Published:Updated:

ஜியோ யுத்தம்! - காங்கிரஸுக்கு 2ஜி... பி.ஜே.பி-க்கு 4ஜி

ஜியோ யுத்தம்
பிரீமியம் ஸ்டோரி
ஜியோ யுத்தம்

இன்று இந்திய கிராமம்தோறும் இணையம் சென்று சேர்ந்திருக்கிறது. காரணம், ரிலையன்ஸின் `ஜியோ’!

ஜியோ யுத்தம்! - காங்கிரஸுக்கு 2ஜி... பி.ஜே.பி-க்கு 4ஜி

இன்று இந்திய கிராமம்தோறும் இணையம் சென்று சேர்ந்திருக்கிறது. காரணம், ரிலையன்ஸின் `ஜியோ’!

Published:Updated:
ஜியோ யுத்தம்
பிரீமியம் ஸ்டோரி
ஜியோ யுத்தம்

ஆரம்பத்தில் இலவசம்... பிறகு குறைந்த கட்டணங்களில் சேவைகளைத் தருவதாக அறிவித்த ஜியோ, தற்போது மற்ற டெலிகாம் நிறுவன அவுட்கோயிங் கால்களுக்கு நிமிடத்துக்கு ஆறு பைசா எனக் கட்டணம் வசூலிக்கப்போவதாக அறிவித்திருக் கிறது. ஜியோவுக்கும் மற்ற டெலிகாம் நிறுவனங்களுக்கும் இடையே நடக்கும் யுத்தமே இந்தக் கட்டணத்துக்குக் காரணம். இதன் பின்னணியில் பா.ஜ.க அரசு ஜியோவுக்கு ஆதரவாகச் செயல்படுவதாக சர்ச்சை எழுந்துள்ளது. ``கடந்த காங்கிரஸ் தலைமையிலான ஐக்கிய முற்போக்குக் கூட்டணி ஆட்சியில் ஸ்பெக்ட்ரம் 2ஜி அலைக்கற்றை ஊழல் எந்தளவுக்கு வீரியமாக எழுந்ததோ அதற்கும், தற்போது 4ஜி அலைக்கற்றையை மையமாக வைத்து பா.ஜ.க ஆட்சியில் நடப்பவற்றுக்கும் பெரிய வித்தியாசம் இல்லை’’ என்கிறார்கள் இதன் உள்விவரங்களை அறிந்தவர்கள்.

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS
விகடனின் அதிரடி ஆஃபர்!
தற்பொழுது ரூ.750 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா999 மட்டுமே! மிஸ் பண்ணிடாதீங்க!Get Offer

தற்போது ஜியோ விதித்திருக்கும் ஆறு பைசா கட்டணம் வாடிக்கையாளர்களின் தலையில் கட்டப்படும் என்பதால், நாடு முழுவதும் கோடிக்கணக்கான வாடிக்கையாளர்கள் அதிருப்தியில் இருக்கிறார்கள். தவிர, 15-க்கும் மேற்பட்ட நிறுவனங்களைக்கொண்டிருந்த இந்திய தொலைதொடர்புச் சந்தை, ஜியோவின் நெட்வொர்க் யுத்தத்தால் நான்கு நிறுவனங்களாக சுருங்கிக்கிடக்கிறது. அதேசமயம் அசுரத்தனமாக வளர்ந்துவருகிறது ஜியோ. அக்டோபர் மாதம் டிராய் (TRAI) வெளியிட்ட அறிக்கையின்படி 2019, ஆகஸ்ட் மாதம் மட்டும் 84.4 லட்சம் வாடிக்கையாளர்களைச் சேர்த்துள்ளது ஜியோ. இதில் வோடஃபோன் 49.5 லட்சம் வாடிக்கையாளர்களையும், ஏர்டெல் 5.6 லட்சம் வாடிக்கையாளர்களையும், பி.எஸ்.என்.எல் இரண்டு லட்சம் வாடிக்கையாளர்களையும் ஆகஸ்ட் மாதம் இழந்துள்ளன.

ஜியோ யுத்தம்
ஜியோ யுத்தம்

இப்படி பிற நிறுவனங்களைக் காணாமல்போகச் செய்ததன் பின்னணியில், மத்திய பா.ஜ.க அரசு ஜியோவுக்கு எப்படியெல்லாம் சாதகமாக நடந்துகொள்கிறது என்பதை வரிசையாகப் பார்போம்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

பிரச்னையின் ஆணிவேர் எங்கே?

இந்தப் பிரச்னையின் ஆணிவேர் IUC (Interconnect Usage Charge) கட்டணம்தான். ஏர்டெல் வாடிக்கையாளர் ஜியோ வாடிக்கையாளரை அழைத்தால், அந்த அழைப்பை இணைக்க ஏர்டெல் நிறுவனத்திடமிருந்து குறிப்பிட்ட தொகையை ஜியோ வசூலிக்கும். அதுபோல் ஜியோ வாடிக்கையாளர் ஏர்டெல்லுக்கு அழைத்தால், அந்த அழைப்பை இணைக்க ஜியோ நிறுவனத்திடமிருந்து குறிப்பிட்ட தொகையை ஏர்டெல் நிறுவனம் வசூலிக்கும். இதுதான் IUC கட்டணம். ஆனால், இந்தத் தொகையை முற்றிலுமாக நீக்கவேண்டும் என்கிறது ஜியோ. மற்ற நிறுவனங்களோ, இந்த நடைமுறை தொடரவேண்டும் என்கின்றன.

இன்று அழைப்புகள் அதிகம் செல்வது ஜியோவிலிருந்துதான். அதாவது, IUC கட்டணம் அதிகம் கொடுக்கும் இடத்தில் ஜியோவும், வாங்கும் இடத்தில் மற்ற நிறுவனங்களும் இருக்கின்றன. இதனால்தான் இந்தத் தொகையே வேண்டாம் என்கிறது ஜியோ. இரண்டு ஆண்டுகளுக்கு முன்பே இந்தப் பஞ்சாயத்து தொடங்கிவிட்டது. அப்போது இந்தக் கட்டணம் நிமிடத்துக்கு 14 பைசாவாக இருந்தது. மற்ற நிறுவனங்கள் `இதை 30 பைசாவாக உயர்த்த வேண்டும்’ என்று தொலைதொடர்பு ஒழுங்குமுறை ஆணையமான டிராயிடம் வலியுறுத்தின. ‘இந்தக் கட்டணமே கூடாது’ என்றது ஜியோ.

‘நெட்வொர்க் கட்டமைப்புகளுக்காக டெலிகாம் நிறுவனங்கள் செலவுசெய்த முதலீட்டைத் திரும்ப எடுக்கவே, இந்தக் கட்டணம் வசூலிக்கப்படுகிறது. ஆனால், தற்போது ஏர்டெல், வோடஃபோன் நிறுவனங்கள் தங்கள் முதலீட்டை ஏற்கெனவே பெற்ற லாபத்திலிருந்தே திரும்பப் பெற்றுவிட்டன. பிறகு ஏன் IUC கட்டணத்தை அந்த நிறுவனங்களுக்கு தொடர்ந்து செலுத்த வேண்டும்?’ என்று அப்போது கேள்வி எழுப்பியது ஜியோ. இந்த விவகாரத்தில், 14 பைசாவாக இருந்த கட்டணத்தை ஆறு பைசாவாகக் குறைத்தது டிராய். ‘பா.ஜ.க அரசின் அழுத்தங்களால் டிராய், ஜியோவுக்குச் சாதகமாக நடந்துகொள்கிறது’ என்ற குற்றச்சாட்டு எழுந்தது.

பின்னணியில் பி.ஜே.பி!

தவிர, மத்திய அரசின் உதவியுடன்தான் டெலிகாம் சந்தைக்குள்ளேயே ஜியோ வந்தது என்ற குற்றச்சாட்டும் உண்டு. 2010-ல், 2ஜி ஸ்பெக்ட்ரமுக்கான ஏலத்தில் ஏர்டெல், வோடஃபோன் டெலிகாம் நிறுவனங்கள் முட்டிமோதின. ஆனால், சத்தமே இல்லாமல் இன்ஃபோடெல் என்ற சிறு நிறுவனம் இந்தியா முழுவதும் பிராட்பேண்ட் சேவை வழங்குவதற்கான BWA ஸ்பெக்ட்ரமுக்கான உரிமத்தை, பல மடங்கு அதிக தொகை கொடுத்து வாங்கியது. இது நடந்த அடுத்த நாளே இன்ஃபோடேல் நிறுவனம், ரிலையன்ஸுக்குச் சொந்தமானது. அதற்கு ‘ஜியோ’ என்று பெயர் மாற்றியது ரிலையன்ஸ். ஜியோவுக்கு, இணைய சேவை வழங்க மட்டுமே உரிமம் வழங்கப் பட்டிருந்தது.

ஜியோ யுத்தம்
ஜியோ யுத்தம்

இது நடந்து மூன்று வருடங்களுக்குப் பிறகு, ஜியோவுக்கு வழங்கப்பட்ட BWA ஸ்பெக்ட்ரமிலேயே, அனைத்து மொபைல் சேவைகளையும் வழங்கும் உரிமையை வழங்கியது தொலைதொடர்புத் துறை அமைச்சகம். இதற்காக ஜியோ 1,658 கோடி ரூபாய் கட்டணமாகச் செலுத்தியது. ‘இது மிகவும் சொற்பத்தொகை; இதன்மூலம் 22,842 கோடி ரூபாய் பணத்தை ஜியோ மிச்சப்படுத்தி விட்டது’ என்று அப்போதே சர்ச்சை வெடித்தது. தலைமைக் கணக்குத் தணிக்கையாளர் அலுவலகமும் அப்போது, ‘இப்படி குறுக்குவழியில் வந்ததால் ஜியோவின் உரிமத்தை ரத்துசெய்ய முடியும்’ என்ற வரைவு அறிக்கையை, தொலைதொடர்புத் துறையிடம் சமர்ப்பித்தது. ஆனால், எதையும் காதில் போட்டுக்கொள்ள வில்லை தொலைதொடர்புத் துறை அமைச்சகம். ‘ஏல விதிமுறைகள், அனைவரும் பங்கேற்கும் விதத்திலேயே அமைந்திருந்தன. BWA ஸ்பெக்ட்ரமில் வாய்ஸ் சேவைகள் கொடுக்கக் கூடாது என்ற எந்தக் கட்டுப்பாடும் இல்லை’ என்று ஜியோ பக்கம் நின்றது அமைச்சகம்.

பி.எஸ்.என்.எல்-க்குக் கிடைக்காத ஆதரவு!

ஜியோ மக்களுக்குக் கிடைக்கத் தொடங்கியபோது, இந்தக் குற்றச்சாட்டுகள் மேலும் வலுவடைந்தன. ஏனெனில், ஜியோ அதிகாரபூர்வமாக சேவையைத் தொடங்கிய அன்றே 20 லட்சம் வாடிக்கையாளர்களைப் பெற்றிருந்தது. சேவைகளின் தரம் எப்படி இருக்கிறது என்பதற்கான சோதனை ஓட்டத்திலேயே இத்தனை வாடிக்கையாளர்கள்! சோதனை ஓட்டம் தொடர்பான வரைமுறைகள் தெளிவாக இல்லாதது ஜியோவுக்குச் சாதகமாகிவிட்டது என்றார்கள். பொதுவாக 90 நாள்கள் மட்டுமே நடக்கும் இதுபோன்ற சோதனை ஓட்டங்கள், ஜியோவில் சுமார் 250 நாள்கள் நடந்தது. ‘‘டெஸ்டிங் என்ற பெயரில் மொத்த வணிகத்தையுமே தொடங்கிவிட்டது ஜியோ’’ என்று 2016-ல் குற்றம்சாட்டினார் இந்திய செல்லுலார் ஆபரேட்டர் சங்கத்தின் இயக்குநர் ராஜன் மாத்யூஸ். பதிலுக்கு, ‘‘அந்தச் சங்கம் ஏர்டெல், வோடஃபோனுக்கு ஆதரவாகச் செயல்படுகிறது’’ என்றது ஜியோ.

இந்தச் சோதனை ஓட்டக் காலத்திலேயே மற்றொரு சர்ச்சையும் வெடித்தது. ஒரு டெலிகாம் சேவையை இன்னொரு டெலிகாம் சேவையுடன் இணைக்கும் இடங்களை `Points of Inter connect’ (POI) என்பர். அனைத்து நெட்வொர்க்குகளுக்கும் இடையே சரியான தொடர்பு கிடைக்க இந்த POI சரியான அளவில் இருக்க வேண்டும். ஆனால், ‘எங்களுக்கு இது சரியாகத் தரப்படவில்லை’ என்று டிராயிடம் புகார் செய்தது ஜியோ. அதற்கு ஏர்டெல், ஐடியா, வோடஃபோன் நிறுவனங்கள், ‘`ஜியோ வெறும் சோதனை ஓட்டம்தானே செய்துகொண்டிருக்கிறது. அதற்கு கூடுதல்

POI-க்கள் தேவையில்லை. தவிர, ஜியோவுக்கு நாங்கள் அதைத் தர வேண்டும் என்பதும் கட்டாயம் இல்லையே’’ என்றன. ஆனாலும், ‘இது வீதிமீறல்’ என்று கூறி, அந்த நிறுவனங்களுக்கு 3,050 கோடி ரூபாயை அபராதமாக விதிக்க மத்திய அரசுக்குப் பரிந்துரைத்தது டிராய்.

பி.எஸ்.என்.எல்-லுக்குக்கூட இத்தனை ஆதரவு தரப்படவில்லை என்பதுதான் பலரின் ஆதங்கமும்.

காணாமல்போன நிறுவனங்கள்!

கடைசியாக, ஜியோவின் விருப்பப்படியே IUC கட்டணத்தை ஆறு பைசாவாகக் குறைத்துவிட்டது டிராய். இதனால் ஜியோவைத் தவிர்த்து மற்ற நிறுவனங்கள் பெரும்நஷ்டத்தைச் சந்திக்கத் தொடங்கின. பெருவாரியான மக்கள், அவுட்கோயிங் அழைப்புகளுக்கு பெரும்பாலும் ஜியோ சிம்களையே பயன்படுத்தத் தொடங்கினர். மற்ற டெலிகாம் நிறுவன சிம்களை இன்கம்மிங் அழைப்புகளுக்கு மட்டும் வைத்திருந்தனர். இதனால் இந்த நிறுவனங்களின் ARPU (Average Revenue Per User) வருவாய் பெருமளவில் சரிந்தது. அதாவது, எந்தத் தொகையும் கட்டாமல் இந்த நிறுவனத்தின் சிம்களை பலரும் பயன்படுத்தி வந்தனர். இப்படி ஒன்றும் தராத வாடிக்கையாளர் களுக்கான நெட்வொர்க் கட்டமைப்புச் செலவுகளையும் இந்த நிறுவனங்கள் ஏற்க வேண்டியதாக இருந்தன.

இதைச் சமாளிக்க, வோடஃபோன் - ஐடியா நிறுவனங்கள் ஒரே நிறுவனமாக இணைந்தன. ஏர்செல் உள்பட பல நிறுவனங்கள் காணாமலேயேபோயின. பி.எஸ்.என்.எல் மூச்சுத்திணறி நிற்கிறது. ஊழியர்களுக்குச் சம்பளம்கூட கொடுக்க முடியவில்லை. நிலைமையைச் சமாளிக்க ஏர்டெல், வோடஃபோன் உள்ளிட்ட நிறுவனங்கள் இன்கம்மிங் அழைப்புகளுக்கு மறைமுகமாக ‘வேலிடிட்டி பேக்கேஜ்’ மூலம் பணம் வசூலிக்கத் தொடங்கின. ‘சிம் வேலிடிட்டி’க்காகவாவது ஒரு சிறு தொகையை வாடிக்கையாளர்கள் கொடுக்க வேண்டும் என்றானது. இதனால் பெரும்பாலான வாடிக்கையாளர்கள் அதிருப்தி அடைவார்கள் என்பது தெரிந்தும், வேறு வழி தெரியாமல் இந்த முடிவுக்கு அந்த நிறுவனங்கள் வந்தன. எந்தவிதமான பயனும் இல்லாமல் தங்கள் நெட்வொர்க்கில் இருப்பதைவிட, அவர்கள் வேறு நெட்வொர்க்குக்கு சென்றாலும் பரவாயில்லை என்பதே அந்த நிறுவனங்களின் மனநிலையாக இருந்தது.

தனிக்காட்டு ராஜாவான ஜியோ!

இதுவும் ஜியோவுக்குச் சாதகமாகவே அமைந்தது. ஏற்கெனவே டிராய் MNP (Mobile Number Portability) முறையை எளிமைப்படுத்தியிருந்தது. இதன்மூலம் வாடிக்கையாளர்கள் மொபைல் நம்பரை ஒரு நெட்வொர்க்கிலிருந்து மற்றொரு நெட்வொர்க்குக்கு இரண்டு, மூன்று நாள்களிலேயே மாற்றிவிட முடியும். இப்படி டெலிகாம் சந்தையில் தனிக்காட்டு ராஜாவாக இருக்க வேண்டும் என்ற கனவை நெருங்கத் தொடங்கியது ஜியோ.

ஆனால், இந்த IUC தொகை அதற்குக் குறுக்கீடாக இருந்தது. முன்பெல்லாம் டெலிகாம் நிறுவனங்களுக்கு டேட்டாவைவிட வாய்ஸ் கால்களில்தான் அதிக வருமானம் வரும். ஆனால், இன்று நிலை தலைகீழ். டேட்டாவே மெயின் பேட்டா; வாய்ஸ் இரண்டாம்பட்சம்தான். இதற்கு ஜியோ அறிமுகப்படுத்திய விலைத்திட்டங்களும் ஒரு காரணம் என்பதை மறுப்பதற்கில்லை. தவிர, டேட்டாவுக்கு பெரிய அளவில் மற்ற நிறுவனங்களைச் சார்ந்திருக்க வேண்டிய அவசியமில்லை. சொந்தமாக நல்ல கட்டமைப்பு இருந்தால் போதும். அது ஜியோவிடம் இருக்கிறது.

மிஸ்டுகால் மெஸ்மரிசம்!

ஆனால், வாய்ஸ் அப்படியல்ல. அழைப்புகள், மற்ற நிறுவன வாடிக்கையாளர்களுக்கும் செல்லலாம். வாய்ஸ் கால்களை இலவசமாகத் தரும் ஜியோ, நிமிடத்துக்கு IUC கட்டணமாக ஆறு பைசாவை மற்ற நிறுவனங்களுக்குக் கொடுப்பதை விரும்பவில்லை. மூன்று ஆண்டுகளில் சுமார் 13,500 கோடி ரூபாயை இப்படி IUC தொகையாக மற்ற நிறுவனங்களுக்குக் கொடுத்திருக்கிறது ஜியோ. இதைச் சமாளிக்க, வேறு ஓர் உத்தியை கையில் எடுத்தது அந்த நிறுவனம். அதுதான் ரிங்டைம் குறைப்பு. ஏர்டெல், வோடஃபோன் போன்ற பிற நிறுவனங்களுக்குச் செல்லும் அழைப்புகளுக்கு ஜியோவில் 20 விநாடிகள்தான் ரிங் அடிக்கும். இப்படி ரிங்டைமைக் குறைப்பதன்மூலம் பிற நெட்வொர்க் சந்தாதாரர்கள் ஜியோ வாடிக்கையாளர்களின் அழைப்புகளை எடுக்கும் வாய்ப்புகள் குறையும். பலரும் மிஸ்டுகாலைப் பார்த்துத் திருப்பி அழைப்பர். இதன்மூலம் IUC செலவு குறைவதுடன் வருமானமும் அதிகரிக்கும்.

ஜியோவின் இந்தச் செயல், மற்ற நிறுவனங்களிடம் கடும் கொதிப்பை ஏற்படுத்தியது. டிராயிடம் புகார் கொடுத்தன. அதன் பிறகு, போனால்போகட்டும் என ஐந்து விநாடிகள் மட்டும் கூட்டியது ஜியோ. இது சரிப்பட்டு வராது என்று மற்ற நிறுவனங்களும் ரிங்டைமை 25 விநாடிகளாகக் குறைத்தன. ``மற்ற நிறுவனங்களின் 2ஜி, 3ஜி சேவைகளின் விலை மிகவும் அதிகமாக இருப்பதால் அவற்றின் வாடிக்கையாளர்கள் பலரும் ஜியோ வாடிக்கையாளர்களுக்கு மிஸ்டுகாலே கொடுக்கின்றனர். ஜியோ வாடிக்கையாளர்தான் திருப்பி அழைக்கிறார்கள். ஜியோவில் நாள் ஒன்றுக்கு 25-30 கோடி மிஸ்டுகால்கள் வருகின்றன’’ என்றது ஜியோ. தொடர்ந்து அக்டோபர் 18-ம் தேதி இதுதொடர்பாக டிராய் நடத்திய கூட்டத்தில் ஏர்டெல் நிறுவனம், ‘ரிங்டைமை 45 நொடிகளாக வரையறுக்க வேண்டும்’ என்றது. வோடஃபோன் - ஐடியா நிறுவனம், ‘30 நொடிகள் வைக்கலாம் அல்லது அழைக்கப்படுகின்ற டெலிகாம் நிறுவனம் இதை நிர்ணயிக்கலாம்’ என்றது. ஆனால், ஜியோ நிறுவனமோ, ‘94 சதவிகித அழைப்புகள் 20-25 நொடிகளிலேயே ஏற்கப்பட்டுவிடுகின்றன. தவிர, உலகளவிலும் ரிங்டைம் 15-20 நொடிகள் மட்டுமே இருக்கிறது. அதிக நொடிகள் ரிங்டைம் வைப்பதால் நெட்வொர்க் வீணாகிறது’ என்று வாதடியது. இதில் இறுதி முடிவு எதுவும் எடுக்கப்படவில்லை.

இப்படி டெலிகாம் சந்தையில் ஜியோ தனிப்பெரும் சக்தியாக ஆதிக்கம் செலுத்த தொடங்கியிருப்பதை காலம்கடந்து புரிந்துகொண்டிருக்கிறது டிராய். 15-க்கும் மேற்பட்ட நிறுவனங்கள் இருந்த இந்திய தொலைதொடர்புச் சந்தையில் இன்று நான்கே நிறுவனங்கள் மட்டுமே இருக்கின்றன. இது விரைவில் இரண்டாகக்கூட ஆகலாம். அப்படியொரு நிலை வந்தால், டிராய்க்கான தேவையே இல்லாமல்போய்விடும். இதனால் IUC கட்டணத்தை 2020-க்குள் முழுவதுமாக நீக்கலாம் எனத் திட்டமிட்டிருந்த டிராய், இப்போது அதை மறுபரிசீலனை செய்துவருகிறது. அதனால்தான், ஜியோ இறுதியாக இந்த IUC கட்டணத்தை வாடிக்கையாளர்களிடம் இருந்தே பெற்றுவிடலாம் என முடிவுசெய்தது. இந்த அறிவிப்புதான் கடந்த வாரம் பெரும் விவாதங்களை உண்டாக்கியிருக்கிறது.

மூடப்பட்ட மொபைல் 
டெலிகாம் நிறுவனங்கள்!
மூடப்பட்ட மொபைல் டெலிகாம் நிறுவனங்கள்!

‘இதுவும் IUC கட்டணத்தை டிராய் நீக்கும் வரைதான். அதுவரை பொறுமை காணுங்கள்’ என்கிறது ஜியோ. IUC நீக்கப்பட வேண்டும் என்று டிராய்க்கு ஜியோ தரும் மறைமுக மிரட்டல்தான் இந்தப் புதிய திட்டம். இப்படி IUC-க்கு பணம் பெற்றால், அப்படி ஒன்று இருப்பது வாடிக்கையாளர்களுக்கும் தெரியவரும். அவ்வளவு ஏன், IUC தேவையற்றது என்ற நோக்கில்தான் ஜியோ விளம்பரமே செய்கிறது. அதை நீக்கச்சொல்லி மக்கள் டிராய்க்கு அழுத்தம் கொடுப்பார்கள் என்று நம்புகிறது ஜியோ. அப்படி நடக்கவில்லை என்றாலும் IUC தொகை வாடிக்கையாளர்களிடமிருந்து வந்துவிடும் என்பதால் லாபம்தான். இந்த IUC கட்டணங்களுக்காக சிறப்பு பேக்கேஜ்களையும் அறிவித்திருக்கிறது ஜியோ. ‘இவை அனைத்திலும் கொடுக்கும் பணத்துக்கு நிகரான டேட்டாவும் கிடைக்கும் என்பதால் கவலை வேண்டாம்’ என்கிறது ஜியோ. மற்ற நிறுவனங்களோ ‘எங்களிடம் வந்துவிடுங்கள். IUC-க்கு உங்களிடம் பணமே வாங்க மாட்டோம்’ என விளம்பரம் செய்கின்றன.

இப்போது டிராய் என்ன செய்யப்போகிறது என்பதுதான் கேள்வி!

இவர்கள் என்ன சொல்கிறார்கள்?

‘‘ஜியோவுக்கு விளம்பரத் தூதரான மோடி!’’ - செல்லப்பா, அகில இந்திய உதவி பொதுச்செயலாளர், பி.எஸ்.என்.எல் ஊழியர்கள் சங்கம்

செல்லப்பா
செல்லப்பா

``2016-ம் ஆண்டு ரிலையன்ஸ் ஜியோ ஆரம்பிக்கப்பட்டபோது, செய்தித்தாள் விளம்பரங்களில் முழுப்பக்கமும் பிரதமர் மோடியின் படம் இடம்பெற்றது. `மூன்று மாதங்களுக்கு அனைத்தும் இலவசம்!’ என்று அறிவித்த ஜியோ, அதை மேலும் மூன்று மாதங்களுக்கு நீட்டித்தது. டிராய் விதிப்படி, மூன்று மாதங்களுக்கு மட்டுமே இலவசமாகக் கொடுக்க வேண்டும். அதற்காக ஜியோ மீது எந்த நடவடிக்கையையும் டிராய் எடுக்கவில்லை. 14 பைசா என்றிருந்த IUC கட்டணத்தைக் குறைக்கும்படி பிரதமர் அலுவலகம் வரை ஜியோ முறையிட்டது. அது ஆறு பைசாவாகக் குறைக்கப்பட்டது. இலவசங்களைக் கொடுத்துவிட்டு, அதனால் ஏற்படும் நஷ்டத்தை தன் கையிலிருந்து காட்டியது ஜியோ. இலவசமாகக் கொடுத்து, மற்ற நிறுவனங்களை ஒழிக்க வேண்டும் என்பதே ஜியோவின் திட்டம்.

இதனால் பிற நிறுவனங்கள் கடும் நஷ்டத்தைச் சந்தித்தன. ஜியோவுக்கும்தான் நஷ்டம் என்றாலும், அது நஷ்டத்தைக் காட்டாமல் வங்கியிலிருந்து கடன் வாங்கிக்கொண்டே இருந்தது. தேசியமயமாக்கப்பட்ட வங்கியில் ஜியோ வாங்கியுள்ள கடன் 2,87,000 கோடி ரூபாய். ஏர்டெல் வாங்கியுள்ள கடன் 1,18,000 கோடி ரூபாய். வோடஃபோன் வாங்கியுள்ள கடன் 1,25,000 கோடி ரூபாய். பி.எஸ்.என்.எல் வாங்கியுள்ள கடன் வெறும் 20,000 கோடி ரூபாய். எத்தனை நாள்தான் பொய்க்கணக்கு காட்ட முடியும்? ஆகையால்தான், இப்போது `IUC கட்டணமாக நிமிடத்துக்கு ஆறு பைசாவை சந்தாதாரர் கொடுக்க வேண்டும்’ என்று சொல்ல ஆரம்பித்திருக்கிறது ஜியோ.

ஜியோவின் நெருக்கடிகளால் 2019, ஜூலையில் மட்டும் ஏர்டெல்லில் இருந்து 25.8 லட்சம் வாடிக்கையாளர்களும், வோடஃபோனிலிருந்து 33.9 லட்சம் வாடிக்கையாளர்களும் வெளியேறிவிட்டனர். கடந்த பல மாதங்களாக ஒவ்வொரு மாதமும் கிட்டத்தட்ட இதே அளவிலான வாடிக்கையாளர்கள் மேற்கண்ட நிறுவனங்களிலிருந்து வெளியேறி வருகின்றனர். இதன்மூலம் பல கோடி புதிய இணைப்புகள் ஜியோவுக்குப் போயுள்ளன. குறிப்பாக 2019, ஜூலை வரை மட்டுமே ஜியோவின் மொத்த இணைப்புகள் 118.9 கோடியாக உயர்ந்துள்ளன. அதேசமயம் பி.எஸ்.என்.எல்-லிலிருந்து ஒரு வாடிக்கையாளர்கூட வெளியே போகவில்லை.

நாங்கள் பல ஆண்டுகளாக பி.எஸ்.என்.எல் நிறுவனத்துக்கு 4ஜி அலைக்கற்றையைக் கேட்டு அரசிடம் போராட்டங்கள் நடத்திவருகிறோம். வழங்கவே இல்லை. ஜியோவுக்குப் போட்டியாக பி.எஸ்.என்.எல் இருக்கக் கூடாது. பி.எஸ்.என்.எல் நிறுவனத்தை காலிசெய்ய வேண்டும் என நினைக்கிறது இந்த அரசு.’’

‘‘அனைத்தும் சட்டப்படியே நடக்கின்றன!’’

மோகன்ராஜுலு, மாநிலப் பொதுச்செயலாளர், பா.ஜ.க

மோகன்ராஜுலு
மோகன்ராஜுலு

``எந்த நிறுவனத்துக்கு ஆதரவாகவும் செயல்பட வேண்டிய அவசியம் பி.ஜே.பி-க்கு இல்லை. காங்கிரஸ் ஆட்சிக்காலத்தில் எத்தனையோ தொலைதொடர்பு நிறுவனங்கள்மீது புகார்கள் எழுந்தன. அப்போது மத்திய அமைச்சர்களாக இருந்த

ப.சிதம்பரம், ஆ.ராசா உள்ளிட்ட பலரின் மீது வழக்குகள் பதியப்பட்டன. அதுபோன்ற ஒரு நிகழ்வாவது கடந்த ஐந்தாண்டு பி.ஜே.பி ஆட்சியில் நடந்தது உண்டா? எந்த நிறுவனமும் அது சிறியதோ, பெரியதோ அதன் சொந்த உழைப்பால்தான் வளர்கிறது. ஒரு நிறுவனத்தை தனிப்பட்ட முறையில் தூக்கி நிறுத்துவதோ... வீழ்த்துவதோ பி.ஜே.பி-யின் வேலை அல்ல.

ஒரு நாட்டின் தொழில் வளர்ச்சிக்கு தேவையான எல்லா உதவிகளைச் செய்வது மட்டுமே மோடி அரசின் பணி. அதன்படிதான் பாரபட்சம் இல்லாமல் தொழில் நிறுவனங்களுக்கு உதவிகள் செய்யப்பட்டுவருகின்றன. தவிர, ரிலையன்ஸ் ஜியோ நிறுவனத்துக்கு மோடி அரசுக்கும் என்ன சம்பந்தம் இருக்கிறது? அனைத்து நடவடிக்கைகளும் சட்டப்படியே நடந்திருக்கின்றன. அவற்றுக்கு எல்லாம் டிராய் மட்டுமே பொறுப்பு. டிராய் என்பது, தன்னாட்சி அமைப்பு. அப்படி இருக்கும்போது தேவையில்லாமல் எங்கள் அரசை இதில் தொடர்புபடுத்துகிறார்கள். இந்தக் குற்றச்சாட்டுகள் ஆதாரமற்றவை’’ என்றார்.

- குரு

ஒளிவுமறைவு, சட்டமீறல் எதுவும் இல்லை!

இதுகுறித்து விளக்கம் கேட்க ஜியோவை, Jio.CorporateCommunication@ril.com என்ற மின்னஞ்சலில் தொடர்புகொண்டோம். தொடர்ந்து +918754594845 என்ற எண்ணிலிருந்து ஜியோ சார்பாக செய்தித்தொடர்பாளர் ஒருவர் பேசினார் (அவர் பெயர் எதுவும் குறிப்பிடவில்லை. ஜியோ நிறுவன விதிமுறையும் அதுதான் என்றார்).

‘‘IUC தொகை வசூலிப்பதுகுறித்து நாங்கள் ஏற்கெனவே தெளிவான விளக்கம் அளித்துவிட்டோம். ரிங்டைம் விஷயத்திலும் சர்வதேச அளவில் பின்பற்றப்படும் நடைமுறைகளையே பின்பற்றுகிறோம். இதுகுறித்து குற்றம்சாட்டும் மற்ற நிறுவனங்களும், ஏன் இப்போது ரிங்டைமை குறைத்தன என யோசித்தீர்களா? மேலும், அரசு ஜியோ பக்கம் நிற்கிறது என்பதெல்லாம் போட்டி நிறுவனங்கள் கூறும் குற்றச்சாட்டுகளே தவிர, அதற்கான ஆதாரங்கள் எதுவும் இல்லை. நாங்களும் பிசினஸ்தான் செய்கிறோம். சந்தையில் பெரும்பங்கைக் கைப்பற்றவேண்டும் என்ற கனவு எங்களுக்கும் இருக்கும். டெலிகாம் சந்தையில் நாங்கள் செய்த புரட்சியை விரும்பாதவர்கள், அதனால் பாதிக்கப்பட்டவர்கள் ‘நாங்கள் மோசடி செய்துவிட்டோம்’ என்கிறார்கள். நாங்கள் இதுவரை செய்த அனைத்துமே வெளிப்படையாகவே இருக்கிறது. ஒளிவுமறைவு, சட்டமீறல் ஆகியவற்றுக்கு எங்கள் நிறுவனத்தில் இடம் இல்லை” என்றார் நிதானமாக.

என்ன காரணம்?

ஜியோவின் இந்த வருட இரண்டாவது காலாண்டு லாபம், கடந்த ஆண்டைவிட 45 சதவிகிதம் உயர்ந்துள்ளது. கடந்த வருடம் இரண்டாவது காலாண்டில் 681 கோடி ரூபாய் லாபம் பார்த்த ஜியோ, இந்த வருடம் அதே காலாண்டில் 990 கோடி ரூபாய் லாபம் பார்த்துள்ளது. ஆனால், ஒரு வாடிக்கையாளரிட மிருந்து வரும் ARPU என்னும் சராசரி வருமானம் ஏழு காலாண்டுகளாகக் குறைந்துகொண்டேவருகிறது. சரிந்துவந்த மற்ற நிறுவனங்களின் ARPU உயரத் தொடங்கியுள்ளது. IUC கட்டணத்தை வாடிக்கையாளரிடமே பெற ஜியோ முடிவுசெய்ததற்கு இதுவும் ஒரு முக்கிய காரணம்.

ஜியோவின் புகார்!

`லேண்ட்லைன் அழைப்புகளுக்கு IUC கிடையாது. ஆனால், தொழில் நிறுவனங்களின் வாடிக்கையாளர் சேவைக்கான தொடர்புகளை வழங்கும்போது லேண்ட்லைன்களுக்குமேல் இன்னொரு மொபைல் நம்பரை இணைத்து அதன் வழியாகத்தான் அழைப்புகளை இணைக்கின்றன ஏர்டெல், வோடஃபோன், பி.எஸ்.என்.எல் நிறுவனங்கள். இதனால் ஜியோ லேண்ட்லைன் அழைப்புகளுக்கும் நூற்றுக்கணக்கான கோடி ரூபாயை IUC தொகையாக நாங்கள் கொடுக்க வேண்டியிருக்கிறது’ என்று சமீபத்தில் புகார் அளித்துள்ளது ஜியோ.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism