Published:Updated:

தூத்துக்குடி:``தமிழகத்தை யாரும் பிரிக்க முடியாது;அதைப்பற்றிக் கவலைப்பட வேண்டிய அவசியமில்லை"-கனிமொழி

kanimozi
kanimozi

”தமிழகத்தை யாரும் பிரிக்க முடியாது. அதனால், அதைப்பற்றிக் கவலைப்பட வேண்டிய அவசியமில்லை” என, தூத்துக்குடியில் நடந்த சுதந்திரப் போராட்ட வீரர் அழகுமுத்துக்கோனின் பிறந்தநாள் விழாவில் கனிமொழி எம்பி தெரிவித்துள்ளார்.

இந்திய சுதந்திர போராட்ட வீரர், வீரன் அழகுமுத்துக்கோனின் 311-வது பிறந்தநாள் விழா, தூத்துக்குடி மாவட்டம் கோவில்பட்டி அருகேயுள்ள கட்டாலங்குளத்தில் உள்ள ’வீரன் அழகுமுத்துக்கோன்' மணிமண்டபத்தில் கொண்டாடப்பட்டது. மணிமண்டபத்திலுள்ள அவரது திருவுருவச்சிலைக்கு கனிமொழி எம்.பி, அமைச்சர்கள் கீதா ஜீவன், அனிதா ராதாகிருஷ்ணன், மாவட்ட ஆட்சியர் செந்தில்ராஜ், மாவட்ட எஸ்பி ஜெயக்குமார், சட்டமன்ற உறுப்பினர்கள் மார்க்கண்டேயன், ஊர்வசி அமிர்தராஜ், கட்டாலங்குளம் ஊராட்சி மன்ற தலைவர் தம்பா ஆகியோர் மாலை அணிவித்து மரியாதை செய்தனர்.

அழகுமுத்துக்கோன் சிலைக்கு மரியாதை
அழகுமுத்துக்கோன் சிலைக்கு மரியாதை

இதனைத் தொடர்ந்து செய்தியாளர்களிடம் பேசிய கனிமொழி எம்.பி., ”இந்த மண் மற்றும் மண்ணின் பெருமைகளை பாதுகாப்பதற்காக தன் இன்னுயிரைத் தந்த சுதந்திர போராட்ட வீரர்களின் பெருமைகளை தமிழக முதல்வர் ஸ்டாலின் தலைமையிலான ஆட்சியில் தொடர்ந்து காப்பாற்றும்.

தமிழ் மண்ணின் பெருமைகளை எந்த காலகட்டத்திலும் இந்த ஆட்சி விட்டுக் கொடுக்காது. நம்முடைய பெருமை மற்றும் உரிமைகளுக்காக திமுக ஆட்சி தொடர்ந்து போராடும். தமிழகத்தை யாரும் பிரிக்க முடியாது. அந்தக் கனவு எல்லாம் நிறைவேறாது. ஆகையால் கவலைப்பட வேண்டிய அவசியமில்லை.

அழகுமுத்துக்கோன் சிலைக்கு மரியாதை
அழகுமுத்துக்கோன் சிலைக்கு மரியாதை

அரசியல் சட்டத்தில் மத்திய அரசை, ஒன்றிய அரசு என்றுதான் குறிப்பிடப்பட்டுள்ளது. ஆகையால், ஒன்றிய அரசு என்று கூறுவது தவறும் இல்லை, ‌நாட்டுக்கு எதிரான ஒன்றுமில்லை.தமிழகம் பாதுகாப்பான ஆட்சியின் கீழ் இன்று இருக்கிறது.ஆகையால் தமிழகத்தைப் பற்றிக் கவலைப்பட வேண்டிய அவசியமில்லை” என்றார்.

அடுத்த கட்டுரைக்கு