Published:Updated:

சந்தைக்கு வராத மாடுகள் சாகத்தான் போகுது!

ஒட்டுமொத்த விகடனுக்கும் ஒரே ஷார்ட்கட்

Use App
சந்தைக்கு வராத மாடுகள் சாகத்தான் போகுது!
சந்தைக்கு வராத மாடுகள் சாகத்தான் போகுது!

சந்தைக்கு வராத மாடுகள் சாகத்தான் போகுது!

பிரீமியம் ஸ்டோரி
சந்தைக்கு வராத மாடுகள் சாகத்தான் போகுது!

ந்தியாவின் முதுகெலும்பு விவசாயம்... விவசாயத்தின் முதுகெலும்பு மாடுகள்! எத்தனை விவசாயிகள் செத்தாலும், எவ்வளவு பெரிய வறட்சி வந்தாலும், திரும்பிக்கூடப் பார்க்காத இந்திய அரசாங்கம்தான், இன்றைக்கு மாடுகளைப் பாதுகாக்கிறேன் என்று வரிந்துகட்டிக் கொண்டு சட்டம் போடுகிறது. இந்தத் தடையால் மாட்டுச் சந்தைகள் இப்போது எப்படி இருக்கின்றன? சந்தைக்கு வராத மாடுகளின் நிலைமை என்ன? மாடுகளை விற்க முடியாத விவசாயிகள் என்ன சொல்கிறார்கள்? இப்படியான கேள்விகளோடு தமிழகத்தின் பல மாட்டுச் சந்தைகளுக்குள் நுழைந்தது ஜூ.வி டீம்.

என்ன சலுகை கொடுத்தாங்க?

செவ்வாய் மற்றும் புதன்கிழமைகளில் கூடும் பொள்ளாச்சி சந்தை தென் இந்தியாவிலேயே பிரபலமான மாட்டுச் சந்தை. கர்நாடகா, கேரளாவில் இருந்து மாடுகளை வாங்கவும் விற்கவும் நூற்றுக்கணக்கான வாகனங்கள் படையெடுக்க, அந்த இரு தினங்களிலும் திணறிப்போகும் பொள்ளாச்சி. வாரம்தோறும் ஆயிரக்கணக்கான மாடுகள் விற்பனையாகும். ஆறு, ஏழு கோடி ரூபாய் வர்த்தகம் கொண்ட பொள்ளாச்சி மாட்டுச் சந்தை ஒரு மாடும் விற்பனை ஆகாமல் முடிந்தது. துடியலூர் மாட்டுச்சந்தையிலும் இதே நிலைமைதான். அவசரத் தேவைக்கு மாடுகளை விற்க முயல்பவர்கள் அல்லாடிப் போயிருக்கிறார்கள்.

எட்டிமடைப் பகுதியைச் சேர்ந்த பாலசுப்பிரமணியம், ‘‘இறைச்சிக் கூடங்களுக்கு மாடுகளை விற்கத் தடை அறிவிப்பு வந்த அடுத்த நிமிஷமே ஒரு வியாபாரியும் மாட்டை வாங்கலை. என்னதான் அந்தச் சட்டத்துக்கு கோர்ட் தடை விதிச்சிருந்தாலும் வியாபாரிகள் மாடு வாங்க பயப்படுறாங்க. அரசாங்கத்தின் இந்த அறிவிப்பு விவசாயிகளுக்கு அடிமேல் அடி கதைதான். வயசான மாடுகளை எப்படி வாழவைக்க முடியும்? பாலும் கொடுக்காது. பராமரிக்கவும் முடியாது. வறட்சியின் காரணமாக, தீவனம் இல்லாம மாடுங்க செத்துக்கிட்டு இருக்குது. எந்த விவசாயியாவது, தான் ஆசையா வளர்த்த மாடு தன் கண் எதிரே சாகுறத பார்க்க முடியுமா, சொல்லுங்க? ஒரு கட்டத்துக்கு மேல வித்துதான் ஆகணும். விற்பனை இல்லைன்னா மாடு வளர்ப்பே சுத்தமா ஒழிஞ்சிடும். விக்கிறதுக்குத் தடை விதிக்கிற அரசாங்கம், வளர்க்குறதுக்கு என்ன சலுகை கொடுத்துருக்கு? சந்தைக்கு வராத மாடுகள் அவ்வளவும் வீட்லயே சாகத்தான் போகுது’’ என்று சீறுகிறார். 

சந்தைக்கு வராத மாடுகள் சாகத்தான் போகுது!

ஏழைகளின் ஏ.டி.எம்!

ஒட்டன்சத்திரம் சந்தைதான் திண்டுக்கல் மாவட்டத்திலேயே பெரிய மாட்டுச் சந்தை. இது, முழுக்க முழுக்க விவசாயம் சார்ந்த மக்கள் வாழும் பூமி. ஒவ்வொரு வீட்டிலும் நிச்சயம் ஒரு மாடாவது இருக்கும். அந்த எளிய மக்களுக்கு அவரசத் தேவைகளுக்குக் கைகொடுப்பது மாடுகள்தான். அதனாலேயே, இந்தப் பகுதியில் மாடுகளை ‘ஏழைகளின் ஏ.டி.எம்’ என்றழைக்கிறார்கள். காளைக் கன்றுகளைப் பால்குடி மறந்ததும் விற்றுவிடுவார்கள். ஏனென்றால், ஒரு நாளைக்கு நூறு, இருநூறு செலவு செய்து காளைக் கன்றுகளைப் பராமரிப்பதற்குப் போதுமான பொருளாதாரச் சூழல் இல்லை. காளைக் கன்றுகளும் காளை மாடுகளுமே இங்கு அதிகம் விற்பனைக்கு வரும். வாரம் 1,500 முதல் 2,000 மாடுகள் விற்பனையாகும் மார்க்கெட் இது. இதில் பெருமளவு கேரளாவுக்குப் போகிறவைதான்.

ஏதாவது திடீர் செலவு வந்துவிட்டால், மாட்டைப் பிடித்துக்கொண்டு சந்தைக்கு ஓடிவரும் மக்கள் இப்போது செய்வதறியாது தவிக்கிறார்கள். “எங்களுக்கு மட்டும் மாடுகளை வெட்டுக்கு விற்கவேண்டும் என்று ஆசையா? யாரும் பசு மாடுகளை விற்கிறது இல்லை. காளை மாடுகளைத்தான் விப்பாங்க. கடைசி வரைக்கும் காளை மாட்டை வளர்க்கணும்னா, ஒரு பசு மாட்டுல வர்ற வருமானத்தைத் தூக்கி அப்படியே அதுக்கு செலவிட வேண்டியிருக்கும். அப்புறம் எதுக்காகச் சிரமப்பட்டு மாடு வளர்க்கணும்? அவசரத்துக்கு மாடு விக்கிறவன்கிட்ட, ‘ஆர்.ஐ சர்டிபிகேட் கொண்டு வா... வி.ஏ.ஓ சர்டிபிகேட் கொண்டு வா’ன்னா என்ன நியாயம்?’’ என்று கொந்தளிக்கிறார்கள்.

சந்தைக்கு வராத மாடுகள் சாகத்தான் போகுது!

மாடு வளர்ப்புக்கே முழுக்கு!

சேலம் மாவட்டத்தின் முக்கியமான மாட்டுச் சந்தைகளான மின்னாம்பள்ளி, முத்தனாயக்கம்பட்டி, ஓமலூர், மேச்சேரி ஆகிய சந்தைகள் மந்தமாகிவிட்டன. வெள்ளிக்கிழமை கூடும் முத்தனாயக்கம்பட்டி சந்தையில் மாடுகளையும் காணோம், வியாபாரிகளையும் காணோம். ஒன்றிரண்டு மாடுகள் வந்து திரும்பிவிட்டதாகக் கவலையோடு பேச ஆரம்பித்தார் மாட்டு புரோக்கர் சேட்டு. ‘‘மூணு தலைகட்டா மாட்டு வியாபாரம் பண்றோம்.  எம்.செட்டிப்பட்டி பஞ்சாயத்துல மட்டும் 700 மாட்டு வியாபாரிகள் குடும்பம் இருக்கு. முத்தனாயக்கம்பட்டி சந்தையில மட்டும் ஒரு வாரத்துக்கு நான்கு கோடி ரூபாய்க்கு வியாபாரம் தூள் பறக்கும். இந்தத் தடை விதிச்சதுக்கு அப்புறம் சுத்தமா வியாபாரமே இல்லை. மாடு வெச்சிருக்கவங்க, விக்கிறதுக்குத் துடிக்கிறாங்க. வியாபாரிங்க எந்த நம்பிக்கையில வாங்குறது? மாடு வாங்குற எல்லாருமே வெட்டுறதுக்காக வாங்கிட்டுப் போறவங்க இல்ல. கோடையில மட்டும்தான் அதிகமா வெட்டுக்குப் போகும். ஏன்னா, வறட்சியில யாராலும் மாடு வளக்க முடியாது. மழை பிடிச்சிட்டா... வளர்க்குறதுக்கு வாங்குற மாடுகள்தான் அதிகம். இப்படியான சட்டம் முழுமையா நடைமுறைக்கு வந்துட்டா மாடு வளர்ப்புக்கே முழுக்குப் போட்டுடுவாங்க’’ என்றார் பெருங்கோபத்தோடு.

சந்தைக்கு வராத மாடுகள் சாகத்தான் போகுது!

சட்டம் போட்டா பிழைக்க முடியுமா?

கரூர் மாவட்டத்தில் மிகப் பெரிய மாட்டுச் சந்தை, தாந்தோணிமலை ஒன்றியத்தில் உள்ள உப்பிடமங்கலம்தான். சனி மற்றும் ஞாயிற்றுக்கிழமைகளில் சந்தை நடக்கும். அரசு அறிவிப்புக்குப் பிறகு டல்லடித்து கிடக்கிறது இந்தச் சந்தை. பால் மாடு வியாபாரியான வேலுச்சாமி, ‘‘நிறையபேர் இங்க சும்மா வேடிக்கைப் பார்க்கவே வருவாங்க. அங்கங்கே முட்டுமுட்டா வியாபாரிகள் நின்னு மாடு வாங்குறவங்க கை மேல துண்டைப் போட்டு மறைத்து, பேரம் பேசுவாங்க. கேரளா, ஆந்திராவில் இருந்து அதிகம் வியாபாரிகள் வருவாங்க. அவங்களுக்குள்ள பழக்கம் அதிமாகி சம்பந்தி ஆன கதை எல்லாம் இருக்கு. அப்பேர்பட்ட மாட்டுச் சந்தைகள் இன்னைக்கு இப்படி மாறியிருக்குதுங்க. மொத்தமே 100 மாடுகள்கூட சந்தைக்கு வரவில்லை... வந்ததையும் யாரும் வாங்கவும் இல்லை’’ என்றார் வேதனை பொங்க!

சந்தையில் ஒருவர் இப்படிக் கேட்டார், ‘‘பூ... சாமிக்கும் போகும். சவத்துக்கும் போகும். சாமிக்கு மட்டும்தான் விற்கணும்னு சட்டம் போட்டா பிழைக்க முடியுமா?’’

- ஆர்.குமரேசன், வீ.கே.ரமேஷ், எம்.புண்ணியமூர்த்தி, துரை.வேம்பையன், தி.ஜெயப்பிரகாஷ்
படங்கள்: தி.விஜய், க.தனசேகரன், நா.ராஜாமுருகன், முரளி

சந்தைக்கு வராத மாடுகள் சாகத்தான் போகுது!

‘‘இது மாட்டுக்கறி பிரச்னையே இல்லை!’’

நா
ட்டு மாடுகள் வளர்ப்பு, இயற்கை விவசாயம் ஆகியவற்றில் தீவிரமாக இயங்கிவரும் சூழலியலாளர் செந்தமிழனிடம் பேசினோம். ‘‘பி.ஜே.பி-யின் நோக்கம், மாட்டுக்கறி சாப்பிடுவதை நிறுத்துவது இல்லை. இதை முதலில் எல்லோரும் தெளிவாகப் புரிந்துகொள்ள வேண்டும். அவர்களின் நோக்கம் நம்முடைய தற்சார்பு பொருளாதாரத்தை அழிப்பது. மாடுகளை விற்க முடியவில்லை என்றால் விவசாயிகள் கொஞ்சமாகப் பால் கறக்கும் நாட்டு மாடுகளை வளர்க்கவே மாட்டார்கள்... வளர்க்கவும் முடியாது. மாட்டுச் சந்தை சிஸ்டம் அழிந்து போகும். வசதியுள்ளவர்கள் அதிகப் பால் கறக்கும் ஜெர்சி மாடுகளை வாங்கி வளர்க்க ஆரம்பித்துவிடுவார்கள். அந்த மாடுகளை நாம் வெறும் புல்லும், வைக்கோலும் கொடுத்து வளர்த்துவிட முடியாது. ஊசியிலிருந்தும், தீவனம் வரை எல்லாவற்றும் நிறுவனங்களைச் சார்ந்திருக்க வேண்டிவரும். அதைத்தான் அரசாங்கம் எதிர்பார்க்கிறது. மிகப் பெரிய அளவில் வருமானம் கொழிக்கும் தொழில், பால் வர்த்தகம். அதை விவசாயிகளிடமிருந்து முற்றிலும் பறிப்பதற்கு என்னென்னவோ சதித்திட்டங்கள் தீட்டுகிறார்கள். அதில் ஒன்றுதான் இது. காந்தியடிகளின் ஒத்துழையாமை இயக்கம் கேள்விப்பட்டிருக்கிறோம் அல்லவா? அதைச் செய்வோம். ‘விற்கப்போவது நாம்... வாங்கப்போவது இன்னொருத்தர். இதில் தலையிடுறதுக்கு நீ யார்?’ எனக் கேட்போம். இந்தச் சட்டம் எங்களுக்கு எதிரானது என நிராகரிப்போம்” என்றார்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு