Published:Updated:

“என் கணக்கு தப்பாகிவிட்டது!”

ஒட்டுமொத்த விகடனுக்கும் ஒரே ஷார்ட்கட்

Use App
“என் கணக்கு தப்பாகிவிட்டது!”
“என் கணக்கு தப்பாகிவிட்டது!”

“என் கணக்கு தப்பாகிவிட்டது!”

பிரீமியம் ஸ்டோரி

காங்கிரஸிலிருந்து பிரிந்து த.மா.கா-வைத் தொடங்கிய போது ஜி.கே.வாசன்மீது எதிர்பார்ப்பு இருந்தது. ஆனால், சமீபத்திய நாடாளுமன்றத் தேர்தலில் பி.ஜே.பி-யுடன் கைகோத்து ஓரிடத்தில் போட்டியிட்டு அதிலும் தோல்வியையே சந்தித்திருக்கிறது. கட்சியின் அடித்தளமே ஆட்டம் கண்டுள்ள சூழ்நிலையில் த.மா.கா தலைவர் ஜி.கே.வாசனைச் சந்தித்துப் பேசினேன்...

‘`39 எம்.எல்.ஏ-க்கள், 20 எம்.பி-க்களுடன் இருந்த 1996 த.மா.கா... ஓரிடத்தில் நின்று அதிலும் தோற்றுப் போன 2019 த.மா.கா... ஏன் இத்தனை பெரிய வீழ்ச்சி?’’

 ‘`வெற்றிதோல்விகளை ஏற்றுக்கொள்ள வேண்டும். அது அரசியலில் அவசியமானதும் கூட. அதைத்தாண்டி மக்கள் பணி, இயக்கப்பணிதான் முக்கியம். அதை நோக்கித்தான் த.மா.கா பயணிக்கிறது. தமிழகத்தை ஆட்சி செய்த இரண்டு திராவிடக்கட்சிகளும் பெரிய வெற்றிகளைச் சந்தித்ததுபோல், மிகப்பெரிய தோல்விகளையும் சந்தித்துள்ளன. அதற்காக அந்தக் கட்சிகள் ஒட்டுமொத்தமாக வீழ்ச்சியடைந்ததாகச் சொல்ல முடியாது. வெற்றிதோல்விகளைத் தாண்டி, இப்போதும் மக்களைச் சந்தித்துவருகிறேன். மக்களின் குறைகளை அரசிடம் கொண்டுசெல்ல முயற்சி செய்கிறேன். என்னுடையது மக்களுக்கான பணி; பதவியைத் தேடுவது அல்ல!’’

“என் கணக்கு தப்பாகிவிட்டது!”

‘‘அரசியலில் உங்களை மக்கள் இன்னும் ஏற்றுக்கொள்ளவில்லையா?’’

 ‘`நான் அப்படி நினைக்கவில்லை. ஒரு தேர்தலில் ஏற்றுக்கொள்கிறார்கள், இன்னொரு தேர்தலில் புறக்கணிக்கிறார்கள். அதற்கு நாம் ஒன்றும் செய்ய முடியாதே. இந்தியா முழுவதும், ஊழல் குற்றச்சாட்டுடைய பலரையும் மக்கள் ஏற்றுக்கொண்டு அவர்களுக்கு வாக்களிக்கிறார்கள். என்மீது எந்த ஊழல் குற்றச்சாட்டும் இல்லை. என்னையும் என் கட்சியையும் மக்கள் ஏற்றுக்கொள்ளவில்லை. ஏனென்று மக்களிடம் சென்று கேட்கவா முடியும்... ஆனால், மறுபடியும் மறுபடியும் மக்களிடம்தான் சென்றாக வேண்டும்.’’

‘`எந்தவிதமான ஊழல் குற்றச்சாட்டுக்கும் உள்ளாகாதவர் என்ற பெயர் மட்டும் ஜி.கே.வாசனுக்குப் போதுமான அடையாளமா?’’

‘`ஊழல் குற்றச்சாட்டுக்கு ஆளாகாதவர் என்பதைப் பெருமையாக எடுத்துக்கொள்ள முடியாது. அது அரசியல்வாதிகளுக்கான அடிப்படை. ஆட்சியில் இல்லாதபோது, மக்கள் போராட்டங்களை, மக்களுக்கான குரலாக இருப்பதை விரும்புகிறேன். என்னால் முடிந்த அளவு அதைச் செயல்படுத்தியும் வருகிறேன்.’’

‘‘உங்கள் எண்ணப்படிதான் த.மா.கா நடக்கிறதா?’’

 ‘`நான்கு ஆண்டுகளாகத் தனித்தன்மையோடு செயல்படுகிறோம். என்கட்சியில், இரண்டாயிரம் பேர்தான் ஆர்ப்பாட்டத்துக்கு வருவார்கள் என்றால், அவர்களை வைத்துதான் ஆர்ப்பாட்டம் நடத்துகிறேன். காசு கொடுத்து அழைத்துவந்து, அதைப் பெரிய அளவில் காட்டவேண்டுமென்ற அவசியம் எனக்கில்லை.’’

‘`தனித்தன்மையோடு இருக்கும் கட்சி எதற்காகக் கூட்டணிக்குள் சென்றது... அதுவும் பா.ஜ.க-வுடன்?’’

 ‘`தனித்தன்மை என்பது வேறு; கூட்டணி வேறு. தேர்தலுக்காகத்தான் கூட்டணி. கூட்டணியில் இருந்தாலும், எங்களுக்கான அடையாளம் என்றும் மாறாது. அரசின் தவறுகளை எப்போதும் சுட்டிக்காட்டுகிறோம். இதுதான் தனித்தன்மை. இது தேர்தலில் கிடையாது. தமிழகத்தில் எல்லாக்கட்சிகளும் கூட்டணியோடுதான் தேர்தலைச் சந்தித்தன. அதுபோல்தான் நாங்களும்.’’

‘`கூட்டணியால் உங்கள் கட்சி தனித்தன்மையை இழந்துவிட்டதாகவே மக்கள் கருதுகிறார்களே?’’

 ‘`அப்படிப்பார்த்தால், எந்தக் கட்சியும் இங்கு தேர்தலில் போட்டியிட முடியாது. ஆட்சியில் இருப்பவர்களாலேயே அது முடியாத காரியம். சின்ன கட்சிகளால் எப்படிச் சாத்தியமாகும்... யதார்த்தம் என்று ஒன்று இருக்கிறது. தனித்தன்மையோடு இருக்கிறேன் என்று 234 தொகுதிகளிலும் தனியாகப் போட்டியிட முடியுமா, ஆட்சியில் இருப்பவர்களே கூட்டணியின்றி  இப்போது போட்டியிட முடியாது. தேர்தலுக்காகத்தான் இந்தக் கூட்டணியே!’’

‘`அப்படியெனில் பா.ஜ.க - அ.தி.மு.க - த.மா.கா கூட்டணியை சந்தர்ப்பவாதக் கூட்டணி என்று சொல்லலாமா?’’

 ‘`இந்தக் கூட்டணி மட்டுமல்ல, இந்தியாவில் உள்ள அனைத்துக்கட்சிகளின் கூட்டணிகளும் தேர்தலுக்கான கூட்டணிதான். அதைச் சந்தர்ப்பவாதம் என்று சொல்லமாட்டேன்.  என்னைப் பொறுத்தவரையில் இந்தக் கூட்டணியை மக்கள் ஆதரிப்பார்கள் என்று கூட்டணிக்கு வந்தேன். என் கணக்கு தப்பாகிவிட்டது.’’

‘`காங்கிரஸ் பாரம்பர்யத்தில் ஊறிய குடும்பம் உங்களுடையது... நீங்கள் பா.ஜ.க-வுடன் கைகோத்தது எப்படி?’’

 ‘`மக்களின் மனநிலை, எண்ணம், நாட்டின் வளர்ச்சி, பாதுகாப்பு, நாட்டின் எதிர்காலம் இவற்றையெல்லாம் கருத்தில் கொண்டுதான் இந்தக் கூட்டணி அமைந்தது. இவற்றை பா.ஜ.க நிறைவேற்றுமென்றுதான் கைகோத்தோம். அதன் அடிப்படையில்தான் தி.மு.க- காங்கிரஸ் கூட்டணியில் இடம்பெறாமல் அ.தி.மு.க - பா.ஜ.க கூட்டணியில் இடம்பெற்றோம். இதைத்தான் நாட்டிலுள்ள பெரும்பாலான மக்களும் நினைத்திருக்கிறார்கள். மீண்டும் மோடி பிரதமராகியிருக்கிறார். இதைக் காங்கிரஸால் செய்ய முடியாதென்று மக்கள் நினைத்திருப்பதால்தான், அவர்களுக்கு 53 இடங்களை மட்டுமே கொடுத்திருக்கிறார்கள்!’’

“என் கணக்கு தப்பாகிவிட்டது!”

‘`ஆனால் தமிழகத்தின் தீர்ப்பு வேறு மாதிரியிருக்கிறதே?’’

 ‘`இங்கு நடந்ததெல்லாம் பொய்ப்பிரசாரம். கம்மலையும் மூக்குத்தியையும் அடகுக்கடையிலிருந்து திருப்பித்தருகிறோம் என்று மக்களை நம்பவைத்திருக்கிறார்கள். போகப்போகத் தெரியும்.’’

‘`காமராஜரை  டெல்லியில் உயிரோடு எரிக்க முயன்ற வகுப்புவாதக் கும்பலுடன் கூட்டணி வைத்ததால்தான் தஞ்சையில் தோற்றதாகக் காங்கிரஸ் தொண்டர்கள் கூறுகிறார்களே?’’

‘`ஆதாரமற்ற தவறான தகவல். அரசியலில் ஒவ்வொரு கட்டத்திலும் ஒவ்வொரு கட்சியின் மீதும் மிகப்பெரிய சந்தேகம் வந்திருக்கிறது. எதையும் கண்மூடித்தனமாக நம்பக்கூடாது. கொலைக்குற்றத்துக்காகப் பல கட்சிகள் விசாரிக்கப்பட்டிருக்கிறார்கள். சில விஷயங்களைப் பேசுவது அர்த்தமற்றது. ஜோடித்துக் குற்றச்சாட்டுகளை வைப்பது அரசியலில் இருக்கிறது. இதையெல்லாம் ஏற்றுக்கொள்ள முடியாது.’’

‘`அப்படியெனில் இதுவும் காங்கிரஸால் ஜோடிக்கப்பட்ட ஒன்றா?’’

‘`ஒன்றை ஒன்பதாக்குவது அரசியலில் நடப்பதுதான். கல்லெடுத்து அடிப்பதைக் கொலை குற்றமாகச் சித்திரிக்கக் கூடாது. அப்படித்தான் இதுவும்.’’

‘`தஞ்சாவூரில் ஒருவேளை நீங்கள் நின்றிருந்தால் ஜெயித்திருக்கலாமோ?’’

‘`அப்படிச் சொல்ல முடியாது. தமிழகம் முழுவதும் ஒரேமாதிரி அலையடித்திருக்கிறது. பொய்ப்பிரசாரங்கள் எடுபட்டிருக்கின்றன. நான் நின்றிருந்தாலும் என்ன நடந்திருக்கும் என்று உறுதியாக எதையும் சொல்ல முடியாது.’’

‘`த.மா.கா மீண்டும் தாய்க்கழகத்தோடு இணைய வாய்ப்பிருக்கிறதா?’’

 ‘`த.மா.கா தனித்தன்மையோடு ஐந்தாண்டுகளாக வளர்ந்துவருகிறது. தமிழகத்தில் மரியாதைக்குரிய கட்சிகளில் எங்கள் கட்சி முதலிடத்தில் இருக்கிறது. இது வளரும்... தொடரும்... சிறக்கும். வரும் தேர்தலில் எதிர்பார்ப்பதற்கு மேல் வெற்றிபெறும்.’’

‘`சோனியா அல்லது ராகுல் காந்தி அழைத்துப் பேசினால் இணைப்புக்கு வாய்ப்புண்டா?’’

 ‘`இந்தியாவில் உள்ள அனைத்துக்கட்சிகளும், தங்கள் கட்சியை வளர்க்கப் பாடுபட்டுக் கொண்டிருக்கின்றன. நானும் அப்படித்தான் த.மா.கா-வை வளர்த்துக்கொண்டிருக்கிறேன். நான் ஏன் மற்ற கட்சிகளைப் பற்றிச் சிந்திக்க வேண்டும்? எனக்கான வேலைகளே நிறைய இருக்கின்றன.’’

“பா.ஜ.க ஆட்சியைப் பிடித்துவிட்டதால் அந்தக் கட்சியுடன் உங்கள் கட்சி இணையப்போவதாகவும் ஒரு தகவல் உலா வருகிறதே?’’

“இதெல்லாம் யூகமான பேச்சு. வெறும் வாட்ஸப் தகவல். மத்திய அமைச்சர் பதவிக்காலம் முடிந்தபின்னும் டெல்லிக்குச் சென்று வருகிறேன். என் நண்பர்கள் பல கட்சிகளில் இருக்கிறார்கள். முன்பெல்லாம் டெல்லிக்குச் சென்றபோது, காங்கிரஸில் இணையப்போகிறேன் என்றார்கள். இப்போது பா.ஜ.க-வுடன் இணைவேன் என்கிறார்கள். அவ்வளவுதான் வித்தியாசம். நன்றாக வளர்ந்துகொண்டிருக்கும் கட்சியை நான் ஏன் வேறு கட்சியோடு இணைக்கப் போகிறேன்?’’

‘‘எட்டுவழிச்சாலைத் திட்டம், நீட் தேர்விலிருந்து தமிழகத்துக்கு விலக்கு அளிப்பது எல்லாம் மத்திய அரசின் கைகளில் இருக்கிறது. பா.ஜ.க கூட்டணியில் இருப்பதால் இவற்றையெல்லாம் எதிர்க்க முடியுமா?’’

‘`விவசாயிகளுக்கு எதிரான எந்தத் திட்டத்தையும் எதிர்ப்போம். விளைநிலங்களைப் பாழ்படுத்தும் எந்தத் திட்டத்தையும் நாங்கள் ஒருபோதும் அனுமதிக்க மாட்டோம். ஆட்சியில் யார் இருந்தாலும், அவர்களுக்கு எதிராக எங்கள் குரலை பலமாக எடுத்துரைப்போம். இப்போதும் அதைச் செயல்படுத்திக்கொண்டிருக்கிறோம். கூட்டணிக்காக எதையும் மாற்றிக்கொள்ள மாட்டோம்!’’

‘`உங்கள் பார்வையில் மோடி - ராகுல்?’’

‘`தனிப்பட்ட முறையில் யாரையும் பார்க்கவில்லை. மக்கள் பார்வையில்தான் நானும் பார்க்கிறேன். மோடிமீது மக்கள் நம்பிக்கை வைத்திருக்கிறார்கள். ராகுல்மீது நம்பிக்கை வைக்கவில்லை. நம்பிக்கை இல்லாததால்தான் காங்கிரஸ் குறைவான இடங்களிலேயே வென்றிருக்கிறது!’’

-இ.லோகேஷ்வரி

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு