மீண்டும் போயஸ்கார்டனில் சசிகலா!

‘`சி றையில் நான்கு ஆண்டுகள் ஏ.சி-யே இல்லாமல் இருந்து பழகிவிட்டேன். இப்போது ஏ.சி உடம்புக்கு ஒப்புக்கொள்ளவில்லை” என்று தனது உறவுகளிடம் சொல்லி வருத்தப்பட்டுள்ளார் சசிகலா. பெங்களூரு டு சென்னை வரை பிரமாண்ட வரவேற்பு, 23 மணி நேர நீண்ட பயணம் என்று தண்டனை முடிந்துவந்த சசிகலாவின் தமிழக என்ட்ரியை மாஸாகக் காட்டினார்கள் டி.டி.வி.தினகரன் தரப்பினர். அந்த முதல்நாள் வரவேற்புக்குப் பிறகு சசிகலா பற்றித் தகவலே இல்லை. என்ன செய்கிறார் சசிகலா? . சென்னைக்கு வந்த சசிகலா, தி.நகர் ஹபிபுல்லா சாலையில் அவருக்காக பிரத்யேகமாகத் தயார்செய்யப்பட்ட இல்லத்தில் கடந்த ஒரு வாரமாக ஓய்வில் இருந்துவருகிறார். சசிகலாவின் இந்த ஓய்வுக்காலம் எப்படிச் செல்கிறது? அவரது குடும்ப உறவுகளிடம் விசாரித்தோம். “இளவரசியின் மகள் கிருஷ்ணப்ரியாவின் வீட்டிற்கு அருகில்தான் சசிகலா இப்போது தங்கியுள்ளார். சசிகலாவிற்கு ஏற்கெனவே போயஸ் கார்டன் வேதா இல்லத்திற்கு எதிரே பிரமாண்ட பங்களா தயாராகிவருகிறது. அந்தப் பணிகள் முடிவடையும்வரை மட்டுமே இந்த வீட்டில் வசிக்கவிருக்கிறார். சசிகலா இந்த வீட்டிற்கு வருவதற்கு ஒருநாள் முன்பே இளவரசி வந்துவிட்டார். சசிகலாவிற்கு முழுநேரமும் இந்த வீட்டில் உதவியாக இருப்பது இளவரசி மட்டுமே. அருகில் உள்ள வீட்டில் கிருஷ்ணப்ரியா இருப்பதால், அடிக்கடி சசிகலாவையும் இளவரசியையும் வந்து பார்த்துச்செல்கிறார்.

இந்த வீட்டிற்கு இரண்டு தெரு தள்ளி இளவரசியின் இரண்டாவது மகள் ஷகிலா வசித்துவருகிறார். அவரும் அடிக்கடி இங்கு வந்துவிடுகிறார்.கொரோனா நோய்த் தாக்கத்திலிருந்து மீண்டு வந்திருப்பதால், அவருக்கு சத்தான உணவுப்பொருள்களாகக் கொடுக்கிறார்களாம். காலையில் சூப், மதியம் பழங்கள் என்று நீண்ட மெனு போட்டு உணவுகள் தயாராகின்றன. வெரைட்டியான அசைவ விருந்துகளும் உண்டாம்.

. சசிகலா மற்றும் இளவரசி ஆகியோர் பயன்படுத்திய பொருள்கள் எல்லாம் போயஸ் கார்டனில் இருந்தன. இப்போது போயஸ் கார்டன் வீடு அரசுடைமையாக்கப்பட்டுவிட்டது. எனவே, அவர்களின் பொருள்களை எடுக்கமுடியவில்லை. சிறையிலிருந்து திரும்பிய இருவருக்குமான உடைகளைப் புதியதாக இப்போது வாங்கிவருகிறார்களாம். சசிகலா உடுத்தும் புடவைகள் பெரும்பாலானவை ஒரு குறிப்பிட்ட ஜவுளி ஷோரூமில்தான் எடுக்கப்படும். இப்போது அங்கே புடவைகளை ஆர்டர் செய்து வீட்டிற்குக் கொண்டுவரச் சொல்லிவிடுகிறார்கள்.

இளவரசியின் மகன் விவேக்கின் மகள் ஆராத்யாவுக்கு சசிகலா சிறையிலிருந்து சென்னை திரும்பிய நாள்தான் இரண்டாவது பிறந்தநாள். பேத்திதான் இப்போது இளவரசிக்கு உற்சாக டானிக்.

ஆரம்பத்தில் இரண்டு நாள்கள் சசிகலாவைச் சுற்றி இளவரசியின் உறவுகளே வட்டமிட்டிருந்தனர். இளவரசியின் அண்ணன் வடுகநாதனே சசிகலாவை சந்திக்க வீட்டிற்கு வந்தவர்களுக்கு பதில் அளித்துவந்தார். சசிகலாவிற்கு நெருக்கமான நட்புகள் சிலர் மட்டுமே கடந்த ஒரு வாரத்தில் சசிகலாவை சந்தித்துள்ளார்கள். அரசியல் ரீதியாக எந்த சந்திப்பையும் சசிகலா வைத்துக்கொள்ளவில்லை. வந்திருப்பவர்களைப் பற்றி, வரவேற்பறையில் உள்ள இன்டர்காம் மூலம் சசிகலாவின் அறைக்குத் தகவல் சொல்லப்படுகிறது. சசிகலாவின் அறையில் இளவரசியும் இருப்பதால், பெரும்பாலும் இளவரசியே இன்டர்காமையும் எடுக்கிறார். அவர் சசிகலாவிடம் ஒப்புதல் வாங்கிய பிறகு சசிகலாவின் அறைக்கு விருந்தினர்களை அழைத்துச்செல்கிறார்கள்.

இளவரசி குடும்பத்திற்கும், தினகரனுக்கும் ஏழாம் பொருத்தம் என்பதால், இங்கு வந்தபிறகு அரிதாகவே சசிகலாவை சந்திக்கிறார் தினகரன். சசிகலாவின் கணவர் நடராசனின் தம்பி எம்.ராமச்சந்திரன், சசிகலாவை சிறையிலிருந்தபோதே அடிக்கடி சந்தித்தவர். சென்னை திரும்பிய பிறகும் தவறாமல் அவர் சந்தித்துவருகிறார்.

நடராசனின் சொத்துகளை சசிகலாவிடம் ஒப்படைக்க ராமச்சந்திரன் முடிவெடுத்துள்ளார். விரைவில் தஞ்சாவூர் வரும் சசிகலாவை நடராசனின் உறவுகள் தனியாக சந்தித்துப் பேசவிருக்கிறார்கள். அப்போது நடராசன் பெயரில் உள்ள சொத்துகளை மாற்றிக்கொடுக்கும் பணிகள் நடக்கலாம் என்கிறார்கள். சசிகலா பெரிதாக அதில் ஆர்வம் காட்டவில்லையாம்.

சசிகலாவிற்கு நம்பிக்கைக்குரிய நபராக இருந்தவர் அவருடைய தம்பி திவாகரன். ஆனால், கடந்த சில ஆண்டுகளாகவே இருவருக்கும் இடையே மனக்கசப்பு அதிகரித்திருப்பதால், சசிகலாவை இதுவரை சந்திக்காமல் மன்னார்குடியிலேயே இருக்கிறார் திவாகரன். சசிகலாவின் உறவுகளில் இன்னும் சிலரும், அவர் போயஸ் கார்டன் வீட்டிற்குப் போனதும் பார்க்கலாம் எனக் காத்திருக்கின்றனர்.

ஜெயலலிதா பிறந்த நாளான பிப்ரவரி 24-ம் தேதிக்குப் பிறகு சசிகலா தமிழகம் முழுக்க சுற்றுப்பயணத்தைத் தொடங்கும் திட்டத்தில் இருக்கிறார். முதலில் நடராசனின் குலதெய்வக் கோயிலுக்குச் சென்றுவிட்டு, பிறகு பசும்பொன்னில் உள்ள தேவர் நினைவிடத்திற்குச் செல்வாராம். அதன்பின் அவர் செய்யப்போகும் அரசியல் பயணம்தான், அவரது எதிர்காலத்தைத் தீர்மானிக்கும்.

மீண்டும் போயஸ்கார்டனில் சசிகலா!

அ.சையது அபுதாஹிர்Follow