Published:Updated:

ரோட்டில் மக்கள்... விடுதிகளில் அமைச்சர்கள்!

சோகம் தீராத கடலூர்

##~##

'தானே’ புயலின் கோரத் தாண்டவத்தில் சிக்கி சின்​னாபின்னமான கடலூர் மாவட்டம் இன்னமும் தலைவிரி கோலத்தில்தான் கிடக்கிறது. புயல் தாக்கி 10 நாட்களுக்கு மேல் ஆகியும் பாதிக்கப்பட்ட மக்களுக்கு குடிநீர், உணவு, மின்சாரம் போன்ற அடிப்படை வசதிகள் செய்து தரப்படவில்லை என்பதுதான் புயலை​விடக் கொடுமை! 

கடந்த 4-ம் தேதி, கடலூர் மாவட்டத்தில் புயல் பாதித்த பகுதிகளைப் பார்வையிட வந்தார் தமிழக முதல்வர் ஜெயலலிதா. புயலால் பாதிப்புக்கு உள்ளான எந்த ஒரு பகுதியையும் நேரில் சென்று பார்க்காமல், பாதிக்கப்பட்ட மக்களிடமோ விவசாயிகளிடமோ குறைகளைக் கேட்காமல், ஒரு சிலருக்கு மட்டும் நலத்திட்ட உதவிகளை வழங்கிய கையோடு, ஹெலிகாப்​டரில் ஏறிப் பறந்து விட்டார்.  மாவட்டத்தின் முழுமையான சேத மதிப்புகளை அறியாமல், பாதிக்கப்பட்ட விவசாயிகளுக்கும் பொதுமக்களுக்கும் நிவாரணத் தொகையாக

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
ரோட்டில் மக்கள்... விடுதிகளில் அமைச்சர்கள்!

850 கோடி அறிவித்தார். 'அரை கிலோ மீட்டர் தூரம்கூட தரையில் பயணிக்காத முதல்வருக்கு, எங்களின் துயரம் எப்படித் தெரியும்?’ என்று ஆவேசமானார்கள் பாதிக்கப்பட்ட மக்கள்!  

ரோட்டில் மக்கள்... விடுதிகளில் அமைச்சர்கள்!

'கடலூர் மாவட்டத்தில் போர்க்கால நடவடிக்​கையாக நிவாரணப் பணி தொடங்கவேண்டும்’ என்று, தொடர் கோரிக்கைகள் வந்ததை அடுத்து...  நத்தம் விஸ்வநாதன், எம்.சி.சம்பத், செல்லூர் ராஜூ, செல்லப்பாண்டியன் உட்பட 15 அமைச்சர்களை கடலூர் மாவட்டத்துக்கு அனுப்பினார்.

''நிவாரணப் பணிகளுக்காக வந்த அமைச்சர்கள் பலரும் பாதிக்கப்பட்ட பகுதிகளுக்கு வரவில்லை. புதுவையிலும், கடலூர் சுற்றுலா மாளிகையிலும் ரூம் போட்டுத் தங்கி உள்ளார்கள். ஆனால், 'நாங்க பாதிக்கப்பட்ட பகுதிகளுக்குச் சென்று பார்வை​யிட்டு, மக்களைச் சந்தித்து ஆறுதல் கூறி, நிவாரணமும் கொடுத்து வருகிறோம்’ என்று சொல்கிறார்கள். அமைச்சர்கள் யாரும் இதுவரை அறைகளை விட்டு வெளியே வந்ததாவே தெரியலை'' என்று புலம்புகிறார்கள் மாவட்ட மக்கள்.

இதற்கு என்ன காரணம் என்று விசாரித்தோம். ''கிராமப்புறங்களில் நிவாரணப் பணிகளுக்கு அமைச்சர்கள் சென்றால், பாதிக்கப்பட்ட மக்கள் ஆத்திரத்தோடு முற்றுகை இடுகிறார்கள். ஏசி கார்களில் வந்து செல்லும் உங்களுக்கு எங்கள் வலி எப்படித் தெரியும்? என்று ஆத்திரப்படுகிறார்கள். ஒரு சில இடங்களில் பஞ்சாயத்து அலுவலகங்களில் அடைத்துவைத்த சம்பவங்களும் நடக்கின்றன. 'மாவட்ட நிர்வாகம் எங்களுக்கு எந்த அடிப்படை வசதியும் செய்து தரலை. உடனடியா செஞ்சு கொடுத்தா... வெளியே விடுறோம்’ என்று ஆவேசப்படுகிறார்கள். அதனால் அங்கே போகவும் முடியாமல் சென்னைக்குத் திரும்பவும் முடியாமல் இடையில் தங்கி பொழுதைப் போக்குகிறார்கள்'' என்கிறார்கள் அமைச்சர்​களின் உதவியாளர்கள்.

ரோட்டில் மக்கள்... விடுதிகளில் அமைச்சர்கள்!

மாவட்ட ஆட்சித் தலைவர் அமுதவல்லியோ, ''மாவட்டத்தில் குடிநீர் தட்டுப்பாட்டை முழுவதுமாக நீக்கி, அனைவருக்கும் தண்ணீர் கொடுத்துவிட்டோம். அதேபோல் சீரமைப்பு பணியும் நிவாரணப் பணியும் 60 சதவிகிதம் முடிந்து விட்டது'' என்கிறார். ஆனால், நகரத்திலும் கிராமப்புறங்களிலும் குடிக்கக்கூட தண்ணீர் இல்லை என்று புகார் கூறி ஒரு நாளைக்கு குறைந்தது ஐந்து சாலை மறியல்களாவது நடக்கின்றன. நகரத்திலேயே சீரமைப்புப் பணிகளை  முற்றிலும் முடிக்காத மாவட்ட நிர்வாகம், கிராமப்புறங்களில் அறுந்துகிடக்கும் மின்கம்பிகளை இன்னும் அசைக்கக்கூட இல்லை  என்பதுதான் உண்மை.  

நிவாரணப் பணிகளை அமைச்சர் யாராவது பார்வையிடச் சென்றால், அவருடனேயே சீரமைப்புப் பணியில் ஈடுபட்டு இருக்கும் அரசு அதிகாரிகளும் ஊழியர்களும் சென்றுவிடுகின்றனர். அதனால், சீரமைப்புப் பணிகள் முற்றிலும் முடங்கி விடுகின்றன.

இப்போது, கிட்டத்தட்ட 30 சதவிகித சீரமைப்புப் பணிகளே நகரத்தில் முடிந்துள்ளன. கிராமத்து மக்கள் சகஜ நிலைக்குத் திரும்ப வேண்டும் என்றால், இன்னும் ஒரு மாதமாவது ஆகும். அதுவரை, கிராமப்புற மக்களின் வாழ்க்கை நரகம்தான்.

ரோட்டில் மக்கள்... விடுதிகளில் அமைச்சர்கள்!

சீரமைப்புப் பணிக்களுக்காக வெளி மாவட்டத்தில் இருந்து மின்சாரத் துறை ஊழியர்கள், துப்புரவுப் பணியாளர்கள், சுகாதாரப் பணியாளர்கள் என்று ஆயிரக்கணக்கான அரசு ஊழியர்களை கடலூர் மாவட்டத்துக்குக் கொண்டு வந்தது மாவட்ட நிர்வாகம். ஆனால், அவர்களின் பணியைத் திட்டமிட்டுக் கொடுக்கவில்லை. போகிற போக்கில் பணிகளைச் செய்துவிட்டுப் போவதால், எந்தப் பணியும் முழுமையாக முடியவில்லை. மாவட்டத்தின் முக்கியப் பகுதிகளான நெல்லிக்குப்பம், மஞ்சக்குப்பம் போன்ற பகுதிகள் இன்னமும் மின்சாரம் இல்லாமல் அவதியில் தவிக்கின்றன.

ரோட்டில் மக்கள்... விடுதிகளில் அமைச்சர்கள்!

புயலால் முழுமையாக வீட்டை இழந்தவர்​களுக்கு நிவாரணம் 5,000 ரூபாய் என்றும், பகுதியாகப் பாதிக்கப்பட்டவர்களுக்கு 2,500 ரூபாய் என்றும் அரசு அறிவித்தது. அந்தத் தொகையாவது பாதிக்கப்பட்டவர்களுக்கு முழுதாகப் போய்ச் சேர்ந்ததா என்றால்... அதுவும் இல்லை.

''கட்சிக்காரர்கள் யாரை கை காட்டுறாங்​களோ... அவர்களுக்குத்தான் முழுத்தொகை கிடைக்கிறது. மற்றவர்களை, பகுதி​யாகப் பாதிக்கப்பட்டவர்கள் லிஸ்ட்டில் சேர்த்து விடுகிறார்கள். அதுவும் 2,500 ரூபாய்க்கு டோக்கன் கொடுத்துவிட்டு, 2,000 ரூபாய்தான் கையில் கொடுக்கிறாங்க. இந்தக் கொடுமையிலும் கட்சிக்காரங்க எங்க வயித்துல அடிக்கிறது நியாயமா..? இந்த ரெண்டாயிரத்தை வைச்சு நாங்க என்ன செய்ய முடியும்? இன்னைக்கு சாதாரண ஒரு கூரை வீடு கட்டுறதுன்னாலே 20,000 ரூபாய் ஆகும். ரெண்டு ரூபா வித்த ஒரு தென்னங்கீற்றின் விலை இப்போ ஆறு ரூபா. அத்தியாவசியப் பொருட்கள் எல்லாம் இப்ப ரெண்டு மடங்கா விலை ஏறிடுச்சு. அதுக்குத் தேவையான பணத்தை எங்களுக்கு நிவாரணமா கொடுக்கணும். இப்போ எங்களின் வாழ்வாதாரமே கேள்விக்குறி ஆயிடுச்சு'' என்று தலையில் அடித்துக்கொள்கிறார்கள் பாதிக்கப்பட்ட மக்கள்.

இந்தப் புயலால் முந்திரி விவசாயக் கிராமங்களான கீழ்மாம்பட்டு, மேல்மாம்பட்டு, மாளிகம்பட்டு, தாழம்பட்டு, பத்திரக்கோட்டை, சிலம்பினாதன் பேட்டை போன்ற கிராமங்களுக்கு ஏகப்பட்ட இழப்பு. அவர்களுக்கு ஒரு ஹெக்டேருக்கு 9,000 ரூபாய் என்று நிவாரணத் தொகை அறிவித்திருக்கிறது அரசு. ''இந்தியாவிலேயே தமிழகத்தில் விளையும் முந்திரிக்கு நல்ல மவுசு. அதுவும் பண்ருட்டி முந்திரின்னா... சந்தைகளில் தனி மரியாதை. அப்படிப்பட்ட முந்திரி ஒரு லட்சம் ஏக்கர் பாதிப்பு அடைஞ்சிருக்கு. மீண்டும் பழைய நிலைக்கு மரங்களை வளர்த்து மகசூலுக்குக் கொண்டுவர்றதுன்னா குறைஞ்சது 10 வருடங்களாவது ஆகும். முந்திரி மரங்கள் குறைஞ்சது 40 ஆண்டுகளாவது மகசூல் கொடுக்கும். ஒரு ஏக்கருக்குக் குறைஞ்சது 40 ஆயிரம் ரூபாய் லாபத்தைக் கொடுக்கும். அப்படிப் பார்க்கும்போது, இப்போது ஒரு ஏக்கருக்கு 16 லட்ச ரூபாயை இழந்திருக்கோம். ஏக்கருக்கு 3,500 ரூபாய் நிவாரணம் என்று அறிவித்து இருப்பது, அங்கே கிடக்கும் பாதிப்புக்குள்ளான மரங்களை அகற்றவே பத்தாது'' என்று கண்ணீர் வடிக்கிறார்கள் முந்திரி விவசாயிகள்.

   நிவாரணப் பணிகளில் அதிவேகம் எடுப்பது மட்டும்தான் பாதிக்கப்பட்ட கடலூர் மாவட்ட மக்களுக்கு அரசு செய்யும் மிகப் பெரிய உபகாரம்!  

- க.பூபாலன்

படங்கள்: கே.ராஜசேகரன், ஜெ.முருகன் 

இது 62-வது புயல்!

  வருடத்துக்கு 250 புயல்கள் பூமியைத் தாக்குகின்றன என்று வானிலை ஆராய்ச்சியாளர்கள் கூறுகின்றனர். பாதிக்கப்பட்ட பகுதிகளில் 5,000 பேருக்கு மேல் இறந்தால், அது மோசமான புயல் என்று வர்ணிக்கப்படுகிறது. வருடத்துக்கு 20 மோசமான புயல்கள் இந்தியா, பங்களாதேஷ் பகுதிகளில் ஏற்படுகின்றன. 1801-ம் ஆண்டு முதல் 2000-ம் ஆண்டு வரை 308 புயல்கள் கிழக்குக் கடற்கரை பகுதிகளில் ஏற்பட்டுள்ளன. 48 புயல்கள் மேற்குக் கடற்கரை பகுதிகளில் ஏற்பட்டுள்ளன. இவற்றில், கிழக்குக் கடற்கரை பகுதிகளில் 103 புயல்கள் அதிகமான சேதங்களை ஏற்படுத்தி உள்ளன. ஒடிசாவில் 98 புயல்கள், ஆந்திர மாநிலத்தில் 79 புயல்கள், மேற்கு வங்கத்தில் 69 புயல்கள், தமிழகத்தில் 62 புயல்கள் சேதங்களை ஏற்படுத்தி உள்ளன.

  தமிழகத்தில் வீசிய 62 புயல்களில் 45 புயல்கள் அதிகப் பாதிப்புகளையும், உயிர்ச் சேதங்களையும் ஏற்படுத்தியுள்ளன. அவற்றில் ஒன்றுதான் தாண்டவமாடிய 'தானே’ புயல். இதுவரை தமிழகப் பகுதிகளில் சென்னையில் 18 புயல்களும், தஞ்சாவூரில் 12 புயல்களும், பாண்டிச்சேரியில் 8 புயல்களும், கடலூரில் 7 புயல்களும் கடந்து உள்ளன.

- டி.கலைச்செல்வன் 

அதிரவைக்கும் புள்ளிவிவரம்

கடலூர் மாவட்டத்தில் மட்டும் நெற்பயிர் 58,020 ஹெக்டேர், கரும்பு 5,700 ஹெக்டேர், நிலக்கடலை 1,400 ஹெக்டேர், பயிறு வகைகள் 950 ஹெக்டேர், பருத்தி 3,500 ஹெக்டேர், வரகு வகைகள் 250 ஹெக்டேர், வாழை 2,860 ஹெக்டேர், முந்திரி 22,500 ஹெக்டேர் (இவற்றில் பண்ருட்டியில் மட்டும் 15,000 ஹெக்டேர்), பலா 1,000 ஹெக்டேர், மா 150 ஹெக்டேர், வெற்றிலை 110 ஹெக்டேர், கொய்யா 200 ஹெக்டேர் பாதிக்கப்பட்டு உள்ளன. இவை தவிர, பாதிக்கப்பட்ட தென்னை மரங்களின் எண்ணிக்கை மட்டும் 85 ஆயிரத்தைத் தாண்டும் என்கிறது விரிவான அறிக்கை.