Published:Updated:

`தமிழகத்தின் தலையெழுத்தை மாற்ற வேண்டிய நாள் வந்தாச்சு!’ - ரஜினி

ரஜினிகாந்த்
ரஜினிகாந்த் ( தே.அசோக்குமார் )

`இந்தப் பாதையில் வெற்றியடைவேன் என்று எனக்கு நம்பிக்கை இருக்கிறது. தமிழகத்தின் தலையெழுத்தை மாற்ற வேண்டிய நாள் வந்தாச்சு. அரசியல் மாற்றம்; ஆட்சி மாற்றம் வேண்டும். இப்ப இல்லைன்னா... எப்பவும் இல்லை.’

ஜனவரியில் கட்சி தொடங்குவதாக நடிகர் ரஜினிகாந்த் அறிவித்திருக்கிறார். இது தொடர்பாக டிசம்பர் 31-ம் தேதி அறிவிக்கப்படும் என்றும் அவர் தெரிவித்திருக்கிறார். சென்னை ராகவேந்திரா மண்டபத்தில், கடந்த 2017-ம் ஆண்டு டிசம்பர் 31-ம் தேதி ரசிகர்களைச் சந்தித்த ரஜினி, `நான் அரசியலுக்கு வருவது உறுதி’ என்று தெரிவித்திருந்தார். அதற்குப் பின்னர் சரியாக மூன்று ஆண்டுகள் கழித்து 2020, டிசம்பர் 31-ம் தேதி, தனது புதிய கட்சி குறித்த அறிவிப்பை ரஜினி வெளியிடவிருக்கிறார்.

புதிய கட்சி குறித்து ட்விட்டரில் பதிவிட்டிருந்த ரஜினி, ``ஜனவரியில் கட்சித் துவக்கம், டிசம்பர் 31-ல் தேதி அறிவிப்பு. #மாத்துவோம்_எல்லாத்தையும்_மாத்துவோம் #இப்போ_இல்லேன்னா_எப்பவும்_இல்ல.

வரப்போகிற சட்ட மன்றத் தேர்தலில், மக்களுடைய பேராதரவுடன் வெற்றிபெற்று, தமிழகத்தில் நேர்மையான, நாணயமான, வெளிப்படையான, சாதி, மதச்சார்பற்ற ஆன்மிக அரசியல் உருவாகுவது நிச்சயம்.

அற்புதம்... அதிசயம்... நிகழும் !!!’’ என்று தெரிவித்திருந்தார்.

`இப்போ இல்லேன்னா எப்பவும் இல்ல; ஜனவரியில் கட்சி தொடக்கம்!’ - ரஜினி அறிவிப்பு

இந்தநிலையில், சென்னை போயஸ் கார்டன் இல்லத்தில் செய்தியாளர்களைச் சந்தித்துப் பேசினார் ரஜினி. அவர் கூறுகையில், `` `நான் அரசியலுக்கு வருவேன்’ என்று 2017-ம் ஆண்டு டிசம்பரிலேயே சொல்லியிருந்தேன். உள்ளாட்சித் தேர்தல், நாடாளுமன்றத் தேர்தலில் போட்டியிடவில்லை. சட்டமன்றத் தேர்தலுக்கு முன்னதாக கட்சியைத் தொடங்கி தேர்தலில் போட்டியிடுவேன் என்று சொல்லியிருந்தேன்.

அதற்குப் பின்னர் சென்னை லீலா பேலஸ் ஹோட்டலில் உங்களையெல்லாம் சந்தித்து, மக்களிடம் எழுச்சி வர வேண்டும் என்று கூறினேன். தமிழகம் முழுவதும் சுற்றுப்பயணம் செய்யத் திட்டமிட்டிருந்தேன். கொரோனா காலத்தில் அது முடியாமல் போனது. தமிழக மக்களுக்காக எனது உயிரே போனாலும் சந்தோஷப்படுவேன்.

ரஜினி
ரஜினி

ஓர் அரசியல் மாற்றம் ரொம்ப கட்டாயம். அது காலத்தின் தேவை. அது இப்போ இல்லைன்னா... எப்பவும் கிடையாது. எல்லாத்தையும் மாத்தணும். நான் சொன்ன சொல் எப்போதும் தவறியதில்லை. நான் ஒரு கருவிதான். நான் அரசியலுக்கு வருகிறேன். நான் வெற்றி பெற்றாலும், அது மக்களின் வெற்றிதான். தோல்வியடைந்தாலும் அதுவும் மக்களின் தோல்விதான். இந்த மாற்றத்துக்கு நீங்க எல்லாரும் துணையா நிக்கணும். `அண்ணாத்த’ ஷூட்டிங் இன்னும் 40 சதவிகிதம் இருக்கிறது. அதை முடித்துக்கொடுப்பது கடமை.

கட்சி தொடங்குவது ராட்சத வேலை. கட்சி தொடங்குவதற்கு அவ்வளவு வேலைகள் இருக்கின்றன. இந்தப் பாதையில் வெற்றியடைவேன் என்று எனக்கு நம்பிக்கை இருக்கிறது. தமிழகத்தின் தலையெழுத்தை மாற்ற வேண்டிய நாள் வந்தாச்சு. அரசியல் மாற்றம்; ஆட்சி மாற்றம் வேண்டும். இப்ப இல்லைன்னா.. எப்பவும் இல்லை’’ என்றார்.

அரசியல் கட்சி... ஜனவரியில் விவரங்கள் அறிவிப்பா? - எதிர்பார்ப்பில் ரஜினி மக்கள் மன்ற நிர்வாகிகள்

ரஜினியின் செய்தியாளர் சந்திப்பின்போது காந்திய மக்கள் இயக்கத்தின் தமிழருவி மணியன், மூர்த்தி ஆகியோர் உடனிருந்தனர். கட்சியின் மேற்பார்வையாளராக தமிழருவி மணியனையும், தலைமை ஒருங்கிணைப்பாளராக அர்ஜூன மூர்த்தியையும் ரஜினி நியமித்திருக்கிறார்.

ரஜினி
ரஜினி

புதிய அரசியல் கட்சி தொடங்குவதாக ரஜினி அறிவித்ததை அடுத்து, அவரது ரசிகர்கள் தமிழகம் முழுவதும் பட்டாசுகள் வெடித்தும், இனிப்புகள் கொடுத்தும் கொண்டாடிவருகிறார்கள்.

அடுத்த கட்டுரைக்கு