Published:Updated:

எஃப்.எம்.பி சிக்கல்... யாருக்கு அக்னிப் பரீட்சை ?

ஒட்டுமொத்த விகடனுக்கும் ஒரே ஷார்ட்கட்

Use App
எஃப்.எம்.பி சிக்கல்... யாருக்கு அக்னிப் பரீட்சை ?
எஃப்.எம்.பி சிக்கல்... யாருக்கு அக்னிப் பரீட்சை ?

ஆர்.மோகனப் பிரபு, cfa

பிரீமியம் ஸ்டோரி

‘மியூச்சுவல் ஃபண்ட் முதலீடுகள் சந்தை அபாயங்களுக்கு உட்பட்டவை’ - மியூச்சுவல் ஃபண்ட் முதலீடு பற்றி முதலீட்டாளர்களை எச்சரிப்பதற்காகச் சொல்லப்பட்ட வார்த்தைகள் இவை. இதிலுள்ள ‘அபாயங்கள்’ எனும் வார்த்தைக்கான முழுமையான அர்த்தத்தை மியூச்சுவல் ஃபண்ட் முதலீட்டாளர்களுக்கு இப்போது  புரிய ஆரம்பித்திருக்கிறது. நிலையான கடன் முதிர்வுத் திட்டத்தில் (Fixed Maturity Plans) முதலீடு செய்துள்ள தொகையை முதிர்வுக் காலம் முடிந்தபின்னும் முழுமையாகத் திருப்பித் தர முடியாது என்று கோட்டக் மியூச்சுவல் ஃபண்ட் அறிவிக்க,  அதனைத் தொடர்ந்து ஹெச்.டி.எஃப்.சி மியூச்சுவல் ஃபண்டும் தனது கடன் திட்டக் காலத்தை நீட்டிப்பதாக அறிவித்துள்ளது. இன்னும்கூட சில மியூச்சுவல் ஃபண்டுகளும் இதேபோல அறிவிக்குமோ என்று பயந்து போயிருக்கிறார்கள் முதலீட்டாளர்கள். 

எஃப்.எம்.பி சிக்கல்... யாருக்கு அக்னிப் பரீட்சை ?

பங்குச் சந்தை சார்ந்த மியூச்சுவல் ஃபண்ட் திட்டங்களில் முதலீடு செய்திருப்பவர்களுக்கு அதிலுள்ள ‘அபாயங்கள்’ நன்கு தெரியும். ஆனால்,   கடன் சார்ந்த ஃபண்ட் திட்டங்கள்  பாதுகாப்பானவை என்று எல்லோரும் நினைக்கிற மாதிரிதான் இதுவரை இருந்தன. வட்டி வருவாயில் ஏற்படும் சில ஏற்றத்தாழ்வுகள் தவிர, இந்த முதலீட்டில் பெரிய பிரச்னை எதுவும் இல்லை என்று நினைத்துவந்த வேளையில், அதிலும் சில புதிய பிரச்னைகள் உருவாகியிருப்பதை முதலீட்டாளர்கள் கவனிக்கத் தவறக்கூடாது.

நிலையான கடன்முதிர்வுத் திட்டங்கள்

நிலையான கடன்முதிர்வுத் திட்டத்தில் என்ன பிரச்னை என்று பார்ப்போம். இந்த வகையான மியூச்சுவல் ஃபண்ட் திட்டங்களில் செய்யப்பட்ட முதலீடுகள் குறிப்பிட்ட காலஅவகாசத்திற்குப்பிறகு (பொதுவாக, ஒரு மாதம் முதல் ஐந்து வருடங்கள் வரை) கூட்டு வட்டியுடன் வழங்கப்படும். எப்போது வேண்டுமானாலும் முதலீடு செய்யக் கூடியதும் வெளியேறக்கூடியதுமான திறந்த வகை (Open end) ஃபண்ட் திட்டங்களைப்போல, இந்த முதலீட்டில் போட்ட பணத்தை இடையில் திரும்ப எடுக்க முடியாது. இந்த வகைக் கடன் திட்ட ஃபண்டுகளை சந்தையில் விற்பனை செய்து பணத்தைப் பெறலாம் என்றாலும், பெருமளவு வர்த்தகம் எதுவும் நிகழாத காரணத்தால் விற்பனை செய்வது எளிதான காரியமல்ல.

இந்தத் திட்டத்தில் செய்யப்படும் முதலீடு  பெரும்பாலும் கருவூலத் தாள்கள் (Treasury Bills), வைப்புத் தொகை பத்திரங்கள் (Certificate of Deposit), வணிகத் தாள்கள் (Commercial Papers) போன்ற குறுகிய கால கடன்களிலும் மாற்ற முடியாத கடன் பத்திரங்கள் (Non Convetible Debentures), கடன் பிணைப் பத்திரங்கள் (Bonds) போன்ற நீண்ட காலக் கடன்களிலும் முதலீடு செய்யப்படுகிறது. கடன் பத்திரங்களின் முதிர்ச்சியும் ஃபண்ட் திட்டத்தின் முதிர்ச்சியும் பொருந்தும் வகையில் திட்டமிடப்படுகிறது.

எஃப்.எம்.பி சிக்கல்... யாருக்கு அக்னிப் பரீட்சை ?

இந்தத் திட்டத்தின் பாசிட்டிவ் அம்சங்கள் 

மூன்றாண்டுகளுக்கு மேலே முதலீடு செய்யும் இந்த வகை கடன் திட்டங்களுக்கு நீண்டகால வரி ஆதாயங்கள் உண்டு. மேலும், முதலீட்டின் மீது பெறப்பட்ட வருவாயில் பணவீக்கம் அட்ஜஸ்ட் செய்யப்பட்டு, மீதமுள்ள தொகைக்கே நீண்டகால மூலதன ஆதாய வரி (Long Term    Capital Gains Tax) வசூலிக்கப்படும். உதாரணமாக, இந்த வகை திட்டத்தில் 8% வருவாய் பெற்றுள்ள முதலீட்டாளர், இடைப்பட்ட காலத்தில் உள்ள பணவீக்கம் 3 சதவிகிதமாக இருந்தால்,  பணவீக்கத்திற்கு அதிகப்படியான வருவாயான 5 சதவிகிதத்துக்கு மட்டும் வரிச் செலுத்தினால் போதுமானது. அதேசமயம், வங்கி வைப்புத் தொகையில் 8% வட்டி வருவாய் கிடைக்கும் பட்சத்தில், முழுமையான வட்டித் தொகைக்கும் வரிச் செலுத்த வேண்டும். இதற்கு எந்தவொரு வரி ஆதாயமும் கிடைக்காது.

கடன் பத்திரங்களில் செய்யப் படும் முதலீடுகள், முதிர்வு வரை சீராகத் தொடர் வதால், வட்டிவிகித மாற்றங்கள் எந்தவொரு சந்தை அபாயத்தையும் விளைவிப்பதில்லை. எனவே, ஆரம்பக்கால முதலீடுகளுக்குப்பிறகு ஃபண்ட் மேனேஜர் களுக்கும் அதிக வேலை இருப்பதில்லை. அடிக்கடி முடிவுகளை மாற்றும் அவசியமோ அல்லது அதிகம் வர்த்தகம் செய்யவேண்டிய அவசியமோ இல்லாததினால், இந்த வகைத் திட்டங்களின் செலவின விகிதம் மிகக் குறைவாகவும் அதற்கேற்ற வாறு வருவாய் விகிதம் அதிகமாகவும் இருக்கிறது.

எனவேதான், சமீப காலமாக இந்த வகைத் திட்டங்களுக்கு முதலீட்டாளர்கள் மத்தியில் அமோக வரவேற்பு காணப்படுகிறது. குறிப்பாக, வங்கி வைப்புத் திட்டங்களுக்கு ஒரு மாற்றாக இந்த வகைத் திட்டங்கள் அறியப்பட்டதுடன் பல ஆயிரம் கோடி ரூபாய் முதலீடு செய்தார்கள் முதலீட்டாளர்கள். 

எஃப்.எம்.பி சிக்கல்... யாருக்கு அக்னிப் பரீட்சை ?

இந்தத் திட்டத்தின் நெகட்டிவ் அம்சங்கள்

நிதி மேலாளர்களின் குறைவான தலையீடு செலவினச் சுமைகளைக் குறைக்கிறது என்றாலும், அது சில பக்கவிளைவுகளையும் உள்ளடக்கியுள்ளது. நிலையான கடன் முதிர்வு என்பது வட்டிவிகித ஏற்றத்தாழ்வுகளால் ஏற்படும் சந்தை அபாயங்களை மட்டுமே கட்டுப்படுத்துகிறது. கிரெடிட் ரிஸ்க் எனப்படும் கடன் அபாயங்களின் பாதிப்பை மட்டுப்படுத்துவதில்லை.

மிகச் சமீபத்திய உதாரணமான, ஐ.எல்&எஃப்.எஸ் நிதி நிறுவனத்தின் ரேட்டிங் மிகக் குறுகிய கால இடைவெளியில் உயர்ந்தபட்ச ரேட்டிங்கான ‘AAA’-விலிருந்து மிகக் குறைவான ரேட்டிங்கான ‘D’-க்குச் சரிந்தது, கடன் அபாயத்தின் வீரியத்தையும் முதலீட்டு நிறுவனங்களைத் தொடர்ந்து கவனிக்கவேண்டியதன் அவசியத்தை யும் ஒருங்கே  உணர்த்துகிறது.

வட்டி வருவாயை அதிகப்படுத்து வதற்காக கடன்முதிர்வுத் திட்டங் களில் பெரும்பாலும் ‘அதிகம் வர்த்தகமாகாத கடன் பத்திரங்’களில் (Illiquid Securities) முதலீடு செய்யப் படுகிறது. எனவே, குறிப்பிட்ட நிறுவனத்தின் தரச்சான்று குறைக்கப்படும்பட்சத்தில், நிதி மேலாளரால் எளிதாகக் கடன் பத்திரங்களை சந்தையில் விற்பனை செய்ய முடிவதில்லை. அதேபோல, முதலீடு செய்துள்ள நிறுவனங்களில் ஏற்பட்டுள்ள சிக்கல்கள் வெளிப்படையாகத் தெரியவந்தபிறகும் கூட, திட்டம் முதிர்வடைவதற்குமுன்னர் முதலீட்டாளரால் வெளியேற முடிவதில்லை.

இந்தியாவின் லேமன் பிரதர்ஸ் தருணங்கள்

ஐ.எல்&எஃப்.எஸ் நிறுவனத்தின் கடன் சிக்கல்களும் அதனைத் தொடர்ந்து கடன் சந்தையில் ஏற்பட்ட நிதி நெருக்கடியும், பல புதிய பூதங்களைக் கிளப்பிவிட்டிருக்கின்றன. குறுகிய காலத்தில் ஏற்பட்ட ரேட்டிங் வீழ்ச்சி மியூச்சுவல்  ஃபண்ட் யூனிட்டுகளின் நிகரச் சொத்து மதிப்பினைப் பாதித்தன.  ஐ.எல் & எஃப்.எஸ் குழும நிறுவனங்கள் வெளியிட்டுள்ள கடன் பத்திரங்களின் எதிர்காலம் குறித்த கேள்வி தற்போது பலமாக எழுந்துள்ளது.

சில மியூச்சுவல்  ஃபண்டுகள் பங்கு அடமானத்தின் பேரில் மறைமுகக் கடன் வழங்குவதும் சில மியூச்சுவல் ஃபண்டுகள் தமது சொந்த புரமோட்டர்களுக்கே மறைமுகக் கடன் வழங்குவதும் கேள்விகளை எழுப்பியுள்ளன. அதிலும், சில மியூச்சுவல் ஃபண்டுகள், செபி  பார்வையிலிருந்து தப்புவதற்காக பங்குகளை நேரடியாக அடமானம் பெறாமலேயே நூதன முறையில் கடன் வழங்கியதாகவும் தகவல் வெளியாகி, அதிர்ச்சியைத் தந்தன.

எஃப்.எம்.பி சிக்கல்... யாருக்கு அக்னிப் பரீட்சை ?

யாருக்கு அக்னிப் பரீட்சை?

எஸ்ஸெல் குழுமத்தினைச் சார்ந்த ஜீ நிறுவனப் பங்குகளை அடமானம் வைத்து, அதன் புரமோட்டர்களுக்கு சுமார் ரூ.13,500 கோடி கடன் வழங்கப்பட்டுள்ளது. இதில் சுமார் ரூ.7,000 கோடி அளவிற்கு மியூச்சுவல்  ஃபண்டுகளால் வெவ்வேறு வடிவங்களில் கடன் உதவி செய்யப் பட்டுள்ளது. 

ஜீ நிறுவன புரமோட்டர், சுபாஷ் சந்திராவின் நிதி நெருக்கடி குறித்து நவம்பர் 2018 மாதத்திலேயே சில தகவல்கள் ஊடகங்களில் வெளியான போதும்கூட மியூச்சுவல்  ஃபண்டு கள் உடனடி நடவடிக்கை எதுவும் எடுக்கவில்லை. கடந்த 25.01.2019 அன்று மட்டும் ஒரே நாளில் ஜீ நிறுவனப் பங்குகள் 30 சதவிகிதத்துக்கும் மேலே வீழ்ச்சி அடைய, கடன் ஒப்பந்தத்தின் அடிப்படையில் பிணையாக வழங்கப்பட்ட பங்குகளை விற்பனை செய்ய வேண்டிய கட்டாயம் ஏற்பட்டது.

ஆனால், கடன் வழங்கிய நிறுவனங்களையும் மியூச்சுவல் ஃபண்டுகளையும் சமாதானப் படுத்திய சுபாஷ் சந்திரா செப்டம்பர் 2019 வரை பிணையாக வழங்கப்பட்ட பங்குகளை விற்பனை செய்வதைத் தற்காலிகமாக நிறுத்திவைப்பதற்கு ஒப்புக்கொள்ள செய்தார்.  பிணை பங்குகளை விற்பனை செய்வது, ஜீ பங்குகளின் விலையில் பெரும் சரிவை உண்டாக்கும் என்றும் ‘விற்பனை நிறுத்தப் புரிந்துணர்வு’ பங்குகளின் விலையில் ஸ்திரத்தன்மை கொண்டுவர உதவுவதுடன் கடன் தொகையை திரும்பப் பெறவும் உதவும் என்றும் மியூச்சுவல் ஃபண்டுகள் கருதின.

இந்த முடிவினை ‘அக்னிப் பரீட்சை’ என்று வர்ணித்த கோட்டக் மியூச்சுவல் ஃபண்ட் சி.இ.ஓ, ஜீ பங்கின் உள்மதிப்பு சந்தை விலை அதிகமாக இருந்ததனால், பங்கு விற்பனையை நிறுத்தியவுடன் விலை மீட்சி பெற்றது என்று மகிழ்ச்சி தெரிவித்தார்.

ஆனால், இந்த அக்னிப் பரீட்சையில் தோல்வி அடைந்தது என்னவோ, முதலீட்டாளர்கள்தான். இந்த மாதம் (ஏப்ரல் 2019) முதிர்வடைந்த கடன் திட்டத்தில், கோட்டக் மியூச்சுவல் ஃபண்ட் முதலீட்டாளர்களால் அவர்களது முதலீட்டுப் பணத்தை முழுமையாகத் திரும்பப் பெற முடிய வில்லை.  ஐம்பதுக்கும் மேற்பட்ட கடன் முதிர்வுத் திட்டங்கள்மூலம் ஜீ நிறுவனருக்குக் கடன் வழங்கியிருப்பதால், முதலீட்டாளர்களின் நிலை தற்போது கேள்விக்குள்ளாகி உள்ளது.

வாராக் கடன் சிக்கல்கள்

ஜீ விவகாரத்தில் உள்ள குறிப்பிடத்தக்க அம்சங்கள் இரண்டு. பிணையாக வழங்கப் பட்ட பங்குகளின் மதிப்பு குறையும்போது, அதை ஈடுகட்டும் வகையில் புதிய பிணையாக ஏதும் வழங்கப்படவில்லை. மேலும், கடன் திரும்ப வழங்க வேண்டிய தேதி செப்டம்பர் மாதத்திற்குத் தள்ளிப் போடப் பட்டுள்ளது. சாதாரண வங்கி களில் இதுபோன்ற நிலை ஏற்பட்டிருக்கு மேயானால், சுபாஷ் சந்திரா வாராக் கடனாளியாக  மாறியிருப்பார். 

சுபாஷ் சந்திராவின் வாராக்கடன் நிலை குறித்து மியூச்சுவல் ஃபண்டுகள் மற்றும் செபி முறையான அறிக்கை ஏதும் இன்னும் வழங்க வில்லை. கிட்டத்தட்ட இதேபோன்ற சிக்கல்கள் ஐ.எல்&எஃப்.எஸ் மற்றும் இன்னும் சில நிறுவனங்களில் இருப்பது முதலீட்டாளர் களுக்குக் கவலையளிக்கக்கூடிய விஷயமாகும்.

இது சட்டப்படி சரியாக இருக்கலாம் ஆனால், நியாயப்படி..? இவ்வளவு சிக்கல்களுக்குப் பிறகும், ஜீ பங்குகளை அடமானம் வைத்திருக்கும் ஸ்பிரிட் இன்ஃப்ரா பவர் மற்றும் மல்டிவென்சர்ஸ் நிறுவனங்களின் ரேட்டிங், A (SO) என ஒருபடி மட்டுமே குறைக்கப்பட்டிருப்பது தர நிர்ணய நிறுவனங்களின் நம்பகத்தன்மை குறித்த பல கேள்விகளை எழுப்புகிறது.

இந்த வகையான ரேட்டிங்களின் அடிப்படையில் முதலீடுகளைத் தொடர்வதும் முதலீட்டாளர்களுக்குக் குறித்த தேதியில் முதிர்வுத் தொகையை வழங்காததும் நடைமுறையில் உள்ள விதிகளின்படி சரியாக இருக்கலாம். ஃபண்ட் மேனேஜர் என்பவர்  நிதியை நிர்வகிக்கும் ஒரு சாதாரண தொழிற்முறை பணியாளர் மட்டுமல்ல.  முதலீட்டாளர்களின் பாதுகாவலன் என்ற மிகப் பெரிய பொறுப்பும் அவருக்குண்டு  என்பதை நினைவில்கொண்டு அவர்கள் செயல்படுவது நல்லது.

அதேபோல, இந்த விவகாரத்தில் ஒழுங்குமுறை நிறுவனங்களின் தொடர்ச்சியான மௌனம் முதலீட்டாளர்களின் நம்பிக்கையைச் சிதைத்துவிடும் என்ற அபாயத்தை சம்பந்தப்பட்ட அனைவரும் விரைவில் புரிந்துகொண்டால் நல்லது.

(குறிப்பு: இந்தக் கட்டுரையில் சொல்லப்பட்டுள்ள கருத்துகள் கட்டுரையாளரின் தனிப்பட்ட கருத்துகளே.)

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு