Published:Updated:

`பதவிக்காகக் கட்சிக்கு வந்தவன் அல்ல; போராளியாக வந்தவன்!' - துரைமுருகன் காட்டம்

துரைமுருகன்
துரைமுருகன்

துரைமுருகன் சார்பில் அறிக்கை ஒன்று வெளியிடப்பட்டுள்ளது. அந்த அறிக்கையில்,``சட்டமன்ற உறுப்பினர், எம்.பி பதவிகள் கிடைக்கும் என்று இந்த இயக்கத்துக்கு வந்தவன் அல்ல'' என்று குறிப்பிட்டுள்ளார்.

`தி.மு.க-வின் பொதுச் செயலாளர் பதவி கிடைக்கவில்லை என்கிற ஏக்கத்தில் தி.மு.க-வுக்குள் கலக்கத்தை உருவாக்க நான் முனைவதுபோல் வெளியான செய்தி கண்டிக்கத்தக்கது'' என்று கடுமையாக அறிக்கை ஒன்றை வெளியிட்டுள்ளார் தி.மு.க பொருளாளர் துரைமுருகன்.

துரைமுருகன் அறிக்கை
துரைமுருகன் அறிக்கை

தி.மு.க-வின் பொதுச் செயலாளராக இருந்த அன்பழகன் மறைவுக்குப் பிறகு அந்தப் பதவிக்கு தி.மு.க-வின் பொருளாளராக இருந்த துரைமுருகன் நியமிக்கப்படுவார் என்று கடந்த சில மாதங்களுக்கு முன்பு செய்திகள் வெளியானது. அதற்கு ஏற்றாற்போல் துரைமுருகன், தான் வகித்துவந்த பொருளாளர் பதவியைக் கடந்த மார்ச் மாதம் ராஜினாமா செய்தார். ஆனால், அதன்பிறகு கொரோனா தாக்கம் அதிகரித்ததால், தி.மு.க-வின் பொதுக்குழுக் கூட்டம் நடப்பதில் சிக்கல் ஏற்பட்டது. அதனால் நிர்வாகிகள் தேர்வும் தள்ளிப்போனது. இந்தநிலையில் துரைமுருகன் பொதுச் செயலாளராக வருவதற்கு தி.மு.க தலைவரின் குடும்பத்துக்குள் எதிர்ப்பு எழுவதாகவும் செய்திகள் கசிந்தது.

தி.மு.க-வின் மாதிரி வேட்பாளர் பட்டியல் - உற்சாகத்தில் உதயநிதி... உதறலில் உடன்பிறப்புகள்!

இந்தநிலையில், பொதுச் செயலாளர் தேர்வு தள்ளிவைப்பதற்கான சட்டத்திருத்தம் தொடர்பாகவும் தி.மு.க தலைவரின் சார்பில் அறிவிப்பு வெளியானது. மேலும், பொருளாளர் பதவியில் மீண்டும் துரைமுருகனே தொடருவார் என்கிற அறிவிப்பும் வெளியானது. தற்போது, தி.மு.க-வின் பொருளாளர் பதவியில் இருந்துவருகிறார் துரைமுருகன். இந்தநிலையில் பொதுச் செயலாளர் பதவி கிடைக்காத விரக்தியில் துரைமுருகன் இருப்பதாகவும், கு.க.செல்வம் போன்று துரைமுருகனும் முக்கிய முடிவு எடுப்பார் என்றும் நாளிதழ் ஒன்றில் நேற்று செய்தி வெளியானது. இது தி.மு.க வட்டாரத்தில் பெரும் சர்ச்சையை ஏற்படுத்தியது. தி.மு.க முன்னாள் தலைவர் கருணாநிதியின் நினைவுநாள் நிகழ்வு இன்று அனுசரிக்கப்பட்டு வரும் நிலையில், துரைமுருகன் குறித்த இந்தச் செய்தி தி.மு.க வட்டாரத்தில் அதிர்ச்சியை ஏற்படுத்தியது.

துரைமுருகன், ஸ்டாலின்
துரைமுருகன், ஸ்டாலின்

இதற்கு மறுப்பு தெரிவித்து துரைமுருகன் சார்பில் அறிக்கை ஒன்று வெளியிடப்பட்டுள்ளது. அந்த அறிக்கையில், ``சட்டமன்ற உறுப்பினர், எம்.பி பதவிகள் கிடைக்கும் என்றும் இந்த இயக்கத்துக்கு வந்தவன் அல்லன். அண்ணாவின் திராவிட நாடு கொள்கையைப் பார்த்து ஒரு போராளியாக, இந்த இயக்கத்துக்கு வந்தவன். நான், இதுவரை பெற்ற பதவிகள் எனக்குக் கிடைக்காமல் போய் இருந்தாலும், கட்சியின் அடிமட்ட தொண்டனாக இருந்து இருவண்ணக் கொடியைப் பிடித்துக் கொண்டு கழகத்துக்காகக் கோஷமிட்டுக்கொண்டே இருப்பவன்” என்று அந்த அறிக்கையில் காட்டமாகப் பதில் அளித்துள்ளார்.

அடுத்த கட்டுரைக்கு