Published:Updated:

கலங்கிய ஸ்டாலின்... அழுத அழகிரி... தழுதழுத்த தயாளு!

ஒட்டுமொத்த விகடனுக்கும் ஒரே ஷார்ட்கட்

Use App
கலங்கிய ஸ்டாலின்... அழுத அழகிரி... தழுதழுத்த தயாளு!
கலங்கிய ஸ்டாலின்... அழுத அழகிரி... தழுதழுத்த தயாளு!

கலங்கிய ஸ்டாலின்... அழுத அழகிரி... தழுதழுத்த தயாளு!

பிரீமியம் ஸ்டோரி

ருணாநிதியின் வாழ்க்கை வரலாறு என்பது, பல போராட்டங்களின் தொகுப்புதான். இப்போதும் இயற்கையை எதிர்த்துப் போராட்டம் நடத்தி, அதிசயங்கள் நிகழ்த்திக்கொண்டிருக்கிறார் அவர்.

ஜூலை 27, வெள்ளிக்கிழமை இரவு. கருணாநிதியின் உடல்நிலை கவலைக்கிடமாக இருப்பதாகத் தகவல்கள் வெளியாகின. காவேரி மருத்துவமனையிலிருந்து மருத்துவக்குழு ஒன்று கருணாநிதியின் வீட்டுக்குவந்ததும் பரபரப்பு இன்னும் அதிகரித்தது. அதைத் தொடர்ந்து ‘கலைஞர் உடல்நிலை சீராக உள்ளது’ என அறிவித்த ஸ்டாலின், கோபாலபுரத்தில் குவிந்திருந்த தொண்டர்களைக் கலைந்து போகுமாறு அறிவித்தார். பிறகு ஸ்டாலின், அழகிரி உள்ளிட்ட அனைவரும் கோபாலபுரத்திலிருந்து கிளம்பினர். வீ்ட்டில் கருணாநிதியின் மகள் செல்வி, உதவியாளர் நித்யா உள்ளிட்ட சிலர் மட்டுமே இருந்தனர். வழக்கமாக கருணாநிதிக்கு உதவியாக இருக்கும் செவிலியரும் இருந்துள்ளார்.

இரவு 11 மணியளவில் கருணாநிதியின் உடல்நிலை மீண்டும் மோசமானது. ரத்த அழுத்தம் மிக வேகமாகக் குறைய ஆரம்பித்து, காய்ச்சல் அதிகரித்துள்ளது. இதயத்துடிப்பும் வேகமாகக் குறைந்துள்ளது. இந்தத் தகவல் ஸ்டாலின் உள்ளிட்ட உறவுகளுக்கும், காவேரி மருத்துவமனைக்கும் தெரிவிக்கப்பட்டது. மருத்துவக்குழு அவசரமாக வந்தது. குடும்ப மருத்துவர் கோபால் உள்ளிட்டோர் முதல் மாடியில் உள்ள அறைக்குச் சென்று, கருணாநிதியின் உடல்நிலையைச் சோதித்தனர். ‘அபாயக்கட்டத்தில் இருக்கிறார். இனி, வீட்டில் வைத்துச் சிகிச்சை அளிக்க முடியாது, உடனடியாக மருத்துவமனைக்குக் கொண்டுசெல்ல வேண்டும்’ என டாக்டர்கள் சொல்ல, ஸ்டாலின் கண்கலங்க ஆரம்பித்துவிட்டார். உடனே, காவேரி மருத்துவமனையிலிருந்து ஆம்புலன்ஸ் வரவழைக்கப்பட்டது.

கலங்கிய ஸ்டாலின்... அழுத அழகிரி... தழுதழுத்த தயாளு!

படிகளில் நுழையாத ஸ்ட்ரெச்சர்!

ஆம்புலன்ஸ் வருவதற்குள் தொண்டர்கள் கோபாலபுரத்தில் குவிந்தனர். தி.மு.க-வின் முன்னணி நிர்வாகிகள் வரிசையாக வந்தனர். பலரது முகத்தில் சோகம் அப்பியிருக்க, சிலர் வாய்விட்டு அழவும் தொடங்கிவிட்டார்கள். ஸ்டாலின் கலங்கிய கண்களுடன் நின்றுகொண்டிருந்தார். ஆம்புலன்ஸிலிருந்து ஸ்ட்ரெச்சரை இறக்கி, முதல் மாடிக்குக் கொண்டுசெல்ல முயன்றனர். ஆனால், ஸ்ட்ரெச்சரில் கருணாநிதியைக் கொண்டுவந்தால், படிகளில் ஸ்ட்ரெச்சர் நுழையாது என்பதால், அவரைத் துணியில் கட்டித் தூக்கிவர முடிவானது. முதல் மாடியில் அழகிரி, அவரின் மகன் துரை தயாநிதி மற்றும் மருத்துவக் குழுவினர் இருந்துள்ளனர். கருணாநிதிக்கு அவசரமாக உடைகளை மாற்றி, அவர் வழக்கமாக அணியும் மஞ்சள் துண்டையும் கண்ணாடியையும் மறக்காமல் அணிவித்தனர். பிறகு, பெட்ஷீட்டில் கருணாநிதியைப் படுக்கவைத்து மாடியிலிருந்து கீழ்த்தளத்துக்குத் தூக்கிவந்து, அதன்பிறகு ஸ்ட்ரெச்சரில் வைத்தனர். ஸ்டாலினின் மருமகன் சபரீசன் உள்ளிட்ட சிலர், முதல் மாடியிலிருந்து கருணாநிதியைக் கொண்டுசெல்லும் வேலையில் தீவிரம் காட்டியபோது, அவர்களிடம் அழகிரி கொஞ்சம் கோபத்தை வெளிப்படுத்தியுள்ளார். இதனால், சபரீசன் அப்செட் ஆனார்.
கோபாலபுரம் வீட்டிலிருந்து கருணாநிதியை முதல்முறையாக ஸ்ட்ரெச்சரில் கொண்டுசெல்வதைப் பார்த்த தொண்டர்கள் கதறி அழத் தொடங்கினர். கருணாநிதி ஆம்புலன்ஸில் ஏற்றப்படும்வரை வீட்டு வாசலில் நின்று, இறுக்கமான முகத்துடன் பார்த்துக்கொண்டே இருந்தார் ஸ்டாலின். ஆம்புலன்ஸ் செல்வதற்கு முன்பே அழகிரி, துரைமுருகன் உள்ளிட்டவர்கள் காவேரி மருத்துவமனைக்கு விரைந்தனர்.

நான்கு ஊசிகளும் 48 மணி நேரமும்!

காவேரி மருத்துவமனையின் நான்காவது மாடியில் உள்ள தீவிர சிகிச்சைப் பிரிவுக்கு அவர் கொண்டுசெல்லப்பட்டார். காவேரியின் மூத்த மருத்துவக்குழு உடனடியாக அவரது ரத்த அழுத்தத்தை இயல்பு நிலைக்குக் கொண்டுவரும் வேலையில் தீவிரம் காட்டியது. உடனடியாக ரத்த அழுத்தத்தைச் சீராக்கும் ஊசி போடப்பட்டது. சிறிது நேரத்தில் ரத்த அழுத்தமும் இதயத்துடிப்பும் மெதுவாகச் சீராகிவந்தன. ‘வீரியமிக்க இந்த ஊசி, 12 மணி நேரத்துக்கு ஒருமுறை என நான்கு முறை போடப்படும். நான்கு ஊசிகளுக்குமேல் போடுவதற்குக் கருணாநிதியின் உடல்நிலை ஒத்துழைக்காது என்பதால், அதற்கு மேல் மாற்று மருத்துவம் மட்டுமே செய்ய முடியும். அதுவரை இவரின் உடல்நிலை இயல்பாக இருக்கும்’’ என்று மருத்துவர்கள் நம்பிக்கை தந்தார்கள்.

கலங்கிய ஸ்டாலின்... அழுத அழகிரி... தழுதழுத்த தயாளு!

ஓ.பி.எஸ் வந்தது இதற்குத்தான்?

ஜூலை 26 வியாழன் அன்றே, கருணாநிதிக்குக் காய்ச்சல் அதிகரிக்கத் தொடங்கியது. வழக்கமான மருத்துவச் சோதனைகளுக்காகக் காலையில் வந்த டாக்டர்கள், வீட்டிலேயே சிகிச்சை அளித்தனர். அன்று மதியத்துக்கு மேல் காய்ச்சல் அளவு அதிகரித்தது. காவேரி மருத்துவமனையிலிருந்து நான்கு பேர் கொண்ட மருத்துவக்குழு அன்று இரவு வந்து சிகிச்சை கொடுத்தது. பெரிதாக முன்னேற்றம் இல்லை. இந்தத் தகவல் கருணாநிதியின் வீட்டிலிருந்து உளவுத்துறை மூலம் முதல்வர் அலுவலகத்துக்குத் தெரிவிக்கப் பட்டது. முதல்வரின் ஆலோசனையின் அடிப்படையில்தான், துணை முதல்வர் பன்னீர்செல்வம், மூன்று அமைச்சர்களுடன் கிளம்பி கோபாலபுரம் வீட்டுக்கு வந்தார்.

இப்படி தலைவர்கள் பலரும் கோபாலபுரத்துக்கு வந்துசென்றுகொண்டிருந்த நேரத்தில் கருணா நிதியின் உடல்நிலையிலும் கொஞ்சம் முன்னேற்றம் ஏற்பட்டுள்ளது. இதைத் தொடர்ந்து ஸ்டாலின், தமிழரசு உள்ளிட்டோர் அவரவர் வீடுகளுக்குச் செல்லவிருந்தனர். ஆனால், வீட்டுக்கு வெளியே தொண்டர்கள் கலையாமல் நின்றுகொண்டிருந்தனர். அதனால், ஸ்டாலின் கிளம்பியதும் கோபாலபுரம் வீட்டின் கதவு மூடப்பட்டது. வீட்டுக்குள் பூச்சி முருகன், கு.க.செல்வம் உள்ளிட்ட சிலர் மட்டும் இரவு முழுவதும் இருந்தனர். 

முதல் மாடிக்கு நோ என்ட்ரி!

கருணாநிதிக்கு, அவர் வழக்கமாக இருக்கும் முதல் மாடி அறையில் வைத்தே சிகிச்சைகள் அளிக்கப்பட்டன. காய்ச்சலும் நோய்த்தொற்றும் இருந்ததால், அவரை யாரும் சந்திக்க வேண்டாம் என மருத்துவர்கள் தரப்பில் தெரிவிக்கப்பட்டது. ஓ.பன்னீர்செல்வம் வந்துசென்றபிறகு கோபாலபுரத்தில் பரபரப்பு தொற்றிக்கொண்டது. வரிசையாகப் பல்வேறு கட்சியின் தலைவர்களும் கோபாலபுரத்துக்குப் படையெடுத்தனர். கருணாநிதிக்கு என்ன ஆனது என்று  அச்சத்துடன் தொண்டர்களும் குவியத்துவங்கினர். யாரையும் முதல் தளத்துக்குச் செல்ல அனுமதிக்கவில்லை. கீழ்தளத்தில் ஸ்டாலினைச் சந்தித்து அவரிடமே கருணாநிதியின் உடல்நிலை குறித்து  விசாரித்து விட்டுச் சென்றனர் தலைவர்கள். நெருங்கிய உறவினர்கள் சிலர் மட்டும் மாடிக்குச் சென்று கருணாநிதிக்கு அளிக்கப்படும் சிகிச்சையைப் பார்த்தனர்.

 கனிமொழி டெல்லி பயணம்!

கருணாநிதி உடல்நிலை நலிவடைந்த 26-ம் தேதி இரவே அவசரமாக டெல்லிக்குப் புறப்பட்டார் கனிமொழி. கருணாநிதியின் உடல்நிலை குறித்த விவரங்களைத் தெரிவிக்கவும், சில ஒப்புதல்களை வாங்கவே கனிமொழி டெல்லி சென்றதாகத் தகவல் வெளியானது. மத்திய அமைச்சர்கள் சிலரை டெல்லியில் சந்தித்துவிட்டு 27-ம் தேதி மதியம் அவர் சென்னை திரும்பினார். அதன்பிறகுதான், தென் ஆப்ரிக்காவிலிருந்து தொலைபேசி மூலம் கருணாநிதியின் உடல்நிலை குறித்து ஸ்டாலினிடம் கேட்டறிந்தார் பிரதமர்.

கலங்கிய ஸ்டாலின்... அழுத அழகிரி... தழுதழுத்த தயாளு!

தழுதழுத்த தயாளு!

26-ம் தேதி இரவு கருணாநிதியின் உடல்நிலை சரியில்லாமல் போனதும், அழகிரிக்குத் தகவல் தெரிவிக்கப்பட்டது. மறுநாள் அதிகாலை கலங்கிய கண்களுடன் புறப்பட்ட அழகிரி, மதியம் கோபாலபுரம் வந்தடைந்தார். வீட்டுக்குள் சென்றவர் கீழ்தளத்தில் இருந்த அம்மா தயாளுவை அழைத்துக்கொண்டு முதல் மாடிக்குச் சென்றுள்ளார். கருணாநிதியின் காதருகே சென்று தயாளு அம்மாள், “அய்யா... அய்யா... பெரியவன் வந்திருக்கான். பாருங்க” என்று சொன்னார். கருணாநிதியிடம் எந்த ரியாக்‌ஷனும் இல்லை. அழகிரி அழுதுவிட்டார். பிறகு, நீண்ட நேரம் அப்பாவின் அருகிலே இருந்தார் அழகிரி.

அழகிரியின் ஆலோசனை!

கருணாநிதிக்கு ட்ரக்கியோஸ்டமி ட்யூபை மாற்றுவதற்காக ஜூலை 18-ம் தேதி காவேரி மருத்துவமனைக்கு அழைத்துச்சென்றனர். அதற்கு ஒரு வாரத்துக்கு முன்பே கருணாநிதிக்குக் காய்ச்சலும், மூச்சுத்திணறலும் இருந்துள்ளது. அப்போது லண்டனில் இருந்த ஸ்டாலினிக்கு இந்தத் தகவல் தெரிவிக்கப்பட்டது. ட்ரக்கியோஸ்டமி ட்யூபை மாற்றியாக வேண்டும் என்று மருத்துவர்கள் சொன்னார்கள். ஸ்டாலின் சென்னை திரும்பிய அன்றே இதைச் செய்தார்கள். அப்போது கருணாநிதிக்கு வேறுசில பரிசோதனைகளும் நடைபெற்றன. அதில் வேறு சில பாதிப்புகளும் கண்டறியப்பட்டன. அவையே இப்போது அவர் உடல்நிலை மோசமடையக் காரணம் என்கிறார்கள் மருத்துவ வட்டாரத்தில்.

சென்னைக்கு வந்ததும், மருத்துவர்கள் குழுவுடன் அழகிரி ஆலோசனை நடத்தியுள்ளார். வெளிநாட்டு மருத்துவர்களை வரவழைப்பது குறித்தும் அப்போது பேசப்பட்டுள்ளது. ஆனால், காவேரி மருத்துவமனை மருத்துவர்கள் கருணாநிதியின் முதுமையைக் காரணம் காட்டி, ‘இப்போது அளிக்கப்படும் சிகிச்சையே போதுமானது’ என்று விளக்கியுள்ளனர். அதன்பிறகு, ‘‘வெளிநாட்டிலிருந்து மருந்துகளை வரவழைக்கலாம்’’ என்று அழகிரி ஆலோசனை செய்துள்ளார். ‘தேவைப்பட்டால் அதைச் செய்யலாம்’ என்று மருத்துவர்கள் சொல்லிவிட்டார்கள்.

- அ.சையது அபுதாஹிர்
படங்கள்: ஜெ.வேங்கடராஜ்

காலில் தெரிந்த அசைவு!

ஜூ
லை 28 அதிகாலை சரியாக 1.20 மணிக்கு கருணாநிதியை ஏற்றிவந்த ஆம்புலன்ஸ், காவேரி மருத்துவமனைக்குள் நுழைந்தது. ஸ்ட்ரெச்சரை இறக்கி, மருத்துவமனை லாபியில் இருக்கும் லிஃப்ட் மூலம் மாடிக்குக் கொண்டுசெல்லப்பட்டார் கருணாநிதி. அவரது காலில் சிறு அசைவு இருந்தது. சற்று நேரத்தில் ஸ்டாலின் வந்தடைந்தார். வி.சி.க தலைவர் திருமாவளவன், தமிழக காங்கிரஸ் தலைவர் திருநாவுக்கரசர் உள்ளிட்ட தலைவர்கள் நள்ளிரவில் மருத்துவமனைக்கு வரத்தொடங்கினர். 2.30 மணியளவில் காவேரி மருத்துவமனை, ‘தொடர் சிகிச்சையால் கருணாநிதியின் ரத்த அழுத்தம் சீரானது’ என அறிக்கை வெளியிட்டது. அங்கு நிலவிய அசாதாரணச் சூழல் அதன்பிறகு முடிவுக்கு வந்தது. ஒவ்வொருவராகக் கிளம்பத் தொடங்க... அழகிரி குடும்பத்தினர், ராசாத்தியம்மாள், கருணாநிதியின் பி.ஏ சண்முகநாதன், ராஜமாணிக்கம் ஆகியோரும் வெளியேறினர். அதிகாலை 3.50 மணிக்கு ஸ்டாலினும் கிளம்பிச்சென்றார்.

ஜூலை 18 முதல் மயக்க நிலையில் இருக்கும் கருணாநிதி, ஊசி போடும்போது லேசாக முனகலை வெளிப்படுத்துவாராம். உடல்நிலை மோசமான பிறகு, ஊசி போடும்போது அவரது காலில் மட்டும் அசைவு இருக்கிறதாம்.

- மீனாட்சிசுந்தரம்

பரபரப்பு இரவு!

ஜூ
லை 29-ம் தேதி வதந்திகளுக்குக் கால் முளைத்து, காவேரி மருத்துவமனை வளாகத்தைப் பரபரப்பு தொற்றிக்கொண்டது. வாசலில் காத்திருந்த தொண்டர்கள் பலரும் வாய்விட்டு அழத்தொடங்கினர். காவல் துறை இணை ஆணையர் அன்பு தலைமையில் துணை ஆணையர்கள் அரவிந்தன், ராஜேந்திரன், சரவணன் ஆகியோர் வந்து, நிலைமையைக் கட்டுக்குள் கொண்டுவருவதற்கான முயற்சியில் தீவிரமாக இருந்தனர். தொண்டர்கள் கலைந்துசெல்ல வேண்டுமானால், தி.மு.க-வின் உயர்மட்டத்தில் உள்ள யாரேனும் கூட்டத்தில் பேசவேண்டும். அதற்கான முயற்சி எடுக்கப்பட்டது. அதனால் ஆ.ராசா, ‘‘தலைவருக்கு ஒன்றும் இல்லை. அவர் உடல்நலம் தேறிவருகிறார். வதந்திகளை நம்ப வேண்டாம்’’ என மைக்கில் கூறினார். ஆனால், யாரும் நம்பத் தயாராக இல்லை. “எதுவாக இருந்தாலும் உண்மையைச் சொல்லுங்கள்” என்று சொல்லிக்கொண்டே மருத்துவமனையின் உள்ளே பலர் நுழைய முயன்றனர். இதனால் தள்ளுமுள்ளு ஏற்பட்டது. நிலைமை மோசமாகவே காவலர்கள் லேசான தடியடியில் ஈடுபட்டனர். சிலர் காவலர்களை நோக்கிக் கல் வீசப்பட்டது.

இரவு 10.50 மணிக்கு தி.மு.க செயல்தலைவர் ஸ்டாலின், மருத்துவமனையை விட்டு வெளியேறினார். பல நிர்வாகிகளும் வெளியேறினர். அதைத் தொடர்ந்து, தொண்டர்கள் பலர் கோபாலபுரம் வீட்டுக்கு ஓடினார்கள். ஆனால், அந்த வீடு விளக்குகள் அணைக்கப்பட்டு, இருள் படர்ந்து கிடந்தது. கோபாலபுரத்திலும் மருத்துவமனை வாசலிலும் தொண்டர்கள் விடிய விடிய அழுதுகொண்டே தவம் கிடந்தார்கள்.

- ஜெ.அன்பரசன்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு