‘‘தமிழக சுகாதாரத்துறை அமைச்சர் சி.விஜயபாஸ்கருக்கும் எனக்கும் பல வருடங்கள் நட்பு உள்ளது. கூவத்தூர் சம்பவத்தின்போது அவர் சொன்ன தொகைக்கு தங்கக்கட்டிகளை மாற்றிக் கொடுத்தேன். ஆனால், எனக்குத் தர வேண்டிய பணத்தைக் கொடுக்காமல் மோசடி செய்துவருகிறார்.’’ - கடந்த சில மாதங்களாகவே இப்படியொரு `பகீர்’ குற்றச்சாட்டை அடிக்கடி கிளப்புகிறார் கேரளாவைச் சேர்ந்த ஷர்மிளா. இந்தநிலையில்தான், கரூர் மாவட்ட காவல்துறையில் ஷர்மீளாமீது மோசடி புகார் ஒன்று பதிவாகி, பரபரப்பை எகிறவைத்திருக்கிறது!

கேரளா மாநிலம், ஆலப்புழாவைச் சேர்ந்த ஷர்மிளாவும், அவரின் கணவர் ராஜீவும் தொழிலதிபர்கள். கடந்த 2020, ஜூலை மாதம் ஷர்மிளா பேசிய வீடியோவில் சுகாதாரத்துறை அமைச்சர் விஜயபாஸ்கரை குறிப்பிட்டு, ‘‘ஹை கமாண்ட் பெயரைச் சொல்லி அவர் முடித்துக் கொண்ட காரியங்கள் பற்றி எனக்குத் தெரியும். அவர் எவ்வளவு கீழ்த்தரமான மனிதர் என்பதை மக்கள் தெரிந்துகொள்ள வேண்டும்’’ என்று வெடித்திருந்தார்.

அரசியல் வட்டாரத்தில் அந்த வீடியோ அனலைக் கிளப்பிய நிலையில், சில வாரங்களிலேயே மற்றொரு வீடியோ வெளியானது. அதில் ஷர்மிளா, ‘‘விஜயபாஸ்கரும் நானும் நண்பர்கள். மருத்துவச் சிகிச்சைக்காக அவர் பலமுறை என் தரப்புக்கு உதவியிருக்கிறார். இதைத் தாண்டி எங்களுக்குள் எந்தத் தொடர்பும் இல்லை’’ என்று விளக்கம் கொடுத்தார். இதனால், இருவருக்கும் சமாதானம் ஏற்பட்டதாகக் கூறப்பட்ட நிலையில், டிசம்பர் 2020-ல் மீண்டும் விஜயபாஸ்கருக்கு எதிராகப் பேட்டி தரப்போகிறேன் என்று பரபரப்பை ஏற்படுத்தியவர், பிறகு ஏனோ அமைதியாகிவிட்டார்.

இந்தச் சூழலில்தான், சென்னை அயன்புரத்தைச் சேர்ந்த சிவகுமார் என்பவர் கரூர் மாவட்ட குற்றப்பிரிவில் புகார் ஒன்றை அளித்திருக்கிறார். 2020, அக்டோபர் 15-ம் தேதி பதியப்பட்டுள்ள அந்தப் புகாரில், ‘தமிழ்நாடு மின்சார வாரியத்தில் வேலை வாங்கித் தருவதாகக் கூறி என்னிடம்

25 லட்சம் ரூபாயை ஷர்மிளாகுமாரியும் அவர் கணவர் ராஜீவும் மோசடி செய்துவிட்டனர். இருவர் மீதும் நடவடிக்கை எடுத்து, பணத்தை மீட்டுத்தர வேண்டும்’ என்று குறிப்பிட்டிருக்கிறார். புகார் தொடர்பாகப் பேச சிவகுமாரைத் தொடர்பு கொண்டோம். ‘‘பயணத்தில் இருக்கிறேன், மீண்டும் பேசுகிறேன்’’ என்றவர், மீண்டும் நாம் தொடர்பு கொண்டபோது அழைப்பை ஏற்கவேயில்லை.

இந்தநிலையில்தான், சில நாள்களுக்கு முன்பு மேற்கண்ட புகார் தொடர்பாக விளக்கமளிக்க நேரில் ஆஜராகும்படி ஷர்மிளாவுக்கு நோட்டீஸ் அனுப்பியிருக்கிறது காவல்துறை. ஆனால், “இந்தப் புகாரே விஜயபாஸ்கரின் திட்டமிட்ட நாடகம்” என்கிறார் ஷர்மிளா. “இருவருக்குமிடையே என்னதான் நடக்கிறது?” என்று ஷர்மிளாவிடம் கேட்டோம்.

‘‘எனக்குச் சேர வேண்டிய பணத்தை விஜயபாஸ்கர் இதுவரை தரவில்லை. அவர் அமைச்சராக இருப்பதால், என்மீது பொய்யான புகாரைக் கிளப்பி என்னைக் கைதுசெய்ய வைத்துவிடுவார் என்று அஞ்சினேன். எனக்கும் என் குடும்பத்தினருக்கும் உயிர் அச்சுறுத்தல் இருப்பதால்தான், டிசம்பர் 2020-ல் நான் ஏற்பாடு செய்த பத்திரிகையாளர் சந்திப்பைக்கூட நடத்த முடியவில்லை. இந்தநிலையில்தான் என்மீது மோசடி புகார் பதியப்பட்டு நோட்டீஸ் வந்திருக்கிறது.

இது விஜயபாஸ்கரின் திட்டமிட்ட நாடகம். தேர்தல் நேரத்தில் நான் வாய் திறந்தால், அவருக்குப் பெரிய பாதிப்பை ஏற்படுத்தும் என்பதால், என்னை முடக்குவதற்கு இப்படி பொய்ப் புகாரைப் பதிவுசெய்ய வைத்திருக்கிறார். என்மீது புகார் அளித்திருக்கும் நபரை நான் சந்தித்ததே இல்லை’’ என்றவரிடம், ‘‘விஜயபாஸ்கரை மிரட்டி பணம் பறிக்க நீங்கள் முயல்வதாகக் கூறப்படுகிறது. உங்களுக்கும் விஜயபாஸ்கருக்கும் எந்தத் தொடர்பும் இல்லை என்று நீங்களே ஒரு வீடியோவில் சொல்லியிருந்தீர்களே?’’ என்று கேட்டோம்.

‘‘அவரை மிரட்டி பணம் பறிக்க வேண்டிய அவசியம் எனக்கில்லை. 2017, பிப்ரவரியில் என்னைத் தொடர்புகொண்ட விஜயபாஸ்கர், ஒரு பெரும் தொகையைக் குறிப்பிட்டு, ‘ஹை கமாண்ட் பணம் இது. இந்தப் பணத்துக்கு தங்கக்கட்டிகளை மாற்றித் தாருங்கள்’ என்றார். அவரை நம்பி தங்கக்கட்டிகளாக மாற்றிக் கொடுத்தேன். நான் கொடுத்த அந்தத் தங்கம்தான் கூவத்தூரில் அ.தி.மு.க எம்.எல்.ஏ-க்களுக்கு வழங்கப்பட்டது. முதல்வர் எடப்பாடி பழனிசாமியின் பெயரைச் சொல்லி என்னிடம் பல காரியங்களை அவர் சாதித்துக்கொண்டார். 17 கோடி ரூபாய் மதிப்புள்ள தங்கத்தை விஜயபாஸ்கரிடம் கொடுத்தேன். அதற்கான வங்கிப் பரிவர்த்தனைகள், ஆவணங்கள் எல்லாமே என்னிடம் இருக்கின்றன. இன்றுவரை அதற்கான பணம் எனக்கு வரவில்லை. அதற்காகத்தான் போராடுகிறேன்.

சேலத்திலிருக்கும் மருத்துவர் ஒருவர் என்னைச் சந்தித்து, ‘அமைச்சர் உங்களுக்கு விரைவில் செட்டில் செய்துவிடுவார்’ என்று சொல்லி, ‘விஜயபாஸ்கருக்கும் எனக்கும் நட்புரீதியாக மட்டுமே தொடர்பு இருப்பதாக’ என்னைக் கட்டாயப்படுத்திப் பேசவைத்து, வீடியோவும் எடுத்துக்கொண்டார். அதைவைத்துத்தான் எங்களுக்கு இடையே செட்டில்மென்ட் முடிந்துவிட்டதாகக் கூறுகிறார்கள். எனக்கு என் பணம் வேண்டும்’’ என்றார்.

ஷர்மிளாவின் புகார்கள் தொடர்பாக விளக்கமறிய அமைச்சர் சி.விஜயபாஸ்கரை பலமுறை தொடர்புகொண்டோம். அவர் பிஸியாக இருப்பதாக அவர் தரப்பிலிருந்து கூறப்பட்டது. அமைச்சர் பதிலளிக்கும்பட்சத்தில் அதை பிரசுரிக்கத் தயாராக இருக்கிறோம்.

சட்டமன்றத் தேர்தல், சசிகலாவின் தமிழக வருகை நெருங்கும் சூழலில், கூவத்தூரில் எம்.எல்.ஏ-க்களுக்கு தங்கக்கட்டிகள் கொடுக்கப்பட்டதாகவும், அதற்கு பெரும் தொகையை ‘ஹை கமாண்ட்’ பெயரைச் சொல்லி அமைச்சர் விஜயபாஸ்கர் அளித்ததாகவும் ஷர்மிளா கிளப்பியிருக்கும் பூதம், விஸ்வரூபம் எடுக்குமா அல்லது வழக்கம்போல ஜாடிக்குள் முடங்கிவிடுமா?