Published:Updated:

பாய்ச்சல் ராசா... பதுங்கல் பிரதமர்!

வெளிவருமா ஜே.பி.சி-யின் அறிக்கை?

பிரீமியம் ஸ்டோரி
##~##

பூதாகரமாக வெடித்த 2ஜி ஸ்பெக்ட்ரம் விவகாரத்தில் முன்​னாள் தொலைதொடர்புத் துறை அமைச்சர் ஆ.ராசாவைக் குற்றம் சாட்டிய எதிர்க் கட்சிகள், இப்போது அவருக்கு ஆதரவாகக் களம் இறங்கிவிட்டன. 'ராசாவை மட்டும் குற்றம் சாட்டுவது சரியல்ல. பிரதமர், நிதியமைச்சர், அமைச்சரவைக் குழுத் தலைவர், பிரதமர் அலுவலக அதிகாரிகள் என மற்றவர்களுக்கு இதில் இருக்கும் பங்குகள் குறித்தும் விசாரணை நடத்த வேண்டும்’ என்று எதிர்க் கட்சிகள் நெருக்கடி கொடுக்​கின்றன. 

இந்தத் திருப்பு​முனைக்குக் காரணம், இப்போதைய அட்டர்னி ஜெனரல் ஜி.இ.வாஹன்வதி. அவர் நாடாளுமன்றக் கூட்டுக் குழு (ஜே.பி.சி.) முன்பு கூறிய குற்றச்சாட்டுதான் இதைக் கிளப்பியது. சிறப்பு நீதிமன்றத்தில் இருக்கும் வழக்கில் ஆ.ராசா மீதான புகாருக்கு வாஹன்வதியின் சாட்சியம்தான் முக்கியமானது. சட்ட நிபுணரான வாஹன்வதி 2008 ஜனவரியில் ஒப்புதல் கொடுத்த ஒரு செய்திக்குறிப்பை, தனக்கு வேண்டிய நிறுவனங்கள் பயனடையும் வகையில் ஆ.ராசா சில வரிகளைச் சேர்த்தார் என்பது குற்றச்சாட்டு. 'கூடுதலாக இடம்பெறச் செய்த அந்த வரிகள் எனக்குத் தெரியாது. அவற்றை அமைச்சராக இருந்த ஆ.ராசாவே தன் கைப்படத் திருத்திச் சேர்த்துவிட்டார்’ என்பது

பாய்ச்சல் ராசா... பதுங்கல் பிரதமர்!

வாஹன்வதியின் சாட்சியம். இதனை கடந்த பிப்ரவரி 5-ம் தேதி நாடாளுமன்றக் கூட்டுக் குழு முன்னிலையிலும் குறிப்பிட்டார்.

இவை எல்லாம் ஆ.ராசா மீதான நேரடிக் குற்றச்சாட்டாக இருக்க... அவர் கொதித்​தெழுந்தார். 'இது பொய். ஜே.பி.சி-யிடம் இந்தக் குற்றச்சாட்டுகளுக்கு நேரில் பதில் கூற, எனக்கும் வாய்ப்பளிக்க வேண்டும்’ என்று கடிதம் எழுதி​னார் ராசா. ஜே.பி.சி. தலைவர் சாக்கோ, எழுத்துபூர்வமாகப் பதில் அளிக்க மட்டும் ராசாவை அனுமதித்தார். இதையட்டி ராசாவும் கடந்த 18-ம் தேதி 17 பக்க விளக்கக் கடிதத்தை ஜே.பி.சி-க்கு அனுப்பினார்.

பாய்ச்சல் ராசா... பதுங்கல் பிரதமர்!

ஜே.பி.சி-யிடம் ஆ.ராசா அளித்த கடிதம் நமக்கும் கிடைத்தது. ''2007 டிசம்பரில் தொலைதொடர்புத் துறை அமைச்சர் என்கிற முறையில் நானும் சொலிசிட்டர் ஜெனரலாக இருந்த வாஹன்வதியும் கூடுதல் அலைக்கற்றை ஒதுக்கீடு, இரட்டைத் தொழில்நுட்ப உரிமங்கள் போன்ற விவகாரங்களோடு புதிய உரிமங்களும் அலைக்கற்றையும் எப்படி ஒதுக்கீடு செய்வது என்பது குறித்தும் முடிவு செய்தோம். இந்த முடிவுகளின்படி உருவாகப்பட்ட குறிப்புகளைக் கொண்டு, அலைக்கற்றைகளுக்கான அமைச்சரவைக் குழுத் தலைவர் பிரணாப் முகர்ஜியிடம் ஆலோசிக்கப்பட்டது. அப்போதும் வாஹன்வதி உடன் இருந்தார்.  நிலுவையில் உள்ள அலைக்கற்றைகளை எப்படி ஒதுக்கீடு செய்வது என்று அப்போது முடிவெடுக்கப்பட்டது. இந்தக் கூட்டத்தின் அடிப்படையில்தான் அமைச்சரவைக் குழுத் தலைவர் பிரணாப் முகர்ஜி ஒரு குறிப்பைத் தயாரித்து, பிரதமர் அலுவலகத்துக்கு அனுப்பினார். சொலிசிட்டர் ஜெனரல் வாஹன்வதி அளித்த குறிப்பு, அலைக்கற்றை அமைச்சரவைக் குழுத் தலைவர் பிரணாப் முகர்ஜி அளித்த குறிப்பு ஆகிய இரண்டு குறிப்புகளோடு தொலைதொடர்பு அமைச்சர் என்கிற முறையில் நானும் ஒரு குறிப்பை பிரதமர் அலுவலகத்துக்கு அனுப்பினேன். இந்தக் குறிப்புகளின் அடிப்படையில் பிரதமர் அலுவலகம் ஒப்புதல் வழங்கியது. இதன்படி முதலில் வருவோருக்கு முன்னுரிமை என்கிற கொள்கைப்படியும் நிபந்தனைகளைப் பூர்த்தி செய்வோருக்கு முதலில் உரிமங்கள் கொடுப்பது என்கிற இரு முடிவுகளும் எடுக்கப்பட்டன. இந்தக் குறிப்புகளும் ஆலோசனைக் கூட்டங்களும் வெளிப்படையாக இருப்பவை.

பிரணாப் முகர்ஜி வெளியுறவுத் துறை அமைச்சராக இருந்தபோதுதான், இந்த அமைச்சரவைக் குழுத் தலைவராகவும் இருந்தார். அவரே இந்தக் குறிப்பு​களையும் ஆலோசனைகளையும் முரளி மனோகர் ஜோஷி தலைமையில் இருந்த பொதுக் கணக்குக் குழுவில் உறுதியும் செய்துள்ளார்'' என்று கூறி இருக்கும் ராசா, ''இந்த ஃபைல்களை ஜே.பி.சி. பரிசீலனை செய்யட்டும். நானும் இந்த விவரங்களை எழுத்து​பூர்வமாக சொல்வதைவிட, நேரடியாக ஜே.பி.சி. குழு உறுப்பினர்கள் முன்னிலையில் சொல்வதின் மூலமே, இந்த விவகாரத்தை மேலும் புரியவைக்க முடியும்'' என்று விவரமாகக் கடிதம் எழுதியுள்ளார்.

இந்தத் தகவல்கள் வெளியானதை அடுத்து, பிரதமர் மன்மோகன் சிங் மற்றும் நிதியமைச்சராக இருந்த ப.சிதம்பரம் போன்றவர்களை எதிர்க் கட்சிகள் கேள்வி கேட்க நெருக்குகின்றனர். ஆ.ராசாவுக்கு ஜே.பி.சி-யில் ஆஜராக வாய்ப்பு கொடுக்க வேண்டும் என்று கோருவதோடு, பிரதமரும் நிதியமைச்சரும் ஜே.பி.சி. முன் ஆஜராகி விளக்கம் அளிக்க வேண்டும் என்றும் சொல்கின்றனர்.

2011 மார்ச் மாதம் விசாரணையைத் தொடங்கிய ஜே.பி.சி., இதுவரை 56 முறை கூடி சாட்சிகளை விசாரித்தது. விசாரணையின் வரைவு அறிக்கையை தயாரிக்கும் பணியில் ஜே.சி.பி-யின் தலைவர் பி..சி.சாக்கோ இறங்க, அதன் உறுப்பினர்கள் அதனைக் கடுமையாக எதிர்க்கின்றனர். இந்த விவகாரத்துக்காக பி.ஜே.பி. பத்திரிகையாளர் கூட்டத்தை நடத்தி, ஆ.ராசாவுக்கு அனுமதி வழங்கப்படாததைக் கண்டித்ததோடு, பிரதமர் தயங்குவது குறித்தும் கேள்வி எழுப்பியது. மன்மோகன் சிங்கோ, 'நான் ஆஜராக வேண்டிய அவசியம் இல்லை. எல்லாத் தகவல்களும் ஆவணங்களும் நாடாளுமன்றக் கூட்டுக் குழுவிடமே உள்ளது’ என்று கூறியுள்ளார்.

முரளி மனோகர் ஜோஷி (பி.ஜே.பி.) தலைமை​யிலான பொதுக் கணக்குக் குழு விசாரணையை காங்கிரஸ் போராட்டம் நடத்தி அறிக்கை வெளியாகாமல் தடுத்தது. இப்போது சாக்கோ (காங்கிரஸ்) தலைமையிலான ஜே.பி.சி-யின் அறிக்கையை பி.ஜே.பி-யே போராடித் தடுத்தாலும் ஆச்சர்யப்படுவதற்கு இல்லை.

இரண்டு பேரும் சேர்ந்து உண்மை வெளியில் வராமல் செய்துவிடுவார்கள் போல் தெரிகிறது.

- சரோஜ் கண்பத்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு