அராஜக கந்தன்... தயங்கும் அதிகாரிகள்... தடுப்பது யார்? - FOLLOW-UP

கடலூரில் சுனாமியால் பாதிக்கப்பட்ட மக்களுக்கு, பனங்காட்டு காலனியில் 16 வருடங்களுக்குப் பிறகே அரசு சார்பில் சுனாமி குடியிருப்பு வீடுகள் கட்டிக் கொடுக்கப்பட்டன. அதற்கும் ஒரு வீட்டுக்கு ரூ.30,000 முதல் ரூ.50,000 வரையில் லஞ்சம் பெற்றுக்கொண்டார், அமைச்சர் எம்.சி.சம்பத்தின் ஆதரவாளரும் முதுநகர் 36-வது வார்டு முன்னாள் கவுன்சிலருமான கந்தன். அதோடு, முழுப்பணத்தைக் கொடுக்காதவர்களின் வீடுகளுக்குப் பூட்டும்போட்டார். நாம் தலையிட்ட பிறகே பூட்டுகளைத் திறந்துவிட்டார். இது குறித்து 19.08.2020 தேதியிட்ட ஜூ.வி இதழில் ‘302 வீடுகள்... ரூ.86,10,000 லஞ்சம்...’ என்ற தலைப்பில் விரிவாக எழுதியிருந்தோம். . கட்டுரையின் முடிவில், ‘சுனாமியால் உறவுகளையும் உடைமைகளையும் இழந்து தவிக்கும் அப்பாவி மக்களைச் சுரண்டியதுடன், மிரட்டலையும் விடுத்திருக்கும் கந்தன்மீது மாவட்ட நிர்வாகமும் காவல்துறையும் ஏன் இன்னும் நடவடிக்கை எடுக்கவில்லை? இந்தத் தாமதமும் மௌனமும் சம்பந்தப்பட்ட துறை அதிகாரிகளின் மீதே நமக்குச் சந்தேகத்தை ஏற்படுத்துகிறது’ என்று குறிப்பிட்டிருந்தோம். அதிகாரிகளின் ஆமைவேகச் செயல்பாடு அந்தச் சந்தேகத்தை மேலும் அதிகரித்திருக்கிறது.

‘முறைகேட்டில் ஈடுபட்ட கந்தன்மீது உடனே நடவடிக்கை எடுக்க வேண்டும்’ என்று கடலூர் கலெக்டர் சந்திரசேகர் சாகமுரியிடம் சி.பி.எம் மாவட்டச் செயலாளர் டி.ஆறுமுகம் மனு அளித்திருக்கிறார். புகார்தாரர்களில் ஒருவரான சக்திவேல், அவரின் மனைவி லட்சுமி தேவி இருவரும் தனித்தனியே எஸ்.பி அலுவலகத்தில் ஆஜராகி புகாரளித்திருக்கிறார்கள். விஜயா, ராமேஸ்வரி என்ற இரு பயனாளர்கள் தாமாக முன்வந்து, ‘கந்தன் பணம் கேட்டு மிரட்டினார். பணம் தராததால் வீட்டுக்குப் பூட்டுப் போட்டார்’ என எஸ்.பி அலுவலகத்தில் எழுத்து மூலமாகத் தெரிவித்திருக்கிறார்கள். அதன் பிறகும் கந்தன் மீது நடவடிக்கை இல்லை.

. ‘‘குடிசை மாற்று வாரியத் தலைவருக்கு ரூ.25 லட்சம் கொடுத்தேன்’’ என்று புகார்தாரர் சக்திவேலை மிரட்டிய ஆடியோவில் கந்தன் கூறியிருந்தார். அதற்குப் பதிலளித்த குடிசை மாற்று வாரியத் தலைவர் ராஜேஷ் லகானி, ‘‘சுனாமி குடியிருப்பு விவகாரம் தொடர்பாக கடலூர் முதுநகர் காவல் நிலையத்தில் புகார் அளித்திருக்கிறோம்’’ என்று சொல்லியிருந்தார். ஆனால், 15.08.2020 அன்று கடலூர் குடிசை மாற்று வாரிய உதவி நிர்வாகப் பொறியாளர் ஜெயக்குமார் கொடுத்த புகாரின் அடிப்படையில் எழுதப்பட்ட மனு ரசீதில், கந்தன் பெயரைக் குறிப்பிடாமல், ‘பனங்காட்டு காலனி சுனாமி குடியிருப்பில் யாரோ சிலர் பணம் கேட்டு மிரட்டியிருக்கிறார்கள்’ என்று மட்டுமே குறிப்பிடப்பட்டிருக்கிறது. முதுநகர் காவல் நிலைய ஆய்வாளர் பால் சுதரைத் தொடர்புகொண்டபோது, ‘‘விசாரணை மேற்கொண்டுவருகிறோம்’’ என்று மட்டும் சொன்னார்.

மாவட்ட கலெக்டர் சந்திரசேகர் சாகமுரியைத் தொடர்புகொண்டபோது, ‘‘மாவட்ட எஸ்.பி விசாரணை மேற்கொண்டு வருகிறார்’’ என்றார். பலமுறை தொடர்புகொண்ட பிறகே நமது அழைப்பை ஏற்ற எஸ்.பி-யான அபிநவ், ‘‘குற்றப்பிரிவு போலீஸார் விசாரணை மேற்கொண்டுவருகின்றனர்’’ என்று ஒரே வரியில் முடித்துக்கொண்டார்.

குற்றப்பிரிவை அணுகியபோது, ‘சமூகநீதி மற்றும் மனித உரிமைப் பிரிவு’ வழக்கைக் கையாள்வதாகக் கூறினர். அதன் டி.எஸ்.பி-யான வெங்கடேசனைத் தொடர்புகொண்டோம். ‘‘கந்தன் மீதான குற்றச்சாட்டு உறுதியாகியிருப்பதால் தொடர் விசாரணை மேற்கொண்டுவருகிறோம். பலருக்கும் லஞ்சம் கொடுத்ததாக அவர் பேசிய ஆடியோவை ஆய்வுசெய்து வருகிறோம். உறுதியாக அவர்மீது நடவடிக்கை எடுக்கப்படும்’’ என்றார்.

அனைத்து ஆதாரங்களும் இருந்தும் கந்தன்மீது உடனடியாக நடவடிக்கை எடுக்கத் தயங்குவது ஏன்... தடுப்பது யார்?

- ஜெ.முருகன்

அராஜக கந்தன்... தயங்கும் அதிகாரிகள்... தடுப்பது யார்? - FOLLOW-UP

ஜெ.முருகன்Follow