Published:Updated:

“எங்கள் குடும்பத்தில் நிம்மதி இல்லை... டாக்டர் அய்யா தலையிட வேண்டும்!”

“எங்கள் குடும்பத்தில் நிம்மதி இல்லை... டாக்டர் அய்யா தலையிட வேண்டும்!”
பிரீமியம் ஸ்டோரி
“எங்கள் குடும்பத்தில் நிம்மதி இல்லை... டாக்டர் அய்யா தலையிட வேண்டும்!”

காடுவெட்டி குருவின் மகன் கண்ணீர்

“எங்கள் குடும்பத்தில் நிம்மதி இல்லை... டாக்டர் அய்யா தலையிட வேண்டும்!”

காடுவெட்டி குருவின் மகன் கண்ணீர்

Published:Updated:
“எங்கள் குடும்பத்தில் நிம்மதி இல்லை... டாக்டர் அய்யா தலையிட வேண்டும்!”
பிரீமியம் ஸ்டோரி
“எங்கள் குடும்பத்தில் நிம்மதி இல்லை... டாக்டர் அய்யா தலையிட வேண்டும்!”

பா.ம.க-வின் முன்னாள் எம்.எல்.ஏ-வும், வன்னியர் சங்கத் தலைவருமான காடுவெட்டி குரு மறைவுக்குப் பிறகு, அவரது குடும்பத்தில் ஏகப்பட்ட பிரச்னைகள். எல்லாப் பிரச்னைகளுக்கும் கட்சித் தலைமைதான் காரணம் என்று குருவின் உறவினர்கள் எழுப்பியுள்ள குற்றச்சாட்டு பா.ம.க-வினர் மத்தியில் பரபரப்பை ஏற்படுத்தியுள்ளது.

சமீபத்தில், `‘சொத்துக்காக என் பிள்ளைகளை என்னிடமிருந்து பிரிக்கப் பார்க்கிறார்கள்’’ என்று குருவின் மனைவி லதாவின் கடிதம் வெளியாகி, பா.ம.க மற்றும் வன்னியர் சங்கத்தினர் மத்தியில் அதிர்வலைகளை ஏற்படுத்தியது. அதைத் தொடர்ந்து, தன் தாயை அவரின் உறவினர்களிடமிருந்து மீட்டுத் தன்னிடம் ஒப்படைக்க வேண்டும் என்று வீடியோ ஒன்றை வெளியிட்டார், குருவின் மகன் கனலரசன்.

இந்த நிலையில், குருவின் மகள் விருத்தாம்பிகை, குருவின் தங்கை மகன் மனோஜ்கிரணைக் காதல் திருமணம் செய்துகொண்டார். இந்தத் திருமணத்தில் தனக்கு உடன்பாடு இல்லை என்று கூறிய குருவின் மனைவி, இத்திருமணத்தில்  பங்கேற்கவில்லை. திருமணம் முடிந்தவுடன், “காடுவெட்டியைச் சேர்ந்த சிலர் எங்கள் திருமணத்துக்கு எதிர்ப்புத் தெரிவிக்கின்றனர். எங்களுக்குப் பாதுகாப்பு வழங்க வேண்டும்” என்று போலீஸில் மனு அளித்தனர் மணமக்கள். இவர்களின் திருமணத்தை நடத்திவைத்த குருவின் அக்கா மீனாட்சி, “யாரைக் கேட்டுத் திருமணத்தை நடத்திவைத்தீர்கள் என்று காடுவெட்டியில் உள்ள சிலர் எங்களை மிரட்டுகிறார்கள்” என்று அச்சம் தெரிவித்தார். இதன் உச்சமாக, “பா.ம.க கட்சித் தலைமை எங்கள் குடும்பத்தை அழிக்கப் பார்க்கிறது” என்று குருவின் சகோதரிகள் எழுப்பிய குற்றம்சாட்டு பா.ம.க-வினர் மத்தியில் அதிர்வை ஏற்படுத்தியது. இந்த நிலையில், குருவின் மகன் கனலரசனைச் சந்தித்து சில கேள்விகளை முன்வைத்தோம்.

“எங்கள் குடும்பத்தில் நிம்மதி இல்லை... டாக்டர் அய்யா தலையிட வேண்டும்!”

“உங்கள் குடும்பத்தில் என்னதான் பிரச்னை?”

“அப்பா இறந்த பிறகு என் அம்மா மனவேதனையில் இருந்தார். எனவே, சென்னையில் உள்ள அவரின் அண்ணன் வீட்டுக்கு அனுப்பிவைத்தோம். திடீரென்று, ‘சொத்துக்காக என் பிள்ளைகளைப் பிரிக்கப் பார்க்கிறார்கள்’ என்று அம்மா கையெழுத்திட்ட கடிதம் ஒன்று இணையத்தில் வெளியானது. உடனே, அம்மாவிடம் கேட்டேன். அதற்கு, `டாக்டர் அய்யா தான் ஒரு பேப்பரில் கையெழுத்து போடச்சொன்னார்’ என்றார். எங்கள் குடும்பத்தில் பிரச்னை வெடிக்க, அந்தக் கடிதம்தான் காரணம். எதற்காக டாக்டர் இப்படிச் செய்தார் என்று தெரியவில்லை.”

“உங்கள் குடும்பம் கடனில் இருப்பதாகச் சொல்லப்படுகிறதே?”

“உண்மைதான். ரூ.88 லட்சத்துக்கு மேல் கடன் இருக்கிறது. வீடு, நிலத்தின் மீது அப்பா கடன் வாங்கியுள்ளார். மேலும், வீட்டில் வேலை பார்க்கும் வேலைக்கார அம்மாக்களின் பெயர்களிலும் வங்கிகளில் கடன் வாங்கியுள்ளார். அப்பா ஒன்றும் பெரிதாகச் சொத்துச் சேர்த்துவைக்கவில்லை. இப்போது, டாக்டர் அய்யாவின் பேச்சைக் கேட்டுக்கொண்டு என் அம்மா செயல்படுகிறார்.”

“உங்கள் அக்கா விருத்தாம்பிகையின் திருமணம் ஏன் அவசர அவசரமாக நடத்தப்பட்டது?”

``தன் சகோதரி சந்திரலேகாவின் மகனுக்கு விருதாவைத் திருமணம் செய்துவைக்க வேண்டுமென்பது அப்பாவின் விருப்பம். அப்பா இறந்த பிறகு, டாக்டர் அய்யா என்னை வரச்சொன்னார். ‘உங்க அத்தைங்க எல்லோரும் நல்லவங்க இல்லை. அவங்ககிட்ட அதிகம் பழக்கம் வச்சுக்காதீங்க’ன்னு டாக்டர் சொன்னார். அப்போது, விருதாவை வேறு இடத்தில் திருமணம் செய்துவைக்கப்போவதாக டாக்டர் சொன்னார். அவரது பேச்சுக்கு எதிராக என்னால் எதுவும் பேசமுடியவில்லை. இந்நிலையில், எங்கள் அக்காவுக்கு எம்.பி-யோட பையனை வரன் பார்த்திருப்பதாகத் தகவல் கிடைத்தது. அது பற்றி வைத்தி சித்தப்பாவிடம் (பா.ம.க-வின் துணைப் பொதுச்செயலாளர்) கேட்டதற்கு, ‘டாக்டர் செஞ்சா சரியா இருக்கும்’ என்று சொன்னார். எனவே, அப்பாவின் ஆசைநிறைவேறாமல் போய்விடக்கூடாது என்பதால், இத்திருமணத்தை நடத்தினோம்.”

ஒட்டுமொத்த விகடனுக்கும் ஒரே ஷார்ட்கட்!

“எங்கள் குடும்பத்தில் நிம்மதி இல்லை... டாக்டர் அய்யா தலையிட வேண்டும்!”

“உங்கள் அப்பாவை வெளிநாட்டில் மருத்துவம் பார்த்திருந்தால் காப்பாற்றியிருக்கலாம் என்று சொல்கிறார்களே?”

“அப்பாவை சிங்கப்பூருக்கு அழைத்துப்போவது குறித்து டாக்டர் அய்யாவிடம் கேட்டோம். அதற்கு, ‘இங்கேயே 38 லட்சம் ரூபாய் வரை செலவு செய்துள்ளோம். சிங்கப்பூருக்குப் போனால் ஒரு கோடி ரூபாய்க்கு மேல் செலவாகும். உங்களிடம் அவ்வளவு பணம் உள்ளதா?’ என்று அய்யா கேட்டார். அதை அப்பாவிடம் சொன்னபோது, ‘அய்யாவா இப்படிக் கேட்டார்?’ என்று அதிர்ச்சியடைந்தார். அதிலிருந்து அவர் சரிவர மருந்து மாத்திரை சாப்பிடுவதில்லை. பிறகு ஒருமுறை டாக்டர் போனில் பேசியபோது, ‘அய்யா எனக்கு வாழவே பிடிக்கவில்லை’ என்று லைனை அப்பா துண்டித்துவிட்டார்.”

“காடுவெட்டிக்கு வரக்கூடாது என்று உங்களிடம் சிலர் பிரச்னை செய்கிறார்களாமே?”

“எங்கள் அப்பாவின் ஆசைப்படி, அக்காவுக்குத் திருமணம் செய்துவிட்டு ஊருக்கு வந்தோம். ஆனால், வைத்தி சித்தப்பாவின் பேச்சைக் கேட்டு, சிலர் எங்களை அடிக்க வந்தனர். எங்கள் அம்மாவைக் கீழே தள்ளிவிட்டனர். எங்கள் வீட்டுக்கும், நிலத்துக்கும் வேலைக்கு வருபவர்களை வரவிடாமல் தடுக்கிறார்கள். எங்கள் குடும்பத்தில் நிம்மதியே இல்லை. எங்கள் குடும்பம் நிம்மதியாக வாழ டாக்டர் அய்யா வழி செய்ய வேண்டும்” என்று கண்கலங்கிய கனலரசனிடம், “வன்னியர் சங்கத்தில் இருக்கும் ரூ.300 கோடி சொத்துதான் இத்தனை பிரச்னைகளுக்கும் காரணம் என்கிறார்களே?” என்று கேட்டதற்கு, “அய்யோ, அரசியல் வேண்டாம்” என்று முடித்துக்கொண்டார்.

இந்த விவகாரம் குறித்து பா.ம.க-வின் துணைப் பொதுச்செயலாளர் வைத்தியிடம் கேட்டோம். அவர், ‘‘தம்பி கனலா இப்படிப் பேசுகிறார் என்பதே ஆச்சர்யமாக இருக்கிறது. அவராகப் பேசவில்லை அவரைப் பேசவைக்கிறார்கள். அவர்களின் அத்தைகள், அண்ணன் குருவின் குடும்பத்தைக் கையில் வைத்துக்கொண்டு கட்சிக்கும், அய்யாவின் பெயருக்கும் களங்கத்தை ஏற்படுத்த வேண்டும் என்று செயல்படுகிறார்கள். 25 வருஷங்களாக குருவுடன் இருந்தவன் நான். வேண்டுமென்றே இவர்கள் என் மீது பழி போடுகிறார்கள். குருவைத் தனியாகப் பிரித்துவந்து வன்னியர் சங்கத்தைத் தனியாக நடத்து என அவரின் குடும்பத்தினர் என்னை வற்புறுத்தினர்.  நான் மறுத்துவிட்டேன். இந்தக் குடும்பம் என் மீது கோபப்படக் காரணம் இதுதான். ராமதாஸுக்கு விசுவாசமாக நடக்க வேண்டும் என்று குரு சொன்னார். அதன்படி ராமதாஸுக்கும் குருவுக்கும் விசுவாசமாக நடந்தேன்’’ என்றார்.

- எம்.திலீபன்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism