Published:Updated:

ஆச்சர்யமா இருக்கே... அப்படியா? - ’பாடகர்’ பாண்டியராஜன்!

மாஃபா பாண்டியராஜன்
பிரீமியம் ஸ்டோரி
மாஃபா பாண்டியராஜன்

தெரிந்த பிரபலம்... தெரியாத தகவல்

ஆச்சர்யமா இருக்கே... அப்படியா? - ’பாடகர்’ பாண்டியராஜன்!

தெரிந்த பிரபலம்... தெரியாத தகவல்

Published:Updated:
மாஃபா பாண்டியராஜன்
பிரீமியம் ஸ்டோரி
மாஃபா பாண்டியராஜன்
வெற்றிகரமான தொழிலதிபராக வலம் வந்துகொண்டிருந்த மாஃபா பாண்டியராஜன், அரசியலுக்குள்ளும் அடியெடுத்துவைத்து அமைச்சர் பதவி வரை தன்னை உயர்த்திக்கொண்டவர் என்பது எல்லோருக்கும் தெரிந்த விஷயம். ஆனால், அரசியலுக்குள் வருவதற்கு முன்னர் அவர் ஒரு தேர்ந்த மேடைப் பாடகராகவும் வலம்வந்திருக்கிறார் என்பது அவரின் அரசியல் நண்பர்களுக்கே தெரியாத ஆச்சர்யத் தகவல்!

1990 காலகட்டத்தில், கொல்கத்தாவில் பணிபுரிந்துவந்தவர், ஓய்வு நேரங்களில் நண்பர்களுடன் சேர்ந்து பொழுதுபோக்காக பாடல்களைப் பாடிவந்திருக்கிறார். பணிபுரிந்த இடத்தில், இசை ஆர்வம்மிக்க நண்பர்கள் அனைவரும் ‘Ensemble’ என்ற பெயரில், இசைக்குழுவை ஆரம்பித்து உலக மொழிகளில் பிரபலமான பல்வேறு பாடல்களை நிகழ்ச்சிகளில் பாடிவந்திருக்கிறார்கள்.

அந்தக் குழுவில் பாடகராக வலம்வந்த மாஃபா பாண்டியராஜன் ஒருகட்டத்தில், தனியாக பிஸினஸ் செய்து முதலாளியாக வளர்ந்துவிட்ட பிறகு, ஓய்வு நேரம் அரிதாகிப்போக... அவருக்குள்ளிருந்த ‘மேடைப் பாடகன்’ குளியலறையுடன் அடைபட்டுப்போனார்.

இதைப் பற்றிக் கேட்டதுமே முகமெல்லாம் மலர்ந்து ஆர்வமான பாண்டியராஜன், “என்னுடைய இளமைக்காலம் முழுவதும் வட இந்தியாவில்தான் கழிந்தது. வட இந்திய சினிமாப் பாடல்கள் மற்றும் உலக அளவில் பிரபலமான பாடல்களெல்லாம் எனக்கு அத்துப்படியாகிவிட்டன. கொல்கத்தாவில், நண்பர்களுடன் சேர்ந்து நாங்கள் ஆரம்பித்த ஆர்க்கெஸ்ட்ராவில் பாடலைவிடவும் இசைக்குத்தான் அதிக முக்கியத்துவம் இருக்கும். நண்பர்கள் அனைவரும் ஒன்றிணைந்து சேர்ந்திசை முறையில் பாடுவோம். அது ஒரு கனாக்காலம்! கூடவே ஓரளவுக்கு வாய்ப்பாட்டோடு தபேலா, சிதார் என இசைக்கருவிகளை வாசிக்கவும் கற்றுக்கொண்டேன்.

ஆச்சர்யமா இருக்கே... அப்படியா? - ’பாடகர்’ பாண்டியராஜன்!

ஆனால், அரசியலுக்கு வந்த பிறகுதான் அத்தனையும் போய்விட்டன. என்னிலிருந்து பாடகன் விலகிப்போனதில் உண்மையிலேயே வருத்தம்தான். ஆனால், கல்யாண வீடு போன்ற விசேஷ நிகழ்ச்சிகளில் கலந்துகொள்ளும்போது, கச்சேரி நடத்துபவர்களே என்னை மேடைக்கு அழைத்துப் பாடவைப்பதில், பெரும் மகிழ்ச்சியடைகிறேன். தினமும் நடைப்பயிற்சியின்போது எனக்குப் பிடித்த பாடல்களை வாய்விட்டுப் பாடியபடியேதான் நடக்கிறேன்.

பெங்காலி மொழிப் பாடல்கள் எனக்குப் பிடிக்கும். தமிழில், ‘மயக்கமா... கலக்கமா...’ , ‘இது ஒரு பொன் மாலைப் பொழுது...’ பாடல்கள் என் ஃபேவரைட். குறிப்பாக ‘சங்கராபரணம்’ பாடல்கள் எனக்கு ரொம்பவும் பிடிக்கும். சமீபத்தில் எஸ்.பி.பி மறைவுக்கு அஞ்சலி செலுத்தியபோது ‘இது ஒரு பொன்மாலைப் பொழுது’, ‘சங்கராபரணம்’ பாடல்களைப் பாடினேன்’’ என்று உணர்ச்சிவசப்பட்டவரிடம்... “உங்கள் மனைவிக்குப் பிடித்தப் பாடல் எது?” என்று கேட்டோம்.

“ ‘நான் பேச நினைப்பதெல்லாம் நீ பேச வேண்டும்... நாளோடும் பொழுதோடும் உறவாட வேண்டும், உறவாட வேண்டும்...’ பாடல் என் மனைவியின் ஃபேவரைட். அடிக்கடி இருவரும் சேர்ந்தே இந்தப் பாடலைப் பாடுவோம்’’ என்று மெலிதாக ஹம் பண்ண ஆரம்பிக்கிறார் அமைச்சர் பாண்டியராஜன்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism