Published:Updated:

காலாவதியான பேருந்துகள் காயலாங்கடைக்குப் போகவில்லை!

ஒட்டுமொத்த விகடனுக்கும் ஒரே ஷார்ட்கட்

Use App
காலாவதியான பேருந்துகள் காயலாங்கடைக்குப் போகவில்லை!
காலாவதியான பேருந்துகள் காயலாங்கடைக்குப் போகவில்லை!

ஜூ.வி. புலனாய்வு! - RTI அம்பலம்

பிரீமியம் ஸ்டோரி
காலாவதியான பேருந்துகள் காயலாங்கடைக்குப் போகவில்லை!

நீங்கள் சென்னையில் ஒரு மாநகரப் பேருந்தில் பயணம் செய்பவரா? அல்லது, அந்தப் பேருந்துகள் செல்லும் சாலையில் அப்பாவியாக டூ-வீலரிலோ, நடந்தோ செல்பவரா? உங்களுக்காகச் சில அதிர்ச்சித் தகவல்கள். உங்களைப் போல லட்சக்கணக்கான மக்கள் பயணிக்கும், சாலைகளில் எதிர்கொள்ளும் சென்னை மாநகரப் பேருந்துகளில் பல, எமனுடைய வாகனத்தைப்போல ஓடிக் கொண்டிருக்கின்றன. இந்தப் பேருந்துகளில் பயணம்செய்யும் மக்களின் உயிருக்கு எந்த உத்தரவாதமும் இல்லை. ‘‘சென்னையில் மட்டுமல்ல... தமிழகம் முழுக்க அரசுப் பேருந்துகளின் நிலைமை இதுதான்’’ என்கிறார்கள், போக்குவரத்துக் கழகங்களில் உயர் பொறுப்புகளில் இருப்பவர்கள்.

சென்னை மாநகரப் பேருந்துகளில் பயணம் செய்து பார்த்திருக்கிறீர்களா? கிழிந்த இருக்கைகள், உடைந்த படிக்கட்டுகள், கழன்று ஓடும் சக்கரங்கள்,  கிழிந்து ஓட்டையான மேற்கூரை, தலைவலியை உண்டாக்கும் பேரிரைச்சல் என ‘டெர்ரர்’ கண்டிஷனில் பஸ்கள் ஓடிக்கொண்டிருக் கின்றன. இதுகுறித்து போக்கு வரத்துத் துறை வட்டாரத்தில் விசாரித்தபோது, “ஆயுள்காலம் முடிவடைந்த ஏராளமான பேருந்துகளை சென்னை மாநகரப் போக்கு வரத்துக்குக் கழகம் இயக்குகிறது. ஆயுள்காலம் முடிவடைந்தும் பேருந்துகள் இயக்கப்பட வேண்டுமெனில், ஆர்.டி.ஓ-விடம் தகுதிச் சான்றிதழ் (Fitness Certificate) வாங்க வேண்டும். இந்த விதியைப் பயன்படுத்தி, காயலாங்கடைக்குப் போக வேண்டிய பேருந்துகளுக்கும் தகுதிச் சான்றிதழ்கள் வாங்கி, அவற்றை இயக்கி வருகிறார்கள்” என்று நம்மை அதிர வைத்தார்கள்.

காலாவதியான பேருந்துகள் காயலாங்கடைக்குப் போகவில்லை!

காலாவதியான பேருந்துகள்...

ஆயுள்காலம் முடிந்த பிறகும் எத்தனைப் பேருந்துகள் இயக்கப்படுகின்றன என்று ‘ஜூனியர் விகடன்’ சார்பில் தகவல் அறியும் உரிமைச் சட்டத்தின் கீழ் சென்னை மாநகரப் போக்குவரத்துக் கழகத்திடம் கேள்விகள் கேட்டிருந்தோம். அதில், நமக்கு அளிக்கப்பட்ட தகவல்கள் இதோ...

 “பேருந்துகளின் சராசரி ஆயுள்காலம் 6.6 வருடங்கள். ஒவ்வொரு பேருந்தும் ஆயுள்காலத்தில் ஏழு லட்சம் கி.மீ முதல் 12 லட்சம் கி.மீ வரை இயக்கப்படும். மாநகரப் போக்குவரத்துக் கழகத்தில் ஆயுள்காலம் முடிந்தும் 3,035 பேருந்துகள் இயக்கப்படுகின்றன. மாநகரப் போக்குவரத்துக் கழகத்தால் இயக்கப்படும் அனைத்துப் பேருந்து களுக்கும் வருடத்துக்கு ஒரு முறை  தகுதிச் சான்றிதழ் பெறப்படுகிறது. வாரத்துக்கு ஒரு முறையும், தினசரியும் முறையாகப் பராமரிப்புப் பணிகள் மேற்கொள்ளப்படுகின்றன. 2015-16-ம் ஆண்டு கணக்கின்படி சராசரியாக ஒரு பேருந்துக்கு டயர், உதிரிப் பாகங்களுக்கு (டீசல், சம்பளம் தவிர) ஒரு ஆண்டுக்கு 2.15 லட்சம் ரூபாய் செலவிடப்படுகிறது. பேருந்துகளைப் பராமரிப்பது குறித்து முறையான அரசு ஆணைகள் ஏதும் இல்லை” என்று கூறப்பட்டுள்ளது.

உயிருக்கு உத்தரவாதம் இல்லை

இதுகுறித்து தமிழ்நாடு அரசுப் போக்குவரத்துக்கழக தொழிற்சங்கத் தலைவர் பாலகிருஷ்ணனிடம் பேசினோம். “சென்னை மாநகரப் போக்கு வரத்துக்  கழக விதிமுறையின்படி, ஆயுள்காலம் முடிந்த பேருந்துகளை இயக்குவது பயணிகளின் உயிரோடு விளையாடுவதற்குச் சமம். அவை இயக்குவதற்குத் தகுதியற்றவை. ஆயுள்காலம் முடிந்த பேருந்துகளின் உதிரிப் பாகங்கள் எந்த நேரத்திலும் சேதம் அடைந்து விபத்தை ஏற்படுத்தக் கூடும். பேருந்தை இயக்கும் ஓட்டுநர் ஒருவித பயத்திலேயே வண்டியை ஓட்ட வேண்டிய நிலை இருக்கிறது. பிரேக் போட முடியாது; ஸ்டீயரிங்கைத் திருப்ப முடியாது; கியர் போட்டால் சத்தம் வரும்; கிளட்ச்சை அழுத்த முடியாது; பேருந்தின் முன்பகுதி கடகடவென ஆடிக்கொண்டு போகும்; சீட்டுக்கு கீழே உள்ள ஸ்பிரிங் சேதமடை வதால் பயணிகளுக்கு இடுப்பு வலி வரும்; சீட்டில் குஷன் வசதி இருக்காது; குறிப்பாக, பேருந்தின் அடித்தளம் எனச் சொல்லப் படும் சேஸிஸ் பலவீனமாகிவிடும்.

காலாவதியான பேருந்துகள் காயலாங்கடைக்குப் போகவில்லை!

ஆர்.டி.ஓ அலுவலகத்தில் முறையாக தகுதிச் சான்றிதழ் பெறுகிறார்கள் என்று சொல்லப்படுவது ஒரு ஏமாற்று வேலை. தகுதிச் சான்றிதழ் வாங்கப்பட்டு டெப்போவுக்குக் கொண்டு வரப்படும் வழியிலேயே பேருந்துகள் பிரேக்டவுண் ஆகிவிடுகின்றன. பேருந்து களை முறைப்படி பராமரிக்க வேண்டும் என்று விதிமுறையில் உள்ளது. ஆனால், பராமரிப்பதற்கு ஆட்கள் இல்லை. ஒரு பேருந்தைப் பராமரிக்க சராசரியாக 1.25 மேன்பவர் தேவை. ஆனால், இப்போது சென்னை மாநகரப் போக்குவரத்துக் கழகத்தில் ஒரு பேருந்தைப் பராமரிக்க 0.45 என்ற அளவில்தான் மேன்பவர் இருக்கிறது. ‘ஆட்கள் பற்றாக்குறை இல்லை’ என்கிறார்கள். ஆனால், பேருந்துகளின் டயர்களைப் பராமரிக்கும் பணியை அவுட் சோர்ஸிங் விடுகின்றனர். போக்குவரத்துக் கழகத்துக்குத் தரமில்லாத டயர்களைத்தான் வாங்குகின்றனர். பேருந்துகளை முறையாகப் பராமரிக்காமல், ஆயுள்காலத்துக்கு முன்பேகூட இயக்க முடியாத நிலையை அடைந்து விடுகின்றன” என்றார் கவலையுடன்.

முறையான பராமரிப்பு

இது குறித்து சென்னை மாநகரப் போக்குவரத்துக் கழகத்தின் நிர்வாக  இயக்குநர்   வி.கிருஷ்ணமூர்த்தி யிடம் பேசினோம். “பேருந்துகளின் ஆயுள்காலம் குறித்து தமிழக அரசு சார்பில் ஒரு விதிமுறை வகுத்துள்ளனர். அதன்படி, 6.6 ஆண்டுகள் அல்லது 7 லட்சம் கி.மீ ஓடிய பேருந்துகள் ஆயுள் காலம் முடிந்தவை என்று கணக்கிடப்படுகிறது. அதன்படி, 3,000 பேருந்துகள் ஆயுள்காலம் முடிந்தவை என்று உங்களுக்குத் தகவல் அளிக்கப்பட்டுள்ளது. ஆயுள்காலம் முடிந்த பேருந்துகள் என்றபோதிலும் அவை முறையாகப் பராமரிக்கப்படுகின்றன. திடீரென அந்தப் பேருந்துகளைச் சேவையில் இருந்து நிறுத்த முடியாது. அப்படிச் செய்தால், பயணிகளுக்குப் பாதிப்பு ஏற்படும்.

ஆயுள்காலம் முடிந்த பேருந்துகளுக்குப் பதிலாகப் புதிய பேருந்துகளை அரசிடம் கேட்டிருக்கிறோம். ஆனால், இன்னும் வழங்கப்படவில்லை. அவை வந்ததும் படிப்படியாக மாற்றப்படும். சில ஆண்டுகளுக்கு முன்பு பேருந்துகள் ஆங்காங்கே நின்றுவிடும். இப்போது அந்த நிலைமை இல்லை. முறையான பராமரிப்பு செய்வதால்தான் வண்டிகள் ஓடிக்கொண்டிருக் கின்றன. எப்போதாவது பிரேக்டவுண் ஆவது உண்டு. எல்லாப் பேருந்துகளும் பிரேக்டவுண் ஆவதில்லை” என்றார். 

அரசுப் பேருந்துகள், ஆண்டுதோறும் ஆர்.டி.ஓ அலுவலகத்தில் தகுதிச் சான்றிதழ் பெற்ற பிறகே இயக்கப்படுகின்றன என்று சொல்லப் படுகிறது. ஆனால், தனியார் பேருந்துகளைப் பரிசோதிப்பதுபோல அரசுப் பேருந்துகளை ஆர்.டி.ஓ தரப்பில் சோதனை செய்வதில்லை. இதனால்தான், வெறுமனே பெயின்ட் மட்டும் அடிக்கப்பட்ட அரசுப் பேருந்துகளுக்கு தகுதிச் சான்றிதழ் கொடுக்கப்பட்டுவிடுகிறது. முறையாகப் பரிசோதனை செய்தால், இத்தனை பேருந்துகளை ரோட்டில் இயக்க முடியாது என்பதுதான் உண்மை.

காலாவதியான பேருந்துகள் காயலாங்கடைக்குப் போகவில்லை!

15 ஆண்டுகள்...

 இதுகுறித்து மாநில போக்குவரத்து ஆணையத்தின் போக்குவரத்து இணை இயக்குநர் (விதிமுறைகள்) முருகானந்தத்திடம் கேட்டோம். “பேருந்தின் ஆயுள்காலம் என்பது 15 ஆண்டுகளாக வரையறுக்கப்பட்டுள்ளது. ஒரு பேருந்து, பதிவு செய்யப்பட்டதிலிருந்து இரண்டு ஆண்டுகள் கழித்து, அதற்கு முதல் தகுதிச் சான்றிதழ் கொடுப்போம். பின்னர், ஒவ்வொரு வருடமும் அந்தப் பேருந்து ஆய்வுசெய்யப்பட்டு தகுதிச் சான்றிதழ் கொடுக்கப்படும். அரசுப் பேருந்தின் ஆயுள்காலம் 6.6 ஆண்டுகள் என்பது மாநகரப் போக்குவரத்துக் கழகம் வகுத்த விதிமுறை. 6.6 ஆண்டுகள் முடிவடைந்த பேருந்துகளை எங்களிடம் சோதனைக்கு உட்படுத்திப்  தகுதிச் சான்றிதழ் பெற்றபின் இயக்குகின்றனர். பேருந்துகள் முறையாகப் பராமரிக்கப்படுகின்றனவா, பேருந்தின் பாகங்கள் பழுதடையாமல் இருக்கின்றனவா என்பதைச் சரிபார்த்த பின்னர்தான் நாங்கள்  தகுதிச் சான்றிதழ் தருகிறோம். மாநகரப் போக்கு ழ்வரத்துக் கழகப் பேருந்துகளை அதிகபட்சம் எட்டு வருடங்கள் வரை இயக்கலாம். மேலும், அரசுப் பேருந்துகளைச் சரியாக ஆய்வு செய்யாமல் நாங்கள் தகுதிச் சான்றிதழ் வழங்குகிறோம் என்று சொல்வ தெல்லாம் தவறான தகவல்” என்றார்.

 பயணிகள் உயிருடன் விளையாடாதீர்கள். தயவுசெய்து, காலாவதியான பேருந்துகளைக் காயலாங்கடைக்கு அனுப்பிவிடுங்கள்.

காலாவதியான பேருந்துகள் காயலாங்கடைக்குப் போகவில்லை!

ஆதாரம்: தமிழக போக்குவரத்துத் துறை, மாநகரப் போக்குவரத்துக் கழகம் - சென்னை.
தொகுப்பு: கே.பாலசுப்பிரமணி
இன்ஃபோகிராபிக்ஸ்: நிஜார் மின்ஹா

- கே.பாலசுப்பிரமணி
படங்கள்: ரா.ராம்குமார்

பேருந்துகள் குறைப்பா?

அண்மையில் போக்குவரத்துத் துறை அதிகாரிகள் மட்டத்தில் நடைபெற்ற ஆலோசனையில், ‘தமிழகம் முழுவதும், நஷ்டத்தில் இயங்கும் 3,200 பேருந்துகளை நிறுத்தலாம்’ என்றும் முடிவுசெய்யப்பட்டதாகத் தகவல்கள் வெளியாகியுள்ளன. சென்னையில் மட்டும் 360 பேருந்துகள் நிறுத்தப்படலாம் என்று சொல்லப்படுகிறது. இதன் தொடர்ச்சியாகப் போக்குவரத்துக் கழகங்களுக்கு அனுப்பப்பட்ட சுற்றறிக்கையில், ஒரு கி.மீ-க்கு 18 ரூபாய்க்கும் குறைவாக வசூல் இருந்தால், அந்தப் பேருந்தை நிறுத்திவிடலாம் என்று அறிவுறுத்தப்பட்டதாகத் தெரிகிறது. ஆனால், தொழிற்சங்கங்களின் எதிர்ப்புக் காரணமாக பேருந்துகளை நிறுத்தும் முடிவை அரசு கைவிட்டிருக்கிறது.

பேருந்துகள் நஷ்டம் இல்லாமல் செயல்பட போக்குவரத்துக் கழகங்களின் வரவுக்கும் செலவுக்கும் இடையான வித்தியாசத்தை அரசு தர வேண்டும். இலவச பஸ் பாஸ், முதியோர் பஸ் பாஸ் போன்றவற்றுக்கான மானியத் தொகையை காலதாமதம் இன்றி முழுமையாக அரசு தர வேண்டும். ‘நஷ்டத்தை ஈடுகட்ட போக்குவரத்துக் கழகங்களுக்கு மானியம் வழங்கப்படும்’ என்று சட்டப்பேரவையில் 110 விதியின் கீழ் முதல்வர் ஜெயலலிதா அறிவிப்பு செய்தார். அறிவித்து 2 ஆண்டுகள் ஆகியும் அதை அமல்படுத்தவில்லை. சொன்னதை அமல்படுத்தினாலே போக்குவரத்துக் கழகங்கள் லாபத்தில் செயல்படும் என்று சொல்கின்றனர்.

காலாவதியான பேருந்துகள் காயலாங்கடைக்குப் போகவில்லை!

``விபத்துக்கள் நடக்கத்தான் செய்யும்!’’

 டெல்லி, மும்பை போன்ற நகரங்களில் 10 வருடங்கள் ஆயுள் முடிந்த பேருந்துகளை இயக்கக்கூடாது என்ற விதிமுறை உள்ளது. இதை அங்கு கடுமையாகக் கடைபிடிக்கிறார்கள். 

 ஐரோப்பிய நாடுகளில், ஒவ்வொரு நாட்டிலும் தனித்தனி விதிகள் உண்டு. அதற்கு ஏற்றபடி 10 முதல் 15 ஆண்டுகள் வரை மட்டுமே பேருந்துகளை இயக்க வேண்டும். அதற்குப் பிறகு அந்தப் பேருந்துகள் காயலாங்கடைக்குத்தான் போயாக வேண்டும்.

 2014-15-ம் ஆண்டு காலகட்டத்தில் மட்டும், தமிழகம் முழுவதும் அரசுப் போக்குவரத்துக்கழகப் பேருந்துகளால் ஏற்பட்ட விபத்துகளில் 1,460 பேர் உயிரிழந்துள்ளனர். 2015-16-ம் ஆண்டு காலகட்டத்தில், அரசுப் பேருந்துகளால் ஏற்பட்ட விபத்துகளில் 1,331 பேர் உயிரிழந்துள்ளனர். 

 மீபத்தில் திருச்சியில் நடைபெற்ற சாலைப் பாதுகாப்பு விழிப்பு உணர்வு நிகழ்ச்சியில், மத்திய கப்பல் மற்றும் சாலைப் போக்குவரத்து இணை அமைச்சர் பொன்.ராதாகிருஷ்ணன், ‘‘இந்தியாவிலேயே தமிழகத்தில்தான் சாலை விபத்துகள் அதிகம் நடக்கின்றன’’ என்றார். அதே நிகழ்ச்சியில் பங்கேற்ற தமிழகப் போக்குவரத்து அமைச்சர் விஜயபாஸ்கர், ‘‘இந்தியாவிலேயே தமிழகத்தில்தான் அதிக பஸ்கள் இயங்குகின்றன. அதனால், விபத்துகள் அதிகம் நடக்கத்தான் செய்யும்’’ என்று அலட்சியமாகச் சொன்னார்.

 தமிழகப் போக்குவரத்துக் கழகங்கள், தம் வருமானத்தில் 4.1 சதவிகிதத்தையே பராமரிப்புக்கு ஒதுக்குகின்றன. 

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு