Published:Updated:

‘பொறி’ வைத்துப் பிடிக்கும் பொறியியல் கல்லூரிகள் - ஜூ.வி ஸ்பெஷல் ஸ்டோரி

‘பொறி’ வைத்துப் பிடிக்கும் பொறியியல் கல்லூரிகள் - ஜூ.வி ஸ்பெஷல் ஸ்டோரி
பிரீமியம் ஸ்டோரி
‘பொறி’ வைத்துப் பிடிக்கும் பொறியியல் கல்லூரிகள் - ஜூ.வி ஸ்பெஷல் ஸ்டோரி

கேம்பஸ் இன்டர்வியூ கோல்மால்... அட்மிஷனுக்கு ஆள் செட்டப்... ஃபிளாப் பிளேஸ்மென்ட்...

‘பொறி’ வைத்துப் பிடிக்கும் பொறியியல் கல்லூரிகள் - ஜூ.வி ஸ்பெஷல் ஸ்டோரி

கேம்பஸ் இன்டர்வியூ கோல்மால்... அட்மிஷனுக்கு ஆள் செட்டப்... ஃபிளாப் பிளேஸ்மென்ட்...

Published:Updated:
‘பொறி’ வைத்துப் பிடிக்கும் பொறியியல் கல்லூரிகள் - ஜூ.வி ஸ்பெஷல் ஸ்டோரி
பிரீமியம் ஸ்டோரி
‘பொறி’ வைத்துப் பிடிக்கும் பொறியியல் கல்லூரிகள் - ஜூ.வி ஸ்பெஷல் ஸ்டோரி

‘படிக்க சீட் கிடைத்துவிடும். ஆனால், படித்து முடித்ததும் வேலை கிடைக்காது!’ இதுதான் இன்ஜினீயரிங் படிப்பின் இன்றைய நிலை. தமிழகத்தில் சுமார் 2.8 லட்சம் இன்ஜினீயரிங் படிப்புக்கான இடங்கள் இருக்கின்றன. அதில் கடந்த ஆண்டு 1,01,318 இடங்கள் காலியாக இருந்தன. சில கல்லூரிகளில் சேர்க்கையே இல்லை. பல கல்லூரிகளில் பல துறைகள் மாணவர்கள் இன்றி வெறிச்சோடிக் கிடந்தன. 

‘பொறி’ வைத்துப் பிடிக்கும் பொறியியல் கல்லூரிகள் - ஜூ.வி ஸ்பெஷல் ஸ்டோரி

தொழில்நுட்பமும் பொறியியலும் பயன்படாத துறைகளே இல்லை. ஆனால், இங்கே இன்ஜினீயரிங் முடித்த லட்சக்கணக்கான இளைஞர்களுக்கு வேலை கிடைக்கவில்லை. மாதம் ரூபாய் ஏழாயிரம், எட்டாயிரம் சம்பளத்துக்கே வரிசை கட்டி நிற்கிறார்கள் பொறியாளர்கள். இதைச் சாதகமாகப் பயன்படுத்தி, பெரிய சம்பளம் வாங்கும் மூத்த ஊழியர்களை வீட்டுக்கு அனுப்பிக்கொண்டிருக் கின்றன ஐ.டி நிறுவனங்கள்.

மயக்கும் தந்திர விளம்பரம்!


கடந்த தொண்ணூறுகளின் தொடக்கத்தில், ஐ.டி நிறுவனங்கள், மோட்டார் தொழிற்சாலைகள் இந்தியாவுக்குள் வரத்தொடங்கின. அடுத்த 10 ஆண்டுகளில் அவை பலமாக வேரூன்றி, உச்சம் பெற்றன. இந்த நிறுவனங்களில் வேலைசெய்ய அதிக அளவு தொழில்நுட்ப வல்லுநர்கள் தேவைப்பட்டார்கள். ‘படித்து முடித்ததும் வேலை, நமது முந்தைய தலைமுறை நினைத்துப் பார்க்க முடியாத சம்பளம்’ என அந்தத் துறை தன் பளபளப்பால் அனைவரையும் ஈர்த்தது. நிறைய பேர் இன்ஜினீயரிங் படிக்க ஆசைப்பட்டார்கள். அதைச் சாதகமாகப் பயன்படுத்திக்கொண்டார்கள் கல்வித் தந்தைகள். காளான்களைப்போல கல்லூரிகள் பெருகத் தொடங்கின. தமிழ்நாட்டில் இன்று 563 இன்ஜினீயரிங் கல்லூரிகள் உள்ளன. தஞ்சாவூர் அருகே வல்லம் என்னும் சிற்றூரில் மட்டும் மூன்று தனியார் இன்ஜினீயரிங் பல்கலைக்கழகங்கள் இருக்கிறதென்றால், பார்த்துக்கொள்ளுங்கள்.

இன்ஜினீயரிங் கல்லூரிகளின் மிக முக்கிய வணிகத் தந்திரம், ‘100 சதவிகிதம் பிளேஸ்மென்ட்’. உலக அளவில் முன்னணியில் இருக்கும் நிறுவனங்களின் பெயர்களை எல்லாம் போட்டு எல்லா திசைகளிலும் விளம்பரம் செய்கிறார்கள். பெற்றோரும் மாணவர்களும் இந்த  விளம்பரங்களைக் கண்டு மயங்கிவிடுகிறார்கள்.

கேம்பஸ் இன்டர்வியூக்களில் நடப்பது என்ன?

“கல்லூரிகளின் தரம், தேர்ச்சி சதவிகிதம் ஆகியவற்றைக் கணக்கிட்டு டயர்-1, டயர்-2, டயர்-3 எனக் கல்லூரிகள் பிரிக்கப்படுகின்றன. தமிழகத்தில் இருக்கும் 563 இன்ஜினீயரிங் கல்லூரிகளில் 40 கல்லூரிகளைத்தான் டயர்-1 கல்லூரிகள் என வரையறுக்க முடியும். அந்தக் கல்லூரிகளில் மட்டும்தான் பெரிய நிறுவனங்கள் நேரடியாக கேம்பஸ் இன்டர்வியூக்களை நடத்துகின்றன.

இதுதவிர, டயர்-2, டயர்-3 கல்லூரிகளில் நடக்கும் கேம்பஸ் இன்டர்வியூக்கள் பெரும்பாலும் முறையற்றவையாக இருக்கின்றன. ‘கேம்பஸ் இன்டர்வியூ’ என்ற பெயரில், நிறுவனங்களின் ஹெச்.ஆர்-களோடு உடன்பாடு செய்துகொண்டு, மாணவர்களின் எதிர்காலத்தோடு இந்தக் கல்லூரிகள் விளையாடுகின்றன. ஹெச்.ஆர்-களைக் கல்லூரிக்கு அழைத்து வருவதற்கென்று நிறைய இடைத்தரகர்கள் இருக்கிறார்கள். இந்த வணிகம் கோடிகளில் நடக்கிறது. பல கல்லூரி நிர்வாகங்கள் மிகவும் கீழே இறங்குகின்றன. பெரிய அளவில் பணம், வெளிநாட்டுப் பயணம் எனச் சில ஹெச்.ஆர்-களை மகிழ்ச்சிப்படுத்தித் தொடர்பில் வைத்துக்கொள்கிறார்கள்.

தாம்பரம் மெப்ஸ் வளாகத்தில் உள்ள ஒரு சிறிய தயாரிப்பு நிறுவனத்தின் ஹெச்.ஆர், கல்லூரி கேம்பஸ் இன்டர்வியூவுக்கு வர, 60 ஆயிரம் ரூபாய் பணம் கேட்கிறார். அதுதவிர ஒவ்வொரு சேர்க்கைக்கும் 10 ஆயிரம் ரூபாய். அதிகபட்சம் 8,000 ரூபாய் சம்பளம் கொடுப்பார்கள். படித்த படிப்புக்கும், பார்க்கும் வேலைக்கும் சிறிதும் தொடர்பு இருக்காது. ஆனால், கல்லூரி 100 சதவிகிதம் பிளேஸ்மென்ட் என்று விளம்பரம் செய்துகொள்ளும். 

‘பொறி’ வைத்துப் பிடிக்கும் பொறியியல் கல்லூரிகள் - ஜூ.வி ஸ்பெஷல் ஸ்டோரி

மாணவர்களுக்குத் தரும் ஆஃபர் லெட்டரில் சம்பளம், பணி பற்றிக் குறிப்பிடுவார்கள். ஆனால், ‘எப்போது வேலையில் சேர வேண்டும்’ என்று குறிப்பிடுவதில்லை. ஒருமுறை இன்டர்வியூவில் தேர்வு பெற்றால், கல்லூரி முடியும் வரை வேறெந்த இன்டர்வியூவிலும் பங்கேற்க முடியாது. இதனால், மாணவர்களின் வாழ்க்கையே பாதிக்கிறது. பல நிறுவனங்கள் ஆஃபர் லெட்டர்கூட தருவதில்லை. ‘லெட்டர் ஆஃப் இண்டென்ட்’ எனப்படும் உறுதி ஆைணயை மட்டும் தருகின்றன. ‘எதிர்காலத்தில் உங்களை வேலைக்கு எடுத்துக்கொள்ள விரும்புகிறோம்’ என்பதே அதன் பொருள்.

பெரும்பாலான கல்லூரிகளில் வேலைவாய்ப்பு பெற்றுத்தரும் கன்சல்டன்ஸி நிறுவனங்களே கேம்பஸ் இன்டர்வியூக்கு வருகின்றன. பெரிய நிறுவனங்களின் பெயரில் ஆர்டர்களை வழங்கிவிட்டுப் போய்விடுவார்கள். ‘அழைப்பார்கள், அழைப்பார்கள்’ எனக் காத்திருந்து காலத்தை இழந்த மாணவர்கள் நிறைய பேர் இருக்கிறார்கள். அப்படியே வேலைக்குச் சேர்ந்தவர்களையும் ஐந்து மாதங்களுக்கு மேல் அந்த நிறுவனத்தில் வேலைசெய்ய அனுமதிப்பதில்லை. திறன் சரியில்லை  என்று கூறி அனுப்பிவிடுவார்கள். அல்லது ஒரு தேர்வுவைத்து, அதில் தேறவில்லை என்று வெளியேற்றி விடுவார்கள்’’ என்கிறார் கல்வி ஆலோசகர் ஸ்ரீனிவாஸ் சம்பந்தம்.

பெரிய நிறுவனங்களும் ஏமாற்றுகின்றன!

சிறிய நிறுவனங்கள் என்றில்லை. பெரிய பெரிய நிறுவனங்களே கேம்பஸ் இன்டர்வியூக்களில் ஆட்களை எடுத்து, வேலை கொடுக்காமல் காக்கவைப்பதும் உண்டு. அதைக் கண்டித்து போராட்டங் களும் நடந்திருக்கின்றன. 

“ஃபிளிப்கார்ட், எல் அண்டு டி, ஹெச்.சி.எல் போன்ற நிறுவனங்கள் இப்படி வேலையே கொடுக்காமல் நெடுங்காலம் காக்கவைத்த சம்பவங்கள் எல்லாம் உண்டு. ஆர்டர்பெற்ற மாணவர்கள் படிப்பை முடித்தபிறகு, வேறு வேலைக்கும் செல்லாமல் காத்திருந்து பார்த்துவிட்டு, அந்த நிறுவனங்களின் முன்பு போராட்டம் நடத்தினார்கள். இது எல்லா பத்திரிகைகளிலும் செய்தியானது.

எல்லா கல்லூரிகளுமே இன்ஃபோசிஸ், டி.சி.எஸ் போன்ற நிறுவனங்கள் தங்கள் கல்லூரிக்கு வருவதாகச் சொல்கின்றன. இப்போது அந்த நிறுவனங்கள் கிட்டத்தட்ட இன்ஜினீயரிங் கல்லூரிகளுக்குப் போவதையே நிறுத்திவிட்டன. மாறாக, கலை அறிவியல் கல்லூரி மாணவர்களையே வேலைக்கு எடுக்கின்றன. இவர்களை அப்ரண்டீஸ் மாதிரி வேலை செய்துகொண்டே போஸ்ட்  கிராஜுவேட் படிப்புகளைப் படிக்கச் சொல்கின்றன. இதற்காக ஐ.ஐ.எம்., பிட்ஸ் பிலானி, சாஸ்த்ரா போன்ற கல்வி நிறுவனங்களோடு ஒப்பந்தம் செய்துள்ளன. வார விடுமுறை நாள்களில் வகுப்புகள் நடக்கும். ஒரு பொறியியல் பட்டதாரியை வேலைக்குச் சேர்த்தால் கொடுக்கும் சம்பளத்தில் பாதியளவு கூட இவர்களுக்குக் கிடைப்பதில்லை.
இந்த உள்விவரங்கள் எல்லாம், இந்த நிறுவனங்களுக்கு ப்ராஜெக்ட் தரும் கிளையன்ட்டுக்குத் தெரியாது. முறையான ஊழியருக்கு எவ்வளவு பில்லிங்கோ, அதே அளவுக்கு அப்ரண்டீஸ்களுக்கும் பில்லிங் போட்டுப் பணம் பெற்றுவிடுவார்கள். அதுபோக, தங்கள் ஊழியர்களை மேற்படிப்பு படிக்க வைப்பதாக விளம்பரமும் செய்து கொள்வார்கள்” என்கிறார் ‘ஃபோரம் ஃபார் ஐ.டி எம்ப்ளாயிஸ்’ அமைப்பின் பொதுச் செயலாளர் சதீஷ்.

‘பொறி’ வைத்துப் பிடிக்கும் பொறியியல் கல்லூரிகள் - ஜூ.வி ஸ்பெஷல் ஸ்டோரி

அட்மிஷனுக்காக ஆள் செட்டப்!

‘‘மாணவர்களைச் சேர்க்க இன்ஜினீயரிங் கல்லூரிகள் செய்யும் மாயவேலைகள் அதிர்ச்சி ரகம். சில கல்லூரிகள் பிப்ரவரி மாதத்திலேயே தனியார் பள்ளிகளோடு ‘ஒப்பந்தம்’ போட்டுக் கொண்டு அங்கு அறிமுக வகுப்புகளை நடத்தத் தொடங்கிவிடுகின்றன. அந்த வகுப்புகளில் தங்கள் கல்லூரிகளின் `சிறப்பு’களை எல்லாம் எடுத்துரைத்து, சில சலுகைகளையும் அறிவித்து மாணவர்களைச் சேர்த்துவிடுகிறார்கள். ப்ளஸ் டூ தேர்வு முடிந்து ரிசல்ட் வந்தவுடனேயே கல்லூரிகளில் வகுப்புகள் தொடங்கிவிடும். கவுன்சலிங் நேரத்தில், அந்த மாணவர்களை ஆசிரியர்கள் சூழ, கல்லூரி வாகனத்திலேயே அண்ணா பல்கலைக்கழகத்துக்கு அழைத்துச்சென்று கவுன்சலிங்கில் கலந்துகொள்ளவைத்துத் தங்கள் கல்லூரிகளில் சேர்த்துவிடுவார்கள்.

சில கல்லூரிகளில் ஓர் ஆசிரியர் இத்தனை மாணவர்களைக் கல்லூரிக்குக் கொண்டுவர வேண்டும் என்று டார்கெட் ஃபிக்ஸ் செய்துவிடுகிறார்கள். அதற்கேற்ப ஊக்கத்தொகை வழங்கப்படுகிறது. சீனியர் மாணவர்களுக்குப் பகுதிநேர வேலையாகவும் இந்தப் பணி தரப்படுகிறது. சில பெற்றோர்கள் அட்மிஷனுக்கு முன்பு, கல்லூரிக்கு வந்து பார்த்து, வளாகத்தில் நிற்கும் சீனியர் மாணவர்களிடம் விசாரிப்பார்கள். அவர்களுக்குக் கல்லூரி பற்றி நல்லவிதமாகச் சொல்வதற்காக, ப்ளஸ் டூ ரிசல்ட் வந்த நாளிலிருந்து கவுன்சலிங் நிறைவுறும் நாள் வரை கல்லூரிகளின் முன்பு மாணவர்கள் நிறுத்தி வைக்கப்படுவதும் உண்டு.

563 கல்லூரிகளில் சுமார் 300 கல்லூரிகளில் போதிய அளவுக்கு அடிப்படை வசதிகள், ஆய்வுக்கூடங்கள், தகுதிபெற்ற ஆசிரியர்கள் இல்லை. எம்.இ முடித்த மாணவர்கள்தான் வகுப்பெடுக்கிறார்கள்” என்கிறார் கல்வியாளர் பிரின்ஸ் கஜேந்திரபாபு.

‘பொறி’ வைத்துப் பிடிக்கும் பொறியியல் கல்லூரிகள் - ஜூ.வி ஸ்பெஷல் ஸ்டோரி

தொடர்பே இல்லாத பாடம்!

இன்ஜினீயரிங் படிப்பை முடிக்கும் 97 சதவிகிதம் மாணவர்களின் இலக்கு ஐ.டி துறைதான் என்கிறது ‘ஆஸ்பைரிங் மைண்ட்’ என்ற நிறுவனத்தின் ஆய்வு. ஆனால், ‘மூன்று சதவிகிதம் பேர்தான் அதற்குரிய தகுதியோடு கல்லூரி முடித்து வருகிறார்கள்’ என்கிறது அந்த ஆய்வு. ஏழு சதவிகிதம் பேர்தான் சிவில் போன்ற பிற முக்கியத் துறைகளில் பணி செய்யும் திறன் பெற்றவர்கள். ‘25 சதவிகிதம் பொறியாளர்களே தகுந்த திறனோடு பணிக்கு வருகிறார்கள்’ என்று இந்திய ஐ.டி நிறுவனங்களின் கூட்டமைப்பான நாஸ்காம் கூறுகிறது என்றால், நான்கு ஆண்டுகளில் அப்படி எதைத்தான் மாணவர்கள் படிக்கிறார்கள்?

‘‘பாடத்திட்டத்தைப் பொறுத்தவரை நாம் 20 ஆண்டுகள் பின்தங்கி இருக்கிறோம். வாழ்க்கைக்கும் சரி, தொழிலுக்கும் சரி... தொடர்பே இல்லாத படிப்பாகப் பொறியியல் இருக்கிறது. ஒருபக்கம் லட்சக்கணக்கான வேலைகள் காலியாக இருக்கின்றன. இன்னொரு பக்கம் லட்சக்கணக்கானவர்கள் வேலையில்லாமல் இருக்கிறார்கள். தகுந்த பணித்திறன் இல்லை என்று நிராகரிக்கப்படும் மாணவர்களின் எண்ணிக்கை மிகப்பெரியதாக இருக்கிறது.

இன்ஜினீயரிங் என்பது தொழில் சார்ந்த படிப்பு. ஆனால், இன்ஜினீயரிங் கல்லூரிகளுக்கும் தொழில் நிறுவனங்களுக்கும் தொடர்பே இல்லை. பாடத்திட்டங்களை எழுதுபவர்களுக்குக்கூட தொழில் சார்ந்த அனுபவமோ, தொடர்போ இருப்பதில்லை. அதனால் மாணவர்கள் கள அனுபவமே இல்லாமல் தியரியை மனப்பாடம் செய்து தேர்வெழுதிவிட்டு வெளியே வருகிறார்கள். எங்கள் நிறுவனத்துக்கு நேர்காணலுக்கு வந்த எலெக்ட்ரிக்கல் இன்ஜினீயரிங் முடித்த மாணவனிடம், ‘வாட் ஈஸ் வோல்டேஜ்?’ என்று கேட்டால் பதில் சொல்லத் தெரியவில்லை. இந்த அளவில்தான் நம் கல்லூரிகள் பொறியாளர்களை உருவாக்கித் தருகின்றன” என்கிறார் கல்வியாளரும், ஆனந்தம் இளைஞர் நல அமைப்பின் நிறுவனருமான செல்வகுமார்.

‘பொறி’ வைத்துப் பிடிக்கும் பொறியியல் கல்லூரிகள் - ஜூ.வி ஸ்பெஷல் ஸ்டோரி

அப்டேட் ஆக வேண்டும்!

‘இன்ஜினீயரிங் கல்லூரிகளின் செயல்பாடுகள் சரியா?’ - சென்னை இன்ஸ்டிடியூட் ஆஃப் டெக்னாலஜி நிறுவனத்தின் தலைவர் ஸ்ரீராமிடம் கேட்டோம்.

“இன்ஜினீயரிங் கல்லூரிகள் வேலைவாய்ப்பு அலுவலகங்கள் இல்லை. அவை நாட்டின் வளர்ச்சியோடு தொடர்புடையவை. தொழில் நுட்பம் என்பது நொடிக்கு நொடி வளரக்கூடியது. அவற்றை மாணவர்களுக்குத் தகுந்தவாறு கற்பிக்க வேண்டும். கிளவுட் கம்ப்யூட்டிங், பிக் டேட்டா, டேட்டா அனலிட்டிக் எனப் பல தொழில் நுட்பங்கள் வந்துவிட்டன. பிற துறைகளும் நவீனமாகி வருகின்றன. அதையெல்லாம் கல்லூரிகளுக்குள் கொண்டு செல்ல வேண்டும். இனி வருங்காலங்களில் இந்த நிலை மாறும். அகில இந்தியத் தொழில்நுட்பக் கல்விக்கழகம் இதற்கென பல ஏற்பாடுகளைச் செய்து வருகிறது’’ என்கிறார் அவர்.   

பல லட்சம் பேர் இன்ஜினீயரிங் படித்துவிட்டு வேலையில்லாமல் தவித்து நிற்கிறார்கள். ஊருக்கு ஊர் கல்லூரிகளைத் திறக்க அனுமதித்ததோடு, கல்விக் கடன்களை வழங்கி, அந்தக் கல்லூரிகளின் கல்லாவை நிரப்பிய மத்திய, மாநில அரசுகள் ‘எனக்கென்ன’ என்ற மனோபாவத்தில் வேடிக்கை பார்த்துக்கொண்டிருப்பதுதான் இந்த நூற்றாண்டின் மிகப்பெரிய சோகம்.

 - வெ.நீலகண்டன், மு.நியாஸ் அகமது, படம்: வீ.நாகமணி

‘பொறி’ வைத்துப் பிடிக்கும் பொறியியல் கல்லூரிகள் - ஜூ.வி ஸ்பெஷல் ஸ்டோரி

‘‘தரமற்ற கல்லூரிகளை மூட வேண்டும்!’’

டந்த ஐந்தாண்டுகளில் மட்டும் இந்தியா முழுவதும் 507 கல்வி நிலையங்களை மூட அகில இந்தியத் தொழில்நுட்பக் கல்வி கவுன்சில் அனுமதித்திருக்கிறது. தமிழகத்தில் மட்டும் கடந்த நான்கு ஆண்டுகளில், 20 இன்ஜினீயரிங் கல்லூரிகள், தங்கள் கல்லூரியை மூட அனுமதி கோரியிருக்கின்றன. இதுகுறித்து பேசிய அண்ணா பல்கலைக்கழகத்தின் முன்னாள் துணைவேந்தர் இ.பாலகுருசாமி, “கல்லூரிகள் மூடப்படுவது நல்லதுதான். இன்னும் சொல்லப்போனால், இந்திய அளவில் 40 சதவிகிதக் கல்லூரிகள் மூடப்பட வேண்டும். இந்தியாவில் தேவைக்கு அதிகமாக இன்ஜினீயரிங் கல்லூரிகள் வளர்ந்து நிற்கின்றன. இதில் பெரும்பாலான கல்லூரிகளில் எந்த அடிப்படை வசதியும் இல்லை. இந்தக் கல்லூரிகள் இயங்குவது சமூகக்கேடு மட்டுமல்ல, நாம் நம் மாணவர்களுக்கு இழைக்கும் அநீதி. என்னைக்கேட்டால், அரசே தலையிட்டு தரமற்ற அத்தனை கல்லூரிகளையும் மூட வேண்டும்” என்றார்.