Published:Updated:

வெள்ளை அறிக்கையின் கறுப்புப் பக்கங்கள்!

பி.டி.ஆர்.பழனிவேல் தியாகராஜன்
பிரீமியம் ஸ்டோரி
பி.டி.ஆர்.பழனிவேல் தியாகராஜன்

வரி இல்லாத வருவாயைப் பெருக்குவதற்கும் கடந்த அ.தி.மு.க ஆட்சியில் எந்த நடவடிக்கையும் இல்லை என்று குற்றம்சாட்டுகிறார் நிதியமைச்சர்.

வெள்ளை அறிக்கையின் கறுப்புப் பக்கங்கள்!

வரி இல்லாத வருவாயைப் பெருக்குவதற்கும் கடந்த அ.தி.மு.க ஆட்சியில் எந்த நடவடிக்கையும் இல்லை என்று குற்றம்சாட்டுகிறார் நிதியமைச்சர்.

Published:Updated:
பி.டி.ஆர்.பழனிவேல் தியாகராஜன்
பிரீமியம் ஸ்டோரி
பி.டி.ஆர்.பழனிவேல் தியாகராஜன்

தன் இரண்டு மணி நேரச் செய்தியாளர் சந்திப்பை தமிழகத்தின் பேசுபொருளாக மாற்றியிருக்கிறார் நிதியமைச்சர் பி.டி.ஆர்.பழனிவேல் தியாகராஜன். தமிழகத்தின் நிதிநிலை தொடர்பாக அவர் வெளியிட்டிருக்கும் வெள்ளை அறிக்கை, கடந்தகால அ.தி.மு.க அரசின் கறுப்புப் பக்கங்களைப் பேசுகிறது. தமிழகத்திலுள்ள ஒவ்வொரு குடும்பத்தின் மீதும் 2,63,976 ரூபாய் கடன் சுமை விழுந்திருப்பது அதிர்ச்சியளிக்கும் விஷயம். ‘எங்கே, ஏன் சறுக்கியது தமிழகத்தின் நிதிநிலை... அதை மீட்டெடுக்க என்ன செய்யப்போகிறார்கள்... இதன் மூலம் தி.மு.க அரசு மக்களுக்குச் சொல்லும் மறைமுகச் செய்தி என்ன?’ என்கிற விவாதம் சூடாகியிருக்கிறது!

2001-ல் அ.தி.மு.க ஆட்சியமைந்தபோது, அப்போது நிதியமைச்சராக இருந்த பொன்னையன், தமிழகத்தின் நிதிநிலை தொடர்பாக வெள்ளை அறிக்கை வெளியிட்டார். 20 ஆண்டுகளுக்குப் பிறகு, தற்போது பழனிவேல் தியாகராஜன் அதே போன்றதோர் அறிக்கையை வெளியிட்டிருக்கிறார். ‘வருவாய்ப் பற்றாக்குறை இல்லாமல், சமமான வரவு செலவுத் திட்டம் தயாரிக்கப்பட வேண்டும்’ என்பதை 2003-ல் நிறைவேற்றப்பட்ட நிதிநிலை பொறுப்புடைமைச் சட்டம் கூறுகிறது. ‘இதன்படிதான், தமிழகத்தின் நிதிநிலை கையாளப்பட்டதா’ என்று கேள்வி எழுப்புகிறது இந்த வெள்ளை அறிக்கை. ஒவ்வொரு துறைவாரியாகவும் வெள்ளை அறிக்கை வெளியிடலாம் என்றாலும், தமிழகத்தின் நிதித்துறைச் சார்பாக மட்டும் முதற்கட்டமாக வெள்ளை அறிக்கையைத் தயாரித்து வெளியிட்டிருக்கிறார் நிதியமைச்சர்.

வெள்ளை அறிக்கையின் கறுப்புப் பக்கங்கள்!

பணக்கார மாநிலம் டு கடன்கார மாநிலம்!

ஜெயலலிதா உயிருடன் இருந்தவரையில், மாநில மொத்த உள்நாட்டு உற்பத்தியில் ஒரு சதவிகிதத்துக்கும் கீழாக இருந்த மாநில வருவாய்ப் பற்றாக்குறை, தற்போது 3.16 சதவிகிதமாக உயர்ந்திருக்கிறது. அதேபோல, 2020-21 நிதி ஆண்டுக்கான நிதிப் பற்றாக்குறை 92,305 கோடி ரூபாயாக அதிகரித்திருக்கிறது. கடந்த மார்ச் 31-ம் தேதி நிலவரப்படி, தமிழகத்தின் கடன் சுமை 4,85,502 கோடி ரூபாய் என்கிறது வெள்ளை அறிக்கை. “இந்தியாவின் பணக்கார மாநிலங்களில் தமிழகம் ஒன்று. அதேசமயம், வெளிச்சந்தையில் அதிகமாகக் கடன் வாங்குவதிலும் முன்னணியில் இருக்கிறது தமிழ்நாடு” என்கிறார் பழனிவேல் தியாகராஜன்.

ஒரு மாநிலத்துக்குச் சொந்த வரி வருவாய், வரியில்லாத வருவாய், மத்திய அரசின் வரிப் பகிர்வு, தேசியத் திட்டங்கள் மூலம் கிடைக்கும் மானியங்கள் என நான்கு வழிகளில் நிதி வரும். இவை அனைத்திலுமே கடந்தகால அ.தி.மு.க அரசு கோட்டைவிட்டுவிட்டதாகக் கூறுகிறது வெள்ளை அறிக்கை. 2006-07 காலகட்டத்தில், மாநிலச் சொந்த வரி வருவாய் 8.48 சதவிகிதமாக இருந்த இடத்தில், தற்போது 2020-21 காலகட்டத்தில் வெறும் 5.46 சதவிகிதமே கிடைக்கிறது. 2006-07 காலகட்டத்தில், மாநில மொத்த உள்நாட்டு உற்பத்தியில் வணிக வரி மூலமாக 5.8 சதவிகிதம் கிடைத்துவந்த இடத்தில், அடுத்த 10 ஆண்டுகளில் சரிவு ஏற்பட்டு 5.08 சதவிகிதமே கிடைப்பதாகச் சொல்கிறது வெள்ளை அறிக்கை. இந்த வீழ்ச்சி ஜி.எஸ்.டி அமலாகும் முன்பே தொடங்கிவிட்டதுதான் கவலையளிக்கும் விஷயம்.

2013-14 காலகட்டத்தில், மத்திய அரசின் வரவு செலவு திட்டத்துக்கான நிதிச்சட்டத்தில், ‘வருவாய்’ என்பதன் வரையறையில் குறிப்பிடத்தக்க மாற்றம் ஏற்படுத்தப்பட்டது. இதனால், டாஸ்மாக் மீது தமிழக அரசு விதித்துவந்த மாநில ஆயத்தீர்வையில், சில மாற்றங்கள் செய்யப்பட்டன. விற்பனை மற்றும் உரிமக் கட்டணங்களின் மீதான வரிவிதிப்பு இதனால் பாதிப்படைந்தது. இதை ஈடுசெய்வதற்கு அயல்நாட்டு மதுபானங்களில் மதிப்புக் கூட்டுவரியை உயர்த்தியும், இழப்பீட்டை தமிழக அரசால் ஈடுசெய்ய முடியவில்லை. இதனால், மாநில மொத்த உள்நாட்டு உற்பத்தியில் 0.27 சதவிகிதம் இழப்பு ஏற்பட்டதாகச் சொல்கிறது வெள்ளை அறிக்கை.

பெருக்கப்படாத வருவாய் ஆதாரம்... கழுத்தை நெரிக்கும் உத்தரவாதம்!

வரி இல்லாத வருவாயைப் பெருக்குவதற்கும் கடந்த அ.தி.மு.க ஆட்சியில் எந்த நடவடிக்கையும் இல்லை என்று குற்றம்சாட்டுகிறார் நிதியமைச்சர். சுரங்கங்கள், கனிமவளத்திலிருந்து கிடைக்கும் உரிமைத் தொகை, வட்டி வரவினங்கள், அரசால் விதிக்கப்படும் கட்டணங்கள் ஆகியவற்றைப் பெருக்குவதற்கான முயற்சிகளை அ.தி.மு.க அரசு மேற்கொள்ளவில்லை என்று வெள்ளை அறிக்கையில் கூறப்பட்டுள்ளது. ‘கேரளா, குஜராத், உத்தரப்பிரதேசம் போன்ற மாநிலங்களில் வரி இல்லாத வருவாயைப் பெருக்க நடவடிக்கை எடுத்திருக்கிறார்கள். தமிழகத்தில் அதற்கான வாய்ப்புகள் இருந்தும், அதைக் கோட்டை விட்டிருக்கிறது அ.தி.மு.க’ என்று குற்றம் சாட்டுகிறார் நிதியமைச்சர்.

வரி வருவாயும் இல்லை, வருமானமும் இல்லாத சூழலில், பொதுத்துறை நிறுவனங்கள் பெற்றிருக்கும் கோடிக்கணக்கான ரூபாய் கடன்களுக்கு உத்தரவாதம் அளித்திருக்கிறது தமிழக அரசு. உதாரணத்துக்கு, மின்சார வாரியம் மற்றும் போக்குவரத்துக் கழகங்களுக்கு மட்டுமே 91,818.44 கோடி ரூபாய்க்குக் கடன் உத்தரவாதம் அளிக்கப்பட்டிருக்கிறது. இந்த உத்தரவாதங்கள் மாநில அரசின் கடன் சுமையில் ஒரு பகுதியாக இல்லை. ஆனால், இந்தப் பொதுத்துறை நிறுவனங்கள் பெற்றிருக்கும் கடன்களுக்குக் கட்டும் வட்டித் தவணை தவறும் பட்சத்தில், இந்தக் கடனுக்கு தமிழக அரசே பொறுப்பேற்க வேண்டியிருக்கும். ஏற்கெனவே 4.85 லட்சம் கோடி ரூபாய் கடனில் தத்தளிக்கும் அரசின் கழுத்தை இது கூடுதலாக நெரிக்கும்.

வெள்ளை அறிக்கையின் கறுப்புப் பக்கங்கள்!

வரிப் பங்கீட்டில் ஏமாற்றும் மத்திய அரசு!

மாநில அரசுக்கு அளிக்கப்படும் பங்கு வரி, மேல் வரி என இரண்டு இனங்களில் மத்திய அரசு வரி வசூலிக்கிறது. கடந்த சில ஆண்டுகளாக, இந்தப் பங்கு வரி விகிதாசாரம் குறைந்து, மேல் வரி இனம் அதிகரித்திருப்பதாகச் சுட்டிக்காட்டுகிறது வெள்ளை அறிக்கை. உதாரணமாக, 2017-ல் பெட்ரோல் மீது பங்கு வரி 9.48 ரூபாயாகவும், மேல் வரி 12 ரூபாயாகவும் இருந்தன. இதுவே 2020-ல் பங்கு வரி 1.40 ரூபாயாகக் குறைக்கப்பட்டு, மேல் வரி 31.50 ரூபாயாக அதிகரித்திருக்கிறது. எனவே, மாநிலத்துக்கு வர வேண்டிய வரிப்பங்கு கணிசமாகக் குறைந்துவிட்டது.

குடும்பக் கட்டுப்பாட்டுத் திட்டத்தைச் சீராகச் செயல்படுத்தி, மக்கள்தொகைக் கட்டுப்பாட்டில் முனைப்புடன் செயல்பட்ட மாநிலங்களுள் தமிழ்நாடும் ஒன்று. 2011 மக்கள்தொகைக் கணக்கெடுப்பின் அடிப்படையில், தற்போது பங்கு வரி விகிதாசாரம் நிர்ணயிக்கப்படுவதால், தமிழகத்துக்கு ஒதுக்கப்படும் நிதியளவு குறைந்துள்ளது. மத்திய அரசின் வரி வருவாயில் பீகாரின் பங்கு 2.9 சதவிகிதம். ஆனால், அந்த மாநிலத்துக்கு ஒதுக்கப்படும் வரிப் பகிர்வு 10.05 சதவிகிதம். உத்தரப்பிரதேசம் தன் பங்காக 9.04 சதவிகிதத்தை மத்திய அரசின் வரி வருவாய்க்கு அளிக்கிறது. அந்த மாநிலத்துக்கு மத்திய அரசு அளிக்கும் வரிப் பகிர்வு 17.9 சதவிகிதம். ஆனால், மத்திய அரசின் வரி வருவாய்க்கு தமிழகத்தின் பங்களிப்பாக 9.1 சதவிகிதம் செல்லும் நிலையில், வெறும் 4.07 சதவிகிதமே வரிப் பகிர்வாக மத்திய அரசிடமிருந்து கிடைக்கிறது. `குடும்பக் கட்டுப்பாடு திட்டத்தை முறையாக நிறைவேற்றிய ‘காரணத்துக்காக’ தமிழகத்தை வஞ்சிக்கிறது மத்திய அரசு. அதேபோல மேல்வரியை உயர்த்தி, பங்கு வரியைக் குறைத்து, மாநிலங்களுக்குக் கிடைக்க வேண்டிய நியாயமான வரி வருவாயைக்கூட தராமல் மத்திய அரசு ஏமாற்றுகிறது” என்கிறார்கள் நிதித்துறையின் மூத்த அதிகாரிகள்.

வெள்ளை அறிக்கையின் கறுப்புப் பக்கங்கள்!

லீக்கேஜ்தான் பிரதான பிரச்னை!

தன்னுடைய செய்தியாளர் சந்திப்பில், ஒன்றை மட்டும் அழுத்தம் திருத்தமாகச் சொன்னார் பழனிவேல் தியாகராஜன். “தமிழகத்தின் நிதிநிலை மோசமானதற்கு லீக்கேஜ்தான் பிரச்னை. யார் பயனாளர் என்பது தெரியாமலேயே, ஏறத்தாழ 1 லட்சம் கோடி ரூபாய் இப்படி வீணாகியிருக்கிறது. வருவாய் பற்றாக்குறை ஏற்பட இது ஒரு முக்கியக் காரணம்” என்றார். வருவாய் செலவினங்களில் மானியங்களுக்கான செலவினம் மட்டும் 27.06 சதவிகிதமாக உள்ளது. இந்த மானியங்களைச் சிக்கனமாக வழங்கி, லீக்கேஜைக் குறைக்க வேண்டும் என்கிறார் பழனிவேல் தியாகராஜன். “100 யூனிட் இலவச மின்சாரம் எனக்கும்தான் இருக்கிறது. என்னைப் போன்றவர்களுக்கு அது தேவையற்றது. அரசின் உதவி தேவைப்படும் மக்களுக்கு மட்டுமே நிதி செல்ல வேண்டும். பணக்காரர்களுக்கு அது போகக் கூடாது. இந்த சிஸ்டத்தைத்தான் சரிசெய்யப்போகிறோம்” என்கிறார் அவர்.

தமிழகத்தில் மாநகராட்சி, நகராட்சி, பேரூராட்சி என 664 நகர்ப்புற ஊராட்சி அமைப்புகள் உள்ளன. தமிழகத்தின் மக்கள்தொகையில் ஏறத்தாழ 50 சதவிகிதம் பேர் நகர்ப்புறங்களில்தான் வசிக்கிறார்கள். இதனால், தமிழகத்தின் மாநிலச் சொந்த வரி வருவாயில் பத்து சதவிகிதம் இந்த உள்ளாட்சி அமைப்புகளுக்கு ஒதுக்கப்படுகிறது. அப்படி நிதி ஒதுக்கியும், இந்த அமைப்புகள் சிறப்பாகச் செயல்படவில்லை என்கிறது வெள்ளை அறிக்கை. மின்சார வாரியத்துக்கு 1,259.2 கோடியும், தமிழ்நாடு குடிநீர் வடிகால் வாரியத்துக்கு 484.1 கோடி ரூபாயும் இந்த உள்ளாட்சி அமைப்புகள் கடன் வைத்திருக்கின்றன. 2008-ம் ஆண்டு முதல் நகர்ப்புற அமைப்புகளில் சொத்து வரி திருத்தப்படாததால், வரி வருவாய் குறைந்திருப்பதாகக் கூறுகிறது வெள்ளை அறிக்கை. மேலும், உள்ளாட்சித் தேர்தல் நடத்தப்படாததால், மத்திய அரசிடமிருந்து வரவேண்டிய சுமார் 2,500 கோடி ரூபாய் மானியம் தமிழகத்துக்கு வரவில்லை.

கிலோமீட்டருக்கு 59 ரூபாய் நஷ்டம்!

ஓர் அரசுப் பேருந்து 1 கி.மீ ஓடுவதற்கு 96.75 ரூபாய் செலவாகிறது. இதில் கட்டண வசூலாகக் கிடைப்பது 37.60 ரூபாய். மீதி 59.15 ரூபாய் நஷ்டம் என்கிறது வெள்ளை அறிக்கை. “போக்குவரத்துக் கழகத்துக்கு ஒரு ரூபாய் வருமானம் வந்தால், சம்பளம் மற்றும் ஓய்வூதியம் வகையில் மட்டுமே 2 ரூபாய் செலவாகிறது” என்கிறார் நிதியமைச்சர். லாபம் தரும் வழித்தடங்களைத் தனியார்களுக்குத் தாரைவார்த்தது, டீசல் விலைக்கு ஏற்ப கட்டண உயர்வு இல்லாதது, அதிக ஊழியர்கள் மற்றும் ஓய்வூதியதாரர்கள் எனப் பல பிரச்னைகளைச் சந்தித்திருக்கின்றன போக்குவரத்துக் கழகங்கள். இப்போது பெண்களுக்கு இலவசப் பயணம் அறிவித்திருப்பதால், போக்குவரத்துக் கழகங்களின் நஷ்டம் இன்னும் அதிகமாகலாம். நஷ்டத்தைக் குறைப்பதா அல்லது வாக்குறுதியிலிருந்து பின்வாங்குவதா என்பதே தி.மு.க முன் இருக்கும் சவால். விலையில்லாத் திட்டங்கள் பலவற்றிலும் இனி இந்தக் குழப்பம் ஏற்படலாம். இன்னும் பாக்கியிருக்கும் சில வாக்குறுதிகளும் இது போன்ற சிக்கல்களைச் சந்திக்கக்கூடும்.

மின்சார வாரியத்தின் கடன் சுமை மார்ச் 31-ம் தேதி நிலவரப்படி 1,34,119.94 கோடி ரூபாயாக உள்ளது. ‘வேளாண்மைத்துறைக்கு வழங்கப்படும் 18 சதவிகித மின்சாரத்துக்கு வசூல் ஏதும் செய்யப்படுவதில்லை. இதற்காக ஒரு யூனிட்டுக்கு 3.32 ரூபாய் மானியமாக வழங்கப்படுகிறது. இந்த வகையில் குறுக்கு மானியமாக 8,225 கோடி ரூபாய் வழங்கப்படுகிறது’ என்கிறது வெள்ளை அறிக்கை. மின்கட்டணம் திருத்தப்படாதது, கூடுதல் வட்டி ஆகியவற்றால் மின்சார வாரியம் தத்தளிப்பதாகக் கூறுகிறார் பழனிவேல் தியாகராஜன்.

என்ன செய்யப்போகிறது தி.மு.க அரசு?

“ஆகஸ்ட் 13-ம் தேதி சட்டமன்றத்தில் சமர்ப்பிக்கப்படும் பட்ஜெட், திருத்த பட்ஜெட்டாக இருக்கும். சிஸ்டத்தையே மாற்ற வேண்டியிருக்கிறது. இதற்காகப் பொருளாதார ஆலோசனைக்குழுவினருடன் ஆலோசித்து வருகிறோம். இந்த மாற்றங்கள் சிலருக்குக் கோபத்தை ஏற்படுத்தலாம். அதற்கெல்லாம் நான் கவலைப்படப்போவதில்லை. என்னுடைய முயற்சிகளுக்கு முதல்வர் உறுதுணையாக இருக்கிறார்” என்றார் பழனிவேல் தியாகராஜன். வரிவிதிப்பு, கட்டணம் ஆகியவை உயரலாம் என்று தெரிகிறது.

“கொடுத்த வாக்குறுதிகளை நிறைவேற்ற முடியவில்லை. தமிழகத்தின் நிதிநிலையைச் சமாளிக்க முடியாமல் தத்தளிக்கும் தி.மு.க, மொத்தப் பிரச்னைகளுக்கும் காரணம் அ.தி.மு.க-தான் என்று பழிபோடவே இந்த வெள்ளை அறிக்கையைத் தயாரிக்கிறது” என்று எதிர்க்கட்சியினர் விமர்சித்துவந்த நிலையில், “கொடுத்த வாக்குறுதிகளிலிருந்து நழுவுவதற்காக அல்ல இந்த வெள்ளை அறிக்கை. நாங்கள் பின்வாங்க மாட்டோம்” என்று உறுதிபடப் பேசியிருக்கிறார் நிதியமைச்சர்.

கடந்தகால ஆட்சியின் கறுப்புப் பக்கங்கள் என நிதியமைச்சர் முன்வைத்திருக்கும் பிரச்னைகளைச் சரிசெய்யுமா தி.மு.க? பொறுத்திருந்து பார்ப்போம்!

*****

வெள்ளை அறிக்கையின் கறுப்புப் பக்கங்கள்!

“ ‘வெள்ளை அறிக்கை’ என்ற பெயரில் அவதூறு!”

‘தேர்தல் வாக்குறுதியாக நாங்கள் கொடுத்த எதுவும் பட்ஜெட்டில் அறிவிக்கப்படாது. எனவே எதையும் எதிர்பார்க்க வேண்டாம்’ என்பதைச் சுட்டிக்காட்டவே வெள்ளை அறிக்கை வெளியிட்டிருக்கிறார்கள். பேருந்து, மின்கட்டணம் உயர வாய்ப்பிருக்கிறது. மானியங்களைக் குறைக்க வாய்ப்பிருக்கிறது. இந்தப் பழி தங்கள்மேல் விழுந்துவிடக் கூடாது என்பதற்காகத்தான் வெள்ளை அறிக்கை வெளியிடப்பட்டிருக்கிறது. கொரோனா பெருந்தொற்றுக் காலத்தில் அரசாங்கத்தை நடத்தத்தான் கடன் வாங்கப்பட்டது. ஆனால், தி.மு.க ஆட்சியில் கடனை அடைப்பதற்குக் கடன் வாங்கியிருக்கிறார்கள். 2001-06 ஆட்சிக் காலத்தில் தமிழ்நாட்டின் நிதிநிலையை அம்மா சீர்செய்ததன் பலன் அடுத்து வந்த தி.மு.க ஆட்சிக்காலத்திலும் எதிரொலித்தது. நாங்கள் அரசின் கருவூலத்தை நிரப்பிவைத்ததை வைத்து அடுத்து வந்த தி.மு.க ஆட்சியில் அவர்கள் குடும்பம் செழிப்பாக இருந்தது. 2011-ல் தமிழகத்தின் கடன் ஒரு லட்சம் கோடியாக இருந்தது. தற்போது இருக்கும் சிக்கல் கொரோனா சூழலால் வந்தது. அரசியல்ரீதியில் அதை ஒப்புக்கொள்ள மனமில்லாமல் எங்கள்மீது வீண் பழி போடுகிறார் நிதியமைச்சர். மக்களை திசைதிருப்பி எப்படியோ வாக்குகள் வாங்கி வெற்றிபெற்றுவிட்டார்கள். அது தொடர்பாக நாங்கள் கேள்வி எழுப்புவோம் என்பது தெரியும். எனவே, எங்களை எப்படிச் சமாளிப்பது எனத் தெரியாமல், முகாந்திரம் இல்லாத அவதூறுகளை வெள்ளை அறிக்கை என்ற பெயரில் சுமத்தியிருக்கிறார்கள்!”

- முன்னாள் அமைச்சர் ஜெயக்குமார்

வெள்ளை அறிக்கையின் கறுப்புப் பக்கங்கள்!

“குற்றச்சாட்டு அ.தி.மு.க மீதா... அதிகாரிகள் மீதா?”

“எளிமையாகச் சொல்ல வேண்டுமென்றால் கடன் வாங்கித்தான் அரசு இதுவரை நலத்திட்டங்களைச் செய்துவருகிறது. இனி ஏதும் நலத்திட்டங்கள் செய்ய வேண்டுமானால் அதற்காகக் கடன் வாங்க வேண்டியிருப்பதோடு, முன்னர் வாங்கிய கடனுக்குமான வட்டியையும் கட்ட வேண்டும். கடந்த அ.தி.மு.க அரசு சட்டத்துக்குப் புறம்பாக ஒரு லட்சம் கோடிக்கும் மேல் கடன் வாங்கிச் செலவு செய்திருக்கிறது என்பது வெள்ளை அறிக்கை மூலமாகத் தெரிகிறது. உணவு, மின்சாரம், போக்குவரத்து ஆகிய துறைகளுக்குக் கொடுக்கப்பட்ட மானியங்கள் மற்றும் செலவினங்கள் அதிகமாக இருக்கின்றன என்பது புலனாகிறது. கடந்த பத்து ஆண்டுகளாக வரி வசூலும் முறையாகச் செய்யவில்லை. இது அ.தி.மு.க அரசு மீது வைக்கும் குற்றச்சாட்டா அல்லது அதிகாரிகள் மீது வைக்கும் குற்றச்சாட்டா எனத் தெரியவில்லை. ஆனால், தமிழ்நாடு மிக மோசமான நிதிச் சுழலில் மாட்டியிருக்கிறது என்பது மட்டும் தெளிவாகியிருக்கிறது. `இந்த நிதி நெருக்கடியை அடுத்த ஐந்தாண்டுகளில் அரசு சரி செய்துவிடும்’ என்கிறார் நிதியமைச்சர். வாராக் கடன்களை வசூலிக்கவும், மானியங்களைக் குறைக்கவும் அரசின் திட்டங்கள் சரியான நபர்களுக்குச் சென்று சேருவதை முறைப்படுத்தவும் வாய்ப்பு இருப்பதாகவும் தெரிகிறது. மற்றபடி இந்த வெள்ளை அறிக்கையில் புதிதாக எந்தத் தகவலும் இருப்பதாகத் தெரியவில்லை!’’

- பொருளாதார நிபுணர் ஆனந்த் சீனிவாசன்

வெள்ளை அறிக்கையின் கறுப்புப் பக்கங்கள்!

“மத்திய அரசுதான் நிதி நெருக்கடிக்குக் காரணம்!”

“இந்த வெள்ளை அறிக்கையை வரவேற்கிறேன். மாநில அரசின் வருமானம் மிகப்பெரிய அளவில் பலவீனமடைந்திருக்கிறது என்பதை இந்த அறிக்கையின் மூலம் அறிய முடிகிறது. தற்போதிருக்கும் நிதி நெருக்கடிக்கு, முந்தைய அரசின் நிர்வாகத்திறன் இன்மை முக்கியக் காரணம் என்றாலும், மத்திய அரசின் நிதிக் கொள்கைதான் தமிழ்நாட்டின் கடன் அதிகரித்ததற்கு மிக முக்கியக் காரணம். பண மதிப்பிழப்பு, ஜி.எஸ்.டி மூலம் மட்டுமல்லாமல், நேரடியாக வரி விதிக்கும் உரிமையைப் பறித்தது, பெருநிறுவனங்களுக்கு மத்திய அரசு அளித்த வரிச் சலுகைகளும் மாநில அரசின் வருவாயைக் கடுமையாக பாதித்திருக்கின்றன. ஏற்கெனவே குறிப்பிட்ட தொகையை மக்கள் மறைமுக வரியாகச் செலுத்திக்கொண்டிருக்கும் சூழலில், தற்போது வெளியாகியிருக்கும் வெள்ளை அறிக்கையும் மக்களுக்கு அச்சுறுத்தும் சில வரி யோசனைகளைக் கொண்டிருப்பதுபோல இருக்கிறது. மாநில நிதி நிலைமையைச் சீர்செய்ய இந்த வரி விதிப்பு தேவைதான். என்றாலும், சாமானிய மக்கள் பாதிக்காத வகையில் அதைச் செயல்படுத்த வேண்டும்!”

- பொருளாதார நிபுணர் வெங்கடேஷ் ஆத்ரேயா

நிதியமைச்சர் மூக்கை நுழைக்கிறார்!

வெள்ளை அறிக்கை வெளியீட்டின்போது பழனிவேல் தியாகராஜன், “ஒவ்வொரு துறையிலும் இருக்கும் பிரச்னைகளை அந்தந்தத் துறை அமைச்சர்களிடம் சுட்டிக்காட்டியிருக்கிறேன். முதல்வருடன் கலந்தாலோசித்து பிரச்னைகளுக்குத் தீர்வுகாணவும், தேவை ஏற்பட்டால் நானும் ஆலோசனை வழங்குவதாகவும் கூறியிருக்கிறேன்” எனப் பேசியிருப்பது, தேவையில்லாமல் தங்களது துறை விவகாரங்களில் நிதியமைச்சர் மூக்கை நுழைக்கிறார் என மற்ற துறை அமைச்சர்களை முணுமுணுக்க வைத்திருக்கிறது!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism