Published:Updated:

அரசின் தேவைக்கு ஆர்.பி.ஐ-யை நெருக்குவது சரியா?

அரசின் தேவைக்கு ஆர்.பி.ஐ-யை நெருக்குவது சரியா?
பிரீமியம் ஸ்டோரி
News
அரசின் தேவைக்கு ஆர்.பி.ஐ-யை நெருக்குவது சரியா?

அரசின் தேவைக்கு ஆர்.பி.ஐ-யை நெருக்குவது சரியா?

ஹலோ வாசகர்களே..!

அரசின் தேவைக்கு ஆர்.பி.ஐ-யை நெருக்குவது சரியா?



த்திய அரசுக்கும், ஆர்.பி.ஐ-க்கும் இடையிலான மோதல் இப்போது பரபரப்பாகப் பேசப்பட்டு வருகிறது.  ஆர்.பி.ஐ-யின் கையிருப்பில் தற்போது ரூ.6.9 லட்சம் கோடி மதிப்பிலான சொத்துகள் உள்ளன. இதுதவிர, ரூ.2.3 லட்சம் கோடி ரூபாய் மதிப்பிலான சொத்து, அவசர நிதித் தொகுப்பாக ஒதுக்கி வைக்கப்பட்டுள்ளது.

ஆர்.பி.ஐ-யிடம் இருக்கும் பணத்திலிருந்து சில லட்சம் கோடிகளைப் பெற்று, தற்போது ஏற்பட்டிருக்கும் நிதிப் பற்றாக்குறையைப் போக்கிக்கொள்ள நினைக்கிறது மத்திய அரசாங்கம். அரசின் இந்தக் கோரிக்கையை ஏற்றுக்கொள்ள மறுத்துவருகிறது ஆர்.பி.ஐ. இந்த விஷயத்தில் சிலர் அரசாங்கத்துக்கு ஆதரவாகவும், இன்னும் சிலர் ஆர்.பி.ஐ-க்கு ஆதரவாகவும் பேசி வருகின்றனர்.

மத்திய அரசாங்கம் நிதிப் பற்றாக்குறைக்கான இலக்கினை சில மாதங்களிலேயே அடைந்துவிட்ட நிலையில், அரசின் செலவுக்கான நிதியை எங்கிருந்து பெறுவது என்று தெரியாமல் தவிக்கிறது. பொதுத்துறை நிறுவனங்களின் பங்குகளை விற்று மூலதனத்தைத் திரும்பப் பெறுவதில் அரசின் இலக்கினை அடைய முடியவில்லை. இதுவரை இல்லாத நடைமுறையாக சேமிப்புத் திட்டங்களிலிருந்து ரூ.50 ஆயிரம் கோடி ரூபாய்க்கு மேல் மத்திய அரசாங்கம் எடுத்துக்கொண்டிருக்கிறது. இன்னும் அதிகமான நிதி, அரசின் செலவுக்குத் தேவைப்படுவதால், வேறு வகையில் கடன் வாங்குவதைவிட ஆர்.பி.ஐ-யிடமிருந்து பணத்தை எதிர்பார்க்கிறது.

அவசரகாலத்துக்குப் பயன்படும் என ஆர்.பி.ஐ ஒதுக்கிவைத்திருக்கும் பணத்தை எதற்கு அரசின் செலவுக்குத் தரவேண்டும்? எதிர்காலத்தில் எதிர்பாராதவிதமாகப் பொருளாதார சிக்கல் உருவானால், அதைச் சமாளிக்க ஆர்.பி.ஐ-யிடம் இருக்கும் பணம் உதவுமே என்பது இன்னும் சிலரது வாதம்.

மத்திய அரசின் வருமானத்தைப் பெருக்கிக்கொள்ள பல வழிகள் உள்ளன. ஜி.எஸ்.டி-யை சரியாக நடைமுறைப்படுத்துவது,  கறுப்புப்பணம் உருவாவதைத் தடுப்பது மூலம் வரி வருமானத்தை அதிகப்படுத்துவது போன்றவற்றின் மூலம் அரசின் வருமானத்தை இன்னும் கணிசமாக அதிகரித்துக்கொள்ள நிறைய வாய்ப்பிருக்கிறது. மத்திய அரசாங்கம் இந்த வழிமுறைகளை எல்லாம் ஆராய்வதை விட்டுவிட்டு, ஆர்.பி.ஐ-யிடம் இருக்கும் பணத்தை முழுவதுமாகக் கேட்பதில் நியாயம் இல்லை.

தங்கம் விலை குறைவாக இருக்கும்போதெல்லாம் வாங்கிவைத்தும், ரூபாய் மதிப்புக்கு நிகரான டாலரின் மதிப்புக் குறைவாக இருக்கும்போதெல்லாம் வாங்கிச் சேர்த்ததன்மூலமும் பெரும் சொத்தினைச் சேர்த்துவைத்திருக்கிறது ஆர்.பி.ஐ. இது நாட்டின் சொத்துதான் என்றாலும், அதைத் தனது தேவைக்கு மத்திய அரசாங்கம் பயன்படுத்திக்கொள்ள நினைப்பது சரியா? இந்த விஷயத்தில் மத்திய அரசாங்கம், ஆர்.பி.ஐ-யிடம் இன்னும் அதிக நிதியை எதிர்பார்க்கலாமே தவிர, பெரும்பகுதியைத் தரும்படி நெருக்குவது சரியல்ல என்பது மட்டும் நிச்சயம்!

- ஆசிரியர்

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz