Published:Updated:

இரு அவைகளும் பா.ஜ.க வசம்... ஒவ்வொன்றாக நிறைவேறப்போகின்றனவா ஆர்.எஸ்.எஸ் அஜெண்டாக்கள்?

பா.ஜ.க-வின் தாய் அமைப்பான ஆர்.எஸ்.எஸ் பல்வேறு அஜெண்டாக்களை வரிசையாக வைத்துள்ளது.

பிரீமியம் ஸ்டோரி
‘‘மாநிலங்களவையில் 101 எண்ணிக்கையைத் தொட்டுவிட்டது பா.ஜ.க கூட்டணி. இந்த எண்ணிக்கை மத்தியில் ஆளும் பா.ஜ.க அரசின் அதிகாரத்துக்கு அடுத்த வலுவான அடித்தளத்தை அமைத்துக்கொடுத்துவிட்டது’’ என்கிறார்கள் அரசியல் நோக்கர்கள்.

தற்போது மாநிலங்களவையின் மொத்த உறுப்பினர்களின் எண்ணிக்கை 245. இவர்களில் 12 உறுப்பினர்கள் குடியரசுத் தலைவர் மூலம் நேரடியாகத் தேர்வு செய்யப்படுகிறார்கள். பிற உறுப்பினர்கள் மாநிலங்களின் சட்டமன்ற உறுப்பினர்கள் மூலம் தேர்வு செய்யப்படுகிறார்கள். இதனால், மாநிலவாரியாக அதிகாரத்தில் இருக்கும் கட்சிகளே அதிக எண்ணிக்கையிலான உறுப்பினர்களை மாநிலங்களவைக்கு அனுப்ப முடியும். அந்த வகையில் இதுவரை காங்கிரஸ் மற்றும் எதிர்க்கட்சிகளின் எண்ணிக்கை ராஜ்யசபாவில் அதிகமாக இருந்தது.

நரேந்திர மோடி, அமித்ஷா
நரேந்திர மோடி, அமித்ஷா

2014-ம் ஆண்டு நடைபெற்ற நாடாளுமன்றத் தேர்தலில் மோடி தலைமையிலான பா.ஜ.க பெரும்பான்மை பலத்துடன் ஆட்சியை அமைத்தாலும், அந்தக் கட்சிக்கு மாநிலங்களவையில் பெரும்பான்மை பலம் கிடைக்கவில்லை. 2019-ல் மீண்டும் பா.ஜ.க 303 இடங்களைப் பெற்று பெரும்பான்மை பலத்தைப் பெற்றது. உள்துறை அமைச்சராகப் பொறுப்பேற்ற அமித் ஷா, ‘மாநிலங்களவையிலும் பா.ஜ.க பெரும்பான்மையை எட்டிப்பிடிக்கும்’ என்றார்.

அதற்கு அவர் கையிலெடுத்த ஆயுதம்... மாநில அரசுகளைத் தங்கள் கட்டுப்பாட்டில் கொண்டு வருதல் அல்லது மாநிலத்தில் ஆட்சியிலிருக்கும் கட்சிகளின் சட்டமன்ற உறுப்பினர்களைத் தங்கள் பக்கம் கொண்டுவருவது. 2019-ம் ஆண்டு மீண்டும் பா.ஜ.க ஆட்சிக்கு வந்த பிறகு, காஷ்மீருக்கான சிறப்பு அந்தஸ்தை ரத்து செய்தது, முத்தலாக் தடை சட்டம், குடியுரிமை திருத்தச் சட்டம் உள்ளிட்ட வற்றை துணிச்சலாகக் கொண்டுவந்ததற்குப் பின்னணியில் இருந்தது அமித் ஷாவின் வியூகம்தான்.

மாநிலங்களைவில் பா.ஜ.க கூட்டணி பெரும்பான்மை பலத்துடன் இல்லாவிட்டாலும், பிராந்தியக் கட்சிகளின் எண்ணிக்கை கணிசமாக இருந்தது. அந்தப் பிராந்தியக் கட்சிகளை பா.ஜ.க-வுக்கு ஆதரவாக வளைக்கும் பொறுப்பு அமித் ஷா வசம் ஒப்படைக்கப்பட்டது. அதன்படி அ.தி.மு.க., ஒய்.எஸ்.ஆர் காங்கிரஸ், பிஜு ஜனதாதளம் உள்ளிட்ட கட்சிகள் கைகொடுக்க, நிறைவேற்ற வேண்டிய சட்டங்களை இரு அவைகளிலும் நிறைவேற்றியது.

இரு அவைகளும் பா.ஜ.க வசம்... ஒவ்வொன்றாக நிறைவேறப்போகின்றனவா ஆர்.எஸ்.எஸ் அஜெண்டாக்கள்?

மார்ச் மாதம் இந்தியாவில் பல மாநிலங்களில் காலியாக இருந்த 55 மாநிலங்களவை உறுப்பினர்களுக்கான தேர்தல் நடைபெறவிருந்தது. அதில் 36 இடங்கள் போட்டியின்றி தேர்வு செய்யப்பட்டதால், மீதி 19 இடங்களுக்குப் போட்டி ஏற்பட்டது. ஆனால், பொது முடக்கம் காரணமாக தேர்தல் ஒத்திவைக்கப்பட்டு, ஜூன் 19-ம் தேதி நடந்தது. குஜராத், மத்தியப்பிரதேசம், ராஜஸ்தான், ஆந்திரா உட்பட ஒன்பது மாநிலங்களிலுள்ள 19 இடங்களுக்குத் தேர்தல் நடந்தது. அவற்றில் எட்டு இடங்களை பா.ஜ.க தனித்து வென்றுள்ளது.

தேசிய ஜனநாயகக் கூட்டணி மொத்தமாக 11 இடங்களில் வெற்றிபெற்றதால், மாநிலங்களவையில் அந்தக் கூட்டணியின் பலம் 101 ஆக உயர்ந்துள்ளது. ஆட்சிக்கு வந்த ஆறு ஆண்டுகளில் முதன்முறையாக ராஜ்யசபாவில் மூன்று இலக்கத்தைத் தொட்டுள்ளது பா.ஜ.க கூட்டணி. அதேநேரம் காங்கிரஸ் கூட்டணியின் பலம் 65 ஆகக் குறைந்துள்ளது.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

‘‘தற்போது நடந்து முடிந்த தேர்தலில் குஜராத் மாநிலத்தில் இரண்டு இடங்கள் மட்டுமே பா.ஜ.க-வுக்குக் கிடைக்கும் என்று எதிர்பார்க்கப்பட்டது. ஆனால், கடைசிநேர ‘பந்தயத்தில்’ பா.ஜ.க-வுக்குக் கூடுதலாக ஓர் இடம் கிடைத்துள்ளது. மத்தியப்பிரதேசத்தில் குவாலியர் அரசரான சிந்தியா பா.ஜ.க பக்கம் சாய்ந்ததால், அங்கும் பா.ஜ.க-வுக்குக் கூடுதல் இடங்கள் கிடைத்ததுடன், சிந்தியாவும் ராஜ்யசபா உறுப்பினராகத் தேர்வாகியிருக்கிறார்’’ என்கிறார்கள் அரசியல் பார்வையாளர்கள்.

‘‘மாநிலங்களவையில் மெஜாரிட்டி எண்ணிக்கை 123. அடுத்த ஆண்டு உத்தரப்பிரதேசத்தில் மட்டும் பத்து இடங்கள் காலியாகின்றன. அந்தப் பத்து இடங்களும் எங்கள் வசம் வரும். இன்னும் சில மாநிலங்களில் காலியாகும் இடங்களையும் கணக்கில் எடுத்துக்கொண்டால், மெஜாரிட்டி எண்ணிக்கையை எளிதாக எட்டிவிடுவோம்’’ என்கிறார் பா.ஜ.க டெல்லி நிர்வாகி ஒருவர்.

இப்போது பா.ஜ.க-வுடன் கூட்டணியில் இல்லையென்றாலும், அந்தக் கட்சிக்கு இணக்கமாக இருக்கிறது அ.தி.மு.க. அந்தக் கட்சிக்கு ராஜ்யசபாவில் ஒன்பது உறுப்பினர்கள் இருக்கிறார்கள். அதேபோல், பிஜு ஜனதா தளம், ஒய்.எஸ்.ஆர் காங்கிரஸ் உள்ளிட்ட கட்சிகளும் ஏற்கெனவே பா.ஜ.க-வுக்குப் பல கட்டங்களில் ஆதரவளித்துள்ளன. எனவே, இனி நினைத்த சட்டங்களை பா.ஜ.க-வால் நிறைவேற்ற முடியும்.

‘‘பா.ஜ.க-வின் தாய் அமைப்பான ஆர்.எஸ்.எஸ் பல்வேறு அஜெண்டாக்களை வரிசையாக வைத்துள்ளது. ஒரே நாடு ஒரே தேர்தல், மத்திய அரசின் அதிகார வரம்புகளை அதிகரிக்கும் திட்டம், வெளிநாட்டுக் கொள்கையில் மாற்றம் என்று சில முக்கிய சட்டத் திருத்தங்களை கொண்டுவர வேண்டும் என்று மத்திய அரசு நினைக்கிறது. அதற்கு மாநிலங்களவையில் பெரும்பான்மை இல்லை என்கிற குறை இத்தனை நாள்களாக இருந்தது. அடுத்த ஆண்டு முதல் அந்த நெருக்கடியும் இருக்காது. எனவே, இனிமேல்தான் பா.ஜ.க-வின் உண்மையான முகம் வெளியே தெரியும்’’ என்கிறார்கள் எதிர்க்கட்சியினர்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு