கல்லைக் கரைத்த கலெக்டர்கள்!

கிடுகிடு கிரானைட் ஊழல் விசாரணையில் அடுத்து அதிகாரிகள் மீது நடவடிக்கைகள் பாய இருப்பதை கடந்த இதழில் கழுகார் சொல்லி இருந்தார். அப்படியே சீஸன் டூ ஆக்ஷன் ஆரம்பமாகிவிட்டது!

 கிரானைட் ஊழலில் சம்பந்தப்பட்ட கனிம வளம், வருவாய், பொதுப் பணி, கலால், வணிக வரி ஆகிய துறைகளின் அதிகாரிகள் மற்றும் ஊழியர்கள் என மொத்தம் 34 பேர் சம்பந்தப்பட்ட இடங்கள், பி.ஆர்.பி. மற்றும் அவரது உறவினர்கள் வீடுகள் என மொத்தம் 38 இடங்களில் 15-ம் தேதி அதிரடி சோதனை நடத்தியது லஞ்ச ஒழிப்புத் துறை. இதில் மதுரை மாவட்டத்தில் மட்டுமே 18 இடங்கள். சென்னையிலும் சேலத்திலும் தலா ஆறு இடங்கள். கோவையில் இரண்டு இடங்கள். ராமநாதபுரம், விருதுநகர், கன்னியாகுமரி, தூத்துக்குடி, திருச்சி, கரூர் மாவட்டங்களில் சிலரது ஜாகைக்குள் நுழைந்தனர் அதிகாரிகள். பி.ஆர்.பி. அண்ட் கோ-வின் கிரானைட் ஊழலுக்கு உடந்தையாக இருந்ததற்காக, மதுரையின் முன்னாள் கலெக்டர்கள் மதிவாணன், காமராஜ் ஆகியோரும் வளைக்கப்படலாம் என்று எழுதி இருந்தோம். லஞ்ச ஒழிப்பு மற்றும் ஊழல் தடுப்புப் பிரிவு போலீஸார் தற்போது பதிவு செய்திருக்கும் இரண்டு வழக்குகளிலுமே, இவர்கள்தான் அச்சாணி​யாக இருக்கப்போகிறார்கள் என்று தகவல்.

மேலூரைச் சேர்ந்த முருகேசன் என்பவர் 2008-ம் ஆண்டு இறுதியில் பி.ஆர்.பி. எக்ஸ்போர்ட்ஸ் நிறுவனத்தில் நடந்த ஓர் ஊழலைக் கண்டுபிடித்து அப்போதைய தி.மு.க. அரசுக்குப் புகார் அனுப்புகிறார். தகவல் அறியும் உரிமைச் சட்டத்தின் கீழ் முருகேசன்  கேட்டிருந்த தகவல்களுக்கு, '2004 மார்ச் மாதத்தில் இருந்து 2008 மார்ச் மாதம் வரையிலான நான்கு ஆண்டுகளில், பி.ஆர்.பி. நிறுவனம் நான்கு லட்சம் கன மீட்டர் அளவுக்கு கிரானைட் கற்களை ஏற்றுமதி செய்ததாக சுங்கத் துறையில் இருந்து சி.டி. ஆதாரம் கொடுத்திருக்கிறார்கள். ஆனால், அதே கால கட்டத்தில் 78 ஆயிரத்து 631 கன மீட்டர் அளவுக்கே பி.ஆர்.பி. நிறுவனம் கிரானைட் கற்களை உற்பத்தி செய்திருப்பதாக கனிம வளத் துறையில் இருந்து முருகேசனுக்குப் பதில் கொடுத்து இருக்கிறார்கள். ஏற்றுமதிக்கும் உற்பத்திக்கும் பெரிய வித்தியாசம் இருந்ததால், இதில் மோசடி செய்து அரசுக்கு வரவேண்டிய வருமானத்தைத் தடுத்து​​விட்டார்கள் என்பதுதான் முரு​கேசனின் குற்றச்சாட்டு. ஆதாரத்​​துடன் இந்தப் புகார் இருந்தும், பின்னணியில் பெரிய அளவில் 'கைம்மாறு’ சேவைகள் நடந்ததால், புகார் ஏறக்கட்டப்பட்டது.

முருகேசன் தொடர்ந்து குடைச்சல் கொடுத்துக்​கொண்டே இருந்ததால், புகாரை விசாரிக்கும்படி அப்​போது மதுரை கலெக்டராக இருந்த சீதாராம​னுக்கு மார்ச் 2009-ல் ஃபார்​வர்டு செய்கிறது அரசு. கூடவே, விசாரணை அறிக்கை இப்படித்தான் இருக்க வேண்டும் என சில நிர்பந்தங்களும் வந்தன. ஊழல்களை நன்கு அறிந்திருந்ததால், 'அப்படி எல்லாம் விசாரிக்க முடியாது’ என்று கோப்புகளைப் பத்திரமாகக் கட்டிவைத்துவிட்டார் சீதாராமன். இதற்கிடையில், நாடாளுமன்றத் தேர்தல் வருகிறது. மே 20-ல் தேர்தல் முடிவுகள் வெளிவந்ததும், மே 27-ல் சீதாராமனை மதுரையை விட்டுத் தூக்கியது அதிகார வர்க்கம். அவருக்குப் பதிலாக, திருவாரூரில் கலெக்டராக இருந்த மதிவாணன் மதுரை கலெக்டராக அழைத்துவரப்பட்டார்.

மே 29-ல் பொறுப்பேற்ற மதிவாணன், கிரானைட் விவகாரத்தில்தான் முதலில் மூக்கை நுழைத்தார்.

அரசுக்கு அனுப்பி இருந்த புகார் தொடர்பாக ஜூன் 15-ல் நேரில் ஆஜராகி விளக்கம் அளிக்கும்படி ஜூன் 3-ல் முருகேசனுக்கு சம்மன் அனுப்பினார். அதே தேதியில் பி.ஆர்.பி-யையும் நேரில் ஆஜராகும்படி சம்மன் போட்டிருந்ததால் சுதாரித்துக் கொண்ட முருகேசன், 'இந்தப் புகார் நான் உருவாக்கியது இல்லை. அரசு ஆவணங்களை வைத்துப் பார்த்தாலே, ஊழல் வெட்டவெளிச்சமாகிவிடும். என்னிடம் விசாரிப்பதற்கு எதுவும் இல்லை. அதனால் விசாரணைக்கு வர முடியாது. இது சட்டப்படி குற்றம் என்று கருதினால், அதற்காக தாங்கள் என்ன தண்டனை கொடுத்தாலும் அதை எதிர்கொள்ளத் தயாராய் இருக்கிறேன்’ என்று கலெக்டருக்குப் பதில் அனுப்பிவிட்டார்.

இதையடுத்து, ஜூன் 15-ம் தேதி நடந்த விசாரணை யில் பி.ஆர்.பி. தரப்பிலும் வணிக வரி, கலால் துறை அதிகாரிகளும் முருகேசன் குறிப்பிட்டதுபோல் எந்த முறைகேடும் நடக்கவில்லை என 29.5.10-ல் அரசுக்கு அறிக்கை அனுப்பிய மதிவாணன், பத்திரிகைகளுக்கும் அறிக்கை கொடுத்தார். அதை ஆதாரமாகக்கொண்டு முருகேசனிடம் 10 லட்ச ரூபாய் கேட்டு மானநஷ்ட வழக்குத் தொடர்ந்தது பி.ஆர்.பி. நிறுவனம். இதை எதிர்த்து உயர் நீதிமன்றத்தில் ரிட் மனு தாக்கல் செய்த முருகேசன், அங்கே இன்னும் ஓர் ஆவணத்தை தாக்கல் செய்தார். முருகேசனின் புகார் தொடர்பாக விசாரணைக்கு ஆஜராகும்படி கலால் மற்றும் வணிக வரித் துறைக்கு கலெக்டர் மதிவாணன் அனுப்பிய சம்மன்களை, பி.ஆர்.பி. நிறுவனங்களின் ஃபை​னான்ஸ் அதிகாரியான ஆறுமுகம் என்பவரே கையெழுத்துப் போட்டு வாங்கி இருக்கிறார். இந்த தில்லுமுல்லுவைக் கண்டுபிடித்த முருகேசன், 'ஆறுமுகம் என்ற நபர் உங்களது அலுவலகத்தில் வேலை பார்க்கிறாரா?’ என்று கேட்டு கலால் மற்றும் வணிக வரித் துறைக்கு கடிதம் எழுதினார். 'அப்படி யாரும் இல்லை’ என அவர்கள் பதில் கொடுத்திருக்கிறார்கள். அரசு அலுவலகங்களுக்கு அனுப்பிய சம்மன்களை பி.ஆர்.பி-யின் ஆளை வைத்தே வாங்கவைத்து, அவர்கள் மூலமாகவே பதிலையும் போலியாகத் தயாரித்துக் கொடுத்துவிட்டார்கள் என்பதை ஆதாரத்துடன் கோர்ட்டில் சமர்ப்பித்தார் முருகேசன். இந்த நாடகங்களை செம்மையாக நடத்தி முடிப்பதற்கு ஆன செலவு மட்டுமே ஒரு 'சி’-க்கு மேல் இருக்கும் என்பது முருகேசனின் வாதம்.

இதற்கு இடைப்பட்ட காலத்தில்தான் பி.ஆர்.பி. ஊழலை தோலுரித்துக்கொண்டே இருந்த 'தினபூமி’ நாளிதழ் ஆசிரியர் மணிமாறன் மீது வழிப்பறி வழக்கைப் போட்டு, அதில் முருகேசனையும் கோத்துவிட்டார்கள். முருகேசன் உயர் நீதிமன்றத் தில் தொடுத்திருந்த வழக்கில் 2011 பிப்ரவரி 4-ல் தீர்ப்பு எழுதிய நீதியரசர் சந்துரு, 'முருகேசனின் புகார்களில் உண்மை இருக்கிறது. எனவே மேலூர் பகுதியில் உள்ள கிரானைட் குவாரிகள் அனைத்தையும் முறையாக அளந்து முடித்து, அங்கு நடந்துள்ள விதிமீறல்கள் குறித்து ஒரு மாதத்துக்குள் மாவட்ட கலெக்டர் அறிக்கை அளிக்க வேண்டும்’ என்று உத்தரவிட்டார். ஆனால், அந்த உத்தரவு தொடர்பாக ஒரு துரும்பைக்கூட கிள்ளிப்​போடாத மாவட்ட நிர்வாகம், கோர்ட் உத்தரவுக்குத் தடை வாங்கும்படி, கிரானைட் கிங்கரர்களுக்கு யோசனை சொன்னது. அதன்படியே, மார்ச் 30-ல் அந்த உத்தரவுக்குத் தடை வாங்கிவிட்டார்கள் கிரானைட் புள்ளிகள். இந்த விவகாரத்தில்தான் மதிவாணன் சிக்கி இருக்கிறார். இந்த முறைகேடுகளின் அத்தனை அசைவுகளையும் அரங்கேற்றிக் கொடுத்தவர் கனிம வளத் துறை துணை இயக்குநராக இருந்த ராஜாராம். இவர் இப்போது கன்னியாகுமரி மாவட்டக் கனிம வளத் துறை துணை இயக்குநர். இவர் மீதும் மதிவாணனின் செய்கைகளுக்கு உடந்தையாக இருந்ததாக அப்போதைய வணிக வரித் துறை அதிகாரி (ஓய்வு பெற்ற) பெரியசாமி, கலால் துறைக் கண்காணிப்பாளர் கணேசன் மற்றும் பி.ஆர்.பி. உள்ளிட்டவர்கள் மீது ஒரு வழக்குப் பதிவாகி இருக்கிறது. இன்னொரு வழக்கு மதுரை மாவட்ட முன்னாள் ஆட்சியர் காமராஜை மையப்படுத்தியது. என்னதான் மதிவாணன் வளைந்து கொடுத்துப் போனாலும், அத்துமீறல்கள் ஓவராகிப்போனதால் ஒரு கட்டத்தில் ஆளும் தரப்பை அனுசரிக்க மறுத்​தார். இதையடுத்து அவரைக் கட்டாய விடுப்பில்அனுப்பி​விட்டு, காமராஜை​மதுரைக்​குக் கூட்டி வந்தார் தி.மு.க-வின் அப்போதைய அதிரடிப் புள்ளி.

காமராஜ் வந்த பிறகும் புதிதாக ஒரு பிரச்னை​யைக் கிளப்பினார்முருகேசன். 'மேலூர் பகுதிகளில் உள்ள கண்மாய், கால்வாய்களை கிரானைட் புள்ளிகள் ஆக்கிரமித்து விட்டார்கள்’ என்று அரசுக்கு ஆதாரங்​களுடன் புகார் அனுப்பி னார். இதை விசாரிக்கும்படி டி.ஆர்.ஓ-வுக்கு உத்தரவிட்டார் காமராஜ். டி.ஆர்.ஓ-வும் கள விசாரணை நடத்தி, கண்மாய், கால்வாய்களில் உள்ள ஆக்கிரமிப்புகளை உறுதி செய்து கலெக்டருக்கு அறிக்கை கொடுத்தார். இதையடுத்து நடந்த 'கவனிப்பு’களில் கவிழ்ந்துபோன காமராஜ், டி.ஆர்.ஓ. கொடுத்த புகாரைக் கடாசிவிட்டு, 'கண்மாய்களோ, கால்வாய்களோ, குவாரிகளால் ஆக்கிரமிக்கப் படவில்லை’ என்று உண்மையை மறைத்து அரசுக்கு அறிக்கை கொடுத்தார். அந்த அறிக்கைதான் இப்போது காமராஜைக் காவு கேட்கிறது. இந்த விஷயத்தில் இவருக்கு உறுதுணையாக இருந்த கனிம வளத் துறை துணை இயக்குநர் ராஜாராம், மேலூர் தாசில்தார் (இப்போது சிவகங்கை மாவட்ட சமூகப் பாதுகாப்புத் திட்ட சிறப்பு துணை கலெக்டர்) சுப்பு, பொதுப் பணித் துறை உதவி செயற்பொறியாளர் (இப்போது பரமக்குடி செயற்பொறியாளர்) ராமச்சந்திரன் மற்றும் பி.ஆர்.பி. உள்ளிட்டவர்கள் மீது வழக்குப் பதிவு செய்திருக்கிறது விஜிலென்ஸ்.

ரெய்டில் சிக்கிய மூன்று வி.ஏ.ஓ-க்களையும் மதுரை கலெக்டர் ஏற்கெனவே சஸ்பெண்ட் செய்திருக்​கிறார். மேலூர் தாலுக்கா அலுவலகத்தில் இருந்த முக்கிய ஆவணங்கள் மாயமாகிவிட்டதாகவும் தேடி வருகிறார்கள். ரெய்டின்போது அதில் மூன்றில் ஒரு பங்கு ஆவணங்களை வி.ஏ.ஓ-க்கள் வீடுகளில் இருந்து கைப்பற்றி இருக்கிறார்கள். 38 இடங்களில் நடந்த ரெய்டுகளில் சுமார் 500 ஆவணங்கள் சிக்கி இருக்கின்றனவாம். அதிகப்பட்சமாக, திருச்சியில் உள்ள முன்னாள் கனிம வளத் துறை அதிகாரி ஜெயக்குமாரின் வீட்டில் இருந்து 14 லட்ச ரூபாய் பணமாகக் கைப்பற்றப்பட்டதாம். கிட்டத்தட்ட மூன்று வாரங்கள் விசாரணைக்குப் பிறகுதான், இந்த மெகா ரெய்டை நடத்தி முடித்திருக்கிறார்கள்'' என்கிறார்கள். அடுத்ததாக, கிரானைட் புள்ளிகளுக்கு சலுகை காட்டிய போலீஸ் அதிகாரிகள் பட்டியல் ஒன்றும் லஞ்ச ஒழிப்புத் துறையினரின் கைக்கு வந்திருக் கிறதாம். ஆக, கூடிய விரைவில் காக்கிகள் வட்டாரமும் கதறும்!

- குள.சண்முகசுந்தரம்

  படங்கள்: எஸ்.கிருஷ்ணமூர்த்தி, சொ.பாலசுப்பிரமணியம்  

 போலீஸுக்கு வந்த போன்!

''கிரானைட் லஞ்சப்பணம் பெரும்பாலும் கைமாறியது திருச்சி பட்டறையில் வைத்துதான்'' என்று சிலர் அதிரடி வாக்குமூலம் கொடுத்து இருக்கிறார்கள்!

தமிழக அரசின் கனிமவளத் துறையின் மதுரை உதவி இயக்குநராக பணிபுரிந்தவர், ஜெயக்குமார். ரிட்டயர்டு ஆன இவரின் திருச்சி வீட்டில் ரெய்டு நடந்தது. அப்போது, போலீஸுக்கு வந்த ஒரு போன் தகவல் திடுக்கிட வைத்ததாம்.

'கிரானைட் அதிகாரிகளின் ஹஃப் ஒன்று திருச்சியில் இருக்கிறதே தெரியுமா? தமிழகத்தின் முக்கிய ஊர்களில் பணிபுரியும் இந்தத்துறையின் அதிகாரிகள் சிலர் வீடு வாங்கி குடியிருப்பது திருச்சி கே.கே.நகர் ஏரியவில்தான். இதன் பின்னணியை விசாரியுங்கள். மத்திய பேருந்து நிலையத்துக்கு அருகே லாரி சர்வீஸ் செய்யும் ஒரு பட்டறை ஒன்று உள்ளது. கொஞ்ச காலத்துக்கு முன்பு, தினமும் ராத்திரி ஏழு மணிக்கு மேல் அந்த பட்டறை படு பிஸியாக இருக்கும். கிரானைட் கான்ட்ராக்டர்களில் ஆரம்பித்து முக்கிய உயர் அதிகாரிகள் அனைவரும் வெளியூரில் இருந்து அங்கே வருவார்கள். சூட்கேஸ்கள் அங்கேதான் கை மாறும். ஆர்டர்களும் தரப்படும். இப்போது அந்தப் பட்டறையின் ஒரு பக்கம் இடிக்கப்பட்டதால், சின்ன இடம்தான் இருக்கிறது. இந்த கைமாறல் விஷயங்களுக்காகவே இதே ஊரில் இடம் வாங்கி சில அதிகாரிகள் குடியேறினார்கள். போய் அவர்கள் வீடுகளை பாரும்' என்றதாம் அந்தக் குரல்.

ஜெயக்குமாரின் 25 வருட திருமண தின கொண்டாட்டத்துக்கு பி.ஆர்.பி. வந்தது பற்றி சில ஆதாரங்கள் லஞ்ச ஒழிப்பு போலீஸாரிடம் சிக்கியுள்ளதாம். ஒரு தாம்பாளத்தில் பணம். அதன் மீது தங்க நாணயங்கள் வைத்து மண மக்களை வாழ்த்தி அன்பளிப்பை தந்தாராம் பி.ஆர்.பி.!

மலை முழுங்கி மனோகரன்!

டாமினின் உயர் அதிகாரியாகப் பணிபுரிந்த மனோகரமான அதிகாரியை பற்றி கழுகார் 'பாக்ஸ்' செய்தியில் எழுதி இருந்தார். படு டாம்பீகமான வாழ்க்கை வாழ்ந்த அவரின் பெயர் மனோகரன். இவரது வீடு சென்னை அண்ணாநகர் 13-வது மெயின் ரோட்டில் உள்ளது. கடந்த 15 ஆண்டுகளாக டாமின் நிறுவனத்தில் கொடி கட்டி பறந்திருக்கிறார். இவர் வைத்ததுதான் சட்டமாம். இவரைப் பற்றி இதுவரை 23 பேர் புகார்கள் கொடுத்திருந்தார்கள். ஆனால் எதன் மீதும் நடவடிக்கை இல்லை. அந்த அளவுக்கு பவர்ஃபுல்!

பி.ஆர்.பி. விவகாரத்தை விசாரிக்கும் விசாரணை அதிகாரிகள் டாமின் நிறுவன உயர் அதிகாரிகளிடம், 'சுமார் 60 குவாரிகள் கோர்ட்டில் 'ஸ்டே' வாங்கிய நிலையில் தங்களின் வழக்கமான வேலையை கவனித்து வந்தார்களே? அந்த 'ஸ்டே'வை உடைக்காமல் என்ன செய்துகொண்டிருந்தீர்கள்? என்று கேட்டதற்கு, அதிகாரிகள் சுட்டிக்காட்டிய ஒரே நபர் மனோகரன்.

கான்ட்ராக்ட்( ஆர்.சி.எஸ்), மெட்டீரியல்ஸ் சேல்ஸ், கற்களை திருடுவது... இப்படி ஒவ்வொன்றுக்கும் தனித்தனி கமிஷன்கள் வாங்கப்பட்டதாம். இவை எப்படி கைமாறியது என்று அதிகாரிகள் லெவலில் விசாரிக்கும் போது, மனோகரன் ரூட்டில்தான் கொடுத்ததாக சொல்லியிருக்கிறார்கள். சில கிரானைட் புள்ளிகள் மனோகரனின் ரூட் இல்லாமல் வேறு ஏதாவது புது ரூட்டைப் பிடித்து காரியத்தை சாதிப்பார்களாம். அப்படிப்பட்டவர்களை பழிவாங்கும் விதமாக, கீழ்மட்ட அதிகாரிகளை ஏவி தினம் ஒரு டார்ச்சர் கொடுத்து தொழிலை விட்டே தெறித்து ஓடும்படி செய்வதில் கில்லாடியாம். மனோகரனின் வீட்டு திருமண நிகழ்ச்சியின்போது எடுக்கப்பட்ட வீடியோ மற்றும் புகைப்பட ஆதாரங்களை தற்போது கிளறிக்கொண்டிருக்கிறார்கள். 50 எல். மதிப்புள்ள அன்பளிப்புகளை பி.ஆர்.பி. தரப்பினர் திருமணத்தின் போது தந்ததாக புகார் போயிருக்கிறது!

சிலமாதங்களுக்கு முன்பு, மனோகரன் ரிட்டயர்டு ஆகவேண்டிய காலகட்டம் வந்தது! சென்னை தலைமைச் செயலக உயர் அதிகாரி ஒருவருக்கு போன். மறுமுனையில் பேசியவர், ஒரு கோட்டை பிரதிநிதி. ''சார், இங்கே ஒரு ஐ.ஏ.எஸ். அதிகாரியும், மதுரை பி.ஆர்.பி-யும் வந்து என் முன்னால உட்கார்ந்திருக்காங்க. மனோகரனுக்கு பதவி நீடிப்பு தரச் சொல்லி கேட்குறாங்க'' என்று சொல்ல... ''அந்த மனோகரன் ரிட்டயர்டு ஆகுறதே கஷ்டம். அந்த அளவுக்கு புகார்கள் இருக்கு. இந்த நிலையில, நீங்க அவருக்கு பதவி நீடிப்பு செய்யச் சொல்லுறீங்க. நீங்களும் வாங்க. நானும் வர்ரேன். நம்ம சி.எம். முன்னால உட்கார்ந்து விஷயத்தை பேசுவோம். அவுங்க என்ன சொல்கிறாங்களோ? அப்படியே பண்ணிடுவோம்'' என்றாராம். மறுமுனையில் போன் கட் ஆனது. உயர் அதிகாரி குரலை உயர்த்தி பேசியதை கேட்ட கோட்டைப் பிரதிநிதி ஆடிப்போய்விட்டாராம். அத்தோடு விடவில்லையாம் மனோகரன்! 'நான் பிறந்த தேதி வேறு. எனவே, அதன்படி, இப்போது நான் ரிட்டயர்டு ஆக வேண்டியதில்லை’ என்று புதிய கோரிக்கையை கிளப்பினாராம். கடுமையான எச்சரிக்கைக்கு பிறகு இந்த கோரிக்கை அடங்கியதாம். 'இதற்கு மேல் ஏதாவது பிரச்னையை கிளப்பினால், சஸ்பெண்டு. ஜெயில்தான்' என்று தகவல் போனதாம். அத்துடன், பெரிய கும்பிடு போட்டுவிட்டு, பிரச்னை இல்லாமல் ரிட்டயர்டு ஆகும் ஒரு விஷயத்தில் மட்டுமே கவனம் செலுத்தி வீட்டுக்குப் போனாராம்!

என்ன வகை கிரானைட் இது?

தற்போது கனிமவளத்துறையின் உதவி ஜி.எம். ஆக பணிபுரிகிறவர் புருஷோத்தமன். இவர் வீடு ஆலந்தூரில் உள்ளது. புருஷோத்தமன் அவரது மாமியார் வீட்டில்தான் வசிக்கிறாராம். அந்த வீட்டு தரையில் போடப்பட்டிருந்த கிரானைட் கற்கள் எந்த ரகத்தை சேர்ந்தவை என்று நிபுணர்கள் கண்டுபிடிக்க முடியாமல் திணறினார்களாம். புருஷோத்தமன் வீட்டில் 80 சவரன் நகை, எட்டு கிலோ வெள்ளி, சொத்து தொடர்பான பத்து டாக்குமென்ட்கள் ரெய்டில் சிக்கியதாம்!  

- கனிஷ்கா