சிக்கியுள்ளது. கால்நடை மருத்துவர்கள் பின்சர்ஸ் கொண்டு ஆமையின் மூக்கில் அடைத்துக் கொண்டுள்ளதைக் கொஞ்சம் கொஞ்சமாக வெளியில் எடுக்க, நமக்கே பகீர் என்கிறது! வலியால் துடிதுடித்துக் கொண்டிருக்கும் அந்த ஆமையின் மூக்கில் சிக்கியிருந்தது 10 சென்டிமீட்டர் நீள பிளாஸ்டிக் ஸ்ட்ரா! சில வருடங்களுக்கு முன் இணையத்தில் வைரலான இந்த வீடியோ மனிதன் எனும் சுயநலவாதிக்கு இயற்கை மீது இல்லாத அக்கறையை முகத்தில் அறைந்து உணர்த்துகிறது.

எனாக்டஸ் உலகக்கோப்பையில் சென்னை 'ஆல்ஃபா காலேஜ்'

அலட்சியத்தில் கடற்கரையில் நாம் தூக்கி வீசும் பிளாஸ்டிக் பொருள்கள், கடலோடு அடித்துச் சென்று, நீர்நிலைகள் மாசுபட்டு, கடல் உயிர்களை அழித்து, இயற்கை உணவுச் சங்கிலியை உடைத்து, இறுதியில் மனிதர்களின் தலையில்தான் விடிகிறது!

பல கடல்களின் நீரில் நுண்ணிய மைக்ரோ பிளாஸ்டிக்ஸ் கலந்துள்ளதால், அவை கடல் உயிர்களின் உடலில் பரவி அவற்றின் வாழ்வையே நாளடைவில் முடித்துவிடுவதாக பல ஆய்வுகள் தெரிவிக்கின்றன. இப்படிப்பட்ட மீன்கள் உங்கள் தட்டுக்கும் வந்திருக்கலாம், எச்சரிக்கை!

சுற்றுச்சூழலைக் காக்க மாணவர்களின் பங்கு.

சுற்றுச்சூழலைப் பாதுகாக்க அடுத்த தலைமுறையினரைத் தயார் செய்து வருகிறது 'எனாக்டஸ் (Enactus)' சர்வதேச அமைப்பு. சுற்றுச்சூழல் விழிப்புணர்வு ஏற்படுத்திடவும் ஒவ்வொரு ஊர்களிலும் உள்ள எளிய சமூக மக்களைக் கண்டறிந்து அவர்களுக்குத் திறன் வளர் பயிற்சியை வழங்கிடவும் கல்லூரி மாணவர்களை இளம் தொழில்முனைவோராகத் தயார் செய்கிறது எனாக்டஸ்.

வருடாவருடம் வெவ்வேறு தலைப்பிலான சுற்றுச்சூழல் மற்றும் சமூக மேம்பாடு சம்பந்தப்பட்ட புராஜெக்டுகளில் உலகம் முழுவதிலும் உள்ள எனாக்டஸ் மாணவர்கள் ஈடுபடுவர். 'எனாக்டஸ் உலகக்கோப்பை' எனும் சர்வதேச போட்டியில் மிகச்சிறந்த புராஜெக்ட்டுக்கு 'சாம்பியன்ஷிப்' டைட்டில் மற்றும் பரிசுகள் வழங்கப்படும். முந்தைய ஆண்டுகளில் நடைபெற்ற எனாக்டஸ் உலகக் கோப்பை போட்டிகளில் சென்னை போரூரில் இயங்கி வரும் ஆல்ஃபா அறிவியல் மற்றும் கலைக் கல்லூரி மாணவர்கள் வெற்றி பெற்றுள்ளது குறிப்பிடத்தக்கது (அப்போது எனாக்டஸ் அமைப்பு SIFE என்று அழைக்கப்பட்டு வந்தது.)

2021: சுற்றுச்சூழல் மாசுபாட்டில் மிகப்பெரும் பங்கு விளைவிக்கும் பிளாஸ்டிக் பைகள் மற்றும் பிளாஸ்டிக் ஸ்ட்ராக்களுக்கு மாற்றாக 'ரேஸ் டு ரீதிங்க் பிளாஸ்டிக் (Race to Rethink Plastic)' எனும் பெயரில் மூன்று புராஜெக்டுளில் இந்த வருடம் ஈடுபட்டுள்ளனர் ஆல்ஃபா கலை மற்றும் அறிவியல் கல்லூரி மாணவர்கள்.

மரவள்ளிக் கிழங்கு மாவில் மக்கும் பைகள் தயாரித்தல், தென்னை ஓலையில் உறிஞ்சுகுழல் தயாரிப்பு மற்றும் மக்கக்கூடிய பைகளில் காளான் வளர்ப்பு ஆகியவை இதில் அடங்கும். காளான் வளர்ப்பில் வரும் கழிவுகளையும்கூட இயற்கை உரமாக மாற்றி விற்பனை செய்யப்படுவது குறிப்பிடத்தக்கது.

35+ நாடுகள், 72000+ மாணவர்கள், இந்தியாவுக்கே பெருமை!

இந்த வருட எனாக்டஸ் உலகக்கோப்பையில், 35+ நாடுகளில் இருந்து 176 புராஜெக்டுகள் அடிப்படைச் சுற்றுக்கு முன்னேறின. இதில் 'ஆல்ஃபா எனாக்டஸ்' மாணவர்களின் 'மக்கும் பைகளில் காளான் வளர்ப்பு மற்றும் அதன் கழிவுகளை இயற்கை உரமாக மாற்றும் திட்டம்' அடுத்த கட்டமாக டாப் 48 புராஜெக்டுகளில் ஒன்றாகத் தேர்வாகியுள்ளது!

உலகம் முழுக்க 72000+ மாணவர்கள் பங்கேற்கும் மாபெரும் சர்வதேச போட்டியில் அடுத்த கட்டத்துக்குத் தேர்வாகி, இந்தியாவுக்கே பெருமை சேர்த்துள்ளனர் ஆல்ஃபா எனாக்டஸ் மாணவர்கள்!

எனாக்டஸ் உலகக்கோப்பையில் சென்னை 'ஆல்ஃபா காலேஜ்'

முன்னேறும் பெண்களின் வாழ்வாதாரம்...

"முன்பை விட இப்போது தன்னம்பிக்கையுடன் வாழ்கிறேன். மரவள்ளிக் கிழங்கிலிருந்து மக்கும் பைகள் தயாரித்து விற்பனை செய்வதன் மூலம் என் வாழ்க்கைத் தரம் உயர்ந்துள்ளது. என் குடும்பத்துக்குத் தேவையான பொருள்களை வாங்க எனக்கு இது பேருதவி புரிந்துள்ளது." என்கிறார் ஆல்ஃபா எனாக்டஸ் மாணவர்கள் பயிற்றுவிக்கும் பெண்கள் சுய உதவிக் குழுக்களில் ஒன்றில் பணியாற்றிவரும் பானுமதி.

பானுமதி போல நூற்றுக்கணக்கான பெண்கள் ரூ. 500 முதல் ரூ. 10000 வரையிலான முதலீடு செய்து சுய வேலைவாய்ப்பை உருவாக்கிக்கொள்ள உதவியுள்ளது ஆல்ஃபா எனாக்டஸ் குழு. திருவள்ளூர் மற்றும் காஞ்சிபுரம் மாவட்டத்தைச் சுற்றியுள்ள கிராமங்களில் இப்போது இந்தப் புராஜெக்ட் நடைபெற்றுவருகிறது.

என்ன வளம் இல்லை இந்த இயற்கையில்?

கொஞ்சம் அக்கறை, கொஞ்சம் வித்தியாசமான யோசனை, கொஞ்சம் நம்பிக்கை, கொஞ்சம் உழைப்பு - இவை இருந்தால் நம்மைச் சுற்றியுள்ள பிரச்னைகளுக்கு நாமே தீர்வு கண்டிடலாம் என்று நிரூபித்துள்ளது ஆல்ஃபா கல்லூரியின் எனாக்டஸ் குழு.

சணல் பர்ஸ், மரவள்ளி மாவு பைகள், தென்னை ஓலை ஸ்ட்ரா, மக்கும் பையில் காளான் வளர்ப்பு மற்றும் இயற்கை உரம் என்று பிளாஸ்டிக் பொருள்களை ஒழிக்க இவர்கள் எடுத்து வரும் நடவடிக்கைகள் பாராட்டுகளைத் தாண்டி, நாம் அனைவரும் ஆதரவு தர வேண்டிய ஒன்று. இந்த 2021 எனாக்டஸ் உலகக்கோப்பை இறுதிச் சுற்றுகளில் நிச்சயம் இது மாபெரும் பேசுபொருளாக மாறும் என்பதில் சந்தேகமே இல்லை!

'இயற்கை என்பது கேள்வியல்ல, விடை. சரியான கேள்விகளை நாம் கேட்டால் நம் பிரச்னைகள் அனைத்துக்கும் இயற்கையிடம் பதில் உண்டு' என்கிறது ஆல்ஃபா எனாக்டஸ் குழு!

Election bannerElection banner
அடுத்த கட்டுரைக்கு