Published:Updated:

எல்.ஐ.சி-யின் எதிர்காலம் என்னவாகும்?

ஒட்டுமொத்த விகடனுக்கும் ஒரே ஷார்ட்கட்

Use App
எல்.ஐ.சி-யின் எதிர்காலம் என்னவாகும்?
எல்.ஐ.சி-யின் எதிர்காலம் என்னவாகும்?

பொதுத்துறை நிறுவனங்களின் பங்குகளை மத்திய அரசு விற்க முற்படும்போதெல்லாம் அரசாங்கத்துக்கு ஆபத்பாந்தவனாக விளங்கியது, விளங்கிக்கொண்டிருப்பது எல்.ஐ.சி நிறுவனம்தான்.

பிரீமியம் ஸ்டோரி

பொதுத்துறை நிறுவனங் களை தனியார் மயமாக்கும் பணிகள் வேகமெடுத்துவருகின்றன. அந்த வகையில், விவாதத்துக்குரிய விஷயமாக மாறியிருக்கிறது எல்.ஐ.சி-யை தனியார் மயமாக்கும் நடவடிக்கை. அரசின் இந்த முடிவுக்கு எதிராக எல்.ஐ.சி ஊழியர்கள் போராட்டத்தில் ஈடுபட்டு வருகின்றனர்.

1956-ம் ஆண்டு ஆயுள் காப்பீட்டு நிறுவனமாக ஆரம்பிக்கப்பட்டது எல்.ஐ.சி. 2001-ம் ஆண்டில் காப்பீட்டுத் துறையில் தனியார் நிறுவனங்கள் நுழைய அனுமதி கொடுக்கப்பட்டது. மொத்தம் 21 தனியார் ஆயுள் காப்பீட்டு நிறுவனங்கள் சந்தைக்கு வந்தன. அதுவரை 100 சதவிகிதம் இருந்த எல்.ஐ.சி-யின் சந்தைப் பங்களிப்பு படிப்படியாகக் குறைந்து, இன்று பாலிசி எண்ணிக்கையில் 76 சதவிகிதத்தையும், முதல் வருடம் பிரீமியம் கணக்கீட்டில் 71 சதவிகிதத்தையும் கைவசம் வைத்திருக் கிறது. இன்றும் தனியார் காப்பீட்டு நிறுவனங்களுடன் போட்டிபோட்டுக் கொண்டு வாடிக்கையாளருக்கான சேவையை செய்துவருகிறது எல்.ஐ.சி.

எல்.ஐ.சி நிறுவனம் வாடிக்கை யாளர்களிடமிருந்து பெறும் பிரீமியம் தொகையை அரசாங்க கடன் பத்திரங்கள், தனியார் கடன் பத்திரங்கள், மியூச்சுவல் ஃபண்ட் திட்டங்கள், பங்குச்சந்தை ஆகியவற்றில் முதலீடு செய்கிறது. அதிலிருந்து கிடைக்கும் லாபத்தைவைத்து தன் வாடிக்கையாளர் களுக்கு இழப்பீடு மற்றும் போனஸ் தொகைகளை வழங்குகிறது. முதலீடுகள் தொடர்பான பெரும்பாலான முடிவுகள் எல்.ஐ.சி நிர்வாகக் குழுவின் ஆலோசனையின்படியே எடுக்கப்படுகின்றன. ஆனாலும், மத்திய அரசின் தலையீடு இல்லை என்றெல்லாம் கூறிவிட முடியாது.

காரணம், பொதுத்துறை நிறுவனங்களின் பங்குகளை மத்திய அரசு விற்க முற்படும்போதெல்லாம் அரசாங்கத்துக்கு ஆபத்பாந்தவனாக விளங்கியது, விளங்கிக்கொண்டிருப்பது எல்.ஐ.சி நிறுவனம்தான். பங்குச்சந்தையில் எப்போதெல்லாம் தள்ளாட்டம் ஏற்படுகிறதோ, அப்போதெல்லாம் எல்.ஐ.சி நிறுவனம் நுழைந்து பங்குகளை வாங்கி பங்குச்சந்தையை நிலைப்படுத்திவருகிறது. இது, அரசாங்கத்தின் அறிவுரையின்பேரிலேயே நடைபெறுகிறது. இதை வைத்துதான், ‘எல்.ஐ.சி தனியார்மயமாக்கப்பட்டு பங்குச்சந்தையில் பட்டியலிடப்பட்டாலும் அதன் நிர்வாகம் மற்றும் முதலீட்டு நடவடிக்கைகளில் வெளிப்படைத்தன்மை இருக்கும்’ என்கிறார்கள்.

அப்படி நடக்காமல்போவதற்கும் வாய்ப்பு இருக்கிறது. பங்குச் சந்தையில் பட்டியலிடப்பட்ட பல பொதுத்துறை நிறுவனங்கள், இன்றளவிலும் அரசாங்கத்தின் அறிவுறுத்தலின்பேரிலேயே பல முடிவுகளை எடுக்கின்றன. உதாரணம், இந்த நிதியாண்டில் பாரத் பெட்ரோலியம் கார்ப்பரேஷன் நிறுவனத்தின் மத்திய அரசின் பங்குகளை ஓ.என்.ஜி.சி நிறுவனத்தின்மூலம் வாங்கியதைக் குறிப்பிடலாம். இரண்டுமே பொதுத்துறை நிறுவனங்கள்தான். இப்படி, `ஒரு பொதுத்துறை நிறுவனத்தின் பங்குகளை, இன்னொரு பொதுத்துறை நிறுவனத்தின் பணத்தைக் கொண்டு வாங்கி, அரசின் வருமானத்தைப் பெருக்குவது எந்த அளவுக்கு சரி!’ என பொருளாதார வல்லுநர்களால் விமர்சிக்கப்பட்டது. இதன்மூலம் பொதுத்துறை நிறுவனப் பங்குகள் விற்பனை (Disinvestment) இலக்கை அரசாங்கம் எட்ட முயற்சி செய்வது சர்ச்சையை ஏற்படுத்தியது.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

எல்.ஐ.சி-யின் சொத்து மதிப்பு

எல்.ஐ.சி-யின் சொத்து மதிப்பு தோராயமாக 30 லட்சம் கோடி ரூபாய்க்குமேல் எனலாம். ஹெச்.டி.எஃப்.சி லைஃப் காப்பீட்டு நிறுவனம் நிர்வகிக்கும் சொத்து மதிப்பு 1.25 லட்சம் கோடி ரூபாய். அந்த நிறுவனத்தின் இன்றைய பங்குச் சந்தை மதிப்பு 1.13 லட்சம் கோடி ரூபாய். ஐ.சி.ஐ.சி.ஐ புரூடென்ஷியல் நிறுவனம் நிர்வகிக்கும் சொத்து மதிப்பு 1.6 லட்சம் கோடி ரூபாய். அந்த நிறுவனத்தின் இன்றைய பங்குச்சந்தை மதிப்பு 65,000 கோடி ரூபாய். இந்த இரண்டு தனியார் காப்பீடு நிறுவனங்களுடன் ஒப்பிட்டால், எல்.ஐ.சி-யின் பங்குச்சந்தை மதிப்பு குறைந்தது 10 லட்சம் கோடி ரூபாய் முதல் அதிகபட்சமாக 27 லட்சம் கோடி ரூபாய் வரை இருக்க வாய்ப்புண்டு. இதில் குறைந்தபட்ச அளவான 10 லட்சம் கோடியை கணக்கில் எடுத்துக் கொண்டாலும், அதில் 10 சதவிகிதப் பங்குகளை விற்றால்கூட 1 லட்சம் கோடி ரூபாய் வருவாய் கிடைக்கும்.

எல்.ஐ.சி-யின் எதிர்காலம் என்னவாகும்?
எல்.ஐ.சி-யின் எதிர்காலம் என்னவாகும்?

இதுவரை இந்தியாவில் வெளியிடப்பட்ட முதல் பொதுத்துறை நிறுவனங்களின் பங்கு வெளியீட்டில் கிடைக்கப்பட்ட அதிகபட்ச தொகை, ‘கோல் இந்தியா’ நிறுவனத்தின் வெளியீட்டில் கிடைத்த 15,200 கோடி ரூபாய். இப்போது எல்.ஐ.சி-யின் பொதுப்பங்கு வெளியீடு குறைந்தது ஐந்து சதவிகிதம் என வைத்துக்கொண்டாலும் 50,000 கோடி ரூபாய் கிடைக்கும். இதன்மூலம், பங்கு வெளியீட்டில் லாபமீட்டும் பொதுத்துறை நிறுவனம் எல்.ஐ.சி-யாகத்தான் இருக்கும். ஆனால், பங்குச்சந்தை தற்போதுள்ள நிலையில் இந்தப் பங்கு வெளியீடு வெற்றிபெறுமா என்பது விவாதப்பொருளாகியுள்ளது.

தவிர, வரும் 2020-21 நிதியாண்டுக்கான பொதுத்துறைப் பங்குகள் விற்பனை இலக்கு 2.1 லட்சம் கோடி ரூபாயாக நிர்ணயிக்கப்பட்டுள்ளது. இந்த இலக்கை எட்ட முடிந்தால்தான், நிதிப்பற்றாக்குறையை மொத்த உள்நாட்டு உற்பத்தியில் 3.5 சதவிகிதம் என்ற இலக்குக்குக் கட்டுப்படுத்த முடியும் என பொருளாதார வல்லுநர்கள் கருதுகிறார்கள்.

கேள்விக்குறியாகும் தனிநபர் வரிச்சலுகை!

கடந்த வருடம் எல்.ஐ.சி 2,660 கோடி ரூபாயை டிவிடென்ட் தொகையாக அரசுக்கு வழங்கியது. எல்.ஐ.சி தனியார்மயமாக்கப்பட்டு அதன் பங்குகள் மக்களுக்கும் விற்கப்படும்பட்சத்தில், இந்தத் தொகையை மக்களும் பெற வாய்ப்பிருக்கிறது. ஆனால், அவ்வாறு பெறப்படும் டிவிடென்ட் தொகைக்கு, டிவிடென்ட் பெறுபவர்கள் தங்கள் மொத்த வருமானத்தில் சேர்த்து கணக்கிட்டு வரி செலுத்த வேண்டும் என 2020-21ம் ஆண்டு பட்ஜெட்டில் மாற்றம் கொண்டுவரப்பட்டுள்ளது.

மேலும், எல்.ஐ.சி வழங்கும் ஒவ்வொரு பாலிசிக்கும் மத்திய அரசு உத்தரவாதம் வழங்குகிறது. இதை நீக்க வேண்டும் என சர்வதேச நிதி மையம் அறிவுறுத்தியது. ஆனால், நிதியமைச்சர் நிர்மலா சீதாராமன், ‘எல்.ஐ.சி தனியார் மயமாக்கப்பட்டாலும் எல்.ஐ.சி வழங்கும் பாலிசிகளுக்கு மத்திய அரசு தொடர்ந்து உத்தரவாதம் அளிக்கும்’ என்று கூறியுள்ளார்.

என்னவாகும் எல்.ஐ.சி-யின் எதிர்காலம்?

இந்த பட்ஜெட்டில் வருமானக் கழிவு களையும், வருமானவரி விலக்குகளையும் நீக்கிவிட்டு, தனி நபர்களுக்கான புதிய வரி விகிதம் அறிமுகப்படுத்தப்பட்டுள்ளது. `இனி வரும் ஆண்டுகளில், வருமானக் கழிவுகளை பெருவாரியாகக் குறைத்து, வரி விகிதங்களும் குறைந்த அளவில் இருக்கும்’ என்று நிதியமைச்சர் தெரிவித் துள்ளார். இவ்வாறு நீக்கப்பட்டதில் ஆயுள் காப்பீட்டு பிரீமியம் தொகையும் அடங்கும். இந்த ஆயுள் காப்பீட்டுக்கான பிரீமியம் தொகை வருமானத்தில் கழிவாக எடுத்துக்கொள்ளப்படாது என்றால், ஆயுள் காப்பீட்டு பாலிசிகளை விற்பது என்பது கடினமாகிவிடும்.

‘இனி வரும் ஆண்டுகளில், வருமானக் கழிவுகளை பெருவாரியாகக் குறைத்து, வரி விகிதங்களும் குறைந்த அளவில் இருக்கும்’ என்று நிதியமைச்சர் தெரிவித்துள்ளார்.
வி.தியாகராஜன், ஆடிட்டர்

நம்மில் பலரும் வருமான வரி சேமிப்புக்காகத்தான் ஆயுள் காப்பீடு பாலிசிகளை, அதுவும் குறிப்பாக பிப்ரவரி, மார்ச் மாதங்களில் எடுக்கிறோம். அந்த வருமான வரிச்சலுகையும் இல்லையென்றால், அந்த பாலிசிகளை ஏன் வாங்க வேண்டும் என்ற எண்ணம் பலருக்கும் தோன்ற வாய்ப்பிருக்கிறது. இது, ஆயுள் காப்பீட்டு நிறுவனங்களின் வளர்ச்சியை பாதிக்கலாம்.

இந்த நிலைமை உடனடியாக வந்துவிடாது என்றாலும், எதிர்காலத்தில் இந்தச் சிக்கலை ஆயுள் காப்பீட்டு நிறுவனங்கள் எதிர்கொள்ள வேண்டி வரும். அப்போது ஆயுள் காப்பீடுகளை மக்கள் வாங்குவதற்கு அரசாங்கம் எந்தவிதமான ஊக்க நடவடிக்கைகளை எடுக்கப்போகிறது என்று பார்க்க வேண்டும். எல்.ஐ.சி தனியார்மயமாக்கப் படுவது வெளிப்படைத்தன்மைக்காகவும் நம்பகத்தன்மைக்காகவும் என்று கூறப்பட்டாலும், லட்சக்கணக்கான எல்.ஐ.சி முகவர்களின் எதிர்ப்பைச் சமாளித்துதான் அதை பங்குச்சந்தையில் பட்டியலிட முடியும். அப்படியெனில், எல்.ஐ.சி-யின் எதிர்காலம் என்னவாகும் என்பதே நம் முன் இருக்கும் மிகப்பெரிய கேள்வி!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு