Published:Updated:

வீரமணியின் வில்லங்க சொத்துகள்!

வீரமணி
பிரீமியம் ஸ்டோரி
News
வீரமணி

அமைச்சரைச் சுற்றும் புகைச்சல்கள்...

தமிழகத்தைப் பொறுத்தவரை ஒவ்வொரு முறையும் ஆட்சி நிறைவடையும்போது ஊழல், மின்பற்றாக்குறை, ரெளடியிசம், பணப்புழக்கமின்மை எனக் குறிப்பிட்ட சில பிரச்னைகள் பூதாகரமாகும். அப்படி இந்த முறை பெரும் பூதமாகக் கிளம்பியிருக்கிறது அ.தி.மு.க அரசின் ஊழல் விவகாரங்கள். குறிப்பாக, அமைச்சர்கள் சிலர் வாங்கிக் குவித்த சொத்துகள் பல்வேறு மட்டங்களில் அதிர்ச்சியையும் அதிருப்தியையும் ஒருசேர ஏற்படுத்தியிருக்கின்றன.

அந்த வகையில் வணிகவரித்துறை மற்றும் பத்திரப்பதிவுத்துறை அமைச்சர் கே.சி.வீரமணி, அவரது வருமானத்துக்கு அதிகமாக சொத்துகளைக் குவித்ததாக புகார் எழுந்திருக்கிறது. தவிர, சொத்துகளின் மதிப்பைக் குறைத்துக்காட்டி பத்திரப்பதிவுத்துறையில் குறைவான தொகையைச் செலுத்தி, அரசுக்கு இழப்பை ஏற்படுத்தியிருப்பதாக எதிர்க்கட்சியினர் புகார்ப் பட்டியல் வாசிக்கிறார்கள்.

திருப்பத்தூர் மாவட்டம், ஜோலார்பேட்டை சட்டமன்றத் தொகுதியில் 2011-ம் வருட தேர்தலில் போட்டியிட்டு எம்.எல்.ஏ-வானார் வீரமணி. 2013-ம் ஆண்டு சுகாதாரத்துறை அமைச்சராகவும் அதைத் தொடர்ந்து பள்ளிக்கல்வித்துறை அமைச்சராகவும் பதவி வகித்தார். 2016-சட்டமன்றத் தேர்தலில் வெற்றிபெற்றவர், வணிகவரித்துறை மற்றும் பத்திரப்பதிவுத்துறை அமைச்சராகப் பதவியில் தொடர்கிறார். திருப்பத்தூர் அ.தி.மு.க மாவட்டச் செயலாளராகவும் இருக்கிறார்.

இந்தநிலையில்தான் வேலூரைச் சேர்ந்த தொழிலதிபர்கள் ராமமூர்த்தி, ஜெயப்பிரகாஷ் ஆகியோர், ‘அமைச்சர் வீரமணி வருமானத்துக்கு அதிகமாகச் சொத்து சேர்த்திருக்கிறார்’ என்று தமிழக லஞ்ச ஒழிப்புத்துறைக்கு புகார் அளித்துள்ளனர். இதைத் தொடர்ந்து, வீரமணி தேர்தல் ஆணையத்தில் தனது சொத்துகள் தொடர்பாக தாக்கல் செய்திருக்கும் ஆவணங்களைப் பார்வையிட்டோம்.

வீரமணியின் வில்லங்க சொத்துகள்!

பல மடங்கு அதிகரித்த சொத்து!

2011-ம் ஆண்டு அசையும் சொத்துகளின் மதிப்பு சுமார் 38,67,548 ரூபாய். இது, 2016-ல் 7,37,36,77 ரூபாயாக உயர்ந்திருக்கிறது. அதாவது, சொத்து மதிப்பு பல மடங்கு அதிகரித்திருக்கிறது.

2011-ம் ஆண்டு அசையா சொத்துகளின் மதிப்பு சுமார் 80,31,000 ரூபாய். இது, 2016-ல் 9,80,01,920 ரூபாயாக உயர்ந்திருக்கிறது. இது பல மடங்கு அதிகம்.

புதிதாக வாங்கப்பட்ட சொத்துகளின் பட்டியலைப் பார்த்தபோது, வீரமணி 2015-ல் பெங்களூரில் 2.16 கோடி ரூபாய்க்கு வீட்டுமனையை வாங்கியிருக்கிறார். அந்தக் கட்டடத்துக்கு அபிவிருத்திச் செலவாக 5 கோடி ரூபாயைச் செலவு செய்திருக்கிறார். 2016-ம் ஆண்டு தேர்தல் ஆணையத்துக்கு அவர் தாக்கல் செய்த மனுவில், அந்த வீட்டின் மதிப்பாக 7,11,04,680 ரூபாய் என்று குறிப்பிட்டிருக்கிறார். அதே மனுவில் 2013-ல் ஏலகிரியில் 5 லட்சம் ரூபாய்க்கு வீட்டுமனை, ஜோலார்பேட்டை பாலாஜி நகரில் 22 லட்ச ரூபாய் மதிப்பில் காலிமனை, திருப்பத்தூரில் ஹோட்டல், ஜோலார்பேட்டையில் திருமண மண்டபம் கட்டுவதற்கு 1.75 கோடி ரூபாய் செலவு செய்ததாகக் குறிப்பிட்டிருக்கிறார்.

இதையடுத்து, வீரமணியின் சொத்து விவரங்கள் பற்றிய விசாரணையில் இறங்கினோம். இது குறித்து நம்மிடம் பேசிய வேலூரைச் சேர்ந்த எதிர்க்கட்சியினர் சிலர், ‘‘வேலூர் பஸ் ஸ்டாண்ட் அருகில் ஆறு ஏக்கர் நிலம் தொடர்பான விவகாரத்தில் வீரமணி பிரச்னை செய்வதாக, சிலர் நீதிமன்றம் வரை ஆதாரங்களுடன் முறையிட்டுள்ளனர். வேலூர் பழைய ராஜா தியேட்டர் அருகே காலி மனை ஒன்றை 60 கோடி ரூபாய்க்கு விலை பேசி, 20 கோடி ரூபாயை அட்வான்ஸ் கொடுத்திருப்பதாகவும் சொல்லப்படுகிறது.

வீரமணியின் வில்லங்க சொத்துகள்!

ஓசூரில் ஃபைவ் ஸ்டார் ஹோட்டல் ஒன்றைக் கட்டிவருகிறார். சென்னை சாந்தோமில் வீடு, புழல் ஏரியாவில் குடோன் வாங்கியிருக்கிறார். திருப்பத்தூர் - வாணியம்பாடி ரூட்டில் ஒரு திருமண மண்டபத்தை விலைக்கு வாங்குவதற்குப் பேசிய தொகை ஒன்று; கொடுத்த தொகை வேறு. அந்தத் திருமண மண்டபத்துக்காரர் புலம்பித் தவிக்கிறார்.

2011-ம் வருட சட்டமன்றத் தேர்தலில் போட்டியிட்ட வீரமணி, தேர்தல் கமிஷனில் தாக்கல் செய்த மனுவில் 2010-11-ம் வருடத்தில் அவரது வருமானம் 2,09,000 ரூபாய் என்று குறிப்பிட்டிருக்கிறார். 2016-ம் ஆண்டு சட்டமன்றத் தேர்தலில் தாக்கல் செய்த மனுவில் 2015-16-ம் ஆண்டில் வருமானமாக 2,93,00,000 ரூபாயாகக் காட்டியிருக்கிறார். ஐந்தாண்டுகளில் அவரது வருமானம் பல மடங்கு கூடியிருக்கிறது. அமைச்சராக இருப்பவருக்கென்று வழிகாட்டு நெறிமுறைகள் உள்ளன. அந்த வகையில், அமைச்சரான பிறகு, அரசுக்குத் தகவல் தெரிவிக்காமல் பண ஆதாயம் பெறும் வேறு பதவிகளில் இருக்கக் கூடாது. இதையும் மீறியிருக்கிறார் வீரமணி’’ என்றவர்கள், அது பற்றியும் சொன்னார்கள்.

கல்லூரி
கல்லூரி

கைமாறிய நிறுவனம்!

‘‘2013-ல் சுகாதாரத்துறை அமைச்சரான பிறகு, ஓசூரில் `ஹோம் டிசைனர்ஸ் அண்ட் ஃபேப்ரிகேட்டர்ஸ் பிரைவேட் லிமிடெட்’ என்ற கம்பெனியின் பங்குகளை வாங்கி அதன் இயக்குநராகியிருக்கிறார். பங்குகளின் மதிப்பு 1,79,10,360 ரூபாய். இதைத் தனது முதலீடாக 2016 தேர்தல் அஃபிடவிட்டில் காட்டியிருக்கிறார். அந்த நிறுவன இயக்குநர் என்ற வகையில் 2015-16-ம் ஆண்டில் சம்பளமாக 24 லட்ச ரூபாய் வாங்கியதாகவும் அஃபிடவிட்டில் காட்டியிருக்கிறார். தனியார் நிறுவனத்தின் இயக்குநராக இருந்துகொண்டு, அமைச்சர் பதவிக்கான சம்பளத்தையும் இவர் எப்படிப் பெற முடியும்?

அதுமட்டுமல்ல... அதே நிறுவனத்தைச் சேர்ந்த நிகில் பிரசாத் என்பவருக்கு சுமார் மூன்றரைக் கோடி ரூபாய் கடனாகக் கொடுத்ததாகவும் அஃபிடவிட்டில் காட்டியிருக்கிறார். அத்துடன், இந்த நிறுவனத்துக்குத் தனது சொந்த வங்கிக் கணக்கிலிருந்து 90 லட்சம் ரூபாய் கடனாகக் கொடுத்ததாகவும் கணக்கு காட்டியிருக்கிறார். இந்த விவகாரங்களைச் சிலர் கிளப்பவே, 2019-ல் அந்த நிறுவனத்தின் இயக்குநர் பதவியிலிருந்து ராஜினாமா செய்துவிட்டார்.

விஷயம் என்னவென்றால், மேற்கண்ட நிறுவனத்தின் சுமார் 30 கோடி ரூபாய் மதிப்புள்ள இடத்தைக் குறிவைத்திருக்கிறார் வீரமணி. அந்த இடத்தில் ஸ்டார் ஹோட்டல் கட்டுவதுதான் அவரது திட்டம். இதை வெளிக்காட்டிக் கொள்ளாமல், அந்த நிறுவனத்தின் பங்குகளை வாங்கியிருக்கிறார். கூடுதலாக மகள் அகல்யா, சகோதரர் சிற்றரசு பெயர்களிலும் பங்குகளை வாங்கியிருக்கிறார். ஆக, நிறுவனம் வீரமணியின் கைக்கு வந்துவிட்டது. அங்குதான் தற்போது ஸ்டார் ஹோட்டலையும் கட்டிக்கொண்டிருக்கிறார். அதன் கட்டட மதிப்பு மட்டும் சுமார் 20 கோடி ரூபாய் இருக்கும் என்கிறார்கள்.

இவை தவிர வீரமணி தன் மாமனார், தாயார் பெயர்களிலும் நிலங்களை வாங்கியிருக்கிறார். 2015-ல் வீரமணியின் மாமனார் பழனி, தாயார் மணியம்மாள் இருவரும் கொத்தமாரிக்குப்பம், கார்க்கூர் ஆகிய கிராமங்களில் நிலங்களை வாங்குகிறார்கள். நிலத்துக்கு அவர்கள் குறிப்பிட்டுள்ள மதிப்பு 78 லட்சம் ரூபாய். அதே ஆண்டில், `எஸ்.ஆர்.எஸ் எஜுகேஷனல் அண்ட் சாரிட்டபிள் டிரஸ்ட்’டை ஆரம்பித்து, அந்த நிலங்களை டிரஸ்ட்டுக்கு நன்கொடையாக அளிக்கிறார்கள். 2017, பிப்ரவரி 1-ம் தேதி வீரமணி மேற்கண்ட டிரஸ்ட்டின் கூடுதல் டிரஸ்டி மற்றும் சேர்மன் அண்ட் எம்.டி பொறுப்புகளை ஏற்கிறார். அந்த இடத்தில் விவசாயக் கல்லூரி ஆரம்பிக்கப்படுகிறது.

ஆனால், அவருடைய மாமனாரும் தாயாரும் அந்த நிலங்களை வாங்கியதற்கான நிதி ஆதாரம் கிடையாது. பழனி 2015-16-ல் வருமானவரி தாக்கல் செய்த ஆவணத்தில் தனது வருமானமாக 12 லட்சம் ரூபாயை மட்டுமே காட்டியிருக்கிறார். அதேசமயம், அந்த நிலங்களை வாங்கியதையும் வருமானவரிக் கணக்கில் காட்டவில்லை. மணியம்மாளுக்கு ஐ.டி கணக்கே கிடையாது. ஏழைகளுக்கு உதவி செய்வதுதான் 80ஜி வருமானவரிச் சலுகை பெறப்பட்ட ஒரு டிரஸ்ட்டின் நோக்கமாக இருக்க வேண்டும். ஆனால், டிரஸ்ட்டுக்காக 2018, பிப்ரவரி 16-ம் தேதி திருப்பத்தூர் இந்தியன் வங்கிக் கிளையில் சிறு, குறுந்தொழில் கடன் திட்டத்தில் 15 கோடி ரூபாய் கடனாகப் பெற்றிருக்கிறார் வீரமணி. இதுவும் விதிமீறலே.

ஏலகிரியில் ஹோட்டல்!
ஏலகிரியில் ஹோட்டல்!

ஏலகிரியில் ஹோட்டல்!

இது மட்டுமல்ல... ஏலகிரி மலையில் 2015-ல் வீரமணி, அவரின் சகோதரி சுதாசுசீலன் பெயரில் 1.25 கோடி ரூபாய்க்கு ஒரு பிரபல ஹோட்டலை விலைக்கு வாங்குகிறார். 2018-ல் அதே ஹோட்டலை சகோதரியிடமிருந்து, தான செட்டில்மென்ட்டாக மீண்டும் பெற்றுக்கொள்கிறார் வீரமணி. அப்படிப் பெறும்போது அதன் மதிப்பு 3.10 கோடி என்று கணக்கு காட்டப்பட்டிருக்கிறது. ஆனால், 2016-17-ல் சுதாசுசீலன் தாக்கல் செய்திருக்கும் வருமான வரித்துறை ஆவணத்தில் 21,14,923 ரூபாய் மட்டுமே வருமானமாகக் காட்டப்பட்டிருக்கிறது. அப்படியிருக்க, அதற்கு முந்தைய ஆண்டில் ஒன்றே கால் கோடி ரூபாய் ஹோட்டலை அவர் எப்படி வாங்க முடியும்? இது தொடர்பான பத்திரப்பதிவு ஆவணத்திலும் ஹோட்டலின் கட்டட அளவு குறிப்பிடப்பட வில்லை. இதுவும் ஒரு விதிமீறல். அந்த விவரம் இல்லாமல் எப்படி ஜோலார்பேட்டை சார்பதிவாளர் அலுவலகத்தில் பதிவு செய்தார்கள்?

இன்னொரு விவகாரம்... மேற்கண்ட ஹோட்டலின் அருகில் காலி இடம் ஒன்று இருந்தது. அரசுப் பதிவேடுகளில் அந்த இடம் வீட்டுமனை என்று குறிப்பிடப்பட்டுள்ளது. அதன் சந்தை மதிப்பு சுமார் 7 கோடி ரூபாய். இதை 2016-ல் விவசாய நிலமாக மாற்றம் செய்து, 1.32 கோடி ரூபாய்க்கு அமைச்சரின் குடும்ப உறுப்பினர் மற்றும் நண்பர் என இருவரின் பெயருக்குப் பதிவு செய்கிறார்கள். இதற்கு முத்திரைத்தாள் மற்றும் அரசுப் பதிவுக் கட்டணமாக (11%) 77 லட்சம் ரூபாய் கட்ட வேண்டும். ஆனால், விவசாய நிலமாக மாற்றி, மதிப்பையும் குறைத்துக் காட்டியதால், சுமார் 15 லட்ச ரூபாய் மட்டுமே முத்திரைத்தாள் கட்டணமாகக் கட்டியிருக்கிறார்கள்’’ என்றார்கள்.

ம்ம்ம்... என்னவென்று சொல்ல? காமராஜரும் கக்கனும்தான் நினைவுக்கு வந்து போகிறார்கள்!

வீரமணியின் வில்லங்க சொத்துகள்!

10 வயதிலிருந்து வருமானவரி கட்டுகிறேன்!

கே.சி.வீரமணி மீதான குற்றச்சாட்டுகளுக்கு விளக்கம் கேட்டு அவரை நேரில் சந்தித்தோம்...

‘‘ஓசூரில் இயங்கக்கூடிய ‘ஹோம் டெக்கர்ஸ்’ என்ற நிறுவனத்திலிருந்து 2014-2015-ம் ஆண்டில் 24 லட்ச ரூபாய் சம்பளம் வாங்கியதாக ஒரு புகார் இருக்கிறது. அரசின் சம்பளம் பெறக்கூடிய ஓர் அமைச்சர் தனியார் நிறுவனத்திலிருந்து சம்பளம் பெறலாமா?’’

‘‘அரசியலில் 20 வருடங்களாகத்தானே இருக்கிறேன். விவரம் தெரிந்து 10 வயதிலிருந்தே வருமானவரி கட்டுகிறேன். என்னுடைய பிசினஸ் அது. சம்பளம் பெறுவது குறித்து அரசுக்கு முறைப்படி தெரியப்படுத்தியிருக்கிறேன்.’’

‘‘அதே ஹோம் டெக்கர்ஸ் நிறுவனத்தைச் சேர்ந்த நிகில் பிரசாத் என்பவருக்கு சுமார் மூன்றரை கோடி ரூபாய் கடனாக நீங்கள் வழங்கியிருப்பதாகக் கூறப்படுகிறது. அவ்வளவு பெரிய தொகை உங்களுக்கு எங்கிருந்து வந்தது?’’

‘‘ஆண்டுக்கு வருமானவரி மட்டுமே ஒன்றரைக் கோடி ரூபாய் கட்டுகிறேன். திடீரென்று வருமானவரி செலுத்துபவனிடம் இது போன்ற கேள்வியை எழுப்பலாம். புதிதாக பிசினஸ் தொடங்குபவர்களே ஆண்டுக்குப் பல நூறு கோடி வருமானம் ஈட்டுகிறார்கள். நான் பல ஆண்டுகளாக பிசினஸ் செய்கிறேன். அப்படியானால், எவ்வளவு வருவாய் கிடைக்கும் என்று கணக்கு போட்டுக்கொள்ளுங்கள்!’’

‘‘2011 சட்டமன்றத் தேர்தலில் போட்டியிட்டபோது உங்களிடம் இருந்த வருவாயைவிட 2016 சட்டமன்றத் தேர்தலின்போது வருமானம் பல மடங்கு பெருகியிருக்கிறது. அது எப்படிச் சாத்தியம்?

‘‘தேர்தல் நேரத்தில் என்னுடைய ஆட்கள் மனுவில் எதையாவது நிரப்பிக் கொடுத்திருப்பார்கள். அது பற்றி எனக்குத் தெரியவில்லை. அந்தக் காலத்திலிருந்தே வசதியான குடும்பத்தைச் சேர்ந்தவன். அரசியலுக்குள் வந்த நேரம் என்பதால், பழைய வருவாயைக் குறைத்துக் காட்டியிருக்கலாம்.’’

‘‘உங்கள் பெயரிலும், உங்களின் குடும்பத்தாரின் பெயரிலும் பல்வேறு ஊர்களில் பெருமளவில் முதலீடு செய்திருப்பதாகக் கூறப்படுகிறதே?”

‘‘ஜோலார்பேட்டை பாலாஜி நகரில் 22 லட்சம் ரூபாய் மதிப்புள்ள காலிமனை வாங்கியிருப்பதாகக் கூறுவது உண்மையில்லை. திருப்பத்தூரில் இருக்கிற ஹோட்டல் என்னுடைய பூர்வீகச் சொத்து. அப்பா கட்டியது. ஜோலார்பேட்டையில் அப்பா கட்டியிருந்த பழைய சினிமா தியேட்டரை இடித்துவிட்டு திருமண மண்டபம் கட்டினேன். அதற்கு 1.75 கோடி ரூபாய் செலவிட்டதாகக் கூறுவதும் தவறு. அன்றைக்கு இருந்த செலவு மதிப்பீட்டின்படி பார்த்தால் குறைந்தபட்சம் செலவானது. பெங்களூரில் வீட்டுமனை வாங்கி அபிவிருத்திச் செலவு செய்ததைக் கணக்கில் காட்டியிருக்கிறேன். இவ்வளவு நிதி ஆதாரத்துக்கும் என்னிடம் ஆவணங்கள் இருக்கின்றன.’’

‘‘பேரணாம்பட்டு பகுதியில் நீங்கள் நடத்திவரும் வேளாண் கல்லூரி அமைந்துள்ள 100 ஏக்கர் இடத்தின் மதிப்பையும் குறைத்து பதிவு செய்திருப்பதாகப் புகார் இருக்கிறது. கல்லூரி இடத்தை உங்கள் மாமனார் வாங்கியிருக்கிறார். பின்னர், நீங்கள் தலைவராக இருக்கும் ஓர் அறக்கட்டளைக்கு அவரே தானமாகக் கொடுத்திருக்கிறார். இந்த நிலத்தைக் காசு கொடுத்து வாங்கியதாகவோ, தானமாகக் கொடுத்ததாகவோ உங்கள் மாமனார் வருமானவரிக் கணக்கில் எந்த இடத்திலுமே காட்டவில்லை. ஏன்?’’

‘‘கரடுமுரடான மதிப்பில்லாத இடம் அது. நாற்பதாயிரம், ஐம்பதாயிரம் ரூபாய்க்கு ஒரு ஏக்கர் கிடைத்தது. நாங்கள் வாங்கி இடத்தை டெவலப் செய்தோம். இடத்தை தானமாகக் கொடுத்ததை வருமானவரிக் கணக்கிலும் மாமனார் காட்டியிருக்கிறார். அதிலெல்லாம் நாங்கள் சரியாக இருப்போம்.’’

‘‘ஏலகிரி மலையில் இருக்கிற உங்கள் ‘ஹில்ஸ்’ ஹோட்டலின் உண்மையான மதிப்பு 10 கோடி ரூபாயா? கட்டடத்தின் அளவுகள் குறிப்பிடாமல் பதிவு செய்யப்பட்டிருப்பதாகக் கூறப்படுகிறதே?’’

‘‘என் சகோதரி கட்டிய ஹோட்டல் அது. எங்களுக்குள் நீண்டகாலமாகவே கொடுக்கல் வாங்கல் இருந்தது. ஒரு விவகாரத்தில், ஹோட்டலை எனக்கு தானமாக எழுதிக் கொடுத்துவிட்டு லண்டன் சென்று செட்டிலாகி விட்டார். இப்போது, ஹோட்டலைப் புதுப்பித்திருக்கிறேன். கட்டட அளவுகளையும் சரியாகத்தான் காட்டியிருக்கிறோம். ஹோட்டலின் வழிகாட்டி மதிப்பு குறைவு. சந்தை மதிப்பு அதிகம். ஆனால், 10 கோடியெல்லாம் இல்லை.’’

‘‘ஹில்ஸ் ஹோட்டலை அடுத்துள்ள காலிமனையின் சந்தை மதிப்பு 7 கோடி ரூபாய் என்கிறார்கள். உங்களுக்குச் சொந்தமான வி.பி.ஆர்.ஹில்ஸ் குழுமம் அந்த இடத்தை விலைக்கு வாங்கி விவசாய நிலம் என்று பதிவு செய்ததாகக் கூறப்படுகிறதே?’’

‘‘அது, என்னுடைய குழுமம் இல்லை. ஏலகிரி மலையில் எனக்கு நிலம் இருக்கிறது. அவ்வளவுதான்.’’

வீரமணியின் வில்லங்க சொத்துகள்!
வீரமணியின் வில்லங்க சொத்துகள்!
வீரமணியின் வில்லங்க சொத்துகள்!
வீரமணியின் வில்லங்க சொத்துகள்!
வீரமணியின் வில்லங்க சொத்துகள்!
வீரமணியின் வில்லங்க சொத்துகள்!
வீரமணியின் வில்லங்க சொத்துகள்!