கொரோனா ஊரடங்கு காலத்தில், பரபரப்பான அரசியல் நிகழ்வுகளை மக்களிடம் விவாதப் பொருளாக்குவதில் சமூக ஊடகங்களே முக்கியப் பங்காற்றுகின்றன.

அதற்கேற்ப, அரசியல் கட்சிகளின் தகவல் தொழில்நுட்ப அணிகளும் சமூக ஊடகங்களில் தீயாகச் செயல்பட்டுவருகின்றன. இந்த நிலையில், அ.தி.மு.க தகவல் தொழில்நுட்ப அணியில் ஏராளமான பொறுப்பாளர்களை நியமித்து, ஹைடெக்காக மாற்ற எடப்பாடி பழனிசாமி உத்தரவிட்டுள்ளார். இதனால் ஐ.டி விங் நிர்வாகிகள் உற்சாகத்தில் மிதக்கின்றனர்.

நம்மிடம் பேசிய அ.தி.மு.க ஐ.டி விங் நிர்வாகி ஒருவர், ‘‘தி.மு.க-வின் ஒவ்வொரு செயலையும் அ.தி.மு.க ஐ.டி விங் விமர்சித்துவருகிறது. அ.தி.மு.க ஐ.டி விங்கை மேலும் சுறுசுறுப்பாக்க சென்னை, வேலூர், திருச்சி, கோவை, மதுரை என ஐந்து மண்டலங்களாகச் சில நாள்களுக்கு முன்னர் பிரித்தனர். அதன் பிறகு, தி.மு.க-வுக்கு இன்னும் அதிகமாகக் குடைச்சல் கொடுத்துக்கொண்டிருக்கிறோம்.

குறிப்பாக, ‘கறுப்பர் கூட்டம்’ விவகாரத்தில் பா.ஜ.க-வும் இந்து அமைப்புகளும் தீவிரமாகக் களத்தில் இறங்கிப் போராட அ.தி.மு.க ஐ.டி விங்தான் காரணம். ‘தி.மு.க ஐ.டி விங்குக்கும், கறுப்பர் கூட்ட நிர்வாகிகளுக்கும் தொடர்பு உள்ளது’ என்பதற்கான போட்டோ ஆதாரங்களை வெளியிட்டு, தி.மு.க-வைத் திணறடித்தோம். இந்த விவகாரத்தில் எங்களின் செயல்பாட்டைப் பார்த்து உற்சாகமாகி மண்டலச் செயலாளர்களைப் பாராட்டிய முதலமைச்சர், ஐ.டி விங்கை இன்னும் பலமாக்க உத்தரவிட்டுள்ளார். இதற்காக அமைச்சர்களும் மாவட்டச் செயலாளர்களும் செலவு செய்ய வேண்டும் என்றும் சொல்லியிருக்கிறார்.

தேர்தலுக்கும் ஐ.டி விங்கின் பணி முக்கியமானது என்பதால் மாவட்டம்தோறும் புதிய கிளைகளை உருவாக்கவும், தமிழகம் முழுவதும் 45,000 இளைஞர்களுக்குப் பொறுப்பாளர் பதவி வழங்கவும், கிராமப்புற இளைஞர்களுக்குத் தொழில்நுட்பப் பயிற்சியளித்து உறுப்பினராக்கவும் திட்டமிடப்பட்டுள்ளது. மாநகராட்சி, நகராட்சி, பேரூராட்சி, கிராம ஊராட்சிகளில் ஒரு வார்டுக்கு 16 உறுப்பினர்களைச் சேர்ப்பது, ஒவ்வோர் உறுப்பினரும் 20 வாட்ஸ்அப் குழுக்களில் இயங்குவது, அதன் மூலம் ஆட்சியின் நலத் திட்டங்களையும் எதிர்க்கட்சிகள் பற்றிய விமர்சனங்களையும் கொண்டுசெல்வது என்று திட்டமிட்டுள்ளோம்.

இதற்காகக் கட்சி சார்பில் முதற்கட்டமாக 25,000 ஸ்மார்ட் போன்கள் வழங்குவதுடன், இன்டர்நெட் உள்ளிட்ட செலவுக்கு மாதம் ஆயிரம் ரூபாயை ஊக்கத்தொகையாகவும் வழங்கத் திட்டமிட்டுள்ளனர். முக்கியப் பொறுப்பாளர்களுக்கு லேப்டாப்பும் வழங்கவுள்ளனர். கொரோனா ஊரடங்கு இப்படியே தொடர்ந்தால், ஐ.டி விங்தான் கட்சிக்குப் பக்கபலமாக இருக்கும். அதற்காக எவ்வளவு செலவு செய்யவும் கட்சி தயாராகிவிட்டது’’ என்றார்.

ஸ்மார்ட்போன் உள்ளிட்ட வெகுமதிகளை வழங்கும் திட்டத்தை சேலம் மாவட்டத்திலிருந்து தொடங்கி மற்ற மாவட்டங்களுக்கும் விரிவுபடுத்தவுள்ளாராம் எடப்பாடி!