Published:Updated:

“பழனிவேல் தியாகராஜன் எங்களை ஏளனமாகப் பேசுகிறார்!”

அரசு ஊழியர் அமைப்புகள்
பிரீமியம் ஸ்டோரி
அரசு ஊழியர் அமைப்புகள்

முதல்வர் தலையிடக் கோரும் அரசு ஊழியர் அமைப்புகள்...

“பழனிவேல் தியாகராஜன் எங்களை ஏளனமாகப் பேசுகிறார்!”

முதல்வர் தலையிடக் கோரும் அரசு ஊழியர் அமைப்புகள்...

Published:Updated:
அரசு ஊழியர் அமைப்புகள்
பிரீமியம் ஸ்டோரி
அரசு ஊழியர் அமைப்புகள்

கடந்த சட்டமன்றத் தேர்தலின்போது, ‘தி.மு.க அரசு அமைய வேண்டும்’ என்று குரல் கொடுத்த கணிசமான அரசு ஊழியர்களும் ஆசிரியர்களும் தி.மு.க ஆட்சி அமைந்து மூன்று மாதங்கள் மட்டுமே நிறைவடைந்துள்ள நிலையில், அரசுக்கு எதிராகப் போர்க்கொடி தூக்கியிருக்கிறார்கள். அகவிலைப்படி, சம்பளம், ஓய்வூதியம் ஆகியவை குறித்து நிதியமைச்சர் பி.டி.ஆர்.பழனிவேல் தியாகராஜன் வெளியிட்ட கருத்துகளே அரசு ஊழியர்களின் கோபத்துக்குக் காரணம்.

‘புதிய ஓய்வூதியத் திட்டம் ரத்து செய்யப்படும்; பழைய ஓய்வூதியத் திட்டம் கொண்டுவரப்படும்’ என்று அ.தி.மு.க அளித்த தேர்தல் வாக்குறுதியை நிறைவேற்ற வேண்டும் என அரசு ஊழியர்களும் ஆசிரியர்களும் ஏராளமான போராட்டங்களை நடத்தினார்கள். கைது, பணியிட மாற்றம், சலுகைகள் ரத்து என அ.தி.மு.க அரசு போராட்டத்தில் ஈடுபட்டவர்களை ஒடுக்கியது. அதனால், அ.தி.மு.க அரசு மீது கடும் கோபத்தில் இருந்த அரசு ஊழியர்களும் ஆசிரியர்களும் 2021 சட்டமன்றத் தேர்தலில் தி.மு.க-வின் வெற்றியை ஆவலுடன் எதிர்பார்த்தனர். தி.மு.க-வும் வெற்றிபெற்றது. ஆனால், தி.மு.க ஆட்சிக்கு வந்து 100 நாள்கள் கடந்தநிலையில், அரசு ஊழியர்களும் ஆசிரியர்களும் அரசுக்கு எதிராகத் திரும்பியிருக்கிறார்கள்.

“பழனிவேல் தியாகராஜன் எங்களை ஏளனமாகப் பேசுகிறார்!”

‘அரசு ஊழியர்களையும் ஆசிரியர்களையும் மக்கள் விரோதிகள்போல சித்திரித்துவரும் நிதியமைச்சர் பி.டி.ஆர்.பழனிவேல் தியாகராஜனை வன்மையாகக் கண்டிக்கிறோம். தமிழகத்தில் ஆட்சி மாற்றம் கண்டு அரசு ஊழியர்களும் ஆசிரியர்களும் நெஞ்சம் நெகிழத் தேவையில்லை. வஞ்சம் இன்னும் மாறவில்லை’ என்று தமிழ்நாடு அரசு ஊழியர் சங்கம் காட்டமான அறிக்கையை வெளியிட்டுள்ளது. ஜாக்டோ - ஜியோ கூட்டமைப்பும், ‘நிதியமைச்சரின் இந்தப் போக்கு அரசுக்கும் அரசு ஊழியர்களுக்கும் இடையிலான நல்லுறவில் விரிசலை உண்டாக்கும்’ என்று அறிவித்துள்ளது.

சமீபத்தில் பி.டி.ஆர்.பழனிவேல் தியாகராஜன் அளித்த பேட்டியில், “விலைவாசி உயரும்போது அதை ஈடுகட்டுவதற்காக அரசு ஊழியர்களுக்கும் ஆசிரியர்களுக்கும் அகவிலைப்படி வழங்கப்படுகிறது. ஆனால், கொரோனா ஊரடங்கால் தற்போது பலரும் சாப்பாட்டுக்குக் கூட பணமில்லாமல் தவிக்கிறார்கள். கணவனை இழந்தோருக்கான ஓய்வூதியம், முதியோர் ஓய்வூதியம் பலருக்குக் கொடுக்க வேண்டியிருக்கிறது. ஒரு ரூபாய் செலவு செய்தால் 60 - 65 பைசா அரசு ஊழியர் சம்பளம் மற்றும் ஓய்வூதியத்துக்குப் போகிறது. இதைச் சேமித்தால் 4,000 கோடி ரூபாய் மிச்சமாகும். பழைய ஓய்வூதியத் திட்டத்தை அமல்படுத்தினால், அடுத்த பத்தாண்டுகளில் அரசின் ஒட்டுமொத்த வருவாயும் அரசு ஊழியர்களின் சம்பளத்துக்கும் ஓய்வூதியத்துக்குமே போய்விடும்” என்று குறிப்பிட்டார்.

“பழனிவேல் தியாகராஜன் எங்களை ஏளனமாகப் பேசுகிறார்!”
“பழனிவேல் தியாகராஜன் எங்களை ஏளனமாகப் பேசுகிறார்!”

அமைச்சரின் இந்தப் பேச்சுக்கு கண்டனம் தெரிவிக்கும் தமிழ்நாடு அரசு ஊழியர் சங்கத்தின் பொதுச்செயலாளர் ஆ.செல்வம், “முந்தைய ஆட்சியாளர்கள்தான் எங்களை அழைத்துப் பேசக்கூட இல்லை. தி.மு.க ஆட்சிக்கு வந்தால் எங்கள் கோரிக்கைகள் நிறைவேற்றப்படும் என்று எதிர்பார்த்தோம். ஆனால், எங்களது கோரிக்கைகள் பட்ஜெட்டில் புறக்கணிப்பட்டுள்ளன.

கடந்த ஒன்றரை ஆண்டுகளில் அகவிலைப்படி, சரண்டர் விடுப்பு, பி.எஃப் வட்டி குறைப்பு என பல்லாயிரம் கோடி ரூபாயை இழந்திருக்கிறோம். இந்தநிலையில், பட்ஜெட்டில் அகவிலைப்படியை மிகவும் எதிர்பார்த்திருந்தோம். ஆனால், ‘அடுத்த ஆண்டு ஏப்ரல் மாதம்தான் அகவிலைப்படி வழங்கப்படும்’ என்று நிதியமைச்சர் அறிவித்திருக்கிறார். இதுமட்டுமல்ல... நிதியமைச்சர் எங்களை ஏளனமாகப் பேசுவதுதான் வேதனையாக இருக்கிறது. ஒருமுறை ஜெயலலிதா, ‘அரசு வருமானத்தில் 94 சதவிகிதம் அரசு ஊழியர்களின் சம்பளத்துக்கும் ஓய்வூதியத்துக்குமே போகிறது’ என்று கூறினார். அது தவறான கருத்து என்று குறிப்பிட்ட அப்போதைய எதிர்க்கட்சித் தலைவர் கருணாநிதி, ‘அரசாங்கத்தின் அச்சாணியாகச் செயல்படுபவர்கள் அரசு ஊழியர்கள். அவர்களுக்குச் சம்பளம் கொடுப்பதால்தான் அரசு எந்திரம் செயல்படுகிறது; மக்கள் நலத்திட்டங்கள் மக்களைச் சென்றடைகின்றன’ என்று கூறினார். ஆனால், கருணாநிதியின் வழிவந்த ஸ்டாலினின் ஆட்சியில் ஜெயலலிதாவைப்போலவே பேசுகிறார் நிதியமைச்சர். அன்றைக்கு கருணாநிதி சொன்னதை இவர் முதலில் புரிந்துகொள்ள வேண்டும்” என்றார் காட்டமாக.

ஜேக்டோ - ஜியோ கூட்டமைப்பின் ஒருங்கிணைப்பாளர் வெங்கடேசனோ, “ஒரு ரூபாயில் 19 பைசா அரசு ஊழியர்களின் ஊதியத்துக்காகவும், 8 பைசா ஓய்வூதியத்துக்காகவும் செலவிடப்படுகிறது என்று நிதிநிலை அறிக்கையில் தெரிவித்துவிட்டு, ஒரு தொலைக்காட்சிப் பேட்டியில் ஒரு ரூபாயில் 65 பைசா ஊதியம் மற்றும் ஓய்வூதியத்துக்காகச் செலவிடப்படுகிறது என்று தவறான புள்ளிவிவரங்களைக் கூறுகிறார் நிதியமைச்சர். அவரது அணுகுமுறையே சரியில்லை. இதில் முதல்வர் தலையிட்டு தீர்வுகாண வேண்டும்” என்றார்.

வெங்கடேசன், எழிலரசன்
வெங்கடேசன், எழிலரசன்

இது குறித்து விளக்கம் பெறுவதற்காக நிதியமைச்சர் பி.டி.ஆர்.பழனிவேல் தியாகராஜனின் அலைபேசியைத் தொடர்புகொண்டோம். பலமுறை முயன்றும் நமது அழைப்பை அவர் ஏற்கவில்லை. தி.மு.க எம்.எல்.ஏ எழிலரசனிடம் இது பற்றிக் கேட்டோம். “தற்போதைய நிதிநிலை காரணமாக அகவிலைப்படியைக் கொடுக்க முடியவில்லை; நிதிநிலை சரியாகும்போது உறுதியாக அதை வழங்குவோம் என்றுதான் சட்டசபையில் நிதியமைச்சர் கூறினார். பழைய ஓய்வூதியத்தைப் பொறுத்தவரையில், தற்போதைய இக்கட்டான நிதிச் சூழலில் உடனடியாக அதைச் செயல்படுத்த முடியவில்லை. மேலும், அது தொடர்பாக நிறைய ஆய்வுகள் செய்யவேண்டியிருக்கிறது என்றுதான் நிதியமைச்சர் சொன்னார்” என்றார்.

பேசித் தீராதது எதுவுமில்லை... ஆரம்பநிலையிலேயே இந்தப் பிரச்னையைச் சீர்செய்ய வேண்டும் அரசு!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism