Published:Updated:

யாகாவாராயினும் நா காக்க!

யாகாவாராயினும் நா காக்க!
பிரீமியம் ஸ்டோரி
News
யாகாவாராயினும் நா காக்க!

யாகாவாராயினும் நா காக்க!

மீபகாலமாகத் தமிழக அரசியல் அரங்கில் நடைபெறும் செயல்கள் மகிழ்ச்சியளிப்பதாக இல்லை. ``அ.தி.மு.க ஆட்சியை லஞ்ச ஆட்சி என்று யாராவது சொன்னால், அவர்களின் நாக்கை அறுப்பேன்’’ என்று, சமீபத்தில் நடந்த ஒரு நிகழ்ச்சியில் விவசாயத்துறை அமைச்சர் துரைக்கண்ணு பேசினார். பிறகு, ``அது வாய் தவறி வந்த வார்த்தை. அ.தி.மு.க ஆட்சியைத் தவறாக விமர்சிப்பவர்களின் நாக்கு அழுகிவிடும் என்று சொல்வதற்குப் பதில், தவறுதலாகச் சொல்லிவிட்டேன்’’ என்று கூறியிருக்கிறார்.

யாகாவாராயினும் நா காக்க!


உண்மையிலேயே அமைச்சர் துரைக்கண்ணு வாய் தவறிப் பேசியிருந்தால் அவர் விளக்கத்தை ஏற்றுக்கொள்ளலாம். ஆனால், தொடர்ச்சியாக அ.தி.மு.க அமைச்சர்கள் முன்னுக்குப் பின் முரணாகப் பேசுவதும் சர்ச்சைக்குரிய வகையில் பேசுவதும் தொடர்கதையாகிவருகிறது. ஜெயலலிதா அப்போலோவில் சிகிச்சை பெறும்போது எல்லாம், ``ஜெயலலிதாவின் உடல்நிலை தேறிவருகிறது’’ என்று தெரிவித்த வனத்துறை அமைச்சர் திண்டுக்கல் சீனிவாசன், ஜெயலலிதா மரணத்துக்குப் பிறகு, ``ஜெயலலிதா இட்லியும் சாப்பிடவில்லை; சட்னியும் சாப்பிடவில்லை. நாங்கள் பொய் சொன்னோம்’’ என்று வெளிப்படையாகவே சொன்னார். இன்னொரு அமைச்சர் செல்லூர் ராஜூவோ, ``அ.தி.மு.க உறுப்பினர் அட்டை வைத்திருப்பவர்களுக்குத்தான் நலத்திட்டங்கள்’’ என்றார்.

அ.தி.மு.க அமைச்சர்கள் மட்டுமல்ல, ஹெச்.ராஜா, கருணாஸ் போன்றவர்களும் சமூக ஒழுங்கைக் குலைக்கும்வகையில் சர்ச்சைப் பேச்சுகள் பேசிவிட்டு, `தவறுதலாகப் பேசிவிட்டேன்', `என் அட்மின் போட்ட பதிவு அது', `அந்த வீடியோவில் இருக்கும் குரல் என்னுடையதே அல்ல' என்றெல்லாம் சொல்வது வழக்கமாகிவிட்டது. கருணாஸ், ஹெச்.ராஜா விவகாரங்களில் தமிழக அரசின் பாரபட்சம் வெளிப்படையாகவே தெரிகிறது. ``ஹெச்.ராஜாமீது சட்டப்படி நடவடிக்கை எடுக்கப்படும்’’ என்கிறார் மீன்வளத்துறை அமைச்சர் ஜெயக்குமார். தமிழ் வளர்ச்சித்துறை அமைச்சர் மாபா.பாண்டியராஜனோ, ``ஹெச்.ராஜா பேச்சு சட்டம் ஒழுங்கைக் குலைக்காததால், கைது செய்ய முகாந்திரம் இல்லை’’ என்கிறார். இன்னொருபுறம் அவரைக் கைது செய்வதற்குத் தனிப்படை அமைக்கப்படுகிறது.  ஆனால், போலீஸ் பாதுகாப்புடன் மேடைகளில் பேசுவதுடன், கவர்னரையும் சந்திக்கிறார் ஹெச்.ராஜா. இருவரும் என்ன பேசினார்கள் என்ற விவரம் வெளியிடப்படவில்லை.

எந்தக் கட்சிக்காரர்களாக இருந்தாலும் கண்ணியம் காத்து, பேச வேண்டும். அதிலும் குறிப்பாக ஆளுங்கட்சியினருக்கு அதில் கூடுதல் பொறுப்பு இருக்கிறது. மக்களைக் காக்க வேண்டியது மக்கள் பிரதிநிதிகளின் கடமை. மக்களைக் காப்பதற்கு முன் தங்கள் நாவைக் காக்க வேண்டியது முக்கியம். அதனால்தான் வள்ளுவன் `யாகாவாராயினும் நா காக்க' என்றான்.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz