Published:Updated:

கடலில் மீன் பிடிக்கப்போகும் ராகுல் காந்தி - தேங்காய்ப்பட்டணத்தில் ஒன்றரைக் கோடியில் தயாராகும் படகு!

ராகுல் காந்தி கடலுக்குச் செல்லத் தயாராகும் படகு
ராகுல் காந்தி கடலுக்குச் செல்லத் தயாராகும் படகு

வரும் மார்ச் 1-ம் தேதி கன்னியாகுமரி மாவட்டத்துக்கு வருகை தரும் ராகுல் காந்தியை தேங்காய்ப்பட்டணம் துறைமுகத்திலிருந்து கடலுக்கு மீன்பிடிக்க அழைத்துச் செல்ல புதிய விசைப்படகு தயாராகிவருகிறது.

தமிழகத்தில் சட்டசபைத் தேர்தல் நெருங்குவதை ஒட்டி காங்கிரஸ் முன்னாள் தலைவரும், எம்.பி-யுமான ராகுல் காந்தி அடிக்கடி வந்து பிரசாரம் செய்துவருகிறார். ஏற்கெனவே தமிழகம் வந்த ராகுல் காந்தி கோவையை மையமாகவைத்து ஐந்து மாவட்டங்களில் பிரசாரம் மேற்கொண்டார். அப்போது கரூர் மாவட்டத்தில் மாட்டுவண்டியில் பயணம் செய்ததுடன், வில்லேஜ் குக்கிங் சமையல் நிகழ்ச்சியில் கலந்துகொண்டு காளான் பிரியாணி சமைக்க உதவியதுடன், அவர்களுடன் சேர்ந்து ஓலைப்பாயில் அமர்ந்து சாப்பிடவும் செய்தார்.

அதன் பிறகு புதுச்சேரி பிரசாரத்துக்குச் சென்ற ராகுல் காந்தி மீனவ மக்களுடன் கலந்துரையாடினார். அந்தச் சமயத்தில் அடுத்த முறை தென்மாநில விசிட்டின்போது கடலில் மீன் பிடிக்கப்போவதாகக் கூறியிருக்கிறார். இதையடுத்து வரும் மார்ச் 1-ம் தேதி கன்னியாகுமரி மாவட்டத்துக்கு வருகை தரும் ராகுல் காந்தியை தேங்காய்ப்பட்டணம் துறைமுகத்திலிருந்து கடலுக்கு மீன்பிடிக்க அழைத்துச் செல்ல புதிய விசைப்படகு தயாராகிவருகிறது. இதற்காக சுமார் 120 அடி நீளம்கொண்ட புதிய ஆழ்கடல் மீன்பிடி படகு தாராகிவருகிறது. இந்தப் புதிய படகின் விலை ஒன்றரைக் கோடி ரூபாய் என்ற தகவல் வெளியாகியிருக்கிறது. இதற்கான ஏற்பாடுகளை தேங்காய்ப்பட்டணத்தைச் சேர்ந்த தமிழ்நாடு காங்கிரஸ் கமிட்டி செயலாளர் ஜார்ஜ் ராபின்சன் செய்துவருகிறார்.

ஜார்ஜ் ராபின்சன்
ஜார்ஜ் ராபின்சன்

இது குறித்து ஜார்ஜ் ராபின்சன் கூறுகையில்,``சென்னைக்கு அடுத்தபடியாக மீனவர்கள் நெருக்கமாக வாழுறது கன்னியாகுமரி மாவட்டத்துலதான். அதுவும் தேங்காய்ப்பட்டணம் மீன்பிடித் துறைமுகப் பகுதியைச் சுற்றியிருக்கிற கடலோர கிராமங்களைச் சேர்ந்த மீனவர்கள் ஆழ்கடல் தூண்டில் மீன்பிடித் தொழிலில் கைதேர்ந்தவங்க. இங்க இருக்குற மீன்தான் அதிக அளவுல வெளிநாடுகளுக்கு ஏற்றுமதியாகி, அந்நியச் செலவாணியை ஈட்டித்தருது.

மன்னித்துவிட்டேன்... ராகுல் உணர்வுபூர்வ பேச்சும் பின்புலமும் - ஒரு பார்வை!

அதனால மீனவர்கள் பிரச்னை பத்தி ராகுல் காந்தி தெரிஞ்சுக்கவும், தேங்காப்பட்டணம் மீன்பிடித் துறைமுகத்தை அதிகாரிங்க சரியா அமைக்காததுனால அடிக்கடி விபத்து ஏற்படுறது பத்தி தலைவர் ராகுல் காந்திக்கு தெரியப்படுத்தவும் இருக்கிறோம். அதுமட்டுமில்லாம காமராஜர் முதலமைச்சரா இருந்த சமயத்தில மீன்வளத்துறை அமைச்சரா கன்னியாகுமரி மாவட்டத்தைச் சேர்ந்த லூர்தம்மாள் சைமன் இருந்தாங்க. அவங்கதான் மீனவர்களுக்கு விசைப்படகை அறிமுகப்படுத்தினாங்க.

வில்லேஜ் குக்கிங் சேனல் டீமுடன் ராகுல் காந்தி
வில்லேஜ் குக்கிங் சேனல் டீமுடன் ராகுல் காந்தி

காங்கிரஸ் கட்சிதான் அப்பவே மீனவர்களுக்கு ரொம்ப முக்கியத்துவம் கொடுத்தது. அதுபோல இப்பவும் மீனவர்களுக்கு சீட் கொடுக்கணும்னு கோரிக்கைவெப்போம். தேங்காப்பட்டணத்துக்கு வரும் ராகுல் காந்தி மீன் பிடிக்கிறதுக்காக எங்ககூட கடலுக்கு வர இருக்கிறாரு. அவர் கடல்ல வந்து மீன் பிடிக்கிறதுக்காக குளச்சலைச் சேர்ந்த என் நண்பருடைய புதிய விசைப்படகைத் தயார் செஞ்சிருக்கிறோம்" என்றார்.

அடுத்த கட்டுரைக்கு